Qhubeka Uthokoza Nxa Unakekela Umuntu Ogulayo

1-2. UJehova ubabona njani labo abanakekela abagulayo? (IZaga 19:17) (Khangela lemifanekiso.)

UMFOWETHU okuthiwa nguJin-yeol ohlala eKorea uthi: “Sesileminyaka engu-32 sitshadile futhi okweminyaka emihlanu edlulileyo benginakekela umkami. Ulomkhuhlane okuthiwa yi-Parkinson’s disease owenza ehluleke ukwenza loba yini. Ngiyamthanda kakhulu umkami yikho akungithwalisi nzima ukuthi ngimnakekele. Ngilala eceleni kwakhe ngimbambe isandla.”

² Kungenzakala ukuthi sikhuluma nje lawe unakekela umuntu omthandayo. Kungaba ngumzali, umkakho, umntanakho kumbe umngane. Akulambuzo ukuthi okwenza umncedise umuntu lowo yikuthi uyamthanda futhi le ngeyinye indlela otshengisa ngayo ukuthi uzinikele kuJehova. (1 Thim. 5:​4, 8; Jak. 1:27) Khona akuhlali kulula ukunakekela umuntu ogulayo futhi kwesinye isikhathi ungabona angani akulamuntu obubonayo ubunzima ophakathi kwabo. Mhlawumbe nxa usebantwini uyabe ungafuni babone ubunzima ophakathi kwabo ubusuvala ngokuhleka kodwa nxa usuwedwa zigeleze zodwa. (Hubo. 6:6) Kungenzakala ukuthi abanye bangabe bengabuzwisisi ubunzima ophakathi kwabo kodwa uJehova uyabubona bonke futhi uyakwazi ukuthi uzwa njani. (Khangela u-Eksodusi 3:7.) Uyazibona zonke izinyembezi kanye lakho konke okwenzayo uzama ukunakekela umuntu ogulayo. (Hubo. 56:8; 126:5) Konke okwenzayo ukuze unakekele ogulayo kuyabe kungani ukwenzela uJehova futhi yena ukuthembisa ukuthi uzakubusisa.—Bala iZaga 19:17.

3. Yibuphi ubunzima u-Abrahama loSara okungenzeka bahlangana labo?

³ IBhayibhili lisitshela ngabantu abatshiyeneyo ababenakekela abantu asebekhulile kumbe abagulayo. Ngokwesibonelo, uThera uyise ka-Abrahama wayeleminyaka engu-200 ngesikhathi u-Abrahama loSara besuka laye e-Uri besiya eHarani njalo umango lo wawungaba ngamakhilomitha angu-960. (Gen. 11:​31, 32) U-Abrahama loSara babemthanda sibili uThera kodwa kumele ukuthi uhambo lolu lwalunzima kakhulu. Kungenzeka ukuthi babehamba ngamakamela kumbe ngabobabhemi futhi kumele ukuthi lokhu kwakunzima kakhulu emuntwini omdala. Kufanele ukuthi ilanga lalisithi lisiyatshona u-Abrahama loSara bedinwe bengazazi. Lanxa kunjalo uJehova waqhubeka ebanika amandla okuthi benelise ukunakekela ixhegu leli ababehamba lalo. Njengoba nje uJehova wancedisa u-Abrahama loSara, lawe uzakuncedisa akunike amandla.—Hubo. 55:22.

