ISIFUNDO 47
INGOMA 38 Uzalenza Libe Lamandla
“ Wena Uligugu Kakhulu”!
“ Wena uligugu kakhulu.”—DAN. 9:23.
ESIZAKUFUNDA
Isihloko lesi sizanceda labo abazikhangelela phansi bangathandabuzi ukuthi baligugu kuJehova.
1-2. Kuyini okungakunceda ungathandabuzi ukuthi uligugu kuJehova?
UZIBONA uqakathekile yini kuJehova? Abanye abantu kabakukholwa lokhu ngenxa yokuthi bake baphathwa kubi. Kulento ekuzwisa ubuhlungu yini eyakwehlelayo, wacina usuzibona ungasimuntu walutho? Nxa kunjalo, ungenzani ukuze ungathandabuzi ukuthi uligugu kuJehova?
2 Mhlawumbe okunye okungakunceda yikuhlola izindaba eziseBhayibhilini ezitshengisa ukuthi uJehova ufuna abantu baphathwe njani. Ezinye indaba eziseBhayibhilini zitshengisa ukuthi uJesu wayebathanda abantu njalo ebahlonipha. Lokhu kutshengisa ukuthi abantu abazikhangelela phansi baligugu kuJehova lakuJesu. (Joh. 5:19; Heb. 1:3) Esihlokweni lesi sizabona ukuthi uJesu wabancedisa njani abanye ukuthi bazibone beligugu kuJehova. Sizaphinda sibone lokuthi kuyini okungasinceda singathandabuzi ukuthi siligugu kuJehova—Hag. 2:7.
UJESU WABANCEDISA NJANI ABABEZIKHANGELELA PHANSI?
3. UJesu wabancedisa njani abantu ngesikhathi eseGalile?
3 Ngesikhathi uJesu etshumayela eGalile, abantu abanengi babuya bevela endaweni ezitshiyeneyo, abanye bezokwelatshwa ikanti abanye bezomlalela etshumayela. UJesu wananzelela ukuthi abantu laba babethwele nzima ‘benjengezimvu ezingelamelusi.’(Mat. 9:36) Abakhokheli benkolo babebakhangelela phansi abantu laba besithi “baqalekisiwe.” (Joh. 7:47-49) Kodwa uJesu wabatshengisa ukuthi baqakathekile, wabafundisa njalo welapha ababegula. (Mat. 9:35) Kuyazicacela sibili ukuthi wayefuna ukuncedisa abantu abanengi, yikho waqeqetsha abafundi bakhe ukuthi batshumayele waphinda wabanika lamandla okwelapha abagulayo.—Mat. 10:5-8.
4. Ukucabanga ngendlela uJesu ayebaphatha ngayo abantu kuzakunceda njani?
4 Indlela uJesu aphatha ngayo abantu itshengisa ukuthi yena loYise bayabaqakathekisa kakhulu abantu kungelani lokuthi umphakathi ubabona njani. Nxa kuyikuthi lawe uzikhangelela phansi, zama ukucabanga ukuthi uJesu wabaphatha njani labo ababezibona bengasibantu balutho. Ukwenza njalo kuzakunceda ubone ukuthi lawe uqakathekile kuJehova.
5. Kuyini okwakukhathaza owesifazana okukhulunywa ngaye kuMakho 5:25, 26?
5 UJesu wayefundisa amaxuku abantu aphinde ancedise umuntu ngamunye. Ngokwesibonelo, ngesikhathi etshumayela eGalile wahlangana lowesifazana owayeseleminyaka engu-12 esopha. (Mak. 5:25) Umthetho kaMosi wawusithi owesifazana owophayo ungcolile futhi loba ngubani owayemthinta wayesiba ngongcolileyo. Lokhu kufanele ukuthi kwakumenza angakhululeki ukuya ebantwini. Kanti njalo wayengavunyelwa ukuyakhonza labanye. (Levi. 15:19, 25) Kumele ukuthi lokhu kwakumkhathaza kakhulu futhi kumqeda amandla.—Mak. 5:26.
