Manasirira Kuti Mubhabhatijwe Here?

Kuvhira pomakatanga kujija Bhaibheri mbhera zvino, iyemwi majija zvakawanda maningi ngo zva Jehovha. Nguva imweni makatocinja zviro zvimweni muupenyu wenyu, kuti murarame mukuzwirana no zvamuri kujija. Asi, zvingaitazve kuti pano zviro zviri kumuemesa kuti musazvipira kuna Jehovha uye kubhabhatijwa. Mucijijo cino, tinozojija zviro zvimweni zvingamuemesa kuti mubhabhatijwe no zvamungaita kuti muzvinyise.

1. Munodikana kuziva zvese zviri mu Bhaibheri kuti mubhabhatijwe here?

Kuti mubhabhatijwe, munodikana kuva ‘no uzivi wakarurama ngo pamusoro po cokwadi.’ (1 Timoti 2:4) Izvi azvibhui kuti munodikana kuziva zvese zviri mu Bhaibheri musati mabhabhatijwa. Kunyange Vakristu vakabhabhatijwa kare vanondolamba vesijija ngo pamusoro pa Jehovha. (VaKorose 1:9, 10) Asi kuti mubhabhatijwe munodikana kunasa kuzwisisa jijiso jo musoko la Mwari Bhaibheri. Vakuru vo Ungano vanozomubesa kuti muzive kuti uzivi wamunawo waakuita here kuti mubhabhatijwe.

2. Ngazvipi zvamunodikana kutanga maita musati mabhabhatijwa?

Musati mabhabhatijwa, munodikana ‘kukhauya pa zvishaishi zvenyu uye motendeuka.’ (Verenganyi Mabasa 3:19.) Izvi zvinoda kubhuya kuti makhauya ngo mweyo wese pa zviro zvese zvakashata zvomakaita kare uye mokumbira kuti Jehovha amuregerere. Uye izvi zvinobhuyazve kuti yemwi makheta kurarama mukuzwirana no kuda ka Jehovha uye kuti amusadi kuita zviro zvaanobhuya kuti zvakashata. Zviro zvimweni zvamunodikana kuita kuenda kumusangano uye kuparijira pamwepo no ungano.

3. Ngenyi amudiki kuthya kubhabhatijwa?

Vandhu vamweni vanothya kubhabhatijwa ngo kuti vanolangarira kuti avazokoni kuita zvese zvavanogondesa kuna Jehovha. Ngozvo cokwadi kuti yemwi nguva imweni mungazoshaisha, inga zvakaizwawo ngo vandhu vamweni vainamata Mwari vanobhuiwa mu Bhaibheri. Asi Jehovha unoziva kuti vandhu vanomunamata vanomboshaishawo. (Verenganyi Mapisarema 103:13, 14.) Iyena unodakala maningi pamunoita zvese zvamunokona kuti mumudakaje! Jehovha unozomubesa. Ngo zvocokwadi kuti, Jehovha unotithembesa kuti akuna cinozokona ‘kutipalajanisa mu rudo rwake.’—Verenganyi VaRoma 8:38, 39.

JIJANYI ZVIZINJI

4. Nasanyi kuziva Jehovha

Munodikana kuziva Jehovha zvakadini musati mabhabhatijwa? Yemwi munodikana kunasa kumuziva kuti mumude no kumudakaja. Wonanyi VHIDHIYO kuti muzive kuti vajiji vo Bhaibheri kutenderera pasi pese vakaitawo kudaro. Mapeja bhuisananyi ngo muvhunjo unotevera:

VHIDHIYO: Zvamungaita Kuti Mubhabhatijwe (3:56)

• Mu vhidhiyo iyi, zvicinyi zvakabesa vandhu vamweni kuti vanasirire kuitira kubhabhatijwa?

Verenganyi VaRoma 12:2, mapeja bhuisananyi ngo muvhunjo jinotevera:

• Pano zvinojijiswa ngo Bhaibheri zvamusinganasi kuzwisisa here? Pano zvinojijiswa ngo Zvapupu zva Jehovha zvamusingazwisisi here?

• Kudai zviripo, mungaitenyi?