4. Sizaxoxa ngani esihlokweni lesi?

⁴ Kuyini okunganceda labo abanakekela abantu asebekhulile kumbe abagulayo? Okuzabanceda kakhulu yikwenza umsebenzi wabo bethokoza. (Zaga. 15:13) Kumele sikhumbule ukuthi intokozo yeqiniso kayilani lokuthi izimo zinjani. (Jak. 1:​2, 3) Manje ungenzani ukuze ube lentokozo yeqiniso? Thandaza kuJehova umcele ukuthi akuncedise uqhubeke ungumuntu othokozayo. Esihlokweni lesi sizaxoxa ngalokho okungenziwa yilabo abanakekela asebekhulile labagulayo ukuze baqhubeke bethokoza emsebenzini abawenzayo. Sizaphinda sixoxe ngokuthi thina singabancedisa njani labo abanakekela asebegugile kumbe abagulayo. Asiqaleni sixoxe ngobunzima abantu abanakekela abagulayo lasebekhulile abahlangana labo. Besesibona ukuthi bangenzani ukuze baqhubeke bethokoza.

OKUNGENZA BANGASATHOKOZI

5. Kungani kuqakathekile ukuthi uqhubeke uthokoza lanxa unakekela asebekhulile kumbe abagulayo?

⁵ Nxa kuyikuthi unakekela umuntu ogulayo kumbe osekhulile kodwa uhlala ucabanga ngobunzima ohlangana labo kokuphela ungacina ungasathokozi futhi lokhu kungakuqeda amandla. (Zaga. 24:10) Ngezinye izikhathi ungacina ungaselamusa ngenxa nje yokuthi uyabe udiniwe. Kanti yibuphi ubunzima abantu abanakekela abagulayo lasebekhulile abahlangana labo?

6. Yibuphi ubunzima labo abanakekela abagulayo lasebekhulile abahlangana labo?

⁶ Asomsebenzi olula. Udadewethu okuthiwa nguLeah uthi: “Ilanga lithi lisiyatshona sengidinwe ngingokunye. Kwesinye isikhathi ngiyabe ngithamuleke okokuthi kuyabe kungatsho lokuthi ngiphendule amameseji abantu.” Abanye bona bayasiswela isikhathi eseneleyo sokulala kumbe esokuphumula. Udadewethu okuthiwa ngu-Inés uthi: “Angibuquthi, ngivuka kokuphela ngisiyakhangela umamazala. Mina lomkami kudala sacina ukuthi sike sivakatshe siyebethwa ngumoya.” Abanye abanakekela abagulayo kumbe asebekhulile kabasitholi isikhathi sokuthi bazikwejisele labanye kumbe esokwenza okunengi emsebenzini kaJehova. Khonalokho nje kungabadanisa ngoba bayabe befuna sibili ukwenza izinto lezo.

7. Kuyini okunye okungadanisa labo abanakekela asebekhulile kumbe abagulayo?

⁷ Bayake badane. Udadewethu okuthiwa nguJessica uthi: “Kwezinye izikhathi ngiyake ngicabange ukuthi ngiyazehlulekela ukunakekela ubaba. Ngiyabe sengibona angani lokuhlala phansi ukuthi kengikhokhe umoya nje licala.” Abanye babona umsebenzi lo unzima okokuthi kwesinye isikhathi bayabe sebefuna ukukhalala njalo nxa kuyikuthi badinwe kakhulu kungabalula ukuthi bangabatshengisi umusa labo ababanakekelayo. (Jak. 3:2) Abanye badaniswa yikubona umuntu abamthandayo ephakathi kobuhlungu. Udadewethu okuthiwa nguBarbara uthi: “Mina okungizwisa ubuhlungu kakhulu yikubona umuntu engimthandayo esizwa ubuhlungu futhi kungelanto engingayenza ukuze ngimncedise.”

