Amalunga Amatsha EQula Elikhokhelayo
MHLAKA 5 October 2024 kwenziwa isaziso esithokozisayo emhlanganweni owenziwa minyaka yonke waboFakazi bakaJehova esithi: Umfowethu uJody Jedele loJacob Rumph sebengamalunga eQula Elikhokhelayo laboFakazi bakaJehova. Abazalwane laba sebelesikhathi eside bekhonza uJehova bethembekile.
UJody Jedele lomkakhe uDamaris
Umfowethu uJedele wazalelwa edolobheni leMissouri, e-U.S.A. futhi wakhuliswa ngabazali abakhonza uJehova. Babehlala duzane lendawo eyayilaboFakazi abalutshwana yikho umfowethu uJedele wenelisa ukubona abafowethu labodadewethu abavela ezindaweni ezitshiyeneyo ababebuya lapho bezotshumayela. Ukubona indlela abafowethu laba ababethokoza ngayo futhi bemanyene kwamthinta kakhulu. Wabhabhathizwa mhlaka 15 October 1983. Wathi eseqede isikolo waqalisa ukuphayona ngoSeptember 1989.
Abazali bakhe babejayele ukuhamba laye lomnawakhe besiyavakatsha eBhetheli. Lokhu kwenza baba lesifiso esikhulu sokuyasebenza eBhetheli futhi bobabili bacina sebesebenza khona. Umfowethu uJedele wabizwa eBhetheli yeWallkill ngoSeptember 1990. Wafika wasebenza kuhlangothi lokuklina njalo ngokuhamba kwesikhathi wayesesebenza kuHlangothi Oluncedisa Kwezokwelapha.
Kwakulamabandla amanengi asebenzisa ulimi lwesiSpanish futhi kwakudingeka abazalwane abangancedisa emabandleni la. Umfowethu uJedele wathuthela kwelinye lalawo mabandla. Kungakayi ngaphi wabonana loDamaris, udadewethu owayeliphayona futhi esesiqintini sabo. Batshada futhi uDamaris laye wabizwa ukuthi azosebenza eBhetheli.
Ngo-2005 basuka eBhetheli ukuze bayenakekela abazali babo. Ngalesosikhathi babengamaphayona esikhathi sonke. Umfowethu uJedele wayefundisa eSikolo Senkonzo Samaphayona, ekuKhomithi Esebenzelana Lezibhedlela lakuKhomithi Yesabelo Ebona Ngezokwakha.
Ngo-2013 bacelwa ukuthi bancedise ekwakhiweni kweBhetheli eseWarwick. Sebephinde basebenza ePatterson laseWallkill. Umfowethu uJedele wake wasebenza kuHlangothi Lokwakha Lokudweba Amapulani lakuHlangothi Oluphathisa Ngolwazi Lwezokwelatshwa. NgoMarch 2023 waba ngumsizi weKhomithi Yenkonzo. Umfowethu uJedele uthi: “Nxa ungaphiwa umsebenzi omutsha wenkonzo uyakhathazeka uzibuza ukuthi uzenelisa yini ukuwenza kuhle. Kodwa kuyabe sekumele uthembe uJehova ngoba uzakunika amandla okuthi wenze loba yini afuna uyenze.”
UJacob Rumph lomkakhe u-Inga
Umfowethu uRumph wazalelwa edolobheni leCalifornia, e-U.S.A. Lanxa unina kamfowethu uRumph wayengasakhuthalanga kangako ekukhonzeni wayezama ukufundisa umntanakhe ngoJehova. Umfowethu uRumph wayejayele ukuvakatshela ugogo wakhe onguFakazi futhi lokho kwamnceda kakhulu ukuthi afunde ngoJehova. Eseleminyaka engu-13 waqalisa ukufunda iBhayibhili. Wabhabhathizwa mhlaka 27 September 1992. Okuthokozisayo yikuthi unina waphinda wakhuthala ekukhonzeni. Abanawakhe bakamfowethu uRumph kanye loyise baqalisa ukufunda iBhayibhili futhi babhabhathizwa.
Ngesikhathi esakhula, umfowethu uRumph wayebona indlela amaphayona ayethokoza ngayo. Waqalisa ukuphayona ngoSeptember 1995 eseqedile isikolo. Ngo-2000 wathuthela e-Ecuador, endaweni elabamemezeli abalutshwana. Esekhonale wabona udadewethu oliphayona okuthiwa ngu-Inga owayevela eCanada. Bathi sebetshadile baqhubeka bese-Ecuador bengena lebandla elilabamemezeli abalutshwana. Khathesi ibandla lelo selilikhulu.
Ngokuhamba kwesikhathi baba ngamaphayona aqakathekileyo njalo umfowethu uRumph waba ngumbonisi wesiqinti. Ngo-2011 bangena ikilasi yeGiliyadi yesi-132 futhi kusukela lapho sebeke basebenza emazweni atshiyeneyo besenza imisebenzi etshiyeneyo. Bake basebenza eBhetheli, baba ngabanali futhi umfowethu uRumph uke wafundisa eSikolo Sabavangeli boMbuso.
Kwathi sokuqalise umkhuhlane weCOVID-19 umfowethu lodade Rumph babuyela e-United States. Basebenza eWallkill futhi umfowethu uRumph waqeqetshwa ukwenza umsebenzi owenziwa kuHlangothi Lwenkonzo. Baphinda babuyela egatsheni le-Ecuador lapho umfowethu uRumph afika waba lilunga leKhomithi Yegatsha. Ngo-2023 bacelwa ukuthi baye eWarwick. NgoJanuary 2024, umfowethu uRumph waba ngumsizi weKhomithi Yenkonzo. Umfowethu uRumph uthi: “Akulandaba ukuthi wenza wuphi umsebenzi, okuqakathekileyo yikuthi usebenza labantu bakaJehova.”
Siyabathanda kakhulu abafowethu laba abasebenza nzima futhi ‘siyabaqakathekisa kakhulu.’—Flp. 2:29.