UJehova Usenza Sithokoze

1-2. (a) Kuyini okwenza abantu abanengi bangathokozi? (b) Sizaxoxa ngani esihlokweni lesi?

ABANTU abanengi benza izinto ezitshiyeneyo bezitshela ukuthi zizabenza bathokoze. Lanxa kunjalo abanengi bahlala bedanile futhi abalathemba. Ngitsho labantu abakhonza uJehova bayake badane. Lokhu kubangelwa yikuthi ‘sisezinsukwini zokucina okunzima ukuphila kuzo.’—2 Thim. 3:1.

² Esihlokweni lesi sizaxoxa ngezinto ezingasenza sidane besesibona lokuthi singenzani ukuze siphinde sithokoze. Kodwa asiqaleni sixoxe ngokuthi ngubani ongasenza sithokoze.

UJEHOVA NGUYE OSENZA SITHOKOZE

3. Izinto ezidaliweyo zisifundisani ngoJehova? (Khangela lemifanekiso.)

³ UJehova nguNkulunkulu othokozayo futhi ufuna lathi sithokoze. Lokhu kuyazikhanyela ezintweni ezinengi asiphe zona. Ngokwesibonelo umhlaba wethu lo muhle okwamagama, siyakukholisa ukubuka amaluba njalo sihleka kuze kuvele elomhlathi nxa sibona izinyamazana zidlaladlala. Okunye esikukholisayo yikudla ukudla okumnandi. Konke lokhu kutshengisa ukuthi uJehova uyasithanda lokuthi ufuna siyikholise impilo!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Kuyini okwenza uJehova ahlale ethokoza? (b) UJehova usincedisa njani? (IHubo 16:11)

⁴ UJehova uNkulunkulu othokozayo uyakubona konke okuzwisa abantu ubuhlungu. (1 Thim. 1:11) Lanxa kunjalo uhlala ethokoza ngoba uyakwazi ukuthi ukuhlupheka kwabantu ngokwesikhatshana nje kuphela. Phela uselibekile ilanga lapho azatshabalalisa khona abantu abenza okubi abeseqeda konke ukuhlupheka kwabantu. UJehova uyakwazi ukuthi inhlupho esihlangana lazo zingasiqeda amandla. Yikho esincedisa ukuthi sithokoze lanxa siphakathi kwenhlupho. (Bala iHubo 16:11.) Khathesi asixoxeni ngokuthi kuyini okwanceda uJesu ukuthi athokoze.

5-6. Kuyini okwenza uJesu athokoze?

⁵ Kuyini okwenza uJesu athokoze? Kungenxa yokuthi (1) ulingisela uYise kukho konke akwenzayo. (Kol. 1:15; 1 Thim 6:15.) (2) UJesu usephile loYise okwamabhiliyoni lamabhiliyoni eminyaka.

⁶ UJesu uhlala ethokoziswa yikwenza intando kaYise. (Zaga. 8:​30, 31; Joh. 8:29) Lokho kwenza uJehova angamthontisi.—Mat. 3:17.

7. Kuyini okuzasenza sithokoze?

⁷ Okuzasenza lathi sithokoze yikusondela kuJehova uNkulunkulu othokozayo. Nxa singahlala sifunda ngaye futhi sizame ukumlingisela sizathokoza. Okunye okuzasithokozisa yikwenza intando kaNkulunkulu lokukhumbula ukuthi esikwenzayo kuyamthokozisa.a (Hubo. 33:12) Kodwa iqiniso elikhona yikuthi ngezinye izikhathi siyake sidane. Lokhu kuyabe sekusitsho ukuthi uJehova kaselandaba lathi yini? Hatshi! UJehova uyazwisisa ukuthi njengoba singabantu abalesono kwesinye isikhathi siyadana, sihlulukelwe njalo sizwe ubuhlungu. (Hubo. 103:14) Khathesi asixoxeni ngezinto ezingasidanisa besesibona ukuthi singenzani ukuze siphinde sithokoze.

QHUBEKA UTHOKOZA LANXA ULENHLUPHO

8. Kuyini okungasidanisa?

⁸ Okungenza sidane: Inhlupho zempilo. Zinengi inhlupho esihlangana lazo. Abanye bayagula, abanye ngabayanga bokucina ikanti abanye sebegugile. Inhlupho lezi zingasidanisa futhi zisiqede amandla, ikakhulu nxa kungelalutho esingalwenza ngazo. IBhayibhili lithi: “Inhliziyo ebuhlungu yenza umuntu ahlulukelwe.” (Zaga. 15:13) Omunye umfowethu okuthiwa nguBabis ongumdala webandla wafelwa ngumnewabo labazali bakhe ngesikhathi esifitshane nje futhi lokho kwamzwisa ubuhlungu. Uthi: “Okunye okwakungidanisa yikuthi izimo zazingangivumeli ukuthi ngitshone lomnewethu labazali bami. Ngasala ngiyinhlanzi etshelwe ngamanzi.” Liqiniso sibili ukuthi inhlupho zempilo zingasiqeda amandla.