6. Kuyini okwenziwa ngowesifazana lo ukuze asile?
6 Owesifazana lo wayethwele nzima sibili. Wayefisa ukuthi uJesu amelaphe kodwa kazange amlande amcele ukuthi amelaphe. Engxenye kwakumyangisa ukuya ebantwini kumbe ecabanga ukuthi uJesu kasoze emncedise ngenxa yokuthi wephule umthetho. Yikho wangena phakathi kwexuku labantu wafika wathinta isembatho sikaJesu ekholwa ukuthi wayezasila. (Mak. 5:27, 28) Lakanye wasila sibili. Kusenjalo, uJesu wezwa ukuthi amandla ayephumile kuye, wasebuza ukuthi ngubani owayemthintile. Owesifazana lo kazange atshone ezilazila kodwa wahle waphumela egcekeni, wavuma ukuthi nguye owayemthintile.
7. UJesu wamphatha njani owesifazana lo? (UMakho 5:34)
7 UJesu wazibonela ukuthi uvalo lumtshaye lwameqa owesifazana lo. (Mak. 5:33) Manje wamphatha njani? Kazange amkhahlameze kodwa watshengisa ukuthi uyamhlonipha, waze wambiza ngokuthi “ndodakazi.” (Bala uMakho 5:34.) Lo nguye kuphela owesifazana eBhayibhilini uJesu ambiza ngokuthi ‘ndodakazi.’ Engxenye lokhu wakwenza ukuze aduduze owesifazana lo esenzela ukuthi ahlaliseke ngoba wayebona ukuthi ukhathazekile lokuthi wayesesaba kakhulu. Ubona angani owesifazana lo wezwa njani? Kufanele ukuthi wazibonela ukuthi uYise osezulwini uyamqakathekisa.
8. UMaria wahlangana labuphi ubunzima?
8 Lalamuhla, banengi kakhulu abafowethu labodadewethu abathwele nzima ngenxa yokugula lokukhubazeka. Ngokwesibonelo kulodadewethu okuthiwa nguMaria,a oliphayona lesikhathi sonke eBrazil. UMaria wazalwa egogekile, kalanyawo lesandla senxele. Uthi: “Abanye esikolo babengithwalise nzima, bengiqala futhi benginika lamabizo. Labangekhaya babengangiboni ukuthi ngingumuntu.”
9. Kuyini okwanceda uMaria wazibonela ukuthi uqakathekile kuJehova?
9 Kuyini okwanceda uMaria ukuthi angazikhangeleli phansi? Wafunda iBhayibhili wasesiba nguFakazi kaJehova. Abafowethu labodadewethu ebandleni ayekulo bamduduza bamnceda wabona ukuthi uJehova uyamqakathekisa. Uthi: “Lingaphuma lize liyetshona ngilokhu ngilandisa ukuthi uzibani ungincedise njani. Ngimbonga ngingaqedi uJehova ngoba wanginika abafowethu labodadewethu abangithandayo.” Abazalwane bamnceda wazibonela ukuthi uligugu kuJehova.
10. Yibuphi ubunzima uMariya Magadalena ayephakathi kwabo? (Khangela lemifanekiso.)
10 Ukhona yini omunye owayezikhangelela phansi owancediswa nguJesu? IBhayibhili lisitshela ngoMariya Magadalena owayelamadimoni ayisikhombisa. (Luk. 8:2) Njengoba wayelamadimoni, kungenzakala ukuthi wayesenza izinto ezingaqedakaliyo. Lokhu kwakungabe kusenza abantu bangahlaliseki nxa eseduze bacine bemninela khatshana. Owesifazana lo wayephakathi kobunzima obukhulu. Kufanele ukuthi wayesesaba futhi ezitshela ukuthi abantu abalandaba laye. Ngemva kokukhitshwa amadimoni la ayemthwalise nzima, waba ngumlandeli kaJesu. Kuyini okunye uJesu akwenzayo okwanceda uMariya Magadalena wabona ukuthi uJehova uyamqakathekisa?
UJesu wamncedisa njani uMariya Magadalena wabona ukuthi uqakathekile kuJehova (Khangela indima 10-11)
11. UJesu wamncedisa njani uMariya Magadalena wabona ukuthi uJehova uyamqakathekisa?(Khangela lemifanekiso.)
11 Kwakusithi nxa uJesu labafundi bakhe besiyatshumayela kwezinye izindawo bahambe loMariya Magadalena.b Kufanele ukuthi kunengi kakhulu akufundayo ngesikhathi uJesu efundisa. Ngelanga uJesu avuswa ngalo wabonakala kuMariya Magadalena wasemtshela ukuthi ayebikela abafundi bakhe ukuthi usevusiwe. Kufanele ukuthi konke lokhu kwenza wasala engathandabuzi ukuthi uJehova kamthontisi!—Joh. 20:11-18.
