CIJIJO 46
Ngenyi Munodikana Kuzvipira Kuna Jehovha uye Mobhabhatijwa?
Yemwi mungazvipira kuna Jehovha ngo kuita mukumbiro kaari mesimugondesa kuti munozonamata iyena basi uye kuti munozokanda pa ndau yokutanga kuda kake mu upenyu wenyu. (Mapisarema 40:8) Kudai mukadalo, munozobhabhatijwa. Patinonga tesibhabhatijwa tinonga tesikhombija vandhu vamweni kuti takazvipira kuna Jehovha. Kukheta kuzvipira kuna Jehovha ciro cinokosha maningi catingaita mu upenyu. Zvicinyi zvingaita kuti mundhu akhete kuita ciro cinokosha kudai?
1. Zvicinyi zvingaita kuti mundhu akhete kuzvipira kuna Jehovha?
Rudo ndirona rinoita kuti mundhu azvipire kuna Jehovha. (1 Johani 4:10, 19) Bhaibheri rinotivhunja kuti: ‘Ida Jehovha Mwari wako ngo mweyo wako wese, ngo upenyu wako wese, ngo mulangariro wako wese no simba lako rese.’ (Mako 12:30) Tinokhombija kuti tinoda Mwari, haiwa ngo masoko atinovereketa basi, asi ngo zvatinoita. Inga muezaniso, kudai mujaha no musikane vesidisana kamare ivona vanokheta kunyoresa mucato, mukutojanawo, kudai tesida Jehovha kamare, tinokheta kuzvipira kaari uye tobhabhatijwa.
2. Jehovha unogondesa makomborero api kuvanamati vake vakabhabhatijwa?
Pamunobhabhatijwa, yemwi munoita umwe wo divi lo mbhuri ya Jehovha yakadakala. Munozozvionera mega kuti iyena unomuda maningi, uye munozova no ushamwari wakavanga naye. (Verenganyi Maraki 3:16-18.) Ngokuva na Jehovha inga baba venyu, munozova no hama no hanzvaji mu nyika yese jinomuda uye jinodawo Jehovha. (Verenganyi Mako 10:29, 30.) Asi pano zviro zvamunodikana kuita kuti muzobhabhatijwa. Munodikana kujija ngo zva Jehovha, momuda uye motenda muna Jesu. Mukapeja kuita izvi, ndipona pamunozopira upenyu wenyu kuna Jehovha. Kudai mukapeja kuita izvi mobhabhatijwa, munonga maamugwanja rinoenda ku upenyu usingaperi lakazara ngo mudakalo. Soko la Mwari rinoti: ‘Rubhabhatijo . . . riri kumuponesa zvino.’—1 Petro 3:21.
JIJANYI ZVIZINJI
Jijanyi kuti ngenyi zvakanaka kuti mupire upenyu wenyu kuna Jehovha uye mobhabhatijwa.
3. Tese tinodikana kukheta watinoda kunamata
Mu nguva yo Vaisraeri, vandhu vamweni vailangarira kuti zvaizoita kunamata Jehovha uye vesinamatazve mwari umweni wokunyepa waizwi Bhaari. Asi Jehovha wakatuma muprofita Eriya kuti avavhunje kuti vainga valasika. Verenganyi 1 Madzimambo 18:21, mapeja bhuisananyi ngo muvhunjo unotevera:
Vaisraeri, vaidikana kukheta kuitenyi?
Mukuezana no Vaisraeri, yesu mazuva ano tinodikana kukheta kuti tonamata ani. Verenganyi Ruka 16:13, mapeja bhuisananyi ngo muvhunjo jinotevera:
Vamweni vanolangarira kuti vanganamata Jehovha no zviro zvimweni pa nguva imweyo. Asi ngenyi izvi zvisingaiti?
Tingakhombijisa kudini kuna Jehovha kuti takakheta kunamata iyena basi?
4. Langarijisanyi ngo ndava yo rudo la Jehovha laakamukhombijira
Jehovha wakatipa zvipo zvakawanda maningi zvinodakaja. Yesu, tingamupawo cinyi? Wonanyi VHIDHIYO.
