‘Dainjanyi Vakuru vo Ungano’

1. Jehovha unokhombijisa kudini kuti magundata ake anokosha kaari?

MAGUNDATA a Jehovha anokosha kaari. Iyena wakamatenga ngo ngazi ya Jesu uye wakagaja vakuru voungano kuti vamangwarire. (Mabasa 20:28) Mwari unoda kuti vakuru vabate magundata ake ngo unyasha. Vesitungamirirwa ndi Kristu, vakuru vanotondhoja hama no hanzvaji no kuvabesa kuti varambe vakagondeka kuna Jehovha.—Isa. 32:1, 2.

2. Maererano na (Ezekiyeri 34:15, 16) Jehovha unonyanya kuda kubesa vapi?

² Jehovha unoneseka maningi ngo magundata ake ese, asi kunyanya vaya vanonga vesitambujika. Esishandisa vakuru, iyena unobesa vari kutambujika kudivi ro kumweya. (Verenganyi Ezekiyeri 34:15, 16.) Ngo kudaro, Iyena unoda kuti tipsake besero patinonga tesirida. Pa mugariro iji, kunja kokuita basi mukumbiro kuna Mwari kuti atibese, tingakumbirazve besero kuvahavisi no vajijisi vo muungano.—VaE. 4:11, 12.

3. Tese tingabesereka kudini ngo basa rinoizwa ngo vakuru?

³ Mu cijijo cino, tinozojija ngo nasiriro ya Mwari yokuti tiwane besero ro kumweya pesishandiswa vakuru. Tinozodavira muvhunjo iji: Ngapapi patinodikana kukumbira besero vakuru? Ngenyi tinodikana kuita izvi? Uye vakuru vanotibesesa kudini? Kunyange kuti atisati tasangana no zvineso zvo kumweya, mupinguro jo muvhunjo iji jinozoengejera kukoshesa katinoita nasiriro ya Mwari uye zuva rimweni jingazoponesa upenyu wedu.

NGAPAPI PATINODIKANA “KUKUMBIRA BESERO VAKURU”?

4. Ngenyi tingaguma pambhejiso yokuti Jakobe 5:14-16, 19, 20 inobhuira ndhendha yo kumweya? (Wonanyi foto.)

⁴ Mujiji Jakobe wakatsanangura ngo urongwa wa Jehovha kuti atibese uye iyena wakanyora kudai: ‘Uripo anowaja pakati penyu here? Ngaadainje vakuru vo ungano.’ (Verenganyi Jakobe 5:14-16, 19, 20.) Fundo rinokhombija kuti Jakobe waibhuya ngo kuwaja ku mweya. Inga muezaniso, ari kuwaja aaripi kuvhunjwa kuti adainje medhiko asi kudaija vakuru. Kunja kaizvi, Jakobe unotsangurazve kuti mundhu unowaja ungaita nane, kudai zvishaishi zvake zvikaregererwa. Pamugariro jimweni, mudanyu jingadiwa kuti tirapwe kudivi ro kumweya, jakatojana no zvinodiwa patinonga tesiwaja kudivi ro kunyama. Patinonga tesiwaja kudivi ro kunyama tinoenda ka medhiko, tinomuvhunja zvatinonga teizwa uye tinoita zvese zvaanotivhunja. Mukutojanawo, patinonga tesiwaja kudivi ro kumweya, tinopsanga mukuru tomuvhunja cineso cedu uye tinozoita mukuzwirana no mazano o Bhaibheri aanonga atipa.

5. Tingazvizivisa kudini kuti ushamwari wedu na Jehovha uri kutondhora?

⁵ Jakobe citsauko 5, cinotivangisa kuti tibhuye no vakuru paya patinoona kuti tinoda besero kuti tivangise kutenda kedu. Ngozvo ungwaru, kuwana besero tisati tamosha ushamwari wedu na Mwari! Tinodikana kuva takagondeka pacedu. Zvinyorwa zvinotingwaja kuti tingazvicengeja pacedu ngo pamusoro po mugariro wedu wo kumweya. (Jak. 1:22) Makristu amweni okutanga oku Sardhe, akaita cishaishi ici uye Jesu wakavangwaja ngo pamusoro po mugariro wavo wo kumweya. (Zvak. 3:1, 2) Njira imweni yo kupsakisisa utano wedu wo kumweya ngo yo kuezanisa manamatiro atinoita zvino no otaiita kare. (Zvak. 2:4, 5) Tingazvivhunjisa kudai: ‘Mudakaro wangu wokuverenga Bhaibheri no kurangarijisisa wapunguka here? Andisanasiriri no kuenda kumusangano jese here? Kuvangisira kangu mubasa ro kuparijira kuri kutondhora here? Ndisiri kudakarira kuparijira inga zvandaiita kare kana kuti ndiri kupeja nguva yangu pakuita zvimweni?’ Kudai umwe mupinguro wo muvhunjo iji ngowo kuti hina, izvi zvinokhombija kurembejeka, kudai zvikatama kunasirirwa zvinozoshatisisa. Kudai tikazvikorera kuzvinasirisa kana kuti kurembejeka uku katiita kuti tiite cishaishi, tinodikana kukumbira besero vakuru.