12. Kuyini okwenza uLidia wacabanga ukuthi akulamuntu ongamthanda?
12 Lalamuhla banengi abantu ababona angathi abalancedo. Lokho yikho kanye okwakucatshangwa ngomunye udadewethu okuthiwa nguLidia ohlala eSpain. Uthi unina wavele wamzonda esasesiswini ngoba kulesikhathi lapho ake wacabanga khona ukukhipha isisu. Ngitsho lalapho esezelwe, unina wayengamnanzi futhi wayehlala emtshingela. Uthi: “Njengomuntu owakhula engathandwa, ngihlala ngilwisa ukwenza izinto ezizakwenza abanye bangithande futhi babe ngabangane bami. Ngangizitshela ukuthi akulamuntu ongafisa ukuba ngumngane wami ngoba ngakhula ngitshelwa ukuthi ngingumuntu omubi.”
13. Kuyini okwanceda uLidia wabona ukuthi uqakathekile kuJehova?
13 ULidia wathi eseqalise ukufunda iBhayibhili wananzelela ukuthi uJehova uyamqakathekisa. Kuyini okwamnceda wabona ukuthi uligugu kuJehova? Ukuthandaza, ukubala iBhayibhili kanye lalokho ayekwenzelwa ngabanye ebandleni kwamnceda kakhulu. Uthi: “Umkami uhlala engitshela ukuthi uyangithanda njalo uhlala engikhumbuza izinto ezinhle engizenzayo. Kanti njalo labangane bami bahlala bengikhuthaza.” Ebandleni lenu bakhona yini abazikhangelela phansi njengoLidia? Nxa ungabakhuthaza futhi ubaphathe kuhle bazabona ukuthi baligugu kuJehova.
UZIBONA NGENDLELA UJEHOVA AKUBONA NGAYO YINI?
14. Sifundani ku-1 Samuyeli 16:7? (Khangela lebhokisi elithi “Kungani UJehova Ebaqakathekisa Abantu Bakhe?”)
14 Khumbula ukuthi uJehova kakuboni ngendlela abantu bomhlaba lo abakubona ngayo. (Bala u-1 Samuyeli 16:7.) Abantu abanengi emhlabeni lo baqakathekisa umuntu kusiya ngokuthi ulemali yini, ukhangeleka njani kumbe ukuthi ufunde okungakanani. Kodwa lokho ayisikho ngitsho okukhangelwa nguJehova. (Isaya. 55:8, 9) Ngakho ungazikhathazi ngalokho okucatshangwa ngabantu kodwa zama ukuzibona ngendlela uJehova akubona ngayo. Okungakunceda yikubala ngabantu ababezikhangelela phansi okukhulunywa ngabo eBhayibhilini. Abanye babo ngu-Elija, uHana loNawomi. Okunye ongakwenza yikubhala izinto ezike zenzakala empilweni yakho ezitshengisa ukuthi uJehova uyakuthanda njalo uyakuqakathekisa. Mhlawumbe ungabala lezihloko ezikhuluma ngendaba yokuzikhangelela phansi.c
15. Kungani uJehova wayemqakathekisa uDanyeli? (UDanyeli 9:23)
15 Hlala ukhumbula ukuthi uJehova uyakuqakathekisa omenzela khona. Kwake kwaba lesikhathi lapho uDanyeli ayekhathazeke khona kakhulu futhi edanile (Dan. 9:20, 21) Manje uJehova wamncedisa njani? Wathuma ingilosi yakhe uGabriyeli ukuthi iyemkhumbuza ukuthi uqakathekile lokuthi imithandazo yakhe izwakele. (Bala uDanyeli 9:23.) Kungani uJehova wayemqakathekisa kangaka uDanyeli? Okunye yikuthi wayethembekile futhi esenza okulungileyo. (Hez. 14:14) UJehova wafaka indaba le eBhayibhilini ukuze isiduduze. (Rom. 15:4) Lawe uJehova uyakuthanda kakhulu futhi uyayilalela imithandazo yakho njalo uyakuqakathekisa konke omenzela khona.—Mik. 6:8; Heb. 6:10.