Jehovha unokhombijisa kudini kuti unomuda? Verenganyi Mapisarema 104:14, 15 na 1 Johani 4:9, 10, mapeja bhuisananyi ngo muvhunjo jinotevera:
Zvipo zvipi zvinonyanya kukosha zvomakapuwa ndi Jehovha?
Kupuwa zvipo izvi, kunomuita kuti muzvizwe kudini ngo zva Jehovha?
Yemwi, makambopuwa cipo cakamuita kuti mudakare maningi here, icokwadi kuti yemwi makabonga maningi mundhu akamupa cipo ici. Verenganyi Dheuteronomi 16:17, mapeja bhuisananyi ngo muvhunjo unotevera:
Kudai mukalangarira ngo zvipo zvese zvomakapuwa ndi Jehovha, zvinomuita kuti mude kuitenyi kaari?
5. Kuzvipira kuna Jehovha kunoviisa makomborero akawanda
Vandhu vakawanda vanolangarira kuti, kuva no nduma, kuva no basa lakanaka no kuva no mare yakawanda, zvinoviisa mudakalo. Kubhuya kuti izvi ndizvona here? Wonanyi VHIDHIYO, mapeja bhuisananyi ngo muvhunjo jinotevera:
Kunyange Andreya waida maningi kutamba bhora, ngenyi iyena wakarisiya?
Iyena wakakheta kuzvipira kuna Jehovha, haiwa ku bhora, munolangarira kuti iyena wakakheta kuita zvakanaka here? Ngenyi madalo?
Mupostori Pauro, asati ava Mukristu, iyena wainga na zvese zvaimuita kuti ave no nduma. Wainga akajijiswa mutemo yo cijudha, ngo mujijisi wainga no nduma, asi Pauro wakasiya zviro zvese izvi kuti ave Mukristu. Kubhuya kuti Pauro wakazozvicumba here? Verenganyi VaFiripi 3:8, mapeja bhuisananyi ngo muvhunjo jinotevera:
Ngenyi mu postori Pauro wakabhuya kuti zviro zvaaita asati ava Mukristu waizviwona inga svina?
Iyena wakazowinenyi pa ndau yo zviro zvaakasiya?
Munolangarira kuti upenyu wenyu unozova wakanaka here kudai mukakheta kunamata Jehovha? Ngenyi madalo?
Pauro paakakheta kuva Mukristu, wakazowana zviro zvakawanda kudarika zviro zvaakasiya sure
VAMWENI VANOTI: “Yeni ndinozviziva kuti ici icokwadi, asi andidi kupira upenyu wangu kuna Mwari.”
Ngenyi munolangarira kuti zvakanaka kuti mundhu apire upenyu wake kuna Jehovha?
TAJIJENYI
Tajija kuti rudo, ndilona rinotiita kuti tizvipire kuna Jehovha uye tibhabhatijwe.
Muvhunjo Jokuhwirijira
Ngenyi Jehovha akanakira kuti timude ngo mweyo wese uye timunamate?
Jehovha unopa makomborero api kuvanamati vake vakabhabhatijwa?
Yemwi, maizoda kuzvipira kuna Jehovha here?
JIJANYI ZVIMWENI
Wonanyi kuti ngenyi muembi umweni no mugogomi, vakakheta kupira upenyu wavo kuna Jehovha.
Majaha Anovhunjisa Kuti Ndoitenyi no Upenyu Wangu? —Zviro Zvondakamboita (6:54)
Wonanyi zviro zvimweni zvingaita kuti mundhu apire upenyu wake kuna Jehovha obhabhatijwa.
“Ngenyi Munodikana Kupira Upenyu Wenyu Kuna Mwari?” (Nharireyomurindi, 15 ya Janeiro yo 2010)
Mu vhidhiyo iyi, wonanyi mudakalo una vaya vakapira upenyu wavo kuna Jehovha.
Wonanyi shwiro inoti “ko makore akawanda, ndaindozvivhunjisa kuti, ndiri kuraramirenyi?’” kuti muwone zvakaita kuti mwanakaji umweni, aongorore zvaaikoshesa mu upenyu wake.
“Bhaibheri Rinocinja Upenyu wo Vandhu” (Nharireyomurindi, 1 ya Novembro yo 2012)