MUSOLO WO KUJIJA 6
NGOMA 18 Kubonga ngo Muripo
Kuregererwa ko Takaizwa Ndi Jehovha Cipo Cikuru Katiri
‘Mwari wakada vandhu vo nyika ino, ngo kudalo wakapa Mwana wake.’—JOHANI 3:16.
ZVATISAJIJA
Tinoda kujija kuti tingaitisa kudini kuti tiengejere kubonga kedu ngo kuregererwa kotakaizwa ndi Jehovha uye tinozojijazve kuti Jehovha unoitenyi kuti atiregerere.
1-2. Kuitisa kudini mugariro wo vandhu, wakatojana no wo mujaha wabhuiwaya pa ndima yokutanga?
AMBOLANGARIRANYI basi ngo mujaha wakarerwa pa mbhuri yakaganya. Asi zuva rimweni pakaitika asidhenti yakaita kuti vabereki vake vafe. Mujaha uwu unosuruvara maningi ngo zvaitikalo. Asi panoitikazve zviro zvimweni zvakashata. Iyena anoguma pakuziva kuti vabereki vake vakashandisa mare yese, vosara no magava akawanda. Kunja ko kusara no zviro zvo vabereki vaya, iyena wakazosara no magava akawanda maningi. Vandhu vanotanga kumuyonda ngo kukasika kuti abhadhare magava ese aya. Asi mujaha uwu, aana zviri zvese kuti akwanise kubhadhara magava aya.
2 Mukutojanawo, mugariro wedu wakaita inga wo mujaha uwu. Vabereki vedu vokutanga Adhamu na Evha, vainga vasina cishaishi, vairarama mu paradhiso yainga yakaseja maningi. (Gen. 1:27; 2:7-9) Ivona vainga no mukana wo kurarama upenyu usingaperi vesidakala, asi zviro zvakacinja. Ivona vakaruza muzi wavo mu paradhiso no soterero yo kurarama nokusingaperi. Ngaipi ndhaka yovakasiira vana vavo? Bhaibheri rinoti: ‘Ngokuti cishaishi cakapinda mu nyika ngo ndava yo mundhu umwe basi, Adhamu, rufu wopinda ngo ndava yo cishaishi. Ngo maitiro onawo, rufu wakagumira vandhu vese ngokuti vese vainga vashaisha.’ (VaR. 5:12) Ngo kudalo, takagara utaka wocishaishi ca Adhamu, inga muviyo, tiri kufa. Cishaishi cotakagara utaka, cakadai inga zigava lakakura maningi, zvokuti apana na umwe wedu angakwanisa kuribhadhara.—Ps. 49:8.
3. Ngenyi zvishaishi zvedu zvinoezaniswa no ‘magava’?
3 Jesu wakaezanisa zvishaishi no ‘magava.’ (Mateu 6:12; Ruka 11:4) Patinoshaisha, tinoita inga kuti tino magava kuna Jehovha, nokutizve tinodikana kubhadhara mutengo wo magavewo. Kudai tikatama kubhadhara magava aya, patinofa, anonga abhadharwa.—VaR. 6:7, 23.
4. (a) Kudai apato kuwanika besero, ngazvipi zvaizoitika no vashaishi vese? (Pisarema 49:7-9) (b) Mu Bhaibheri, gama lokuti “cishaishi” rinobhuyenyi? (Wonanyi bhokiso rinoti: “Cishaishi.”)
4 Isusu tega, atikwanisi kuwana zvese zvakaruzwa ndi Adhamu na Evha. (Verenganyi Pisarema 49:7-9.) Tisina besero riri rese, isusu atisaizova no soterero yo lamangwana no yo rumuko. Kubhuya cokwadi, isusu taizofa basi totamazve soterero yo kuzoraramazve inga zvinoita zvinyama.—Mup. 3:19, 2 Ped. 2:12.
