ULukha 2:14—‘Ukuthula Emhlabeni Ebantwini Abathokozelwa Nguye’

“Kakhazinyuliswe uNkulunkulu osezulwini, labantu abasemhlabeni abamukelwa nguye kababe lokuthula.”—ULukha 2:14, INguqulo Yomhlaba Omutsha.

“Udumo kalube kuNkulunkulu kweliphezulu, lokuthula emhlabeni ebantwini abathokozelwa nguye.”—ULuka 2:14, The Holy Bible in Ndebele.

Okutshiwo nguLukha 2:14

La ngamazwi okudumisa akhulunywa zingilosi ngesikhathi uJesu esanda kuzalwa njalo atshengisa ukuthi labo abalokholo kuJesu bazakwamukelwa nguNkulunkulu futhi babe lokuthula.

“Kakhazinyuliswe uNkulunkulu osezulwini.” Izingilosi zakhuluma amazwi la ukuze zigcizelele ukuthi uNkulunkulu ukufanele ukuphiwa lonke udumo. Umutsho la uphinda utshengise ukuthi kokubili ukuzalwa kukaJesu kanye lenkonzo ayesazoyenza kwakuzakwenza ukuthi uJehovaa uNkulunkulu adunyiswe. Ngokwesibonelo, uJesu wayehlala edumisa uNkulunkulu ngalokho ayekufundisa yikho wathi: “Engikufundisayo ayisikho kwami, ngokwalowo ongithumileyo.” (UJohane 7:16-18) Izikhathi ezinengi abantu ababebona uJesu esenza izimangaliso ‘babekhazimulisa uNkulunkulu.’ (ULukha 5:18, 24-26; UJohane 5:19) Ukufa kukaJesu lakho kwenza ukuthi uNkulunkulu akhazinyuliswe. Kanti njalo kwavula indlela yokuthi uJehova agcwalise inhloso yakhe yokuthi umhlaba ugcwale abantu abalungileyo futhi abathanda ukuthula.—UGenesisi 1:28.

‘Labantu abasemhlabeni kababe lokuthula.’ Ukuthula lokhu akutsho ukungabikhona kwezimpi nje kuphela, kodwa kugoqela lokuthula kumbe uhlaliseka umuntu aba lakho nxa esamukelwa nguJehova. Abantu bayenelisa ukuba lobudlelwano obuhle loNkulunkulu ngenxa yokuthi uJesu wasifela. (UJakhobe 4:8) UJesu iNkosi yoMbuso kaNkulunkulu uzaletha ukuthula emhlabeni wonke okuzahlala kuze kube nini lanini.—IHubo 37:11; ULukha 1:32, 33.

‘Abantu abamukelwa nguye.’ Amazwi la atsho abantu abenza izinto ezithokozisa uNkulunkulu ngenxa yokuthi balokholo oluqinileyo kuye lakuJesu amthumileyo. Atshengisa ukuthi uNkulunkulu kamukeli wonke umuntu kungelani lokuthi wenzani kumbe ukuthi ulobuntu obunjani. Amanye amaBhayibhili ahumutsha amazwi la ngokuthi “ukwamukelwa ngabantu.” (King James Version) Lanxa kunjalo, imibhalo yakudala yesiGrikhi isekela indlela amazwi la ahunyutshwe ngayo ku-Nguqulo Yomhlaba Omutsha lakwamanye amaBhayibhili atshengisa ukuthi ukuthula kubasebantwini abamukelwa nguNkulunkulu.—Khangela “Indlela ULukha 2:14 Ahunyutshwe Ngayo Kwamanye AmaBhayibhili.”

Amanye amavesi asinceda sizwisise uLukha 2:14

ULukha isahluko 2 ukhuluma ngesikhathi uJesu esesengumntwana. Esanda kuzalwa, ingilosi yabonakala kubelusi “ababehlala emlageni belinde imihlambi yabo ebusuku.”b (ULukha 2:4-8) Ingilosi le yabatshela “izindaba ezinhle zentokozo” yathi: “Lamuhla edolobheni likaDavida lizalelwe umsindisi onguKhristu iNkosi.” (ULukha 2:9-11) Abelusi batshelwa lapho ababezaluthola khona usane lolo njalo babona lezingilosi ezinengi zidumisa uNkulunkulu. Bathi befika eBhethilehema bathola uMariya loJosefa kanye losane olunguJesu. (ULukha 2:12-16) Ngemva kokulandisa ngokwakwenzakele, abelusi babuyela emihlambini yabo “bekhazimulisa uNkulunkulu futhi bemdumisa ngakho konke ababekubonile lababekuzwile.”—ULukha 2:17-20.

Indlela ULukha 2:14 Ahunyutshwe Ngayo Kwamanye AmaBhayibhili

“Udumo kalube kuNkulunkulu kweliphezulu, lokuthula emhlabeni; isifiso esihle ebantwini.”—ULuka 2:14, TBS.

“Inkazimulo kuNkulunkulu phezulu kwaphezulu, emhlabeni ukuthula ebantwini abathokozelwa nguye.”—ULukha 2:14, Holy Bible in Ndebele.

Bukela ividiyo le emfitshane ukuze ubone okumunyethwe libhuku likaLukha.