1 UPhetro 5:6, 7—‘Zehliseni Ngaphansi Kwesandla SikaNkulunkulu Esilamandla. Lethulele Phezu Kwakhe Izinkathazo Zenu Zonke’

“Zithobeni ngaphansi kwesandla sikaNkulunkulu esilamandla ukuze aliphakamise ngesikhathi esifaneleyo, liphosele kuye konke okulikhathazayo ngoba yena ulendaba lani.”—1 UPhetro 5:6, 7, INguqulo Yomhlaba Omutsha.

“Zehliseleni ngaphansi kwesandla sikaNkulunkulu esilamandla, ukuze aliphakamise ngesikhathi esifaneleyo. Lethulele phezu kwakhe izinkathazo zenu zonke, ngoba uyalikhathalela.”—1 UPhetro 5:6, 7, The Holy Bible in Ndebele.

Okutshiwo ngu-1 Phetro 5:6, 7

Umphostoli uPhetro wabhala amazwi la ukuze akhuthaze amaKhristu ukuthi athandaze kuNkulunkulu emtshela loba yiziphi inhlupho ahlangana lazo kumbe ukukhathazeka alakho. UNkulunkulu uyabathanda abantu abathobekileyo futhi uyababusisa.

“Zithobeni ngaphansi kwesandla sikaNkulunkulu esilamandla.” Izikhathi ezinengi nxa iBhayibhili likhuluma ngesandla sikaNkulunkulu liyabe lisitsho amandla akhe okusindisa lawokuvikela abantu bakhe. (U-Eksodusi 3:19; UDutheronomi 26:8; U-Ezra 8:22) AmaKhristu ayabe ezithoba ngaphansi kwesandla sikaNkulunkulu nxa ethembela kuye. Ayakwazi ukuthi kulezinto angenelisi ukuzenza lokuthi ngeke anqobe izilingo ngamandla awo. (IZaga 3:5, 6; KwabaseFiliphi 4:13) Awathandabuzi ukuthi uNkulunkulu ulamandla okuwancedisa ngesikhathi esifaneleyo langendlela engcono kulazo zonke.—U-Isaya 41:10.

“Ukuze aliphakamise ngesikhathi esifaneleyo.” Labo abaqiniselayo ebunzimeni abathandabuzi ukuthi uNkulunkulu uzabaphakamisa kumbe abanike umvuzo omkhulu. Kasoze avume ukuthi labo abamkhonzayo behlelwe yibunzima abangeke benelise ukububekezelela. (1 KwabaseKhorinte 10:13) Kodwa nxa bengaqhubeka besenza okuhle uNkulunkulu uzabanika umvuzo “ngesikhathi esifaneleyo.”—KwabaseGalathiya 6:9.

“Liphosele kuye konke okulikhathazayo ngoba yena ulendaba lani.” AmaKhristu aphosela konke okuwakhathazayo kuNkulunkulu ngokuthandaza kuye. Elinye ibhuku elichasisa iBhayibhili lithi: “Ibala elithi liphosele liyisenzo esitshengisa indlela umuntu ajikela ngayo ulutho khatshana laye futhi lokhu ukwenza ehlosile.” Nxa umKhristu esephosele kuNkulunkulu okumkhathazayo, kakhathazeki kakhulu kodwa uyahlaliseka abe ‘lokuthula kukaNkulunkulu.’ (KwabaseFiliphi 4:6, 7) Uyaqiniseka ukuthi uNkulunkulu uyafuna ukumncedisa ngoba uyakwazi ukuthi ulendaba laye lokuthi ulamandla okumsekela.—⁠IHubo 37:5; 55:22.

Amanye amavesi asinceda sizwisise u-1 Phetro 5:6, 7

Amavesi la asesahlukweni sokucina sencwadi yokuqala umphostoli uPhetro ayibhalela amaKhristu. (1 UPhetro 1:1) Ngalesosikhathi abalandeli bakaKhristu babesehlelwa yibunzima obutshiyeneyo obabubangela ukuthi bakhathazeke futhi baphelelwe lukholo. Lokhu kuyenzakala lakithi lamuhla. (1 UPhetro 1:6, 7) Yikho uPhetro wababhalela incwadi le ngabo-62-64 C.E ukuze abakhuthaze njengoba wayesazi ubunzima ababephakathi kwabo.—1 UPhetro 5:12.

UPhetro uphetha incwadi yakhe ngokukhuthaza labo abahlukuluzwayo ngenxa yokuthi bakhonza uJehova. Ubatshela ukuthi nxa bangahlala bethobekile futhi bathembele kuNkulunkulu bangaqiniseka ukuthi uzabancedisa ukuthi bahlale belokholo oluqinileyo. (1 UPhetro 5:5-10) Amazwi kaPhetro ayawakhuthaza lamaKhristu ahlukuluzwayo lamuhla.

Bukela ividiyo le emfitshane ukuze ubone okumunyethwe libhuku lika-1 Phetro.