Masoko Akanaka ari Kuparijiswa Kudini?

Mbaimbai pano, Jehovha unozoshandisa Umambo wake kuti apeje matambujiko edu ese. Masoko aya, akanaka maningi, tinoavhunjawo vamweni. Jesu waida kuti vateveri vake vazovhunjawo vamweni masoko aya akanaka! (Mateu 28:19, 20) Zvapupu zva Jehovha zviri kutevejeresa kudini zvakabhuiwari ndi Jesu?

1. Mateu 24:14 iri kukwanirisika kudini mazuva ano?

Jesu wakabhuya kuti: ‘Masoko akanaka o Umambo anozoparijirwa munyika yese.’ (Mateu 24:14) Zvapupu zva Jehovha zvinoita basa iri rinokosha zvasidakala. Tinoparijira masoko akanaka munyika yese, mu ndimi jinodarika 1000! Basa iri iguru, zvinotoda kushanda ngo simba nokuva takarongeka. Notainga tisina besero la Jehovha, atisaizorikwanisa tega.

2. Tinoitenyi kuti tikwanise kuparijira vandhu vese?

Tinoparijira kese kunowanika vandhu. Tinoparijirawo ‘pamuzi ngo muzi’ inga zvaiizwa ngo Vakristu vopakutanga. (Mabasa 5:42) Maitire aya akarongeka, ngokuti tinokwanisa kuparijira mamiliyau ovandhu gore ngo gore. Ngo ndava yo kuti vandhu avawaniki mumamuzi mavo nguva yese, tinoparijirawo mu ndau jakawanda vandhu. Nguva yese tinopsaka mukana wokuparijira vandhu ngo zva Jehovha nokuda kake.

3. Ndiyani unodikana kuita basa iri lokuparijira masoko akanaka?

Basa lokuparijira masoko akanaka ngo lo Mukristu wese wocokwadi. Katiri, basa iri rinokosha maningi. Umwe nga umwe wedu anoita zvese zvaanokona mubasa iri lokuparijira, ngo kuti tinoda kuti vandhu vese vapone. (Verenganyi 1 Timoti 4:16.) Atibhadharwi ngo kuita basa iri lokuparijira, ngokuti Bhaibheri rinoti: ‘Makapuwa mahala, ipanyiwo mahala.’ (Mateu 10:7, 8) Avasi vese vanozwa masoko atinoparijira. Asi tinolamba tesiparijira ngokuti tinoda kuzwira Jehovha no kumudakajisa.

JIJANYI ZVIZINJI

4. Yesu tinoshanda ngo simba kuti tiparijire vandhu vese

VHIDHIYO: “Kuparijira ku Ndau jo Ndhambo Jiri Munyika” (7:33)

• Munowona kudini ngo zvinoizwa ngo Zvapupu zva Jehovha kuti zviparijire vamweni?

Verenganyi Mateu 22:39 na VaRoma 10:13-15, mapeja bhuisananyi ngo muvhunjo jinotevera:

• Basa redu lokuparijira rinokhombijisa kudini kuti tinoda vamweni vedu?

• Jehovha unozwa kudini paanowona vandhu vake vesiparijira masoko akanaka? —Wonanyi vhesi 15.

5. Tinoshanda pamwepo na Mwari

Tino zviro zvakawanda zvinokhombija kuti Jehovha uri kutungamirira basa lake. Wonanyi zvakaitika kuno hama imweni inozwi Paul yo ku Novha Zelandhiya. Zuva rimweni comadeko, hama iyi payaiparijira muzi ngo muzi, yakagumira mwanakaji umweni wainga apeja kuita mukumbiro comangwanani o zuva iri. Mwanakaji uwu wainga aita mukumbiro kuna Mwari esishandisa zina la Mwari lo kuti Jehovha, esikumbira kuti mundhu ariwese amuvhakacire. Hama Paul vakati: “Papera nguva ndhatu apera kuita mukumbiro, ndakazoguma pamuzi pake.”

Verenganyi 1 VaKorinde 3:9, mapeja bhuisananyi ngo muvhunjo unotevera:

• Zvakaitikari ku Novha Zelandhiya, zvinokhombijisa kudini kuti Jehovha uri kutungamirira basa lokuparijira?

Verenganyi Mabasa 1:8, mapeja bhuisananyi ngo muvhunjo unotevera:

• Ngenyi tinoda kuti Jehovha atibese mubasa lokuparijira?

Maizviziva here?

Vhiki rimwe nga rimwe, panomusangano watinoita wopakati povhiki, unotijijisa zvatingaita mukuparijira. Kudai makambopinda musangano uwu, munotiwo kudini ngo majijisirwe atinoizwa kuparijira?

6. Tinozwira mutemo wotakapuwa ndi Mwari wo kuti tiparijire

Mumakore akatanga Cikristu, vavengi vakaeja kuemesa basa iri lokuparijira laiizwa ngo vateveri va Jesu. Vakristu ava, ‘vakarwira citenderwa cavo cokuparijira masoko akanaka no kushandisa mutemo kuti vasalambijwa.’ (VaFiripi 1:7) Izvi ndizvona zviri kuizwawo ngo Zvapupu zva Jehovha mazuva ano.a—Wonanyi masoko opasi.

VHIDHIYO: Kurwira Citenderwa Cokuparijira Masoko Akanaka (2:28)

Verenganyi Mabasa 5:27-42, mapeja bhuisananyi ngo muvhunjo unotevera:

• Ngenyi atizosii kuita basa lokuparijira?—Wonanyi mavhesi 29, 38 na 39.

TAJIJENYI

Tajija kuti Jesu wakavhunja vajiji vake kuti vaparijire masoko akanaka kuvandhu vomajinja ese. Tajijazve kuti Jehovha urikubesa vanamati vake kuti vakwanise kuita basa iri lokuparijira.

Muvhunjo Jokuhwirijira

• Masoko akanaka arikuparijiswa kudini munyika yese?

• Basa redu lokuparijira rinokhombijisa kudini kuti tinoda vandhu?

• Munolangarira kuti basa redu lokuparijira rinoviisa mudakalo here? Ngenyi madalo?

JIJANYI ZVIMWENI

Wonanyi kuti Zvapupu zva Jehovha zviri kuparijirisa kudini mumathaundi makuru.

Kuparijira Mundau Jino Vandhu Vakawanda ku Paris (5:11)

Zvapupu zva Jehovha zviri kuitisa kudini kuti zvibesere vatizi vo hondo?

Kubesa Vanonjala yo Zvokunamata (5:59)

Margareti wakapira upenyu wake kuti aparijire masoko akanaka. Wonanyi kuti zvaakaitari zvakaitisa kudini kuti zvimuviisire mudakalo.

Ndiri Kudakala ngo Zvandakakheta (6:29)

Verenganyi ngo zvo shwiro jimweni jomumatare jakabesera kuti basa lokuparijira rilambe resienderera mberi.

“Vapariji vo Umambo Vanoendesa Ndava Javo Kumatare” (Umambo hwaMwari Huri Kutonga!, chitsauko 13)