5. Nyisanyi muejo jiri kumuemesa kubhabhatijwa

Mundhu wese paanokheta kupira upenyu wake uye kubhabhatijwa, unozosangana no matambujiko. Kuti muwone muezaniso wazvo, wonanyi VHIDHIYO, mapeja bhuisananyi ngo muvhunjo jinotevera:

VHIDHIYO: Kuda Kake Jehovha Kakamuita Kuti Anyise Muejo (5:22)

• Mu vhidhiyo iyi, ngajipi muejo yaidikana kunyiswa ndi Narangerel kuti ashandire Jehovha?

• Kuda Jehovha kakabesa kudini Narangeri kuti akunde muejo iji?

Verenganyi Zvirevo 29:25 na 2 Timoti 1:7, mapeja bhuisananyi ngo muvhunjo unotevera:

• Icinyi cinotiita kuti ticunge kunyisa muejo?

6. Thembanyi besero la Jehovha

Jehovha unozomubesa kuti muite zvinomudakaja. Wonanyi VHIDHIYO, mapeja bhuisananyi ngo muvhunjo jinotevera:

VHIDHIYO: Jehovha Mwari Unozomubesa (2:50)

• Mu vhidhiyo iyi, zvicinyi zvakaemesa mujiji uwu wo Bhaibheri kuti abhabhatijwe?

• Zvicinyi zvakavangisa kugonda kake Jehovha?

Verenganyi Isaya 41:10, 13, mapeja bhuisananyi ngo muvhunjo unotevera:

• Zvicinyi zvingamuthembesa kuti munozokona kuzajisa zvamunozogondesa pakubhabhatijwa?

7. Engejeranyi kubonga kenyu rudo la Jehovha

Kudai mukalangarira kudiwa kamunoizwa ndi Jehovha zvisaita kuti mude kumubonga uye zvisamuitawo kuti mumunamate nokusingaperi. Verenganyi Mapisarema 40:5, mapeja bhuisananyi ngo muvhunjo unotevera:

• Makomborero api anovha kuna Jehovha, amunonyanya kubonga?

Muporofita Jeremiya waida maningi Jehovha no soko lake uye waiwona mukana uwu inga cikomborero cinovha kuna Jehovha cokuzivikanwa ngo zina lake. Iyena wakatoguma pakubhuya kuti: ‘Masoko enyu akaita kuti mweyo wangu upururije uye udakare kamare ngo kuti ndiri kudanijwa ngo zina renyu haiwa Jehovha.’ (Jeremiya 15:16) Daviranyi muvhunjo jinotevera:

• Ngenyi kuva Capupu ca Jehovha ciro cinokosha maningi?

• Munodawo kubhabhatijwa kuti muve Capupu ca Jehovha here?

• Pano ciri kumuemesa kuti mubhabhatijwe here?

• Mukuwona kenyu, munodikana kuitenyi kuti mugume pakubhabhatijwa?

TAJIJENYI

Tajija kuti Jehovha ungamubesa kuti munyise muejo jiri kumuemesa kuti mubhabhatijwe.

Muvhunjo Jokuhwirijira

• Kubhuya kuti munodikana kuziva zvese zviri mu Bhaibheri kuti mubhabhatijwe here?

• Munodikana kuitenyi pamaponero enyu kuti muzobhabhatijwa?

• Ngenyi amudiki kuthya kubhabhatijwa?

JIJANYI ZVIMWENI

Wonanyi kuti icinyi cinodikana kumuita kuti mukhete kubhabhatijwa.

“Wanasirira Kubhabhatijwa Here?” (Nharireyomurindi, ya Março yo 2020)

Wonanyi kuti munganyisisa kudini muejo imweni ingamuita kuti murege kubhabhatijwa.

“Icinyi Cirikundiemesa Kubhabhatijwa?” (Nharireyomurindi, ya Março yo 2019)

Wonanyi kuti mwanarume umweni wakanyisisa kudini muejo kuti abhabhatijwe.

‘Ngenyi Muri Kunonoka Kubhabhatijwa?’ (1:10)

Mwanarume umweni waizwi Ataa wainga asina cokwadi cokuti waidikana kubhabhatijwa. Wonanyi kuti icinyi cakamupa cicunge cokuti abhabhatijwe.

Ndinofanera Kuwana Makomborero ese aya Here? (7:21)