6. Zvicinyi zvinodikanwa kuizwa ngo vaya vanonga vaita cishaishi cikuru?

⁶ Zvishaishi zvimweni zvakashatisisa zvingaita kuti mundhu avhiswe muungano kudai akatama kukhauya. Kudai tikaita cishaishi tinodikana kubhuya no vakuru. (1 VaK. 5:11-13) Kudai mundhu akaita cishaishi cikuru, aangakwanisi kunasirira ushamwari wake na Jehovha ari ega. Kuti aregererwe ndi Jehovha ngo muripo, unodikana kukhombija ‘mabasa ake ngo kukhauya.’ (Mabasa 26:20) Mabasa aya anobatanija kuvhunja vakuru cishaishi cikuru caakaita.

7. Ndiani unoda maningi besero ro vakuru?

⁷ Vakuru avabesi basi vanonga vaita cishaishi cikuru, asi ivona vanobesawo vakarembejeka kumweya. (Mabasa 20:35) Inga muezaniso, zvinganesa kuti imwimwi murwisane no zvido zvakashata, kudai kuti pomainga musati majija cokwadi, mainga makajaera kushandisa mutombo jinodhakwisa, maiwona zvo umiti-mitu kana kuti maiita uhure. Imwimwi amudikani kuhwisana no zvineso izvi mega. Imwimwi mungakheta kubhuya no mukuru umwe kuti azwe zvineso zvenyu, ungamupa mazano anoshanda uye no kumuthembesa kuti mungadakajisa Jehovha, ngo kuramba kuita maererano no zvido zvenyu zvakashata. (Mup. 4:12) Zvingaita kuti imwimwi muri kuneseka ngo kurwisana no zvido zvakashata, vakuru vangamuejurira kuti Jehovha unodakara ngo kukumbira komaita besero, zvinokhombija kuti munozvidodokesa, amuthembi simba renyu asi munothemba Jehovha.—1 VaK. 10:12.

8. Zvishaishi zvipi zvatisikadikani kuvhunja vakuru?

⁸ Asipi zvineso zvese zvatinodikana kuenda koovhunja vakuru ngo pamusoro po utano wedu wo kumweya. Inga muezaniso, ngatimboti mabhuya magama anokhugunya hama kana kuti hanzvaji, mbhera moguma pakutama kusengerera. Kunja kokovhunja mukuru, imwimwi mungatoshandisa mazano a Jesu ngo pamusoro po kuva no runyararo no hameyo kana hanzvajiyo. (Mateu 5:23, 24) Mungatopsakisisa ngo shwiro yo kuva makapfava, kusengerera uye kujibata, kuti mukwanise kuzokhombija undhu uwu wakanaka muno ramangwana. Zvakajeka kuti, imwimwi kudai musati makwanisa kupeja cineso muri mega, mungakumbira kubeswa ngo mukuru. Mutsamba yake ku VaFiripi, mupostori Pauro wakakumbira hama imweni aito kubhuiwa zina rayo kuti ibese Evhodhiya na Sintike kunasirira kutama kuzwana kavo, mukuru umwe wo muungano yenyu ungakwanisa kumubesa inga zvakaitikari ku ungano iyi.—VaF. 4:2, 3.

NGENYI TINODIKANA KUKUMBIRA BESERO VAKURU?

9. Ngenyi tisingadikani kusiya kuti kupseruka kutiite kuti titame kookumbira besero vakuru? (Zvirevo 28:13)

⁹ Tinodikana kuva no kutenda uye takashinga kuti tikumbire kubeswa patinonga taita cishaishi cikuru, kana kuti atiripi kukwanisa kurwisana no zvineso zvo kuremba pakunamata. Atidikani kusiya kuti kupseruka kutiite kuti titame kuvhunja vakuru. Ngenyi? Ngo kutevejera nasiriro ya Jehovha, tinokhombija kuti tinothemba ndhungamiriro jake kuti tive no kutenda kakavanga. Tinozviziva kuti tinoda besero rake patinonga tooda kuwa. (Ps. 94:18) Patinoita zvishaishi tinoashira unyasha wa Mwari kudai tikavhunja vakuru uye tosiya kuitazve zvakashata.—Verenganyi Zvirevo 28:13.