9. Kuyini okungasenza sithokoze? (UJeremiya 29:​4-7, 10)

⁹ Okuzasenza sithokoze. Nxa sifuna ukuthokoza akumelanga sizikhathaze ngezinto esingeke sizitshintshe kodwa kumele sisuthiseke njalo sithokoziswe yilokho esenelisa ukukwenza. Abantu abanengi bacabanga ukuthi izinto kumele zibe zitshelela empilweni ukuze bathokoze. Kodwa iqiniso yikuthi singathokoza kungelani lobunzima obungasehlela. Ngokwesibonelo, uJehova watshela abantu bakhe ababethunjwe bahanjiswa eBhabhiloni ukuthi benze konke ababengakwenza ukuze baqhubeke bethokoza. (Bala uJeremiya 29:​4-7, 10.) Manje thina sifundani? Nxa izimo zingatshintsha kumele sikwamukele lokho besesiqhubeka ngempilo ngoba uJehova uzahlala esincedisa. (Hubo. 63:7; 146:5) Udadewethu okuthiwa ngu-Effie walimala okokuthi kasenelisi ukuhamba, uthi: “UJehova wangiqinisa, waphinda wasebenzisa abangakithi kanye labanye engikhonza labo ukuthi bangincedise phakathi kobunzima bonke lobu. Ngiyakuqakathekisa kakhulu lokhu abangenzele khona, yikho ngizama ukuthi ngihlale ngithokoza.”

10. Singenelisa yini ukuthokoza thina siphakathi kwenhlupho? Chasisa

¹⁰ Siyenelisa ukuqhubeka sithokoza lanxa inhlupho zingaze zibuye zibhabhulene.b (Hubo. 126:5) Phela intokozo yeqiniso ayilani lokuthi izimo zinjani. Udadewethu oliphayona okuthiwa nguMaria uthi: “Iqiniso elikhona yikuthi inhlupho esihlangana lazo ziyasidanisa kodwa kazisoze zisiqede amandla ngoba uJehova uhlala esincedisa.” Kumele sihlale sikhumbula ukuthi inhlupho esikuzo ngezesikhatshana nje kuphela. Sekuseduze ukuthi uJehova azithanyele aziqede du!

11. Ufundani kulokho okwenzakala kumphostoli uPhawuli?

¹¹ Uyake ube phakathi kwelitshe lembokodo yini? Phela kwesinye isikhathi nxa ungaba phakathi kobunzima ungacina usuzitshela ukuthi uJehova kasakuthandi. Nxa lokho kuyake kwenzakale kuwe zama ukucabanga ngezinceku zikaJehova ezithembekileyo ezadlula ebunzimeni. Cabanga lokho okwenzakala kumphostoli uPhawuli. UJesu ngokwakhe wamthuma ukuthi ayetshumayela “ezizweni lasemakhosini kanye lasebantwini bako-Israyeli.” (Imiseb. 9:15) Lanxa uPhawuli wayephiwe umsebenzi oqakatheke kangaka, impilo yakhe kayizange ihlale itshelela. (2 Khor. 11:​23-27) Manje inhlupho uPhawuli ahlangana lazo zasezisitsho ukuthi uJehova wayengasamthandi yini? Ngitsho lakancane! Phela wayengeke enelise ukububekezelela bonke ubunzima ahlangana labo aluba uJehova wayengamncedisi. (Rom. 5:​3-5) Khathesi cabanga ngazo zonke inhlupho odlule kuzo lalezo ophakathi kwazo. Ubona angani ngubani okuncedisayo ukuthi uqhubeke ubekezela? Ungathandabuzi ngitsho lakancane ukuthi uJehova uzaqhubeka ekuncedisa futhi ekusekela ngoba uyakuthanda.

12. Kuyini okunye okungasidanisa?

¹² Okungenza sidane: Ukwehluleka ukwenza esikufisayo. (Zaga. 13:12) Sihlala sifisa ukwenza okunengi kakhulu emsebenzini kaJehova ngenxa yokuthi siyamthanda. Kodwa nxa singazama ukwenza izinto ezingaphezu kwamandla ethu besesisehluleka singacina sidana. (Zaga. 17:22) Udadewethu okuthiwa nguHolly oliphayona lesikhathi sonke uthi: “Ngangifuna ukungena iSikolo sabaVangeli boMbuso ngibe sengisiba ngumnali kumbe ukuyancedisa ekwakhiweni kwezakhiwo zenhlanganiso eRamapo e-United States. Kodwa impilo yaphonguthi phendu, yikho angisenelisanga ukwenza ngitsho lokukodwa kwalokho engangikufisa. Ngadana kakhulu ngoba ngangizimisele ukwenzela uJehova okunengi.” Abantu bakaJehova abanengi bayadana nxa bengasenelisanga ukwenza lokho abayabe befisa ukumenzela khona.