16. Kuyini okungakunceda ungathandabuzi ukuthi uJehova uyakuthanda?
16 Hlala ukhumbula ukuthi uJehova uyakuthanda. UJehova kahlali ekulandelela edinga amaphutha owenzayo kodwa ufuna ukukuncedisa. (Hubo. 130:3; Mat. 7:11; Luk. 12:6, 7) Ukucabangisisa ngothando lukaJehova sekuncede abantu abanengi bekela ukuzikhangelela phansi. Omunye udadewethu okuthiwa nguMichelle ohlala eSpain wayethwele amagabha avuzayo. Umkakhe wayehlala emhlukuluza, emtshela amazwi abuhlungu kakhulu futhi lokho kwenza wacina ezibona angani kaqakathekanga. Uthi, “Nxa ngingezwa angathi angisengumuntu walutho, ngiyazama ukukhumbula indlela uJehova angithanda ngayo kuze kube angathi ngiyambona engiphethe ngezakhe izandla.” (Hubo. 28:9) Omunye udadewethu okuthiwa nguLauren ohlala eSouth Africa uthi, “Nxa uJehova engidonsele kuye futhi wangincedisa ukuthi ngihlale ngiseduze kwakhe okweminyaka yonke le, waphinda wangipha lomsebenzi wokufundisa abanye, kutsho ukuthi uyangiqakathekisa kakhulu.”—Hos. 11:4.
17. Kuyini okungakunceda uqiniseke ukuthi uJehova uyakwamukela? (IHubo 5:12) (Khangela lomfanekiso.)
17 Ungathandabuzi ukuthi uJehova uyakwamukela. (Bala iHubo 5:12.) UDavida wathi uJehova ubavikela “ngehawu elikhulu” abantu bakhe. Ukwazi ukuthi uJehova uyakwamukela kuzakunceda nxa usubona angathi usekulahlile. Manje kuyini okungakunceda ubone ukuthi uJehova uyakwamukela? Sibonile ukuthi eLizwini lakhe bukhona ubufakazi obutshengisa ukuthi uyabathanda abantu bakhe. Uphinda asebenzise abadala bebandla, abangane bethu kanye labanye nje ukuze asiqinisekise ukuthi uyasiqakathekisa. Kumele wenzeni nxa abanye bekukhuthaza?
Ukwazi ukuthi uJehova uyasamukela kuzasinceda ukuthi singazikhangeleli phansi (Khangela indima 17)
18. Kungani kuqakathekile ukuvuma nxa abanye bekuncoma?
18 Nxa abangane bakho bekuncoma ungacabangi ukuthi bazama ukukuvala amehlo. Phela bona bayakwazi futhi bayakuthanda kakhulu. Okunye okumele ukukhumbule yikuthi uJehova engabe esebenzisa bona ukuze akutshengise ukuthi uyakuqakathekisa njalo uyakwamukela. UMichelle esike saxoxa ngaye uthi: “Khona akulula kodwa lokhe ngifunda kancane kancane ukuvuma nxa abanye bengincoma. Ngumqanso sibili kodwa ngiyakwazi ukuthi yikho kanye uJehova afuna ngikwenze.” Abadala bebandla bamkhuthazile kakhulu uMichelle. Sikhuluma nje useliphayona lesikhathi sonke futhi uyancedisa eBhetheli.
19. Kuyini okwenza ungathandabuzi ukuthi uligugu kuJehova?
19 Sikwazi mhlophe ukuthi uBaba wethu osezulwini uyasithanda njalo uyasiqakathekisa. (Luk. 12:24) Kwangathi ungahlala ukhumbula ukuthi uligugu kuJehova futhi uncedise labanye ukuthi bangakuphumputhi lokhu!
INGOMA 139 Zibone Lapho Konke Sekukutsha
a Amanye amabizo atshintshiwe.
b UMariya Magadalena wayengomunye wabesifazana ababehamba loJesu ngesikhathi etshumayela. Abesifazana laba babezidela bancedise uJesu labaphostoli bakhe ngalokho ababelakho.—Mat. 27:55, 56; Luk. 8:1-3.
c Khangela isahluko 24 sebhuku elithi Sondela KuJehova njalo ubale lamavesi angaphansi kwesihloko esithi “Ukuzikhangelela Phansi” ebhukwini elithi Imibhalo Engakunceda Ukhonze UJehova.