10. Zvicinyi zvingaitika kudai tikaviga zvishaishi zvedu?

¹⁰ Kudai tikavhunja vakuru zvishaishi zvatakaita, Jehovha ungatiregerera uye tingavazve no ushamwari wakavanga naye. Asi kudai tikatama kubhuya no vakuru tizotambujika maningi ndizvona. Mambo Dhavhidhi paakaeja kuviga cishaishi cake, iyena wakaneseka maningi mu mwoyo make uye no kunyama. (Ps. 32:3-5) Kudai inga ndhendha kana kuti cironda cikatama kurapwa cinonyanyisa maningi, mukutojanawo cineso co kumweya kudai cikatama kunasa kurapwa cinonyanyisa. Jehovha aadi kuti izvi zviitike, ngo kudaro iyena unotivhunja kuti tibhuye no vakuru vaanoshandisa kuti vatibese kuti tive no ushamwari ngo papsa.—Isa. 1:5, 6, 18.

11. Vamweni vangapsasiswa kudini kudai tikaviga zvishaishi zvakakura?

¹¹ Kudai tikaviga cishaishi cakakura catinonga taita, zvingapsasa vamweni. Zvinoita kuti Mwari avhise mweya wake kuunganoyo uye zvopeja runyararo wo hama no hanzvaji. (VaE. 4:30) Mukutojanawo, kudai tikaziva kuti ari wese muungano waita cishaishi cakakura, tinodikana kuvhunja mundhuwo kuti abhuye no vakuru ngo pamusoro po shwiroyo.a Kudai tikaviga cishaishi co mundhu umweni tinovawo no ndava. (Rev. 5:1) Rudo redu kuna Jehovha rinotitora kuti tibhuye cokwadi. Ngo kudaro, tinobesa ungano kuti irambe yakacena uye nokuita kuti vashaishi vavezve no ushamwari wakanaka na Jehovha.

VAKURU VANOTIBESESA KUDINI?

12. vakuru vangabesesa kudini vakarembejeka kumweya?

¹² Bhaibheri rinobhuya kuti vakuru vanodikana kubesa vaya vanonga vesida kubeswa kuti vave no ushamwari na Jehovha. (1 VaT. 5:14) Kudai mukaita cishaishi, vakuru vangaita muvhunjo kuti vazwe zvamunorangarira uye no mazwire enyu. (Zvi. 20:5) Zvingava zvesinesa kubhuya no vakuru. Ngo ndava yo kupseruka kubhuya ngo pamusoro po zvakaitika, asi ivona vangamubesa kudai mukavavhunja cineso camuri kusangana naco. Amudikani kuneseka ngo masoko amunozobhuya kuti angazowonesa kuti aato ‘kunasa kurangarirwa.’ (Job. 6:3) Pano kuguma pambhejiso ngo kukasika, vakuru vanodikana kuvangisira kuti vanase kuzwisisa shwiroyo yese vasati vapa mazano o Bhaibheri. (Zvi. 18:13) Vakuru vanoziva kuti zvinotora nguva yakareba kuti vape besero ku mundhu ari wese, ngo kudaro, ivona vanozivazve kuti nguva jimweni zvingada kuti mubhuisane navo kakawanda kuti muwane besero ramunonga mesida.

13. Vakuru vangatibesesa kudini vesishandisa mukumbiro no ndhungamiriro jo Bhaibheri? (Wonanyi foto.)

¹³ Kudai imwimwi mukadainja vakuru, ivona vanovangisira kuti vasaengejera mazwire enyu okujipa ndava. Kunja kaizvi, ivona vanozoita mukumbiro na imwimwi, uye munozodakara ngo kushamisika ngo simba rakakura ro mukumbiro ramuzowana. Besero ro vakuru iri rinobatanijawo ‘kuzoja ngo mafuta muzina ra Jehovha.’ (Jak. 5:14-16) “Mafuta” aya anoemerera cokwadi ciri muSoko ra Mwari. Asi vakuru vanozobhuisana nemwi vhesi jo Bhaibheri kuti jimunyaraje no kumubesa kuti muvezve no ushamwari wakanaka na Jehovha. (Isa. 57:18) Ndhungamiriro jo Bhaibheri jovanobhuisana nemwi jingavangisa zvamakhetaro kuti murambe mesiita zvakanaka. Pesishandiswa vakuru mungazwa izwi ra Jehovha resiti: ‘Iri ndirona gwanja, hambanyi mariri.’—Isa. 30:21.

