Kwabase-Efesu 3:20—‘Yena UNkulunkulu Ulamandla Okwenza Okukhulu Kakhulu Ukwedlula Konke Esikucelayo Lesikunakanayo’

“Yena uyenelisa ukwenza izinto ezinkulu kakhulu ukwedlula lezo esizicelayo kumbe esizicabangayo, ezenza ngamandla akhe asebenza kithi. Ngakho kumele akhazinyuliswe.”—Kwabase-Efesu 3:20, 21, INguqulo Yomhlaba Omutsha.

“Ngakhoke yena olamandla okwenza okukhulu kakhulu ukwedlula konke esikucelayo lesikunakanayo ngamandla akhe asebenza kithi, kakube kuye udumo.”—Kwabase-Efesu 3:20, 21, The Holy Bible in Ndebele.

Okutshiwo ngu-Efesu 3:20

Umphostoli uPhawuli wayengakuthandabuzi ukuthi uNkulunkulu uyenelisa ukuphendula imithandazo yalabo abamkhonzayo lokubenzela konke abakufisayo. Ngezinye izikhathi ubaphendula ngendlela edlula lokho abayabe bekukhangelele.

‘Yena uyenelisa ukwenza izinto ezinkulu kakhulu, ezenza ngamandla akhe asebenza kithi.’ Uvesi 21 uveza ukuthi okukhulunywa ngaye lapha nguJehova uNkulunkulu.a Evesini le uPhawuli wathi: “Kumele akhazinyuliswe ngebandla langoKhristu uJesu.” Ngakho uNkulunkulu angasinika amandla ukuze senelise ukwenza intando yakhe.—KwabaseFiliphi 4:13.

Kuvesi 20 umphostoli uPhawuli uveza umcijo oqakathekileyo omayelana lokuthi uJehova uyenelisa ukunceda labo abamkhonzayo. Elinye ibhuku elichasisa iBhayibhili lathi umutsho ohunyutshwe ngokuthi “yena uyenelisa” awutsho ukuthi “uNkulunkulu uyenelisa ukwenza into ethile kuphela loba ukuthi engxenye angayenza, kodwa utsho ukuthi ulamandla okuyenza njalo uzayenza.” Ngokwesibonelo, umngane engabe efisa sibili ukukwenzela into ethile kodwa ngezinye izikhathi angehluleka. UJehova yena uyenelisa ukubenzela loba yini labo abakhonzayo ukuze aphendule imithandazo yabo. Nguye yedwa olamandla amakhulu futhi ongehlulwa yilutho.—U-Isaya 40:26.

“[UNkulunkulu] uyenelisa ukwenza izinto ezinkulu kakhulu ukwedlula lezo esizicelayo kumbe esizicabangayo.” UJehova kacini ngokwenzela abantu bakhe izinto ezinkulu loba “ezinkulu kakhulu” kodwa uphinda abancedise ngezindlela abayabe bengazikhangelelanga.

Umutsho othi “ukwedlula lezo esizicelayo kumbe esizicabangayo” usitshela enye into eqakathekileyo. UPhawuli wasebenzisa amazwi la ukuze ancede amaKhristu azwisise ukuthi uNkulunkulu uyenelisa ukuwancedisa ngendlela angayikhangelelanga. IBhayibhili okuthiwa yi-New International Version liqalisa uvesi 20 ngamazwi athi: “Kuye lowo ongenza okukhulu kakhulu kulalokho esikucelayo kumbe esikucabangayo.” Ngezinye izikhathi amaKhristu angacabanga ukuthi inhlupho zawo zinkulu kakhulu okokuthi angaswela lokuthi abambe ngaphi. Amanye ayaswela lokuthi vele athandazeleni. Kodwa uJehova uyabuzwisisa ubunzima aphakathi kwabo njalo uyenelisa ukuwancedisa. Ngesikhathi sakhe esifaneleyo, uzaqeda konke okusihluphayo futhi uzakwenza lokho ngendlela esiyabe singayilindelanga. (UJobe 42:2; UJeremiya 32:17) Okwakhathesi, uyasinika amandla okuthi sibekezele ngapha sithokoza!—UJakhobe 1:2, 3.

Amanye amavesi asinceda sizwisise u-Efesu 3:20

Incwadi yabase-Efesu yabhalwa nguPhawuli ebhalela amaKhristu ayehlala edolobheni le-Efesu elalise-Asia Minor. Lamuhla indawo le iselizweni leTurkey. Encwadini le, uPhawuli wabhala izinto ayezikhulume ngesikhathi ethandazela abase-Efesu. (Kwabase-Efesu 3:14-21) Wakhulekela ukuthi bazame ukulingisela indlela uJesu ayecabanga futhi esenza ngayo. Ukwenza njalo kwakuzabanceda ukuthi balwazi uthando lukaKhristu futhi lathi kumele sikwenze lokhu. UPhawuli waphetha umthandazo wakhe ngokudumisa uJehova wasekhuluma lamazwi aku-Efesu 3:20, 21.

Bukela ividiyo le emfitshane ukuze ubone okumunyethwe libhuku labase-Efesu.