Muvhunjo Usikanesi Wokuti Mundhu Wese Unouiita

Hanzvaji Mariya no mwamuna wavo Johani,a vanogara kunyika yokuti masoko akanaka anoparijirwa ngo vashandi vakawanda vo kunyika yo kuFilipina. Munguva yo COVID-19, hanzvaji Mariya vakabudirira pa kutanga zvijijo zvo Bhaibheri haiwa mu nyika yavo basi asi no mu nyika jimweni. Vakazviitisa kudini?

Hanzvaji Mariya vaivhunjisa vajiji vavo vo Bhaibheri kuti: “Munoziva mundhu umweni ungada kujija Bhaibheri here?” Kudai akati hina, vaimuvhunjisa kuti: “Ungandivhunja kaari here?” Kuita muvhunjo jakareruka, kakawanda kakona kuno mugumisiro wakanaka. Ngenyi? Vandhu povanozwa soko la Mwari, kakawanda vanoda kuvhunja vamweni zvovajija kubatanijawo vo pambhuri no shamwari javo. Kuita muvhunjo iji jakareruka kuno mugumisiro yakadini?

Mujiji wo Bhaibheri wa hanzvaji Mariya unozwi Jasmini wakamubesa kuti awane vajiji vapsa valongomuna. Umwe wakona unozwi Kristina, wakadakarira maningi zvaaijija uye wakakumbira hanzvaji Mariya kuti vajije kaviri pavhiki. Hanzvaji Mariya pavakavhunjisa kuti: Unoziva here mundhu umweni ungada kujija Bhaibheri? Kristina wakati: “Hina ndinozomukhomija shamwari jangu.” Pasure pomavhiki manganani, Kristina wakakhombija shamwari jake mulongomuna Jaida kujija. Ngo kuhamba ko nguva, Kristina wakakhombija shamwari jake jimweni, shamwari jakejo jaindokhombijawo vamweni zveindodalo.

Kristina waida kuti ukama wake uri Filipina ujijewo Bhaibheri. Ngo kudalo, Kristina wakabhuya no mwana wake Andreya kuti ajijewo Bhaibheri. Asi pakutanga Andreya wailangarira kuti: ‘Zvapupu zva Jehovha iceciwo hayo, azvitendi muna Jesu uye zvinoshandisa sandujo yokare basi.’ Pasure po kujija kamwe basi, mulangariro jake jisito kunaka jakapera. Paainga esijija wakashamisika maningi zvokuti wakaguma pa kubhuya kudai: “Kudai Bhaibheri resibhuya hezvi, zvinobhuya kuti ngolo cokwadi!”

Pa kuhamba ko nguva Andreya wakakhombija hanzvaji Mariya shamwari jake mbiri na umwe waaishanda naye kubasa, votanga kujija Bhaibheri. Cimwenizve, thaji va Andreya vaiinga vari bofu vaizwi Angela, vakatanga kuzwa zvaijijwa, hanzvaji Mariya vasikazvizivi. Pazuva rimweni, Angela wakakumbira Andreya kuti avhunje hanzvaji Mariya kuti waidawo kujija Bhaibheri. Angela waidakarira zvaaijija. Ngo mweji umwe, iyena wakakanda mavhesi akawanda uye waida kujija kalongomuna pavhiki! Angela esibeswa ndi Andreya wakatanga kupinda musangano jese esishandisa foni.

Hanzvaji Mariya pavakazwa kuti mwamuna wa Kristina, Joshuwa waingepowo povaijija, hanzvaji Mariya wakamuvhunjisa kuti: Maidakarirawo kujija Bhaibheri here? Joshuwa wakati: “Ndinoviya hangu koozwa asi musandiitira muvhunjo, mukandiitira muvhunjo basi ndinobuda.” Povakatanga kujija, povainga no 5 minutu basi, iyena wakaita muvhunjo jakawanda kudarika ja Kristina.

Muvhunjo wakareruka wa hanzvaji Mariya, wakaita kuti vandhu vajije Bhaibheri. Ngo kuwanda ko vandhu vaida kujija, ivona vakaita nasiriro yokuti hama no hanzvaji jimweni jijije navo. Kuvasanganisa vese, hanzvaji Mariya vakatanga kujija Bhaibheri no vandhu vanokwana 28, mu nyika mulongomuna jakasina-siyana.

Jasmini, mujiji wabhuiwaya mu ciitiko ici, wakabhabhajijwa muna Abril wo 2021. Kristina wakabhabhatijwa muna Maio wo 2022 uye paakapeja wakahwirira ku Filipina koogala no mbhuri yake. Vajiji vaviri vaakakhombijwa ndi Kristina vakabhabhatijwawo. Angela aato kupeja mweji jakawanda wakabhabhatijwawo uye zvino waakushanda inga piyona wo nguva jese. Mwamuna wa Kristina Joshuwa no mwana wake Andreya uye novajiji vamweni vo Bhaibheri vari kuenderera mberi vesikula muno zvo kunamata.

Mu zana lo kutanga, masoko akanaka aiparijirwa ngo kukasika pakati po mbhuri no shamwari. (Johani 1:41, 42a; Mabasa 10:24, 27, 48; 16:25-33) Munozviwonawo zvakadini kuvhunjisa vajiji venyu vo Bhaibheri no vandhu vamweniwo vamunodakarira kuti: “Munozivawo vamweni vangada kujija Bhaibheri here?” Munoziva here zvijijo zvingana zvingatangwa ngo ndava yokuita muvhunjo uwu wakareruka?