CIJIJO 12
Zvicinyi Zvinozomubesa Kuti Mulambe Mesijija Bhaibheri?
Kujija Bhaibheri kuno makomborero akawanda, asi pano pazvinombonesa. Nguva imweni mungatoguma pakuzvivhunjisa kuti: Ndinozozvikona here kulamba ndesijija Bhaibheri? Zvicinyi zvinozomubesa kuti mulambe mesijija pasinenyi no zvineso zvamungasangana nazvo?
1. Ngenyi kujija Bhaibheri kesikosha?
‘Soko la Mwari rinopona uye rinosimba.’ (VaHebheru 4:12) Kujija Bhaibheri kakanaka maningi ngokuti kunotibesa kuziva kuti Mwari anolangarirenyi ngo zvedu no mawonero aanotiita. Mesibeswa ngo Bhaibheri munoguma pakuziva zviro zvipsva, kuva no uzivi uye no soterero. Cinokosha ngo cokuti, ilona rinozomubesa kuti muve shamwari ya Jehovha. Pamunonga mesijija Bhaibheri, siyanyi kuti simba raro ricinje upenyu wenyu.
2. Ngenyi zvakanaka kuti tireremeje zvinojijiswa ngo Bhaibheri?
Cokwadi ciri mu Bhaibheri cakatojana no upfumi unokosha. Ndiyo ndava Bhaibheri resitivhunja kuti ‘titenge cokwadi uye titame kucitengesa.’ (Zvirevo 23:23) Kudai tikakoshesa cokwadi ciri mu Bhaibheri, tinozoshanda ngo simba kuti ticijije kunyange patinosangana no zvineso.—Verenganyi Zvirevo 2:4, 5.
3. Jehovha angamubesesa kudini kuti mulambe mesijija Bhaibheri?
Ngokuti Jehovha ndiyena Musiki womasimba ese, uye Shamwari yenyu, iyena anoda kumubesa kuti mujije ngo zvake. Ngokuti anokwanisa kumupa ‘cido cokuita zviro uye simba lokuzviita.’ (Verenganyi VaFiripi 2:13.) Ngokudalo, paya pamunozwa musina cido cokujija, kana kuti pamunowona zvesinesa kushandisa zvamunonga majija, iyena anokwanisa kumubesa. Kudai mukada simba rokuti mukunde zvineso no matambujiko, Jehovha angakwanisa kumubesa. Itanyi mukumbiro nguva yese kuna Jehovha kuti iyena amubese kuti mulambe mesijija Bhaibheri.—1 VaTesaronika 5:17.
JIJANYI ZVIZINJI
Wonanyi mazano angamubesa kuti mulambe mesijija Bhaibheri kunyange vandhu vamweni vakamushora kana, kuzvizwa muno zvakawanda zvokuita. Wonanyizve kuti Jehovha angamubesa kudini kuti mucungirire zvineso.
4. Kujija Bhaibheri ngakuve pa ndau yokutanga mu upenyu wenyu
Nguva imweni tingazvizwa tino zvakawanda zvokuita, zvokuti tingatama nguva yokuverenga Bhaibheri. Zvicinyi zvingamubesa? Verenganyi VaFiripi 1:10, mapeja bhuisananyi ngo muvhunjo jinotevera:
Mumawonero enyu nga zvipi zvomungati zvinokosha maningi kupinda zvimweni mu upenyu wenyu?
Mungaitenyi kuti kujija Bhaibheri kuve pa ndau yokutanga mu upenyu wenyu?
Kudai mukatanga kukanda majeca mucibhardhi mozokanda mapuwe,mapuwe akona aazokwani
Kudai mukatanga ngo kukanda mapuwe, majeca akawanda anozonghwina. Mukutojanawo, patinokanda zviro zvinokosha pakutanga mu upenyu wedu, tinozokwanisa kuzviita tosara no nguva yakawanda yo kuita zviro zvimweni
Kujija Bhaibheri kunotibesa kuziva kuti tinoda kutungamirirwa ndi Mwari no kumunamata. Verenganyi Mateu 5:3, mapeja bhuisananyi ngo muvhunjo unotevera:
Nga zvipi zvatinozowana kudai tikakanda jijo yedu pakutanga?