8. Labo abanakekela bagulayo kumbe asebekhulile bezwa njani nxa bebongwa?

⁸ Ukucabanga ukuthi abanye abakuqakathekisi lokhu obenzela khona. Kuyini okungenza umuntu onakekela umuntu ogulayo kumbe osekhulile acabange njalo? Mhlawumbe lokhu kungabangelwa yikuthi kukalutshwana ukuthi labo ababanakekelayo babancome kumbe bababonge ngomsebenzi abawenzayo. Phela nxa abantu bangakuncoma lawe uzwa usiba lamandla okwenza umsebenzi wakho. (1 Thes. 5:18) Udadewethu okuthiwa nguMelissa uthi: “Kwezinye izikhathi ngiyake ngidane okokuthi ngicina ngikhala ngenxa yokuzwa ubuhlungu. Kodwa nxa abantu engibanakekelayo bangangibonga ngizwa sengingcono. Ngithi ngivuka kusasa sengilamandla okuqhubeka ngibanakekela.” Umfowethu okuthiwa ngu-Ahmadu lomkakhe banakekela umntwana wesihlobo sabo olomkhuhlane wokuwa. Uthi: “Lanxa yena engeke azwisise ubunzima esihlangana labo kumbe ukuthi silala singalele sikhangele yena, kuyasithokozisa kakhulu ukumuzwa esibonga ngalokho esimenzela khona. Kwezinye izikhathi uyake azame ukubhala phansi ukuthi uyasithanda.”

UNGENZANI UKUZE UQHUBEKE UTHOKOZA?

9. Ukukhumbula ukuthi kulokunye ongenelisi ukukwenza kuzakunceda njani?

⁹ Khumbula ukuthi kulokunye ongeke wenelise ukukwenza. (Zaga. 11:2) Kwesinye isikhathi sizehluleka ukwenza ezinye izinto ngenxa yokuthi siyabe sidiniwe kumbe siyabe singelaso isikhathi sakhona. Yikho akusocala ukwala ukwenza ezinye izinto nxa ungenelisi. Okunye okungakunceda yikuvuma ukuthi abanye abantu bakuncedise. Umfowethu okuthiwa nguJay uthi: “Nxa ufuna ukuthokoza kumele ukhumbule ukuthi akuvumi ukuthi wenze zonke izinto ngelanga elilodwa. Yikho zimisele ukwenza lokho okwenelisayo.”

10. Kungani kungamelanga uzonde masinyane? (IZaga 19:11)

¹⁰ Ungacaphuki masinya. (Bala iZaga 19:11.) Lokhu kuzakunceda ukuthi ungavuki ngolaka nxa umuntu omnakekelayo angakhuluma kumbe enze into ekucaphulayo. Eminye imikhuhlane ingabangela ukuthi umuntu enze izinto ezingasizwisa ubuhlungu lanxa engahlosanga. (Umtshu. 7:7) Ungasala uzibuza ukuthi kanti sokutheni umuntu obumazi elomusa esevuka ngolaka, lomuntu omazi ezwisisa umangale esephongudaza inkani. Uthi uyamncedisa akuthethise kumbe akuchothoze uze uswele lokuthi wenzeni. Nxa kuyikuthi unakekela umuntu ogulayo kungaba kuhle ukuthi ufunde okunengi ngomkhuhlane alawo. Ukuzwisisa ukuthi umkhuhlane alawo yiwo obangela ukuthi enze izinto ngendlela ethile kumbe akhulume amazwi abuhlungu kuzakunceda ukuthi ungamzondeli.—Zaga. 14:29.

11. Kuyini okumele ukuqakathekise kakhulu? (IHubo 132:​4, 5)

¹¹ Qinisa ubungane bakho loJehova. Ngesinye isikhathi kungadingeka ukuthi ume kancane ukwenza eminye imisebenzi ukuze wenze “izinto eziqakatheke kakhulu.” (Flp. 1:10) INkosi uDavida yayilezinto ezinengi okwakumele izenze kodwa eyayikuqakathekisa kakhulu yikukhonza uJehova. (Bala iHubo 132:​4, 5.) Yikho lawe kumele ukuqakathekise kakhulu ukukhonza uJehova. Zinike isikhathi sokubala iBhayibhili lokuthandaza nsuku zonke. Udadewethu okuthiwa ngu-Elisha uthi: “Okungincedayo ukuthi ngiqhubeke ngithokoza yikuhlala ngithandaza lokucabangisisa ngamahubo atshiyeneyo. Ngiyakuqakathekisa kakhulu ukuthandaza. Angiboni ukuthi bengizenelisa ukubekezela aluba bengingathandazi kanengi.”

