UJohane 15:13—“Kakho Olothando Olukhulu Kulalolu”

“Kakho olothando olwedlula lolu, ukuthi umuntu anikele ngempilo yakhe ngenxa yabangane bakhe.”—UJohane 15:13, INguqulo Yomhlaba Omutsha.

“Kakho olothando olukhulu kulalolu, lokuthi umuntu ababekele phansi abangane bakhe impilo yakhe.”—UJohane 15:13, TBS.

Okutshiwo nguJohane 15:13

UJesu wayencedisa abalandeli bakhe ukuthi bazwisise ukuthi uthando lwabo kumele lube lukhulu okokuthi bayazimisela ukufela abanye.

Engakakhulumi amazwi evesi le wayetshele abaphostoli bakhe wathi: “Nanku umlayo engilinika wona: Thandanani njengoba nje lami ngilithandile.” (UJohane 15:12) Uthando lukaJesu lwalunjani? Wayeqakathekisa okwakufunwa ngabalandeli bakhe futhi ezinikela ukubenzela izinto ngoba ebathanda. Ngesikhathi esenza inkonzo yakhe emhlabeni watshengisa ukuthi wayebathanda kakhulu abalandeli bakhe kanye labanye abantu nje. Welapha abantu imikhuhlane etshiyeneyo, wabafundisa ngoMbuso kaNkulunkulu.a Wenza lemisebenzi eyayikhangelelwa phansi ukuze ancede abanye. (UMathewu 9:35; ULukha 22:27; UJohane 13:3-5) Kodwa kuJohane 15:13 uJesu wayekhuluma ngothando olukhulu ukwedlula lolo. Ngemva kwamahola athile ekhulume amazwi lawo, watshengisa ukuthi wayelothando olunjalo ngokunikela ‘ngempilo yakhe ukuze ibe yinhlawulo yabanengi.’ (UMathewu 20:28; 22:39) Yikho wakwenza kwacaca ukuthi wayethanda abanye ukwedlula indlela ayezithanda ngayo.

UJesu uyabathanda abantu bonke. Kodwa abathanda kakhulu yilabo abalandela lokho akufundisayo. Abafundi bakhe wayebabona bengabangane bakhe ngoba babelalela ayebafundisa khona futhi abazange bamlahle ngesikhathi esebunzimeni. (ULukha 22:28; UJohane 15:14, 15) Ngakho wayelesizatho esikhulu sokuthi anikele ukuphila kwakhe ngenxa yabo.

AmaKhristu okuqala ayewalalela amazwi akhulunywa nguJesu futhi ayezimisela ukufela abanye. (1 UJohane 3:16) Lalamuhla amaKhristu eqiniso aziwa ngokuba lothando olunjengolukaKhristu.—UJohane 13:34, 35.

Amanye amavesi asinceda sizwisise uJohane 15:13

Isahluko 13 kusiya ku-17 seVangeli likaJohane silamazwi uJesu avalelisa ngawo abaphostoli bakhe abangu-11 ababethembekile kanye lomthandazo wakhe wokucina elabo. Wafa ngemva kwamahola athile ekwenzile lokhu. Kusahluko 15 uJesu wafanisa abafundi bakhe lengatsha zesihlahla samagilebisi ezithela izithelo ukuze abatshengise ukuthi kwakumele bahlale bemunye laye. Lokhu kwakuzakwenza kukhanye ukuthi bangabalandeli bakhe beqiniso. Wabakhuthaza ukuthi ‘baqhubeke bethela izithelo ezinengi.’ (UJohane 15:1-5, 8) Enye indlela ababengathela ngayo izithelo yikutshumayela “izindaba ezinhle zoMbuso kaNkulunkulu” betshengisa ukuthi balothando olunjengolukaJesu—ULukha 4:43; UJohane 15:10, 17.

Bukela ividiyo le emfitshane ukuze ubone okumunyethwe libhuku likaJohane.