14. Maererano na VaGaratiya 6:1, vakuru vangabesesa kudini ari wese anonga atevera “gwanja rakashata”? (Wonanyi foto.)

¹⁴ Verenganyi VaGaratiya 6:1. MuKristu paanotevera “gwanja rakashata,” iyena aaripi kuita zvinodiwa ndi Jehovha. Gwanja rakashata ringabhuira cishaishi co kutongwa kana kuti kupwanya mutemo wa Mwari. Vakuru vo ciKristu vesindundirwa ngo rudo, “vanopsaka kupangira mundhuwo ngo mwoyo wakapfava.” Gama ro ciGiriki rikasandujwa kuti “kupangira” ringabhuirazve kuhwirijwa ko godo rakaswaya pandau paro kuitira kujivirira kuremara kaanonga aita. Inga medhiko unovangisira kuti arape godo rinonga raswaika asi zvinonga zvesiwaja padoko, vakuru vanobatikana pakurapa ndhendha yedu yo kumweya asi vasingaengejeri kuwajiwa kedu. Bhaibheri rinovhunjazve vakuru kuti “vagare vakavhura majiso avo.” Pavanotibesa kururamisa makwanja edu, vakuru vanozivazve kuti ivona vandhu vano cishaishi uye kuti ivona vanomboitawo zvakashata. Ivona vanongwarira maningi kuti vasawonesa kuti vakarurama maningi kupinda mundhu wavanonga vesibesa, kunja ka izvi vanozvidodokesa uye vanokhombija usizi.—1 Ped. 3:8.

15. Zvicinyi zvatinodikana kuita patinonga tino cineso?

¹⁵ Tinodikana kuthemba vakuru vo ungano yedu. Ivona vakajijiswa kuviga shwiro jedu uye kuti mazano avo anovha mu Bhaibheri, kunja ko kushandisa murangariro wavo, ivona vanotibesa kutwara mutwaro wedu. (Zvi. 11:13; VaG. 6:2) Vakuru vano undhu wakasiyana-siyana uye vamweni vano ruzivo wakakura, asi tinodikana kubhuya no mukuru ari wese patinonga tino cineso. Zvakajeka kuti atisaizoenda kumukuru umwe na umwe kookumbira mazano, tecisoterera kuti ari wese ativhunje zvatinoda kuzwa. Kudai tikaita izvi, taizodai inga vandhu vanodakarira kuzwa zvavanoda, kusiripi “zvinojijiswa ndi Jehovha” muSoko rake. (2 Tim. 4:3) Kudai tikavhunja mukuru umwe ngo cineso cedu, iyena ungativhunjisa kuti takambobhuya no vakuru vamweni ngo pamusoro pazvo uye kuti ivona vakamupa mazano api. Uye kuzvidodokesa kungamundundira kuti mukumbire mazano kumukuru umweni.—Zvi. 13:10.

ZVATINODIKANA KUITA PACEDU

16. Ngaupi mutwaro watinawo pacedu?

¹⁶ Kunyange kuti vakuru vanotingwarira inga magundata a Mwari, ivona avativhunji zvatinodikana kuita. Umwe nga umwe wedu, tinokhombija kuti tinoda Jehovha ngo zvatinoita no zvatinobhuya zuva ngo zuva kuti timudakajise. Ngo besero rake, tingakwanisa kurwisana no zvineso uye kuita kuti tirambe takagondeka kaari. (VaR. 14:12) Ndiyo ndava, vakuru vasingativhunji zvatinodikana kuita, asi vanoshandisa Bhaibheri kuti vatibese kuzwisisa kuti Jehovha unorangarirenyi ngo shwiroyo uye vanotisiya kuti tiite cikhetwa. Ngo kutevera mazano avo akacijikira muBhaigheri, tinonga tesisiya kuti “simba redu ro kuzwisisa rijijiswe” kuti tiite zvikhetwa zvakanaka.—VaH. 5:14.

17. Ngazvipi zvamasunga kuita?

¹⁷ Makomborero akadini atinawo okuva magundata a Jehovha! Jehovha wakatuma “muhavisi wakanaka,” Jesu, kuti atibhadharire muripo tive no mukana wo upenyu usingaperi. (Johani 10:11) Pesishandiswa vakuru vo ungano yo ciKristu, Jehovha wakazajisa cigondiso cake cokuti: ‘Ndinozomupa vahavisi vanoita zvandinoda, vanozomuhavisa ngo uzivi no kuzwisisa.’ (Jer. 3:15) Patinonga takaremba kudivi ro kumweya, atidikani kupseruka kukumbira besero vakuru. Ngatisunge kubesereka ngo nasiriro ya Jehovha yo vakuru vo ungano.