12. Yiziphi ezinye izinto ongazenza?

¹² Qakathekisa impilakahle. Lanxa unakekela umuntu ogulayo kumbe osegugile akumelanga ukhohlwe ukuzinakekela. Kuqakathekile ukuthi uqeqetshe umzimba futhi akumelanga uphongudla loba yini. (Efe. 5:​15, 16) Zama ukuzinika isikhathi eseneleyo sokulala. (Umtshu. 4:6) Abezempilakahle bathi ukulala ngokweneleyo kuyayivuselela ingqondo. Elinye ibhuku lezempilakahle lithi umuntu olala ngokweneleyo uyenelisa ukulwisana lokukhathazeka futhi ingqondo yakhe iqhubeka ihlalisekile lanxa ephakathi kobunzima. Kumele uzinike isikhathi sokubethwa ngumoya lokwenza ezinye izinto ozikholisayo. (Umtshu. 8:15) Omunye udadewethu uthi: “Ngiyake ngiphume phandle ngiyewothamela ilanga. Khonalokhu kuyanginceda ukuthi ngihlaliseke. Okunye engizama ukukwenza yikuthi kanye ngenyanga ngidinge umuntu oyedwa engingazikwejisela laye.”

13. Kunceda ngani ukuhleka? (IZaga 17:22)

¹³ Zijayeze ukuhleka. (Bala iZaga 17:22; Umtshu. 3:​1, 4) Ukuhleka kungakwenza ukhohlwe ngenhlupho olazo futhi kukwenze uhlaliseke. Ngezinye izikhathi kungabanzima ukuthi izinto zihambe ngendlela okade uyikhangelele nxa unakekela umuntu ogulayo kumbe osegugile futhi lokho kungenza umsebenzi wakho ubenzima. Kodwa kulokuthi lokhu kukuzondise, nxa kuvuma zihlekele nje kudlule. Nxa into yakhona ihlekisa lomuntu omnakekelayo, uzamangala nje selizwanana kakhulu.

14. Kunceda ngani ukuthululela abanye isifuba?

¹⁴ Xoxela umngane wakho ukuthi wena uzizwa njani. Lanxa ungenza konke okwenelisayo ukuze uhlale uthokoza iqiniso yikuthi ngezinye izikhathi uzadana. Manje kuyabe sekumele wenzeni? Okungakunceda kakhulu yikuthululela umuntu okuzwisisayo indlela ozizwa ngayo. (Zaga. 17:17) Amazwi azakutshela wona azakukhuthaza futhi akuqinise njalo khonokho kuzakwenza ukuthi uhlale uthokoza.—Zaga. 12:25.

15. Ukuhlala ucabanga ngalokho esikuthenjiswe nguJehova kuzakunceda njani?

¹⁵ Cabanga ngezinto elizazenza emhlabeni omutsha. Hlala ukhumbula ukuthi umsebenzi wokunakekela abagulayo kumbe asebekhululile ngowesikhatshana nje. Phela uJehova wadala abantu efuna baphile beqine saka. (2 Khor. 4:​16-18) “Ukuphila koqobo” esikuthenjiswe nguJehova sekuseduze. (1 Thim. 6:19) Nxa wena lalowo omnakekelayo lingaxoxa ngokuthi impilo izabe isinjani emhlabeni omutsha lizathokoza. (Isaya. 33:24; 65:21) Udadewethu okuthiwa nguHeather uthi: “Ngijayele ukutshela abantu engibanakekelayo ukuthi zinengi izinto esizazikholisa ndawonye emhlabeni omutsha, njengokuthunga, ukugijima lokutshova amabhayisikili. Sizakukholisa lokuphekela izihlobo zethu ezivusiweyo ukudla okumnandi, sibabhekhele ezimnandi. Siyambonga kakhulu uJehova ngethemba asinike lona.”

