SINGENZANI NXA IZINTO ZIKHWELA?

Kwamukele Ukuthi Izinto Sezikhwelile

Kwezinye izikhathi singangananzeleli ukuthi izinto ziyakhwela, ikakhulu nxa kuyikuthi ngesikhathi zikhwela lomholo lawo uyakhwela. Kodwa nxa zingakhwela umholo wona ungakhweli, singaqalisa ukukhathazeka ikakhulu nxa silemuli.

Akulalutho esingalwenza nxa izinto zilokhu zikhwela. Kodwa ukukwamukela ukuthi izinto sezidura kungasinceda.

KUQAKATHEKE NGANI UKWAMUKELA UKUTHI IZINTO ZIYAKHWELA?

Nxa singakwamukela ukuthi izinto zilokhu zikhwela kungaba lula ukuthi . . .

singatatazeli, besekusinceda ukuthi sicabange ngcono futhi senze izinqumo ezinhle.
sibalekele imikhuba emibi enjengokungabhadali imithelo kumbe ukusebenzisa imali ezintweni ezingaqakathekanga.
singaxabani labanye emulini sibanga imali.
sithole lendlela ezingcono zokuyisebenzisa kuhle imali okungatsho ukuthi siyekele ukuthenga ezinye izinto ebesijayele ukuzithenga, lokuthi singasebenzisi imali ezintweni ezingaqakathekanga.

ONGAKWENZA

Zimisele ukutshintsha. Nxa izinto zilokhu zikhwela, kunganceda ukuthi ungathengi izinto ezingaqakathekanga kangako. Phela abanye abantu bayabe befuna ukuphila impilo ephezulu kodwa bengelamali yakhona. Lokhu kungafanana lokuzama ukubhukutsha uphambana lamanzi. Kungenza ukuthi impilo ibe nzima kakhulu. Kanti njalo nxa ulemuli ungasebenza nzima udinga imali yokuthi uyondle. Akulalutho olubi ngalokho! Kodwa kumele uhlale ukhumbula ukuthi kuqakathekile ukuzinika isikhathi sokuba lemuli yakho lokutshengisa ukuthi uyayithanda lokuthi ulendaba layo.

“Ngubani phakathi kwenu ongangezelela umzuzu owodwa nje empilweni yakhe ngokukhathazeka?”—ULukha 12:25.

“Lingaqali ukukhathazeka ngosuku olulandelayo ngoba usuku olulandelayo luzakuba lezalo izinkathazo. Usuku ngalunye lulenhlupho zalo ezilweneleyo.”—UMathewu 6:34.

Umuntu ozama ukuphila impilo ephezulu yena engelamali ufanana lomuntu ozama ukubhukutsha ephambana lamanzi