5. Musahwirira sure pamunotevererwa
Zvingaitika kuti vamweni vangamuvangirija kuti musiye kujija Bhaibheri. Wonanyi zvakaitika no mwanarume umweni anozwi Francisco. Wonanyi VHIDHIYO, mapeja bhuisananyi ngo muvhunjo jinotevera:
Mu vhidhiyo iyi, hama no shamwari ja Francisco vakaitenyi paakavavhunja zvaaijija?
Wakazowanenyi ngo kucungirira?
Verenganyi 2 Timoti 2:24, 25, mapeja bhuisananyi ngo muvhunjo jinotevera:
Ukama wenyu no shamwari vanozwa kudini ngo zvamuri kujija?
Kuenderana no zvataverengari mu mavhesi aya, mungadavirisa kudini mundhu anonga apikiza kujija kamuri kuita Bhaibheri? Ngenyi madalo?
6. Thembanyi kuti Jehovha unozomubesa
Patinovangisa ushamwari wedu na Jehovha, cido cedu cokumudakaja cinoengejekawo. Asi nguva jimweni zvinonesa kuti ticinje zviro mu upenyu wedu kuti tirarame maererano no zvaanoda. Kudai zvesimuitikirawo, tapota musaremba. Jehovha unozomubesa. Wonanyi VHIDHIYO, mapeja bhuisananyi ngo muvhunjo jinotevera:
Mu vhidhiyo iyi, Jim wakacinjisa kudini upenyu wake kuti adakajise Jehovha?
Zvicinyi zvamanyanya kudakarira pano zvaakaita?
Verenganyi VaHebheru 11:6, mapeja bhuisananyi ngo muvhunjo jinotevera:
Jehovha anozoitenyi kuno vaya “vanomupsvaka ngo mweyo wese”, kana kuti, vanoita zvese zvavanokona kuti vamuzive no kumudakaja?
Mukuenderana no vhesi iyi, Jehovha anozwa kudini pamunoita zvese zvamunokona kuti mulambe mesijija Bhaibheri?
VAMWENI VANGAMUVHUJISA KUTI: “Ngenyi muri kujija Bhaibheri no Zvapupu zva Jehovha?”
Maizovadavirisa kudini?
TAJIJENYI
Tajija kuti, icokwadi kuti kujija Bhaibheri azvizivi kureruka. Asi kungakwanisa kuita kuti muzorarama nokusingaperi mesidakala. Lambanyi mesithemba Jehovha, iyena unozomukomborera.
Muvhunjo Jokuhwirijira
Ngenyi tinodikana kukoshesa cokwadi ciri mu Bhaibheri?
Mungaitenyi kuti mukande ‘zviro zvinokosha’ pakutanga mu upenyu hwenyu?
Ngenyi munodikana kukumbira Jehovha kuti amubese kuti mulambe mesijija Bhaibheri?
JIJANYI ZVIMWENI
Wonanyi zviro 4 zvakabesa vakawanda kuti vashandise zvakanaka nguva yavo.
“Zvamungaita Kuti Mushandise Nguva Zvakanaka” (Mukai!, wa Fevereiro wo 2014 Mucishona)
Wonanyi kuti Jehovha wakabesesa kudini mwanakaji umweni wainga no mwamuna waimulambisa kunamata Mwari.
Wonanyi kuti mwanarume umweni wakabeseswa kudini ngo kucungirira kakaita mukaji wake.
Nguva imweni, Zvapupu zva Jehovha zvinonyeperwa kuti zvinopalajanisa mbhuri yo vandhu. Asi icokwadi here?
“Zvapupu zva Jehovha Zvinoita Kuti Vandhu Valambane Here Kana Kuti Haiwa?” (Mu saiti jw.org)