SINGABANCEDISA NJANI LABO ABANAKEKELA ABANYE?

16. Singabancedisa njani abanakekela abagulayo abasebandleni lethu? (Khangela lomfanekiso.)

¹⁶ Ncedisa abanye. Abanye ebandleni bangacela ukuzokuphumuza ukunakekela umuntu ogulayo kumbe osekhulile. Kumele ukuthi uyakuqakathekisa lokhu ngoba kukunika ithuba lokuthi lawe uke uphumule futhi wenze lezinye izinto oyabe ufuna ukuzenza. (Gal. 6:2) Abanye abamemezeli bahle babe lohlelo lokuthi ngubani ozabe encedisa umuntu othile iviki ngayinye. Udadewethu okuthiwa nguNatalya unakekela umkakhe ongasenelisiyo ukwenza loba yini, uthi: “Kulomzalwane osebandleni lethu ojayele ukuvakatshela umkami kanye kumbe kabili ngeviki. Uyabezwa bezikholisela bebukele ifilimu, bezixoxela futhi batshumayela bonke. Ngiyambonga kakhulu umfowethu lo ngoba lokhu kunginika ithuba lokuthi lami ngike ngiphume ngitshaywe ngumoya futhi ngenze ezinye izinto okuyabe kumele ngizenze.” Nxa kuvuma mhlawumbe ungahlela ukuthi kwezinye izikhathi uke uyelala khona ukwenzela ukuthi lowo onakekela ogulayo laye ake alale behle.

17. Kuyini okunye esingakwenza ukuze sincedise labo abanakekela asebekhulile kumbe abagulayo?

¹⁷ Bancedise nxa besemihlanganweni. Labo abanakelela abagulayo kumbe asebekhulile bangaphuma bengazwanga lutho emihlanganweni ngenxa yokuthi bayabe benakekela umuntu abahamba laye. Mhlawumbe ngezikhathi ezinjalo, singacela ukuhlala lalabo asebekhulile kumbe abagulayo ukuze ababanakekelayo labo bathole ithuba lokufunda okunengi emihlanganweni yethu. Nxa kuyikuthi umuntu ogulayo kumbe osekhulile kenelisi ukuyangena imihlangano labanye singacela ukuthi siwulalele kumbe siwubukele sisemzini wakhe ukuze lowo omnakekelayo enelise ukuyangena imihlangano lapho eyenzelwa khona.

18. Kuyini okunye esingakwenzela labo abanakekela asebekhulile kumbe abagulayo?

¹⁸ Hlala ubancoma futhi ubathandazela. Abadala bebandla kumele bahlale beselusa labo abanakekela abagulayo kumbe asebekhulile. (Zaga. 27:23) Lathi sonke kumele sihlale sibancoma abafowethu labodadewethu laba abahlala besebenza nzima. Nxa singahlala sibathandazela sicela ukuthi uJehova aqhubeke ebanika amandla bazawenza bethokoza umsebenzi wabo.—2 Khor. 1:11.

19. Kuyini esikulindele ngabomvu?

¹⁹ Sokuseduze kakhulu ukuthi uJehova aqede imikhuhlane kanye lokufa. Uthembisa lokuzesula zonke izinyembezi ebantwini bakhe. (Isam. 21:​3, 4) Ngalesosikhathi ngitsho labantu abayizigoga ‘bazakweqa njengempala.’ (Isaya. 35:​5, 6) “Izinto zakuqala” ezinjengokunakekela abantu asebekhulile labagulayo “kazisoze ziphinde zikhunjulwe.” (Isaya. 65:17) UJehova uthembisa ukuthi uzaqhubeka esincedisa khathesi njengoba sisasilindele ngabomvu lesosikhathi esihle kakhulu. Uzahlala esinika amandla okuthi siqinisele, sibekezele njalo asincedise ukuthi sithokoze.—Kol. 1:11.