13. Yiziphi ezinye izinto esingazenza?

¹³ Okungasenza sithokoze. Kumele sikhumbule ukuthi uJehova kakhangelelanga ukuthi senze okungaphezu kwamandla ethu. Yena akufunayo nje yikuthi sithobeke futhi simkhonze sithembekile. (Mik. 6:8; 1 Khor. 4:2) UJehova ukhangela inhliziyo yomuntu hatshi imisebenzi ayenzayo enhlanganisweni. Yikho akumelanga sizithwalise nzima sizama ukwenza imisebenzi esingenelisiyo ukuyenza. Nxa kuyikuthi ulesifiso esikhulu sokwenza okunengi emsebenzini kaJehova kodwa izimo kazikuvumeli, zama ukubona ukuthi kuyini owenelisa ukukwenza. Ngokwesibonelo, ungaqeqetsha abafowethu labodadewethu abasakhulayo ebandleni okulo kumbe uncedise asebekhulile. Mhlawumbe ungavakatshela omunye osebandleni, umfonele kumbe umbhalele imeseji ukuze umkhuthaze. UJehova uyathokoza kakhulu nxa ekubona usenza lokho okwenelisayo futhi lawe uzathokoza! Hlala ukhumbula ukuthi emhlabeni omutsha sizenelisa ukwenzela uJehova loba yini esifisa ukumenzela yona. Lokhu yikho kanye okunceda udadewethu okuthiwa nguHolly esike sakhuluma ngaye. Uqhubeka esithi: “Ukuhlala ngikhumbula ukuthi emhlabeni omutsha ngizenelisa ukukhonza uJehova kuze kube nini lanini kuyanginceda nxa ngidanile.”

14. Kuyini okunye okungasidanisa?

¹⁴ Okungenza sidane: Ukugijimisa imali. Izinto esizibona ku-internet zingenza sicabange ukuthi ukuba lemali kuzasenza sithokoze. Singacina sesicabanga ukuthi ukuba lemali enengi ukuze senelise ukuvakatsha sisiya le lale lokuthenga izinto ezinenginengi yikho okuzasenza sithokoze. Khona akukubi ukuthi sikholise ngoba uJehova ufuna sithokoze. Lanxa kunjalo, ukugijimisana lezinto lezi kungasithela emanyaleni. Omunye umfowethu okuthiwa ngu-Eva oliphayona lesikhathi sonke uthi: “Nxa uphilela ukuzikholisela nje kuphela ucina ungasathokozi.” Ukugijimisana lemali kakusoze kusenze sithokoze.

15. Kuyini esikufunda kuSolomoni?

¹⁵ Kunengi esingakufunda kulokho okwenzakala kuSolomoni. Phela akulamuntu owayenothe njengaye. Wayesidla loba yini ayifunayo, elemali yokuthenga konke ayekufisa njalo wayelabahlabeleli abanengi abazingcitshi. Lanxa kunjalo wathi izinto zonke lezi zazingancedi ngalutho. Waphinda wathi: “Ilihlo kalisuthi ngokubona lendlebe ayigcwali ngokuzwa.” (Umtshu. 1:8; 2:​1-11) Abantu abanengi bazitshela ukuthi ukuba lemali enengi kuzabenza bathokoze kodwa leli kayisilo qiniso, ngoba intokozo yeqiniso kayithengwa.

16. Yiziphi izinto esingazenzela abanye? (Khangela lemifanekiso.)

¹⁶ Kuyini okungasenza sithokoze? UJesu wathi: “Ukupha kuyathokozisa kakhulu ukwedlula ukwamukela.” (Imiseb. 20:35) Umdala webandla okuthiwa ngu-Alekos uthi: “Ngiyazama ukuncedisa abanye ngendlela ezitshiyeneyo. Khonalokho kungenza ngithokoze ngoba ngiyabe ngingacabangi ngenhlupho engilazo.” Wena ungabancedisa njani abanye? Nxa ungabona omunye edanile, zama ukumduduza. Lanxa uyabe ungeke uqede zonke inhlupho ayabe elazo, zama ukumlalelisisa ukuze uzwisise indlela azizwa ngayo, ubusumkhumbuza lokuthi atshele uJehova konke okumkhathazayo. (Hubo. 55:22; 68:19) Okunye ongakwenza yikumqinisekisa ukuthi uJehova kasoze amlahle loba sekutheni. (Hubo. 37:28; Isaya. 59:1) Mhlawumbe ungamnxusa ukuthi lizokudla ndawonye, lizikwejisela nje. Nxa kuvuma ungacela ukuthi lihambe lonke ekutshumayeleni ngoba umsebenzi wokutshumayela uyasivuselela. Sebenza loJehova ekuqiniseni abantu bakhe. Ukuhlala sicabanga ngendlela ezitshiyeneyo esingancedisa ngazo abafowethu labodadewethu kulokuthi sihlale sigijimisa lokho esikufunayo kuzasinceda sithokoze!—Zaga. 11:25.

17. Kumele senzeni nxa sifuna ukuthokoza? (IHubo 43:4)

¹⁷ Nxa singaqhubeka sisondela kuJehova sizathokoza. IBhayibhili lisitshela ukuthi uJehova nguye osenza sithokoze. (Bala iHubo 43:4.) Lanxa singahlangana laziphi inhlupho akumelanga sesabe. Kwangathi singazimisela ukugagadlela kuJehova, uNkulunkulu wethu osenza sithokoze!—Hubo. 144:15.