5. Baba vedu vano rudo Jehovha, vakatibesesa kudini pa kubhadhara zigava lo zvishaishi zvedu? (Wonanyi yo pakhavha.)
5 Langariranyi ngo pamusolo po mujaha wabhuiwaya pakutanga. Ngazvipi zvaizoitika kudai mwanarume wakaganya wojipira kuti abhadhare magava ese akasiiwari ngo vabereki vake? Pasina kukaya-kaya, mujaha uwu waizobonga maningi ngo cipo ici. Mukutojanawo, Baba vedu Jehovha, avo vano rudo, vakatipa cipo cinokwanisa kubhadhara magava ese otakagara utaka a Adhamu. Jesu wakasanangura cipo ici ngo njira iyi: ‘Mwari wakada vandhu vo nyika ino, ngo kudalo, wakapa Mwana wake, wakabarwa ari ega kuti vese vanomutenda vatame kupalajwa asi vawane upenyu usingaperi.’ (Johani 3:16) Kunja kaizvi, cipo ici, cinotipa mukana wo kuva shamwari ja Jehovha.
Jesu wakaparijira masoko akanaka ngo pamusolo po kuregerera ka Jehovha esishandisa muripo. (Johani 3:16) Pasure pazvo, Jesu wakapa upenyu wake kamare kuti aite muripo. (Wonanyi ndima 5)
6. Ngaapi magama anoshandiswa mu Bhaibheri atinoda kuzwisisa mu cijijo cino, ngenyi?
6 Tingabesereka kudini ngo cipo ici cotakapuwari ndi Jehovha ngo kuregererwa zvishaishi zvedu kana ‘magava’? Bhaibheri rinodavira muvhunjo uwu resishandisa magama akadai inga aya: Kuviiranisa, mupiro wo kupfuta zvishaishi, cipo co kuviiranisa, muripo, mutengo no kudanijwa inga varurami. Mu cijijo cino, tiri kuda kubhuisana maningi ngo pamusolo po zviro izvi no kubhuisanawo ngo zviro zvakaizwa ndi Jehovha kuti atiregerere. Patinolangarijisisa ngo maitire akaita kuti Jehovha atiregerera, kubonga kedu kunoengejeka.
JEHOVHA UNODA KUTI TIVE SHAMWARI JAKE
7. (a) Ngazvipi zvimweni zvakaruzwa ndi Adhamu na Evha? (b) Ngo kuva mubarihwana wa Adhamu na Evha, ngazvipi zvatinoda? (VaRoma 5:10, 11)
7 Kunja ko kuruza mukana wo kurarama nokusingaperi, Adhamu na Evha vakaruza ushamwari wavo na Jehovha. Pakutanga, ivona vaiita divi lo mbhuri ya Jehovha. (Ruka 3:38) Asi povakandotama kuzwira Jehovha, vakagogomerwa pakati po mbhuri iyi, vasati vaano vana. (Gen. 3:23, 24; 4:1) Ndiyo ndava, isusu tiri mubarihwana wavo, tinodikana kuviiraniswa ndi Jehovha. (Verenganyi VaRoma 5:10, 11.) Ngo magama amweni, tingati tinodikana kuvangisa ushamwari wedu na Jehovha. Mu Cigiriki, gama lokuti “kuviiranisa,” rikasandujwa, rinobhuya “muvengi wova shamwari yedu.” Zvinoshamisa ngozvokuti Jehovha ndiyena kamare wakatanga kuti izvi zviitike. Kuitisa kudini?
JEHOVHA WAKAITA KUTI ISUSU TIVE SHAMWARI JAKE
8. (a) Icinyi cinozwi mupiro wo kufukija zvishaishi? (b) Icinyi cinozwi cipo co kuviiranisa?
8 Jehovha wakaita kuti vandhu vano cishaishi vakwanise kuva shamwari jake. Bhaibheri rinobhuya kuti zvakaitari Jehovha, mupiro wokufukija zvishaishi. Mupiro wokufukija zvishaishi, zvinobhuya kucinja ciro ngo ciro cimweni asi cino mutengo umwewo. Ngo kudalo, Jehovha wakaita kuti zvakaruzwaya ndi Adhamu zviwanikezve ngo kupira mundhu asina cishaishi wakadai inga ndi Adhamu. Zvinyorwa zvo Cikristu zvo Cigiriki, zvinoshandisa gama lokuti “muviiranisi” iro rinobhuya zvakatojana no gama lokuti mupiro wokufukija zvishaishi. (VaR. 3:25) Cipo cokuti muviiranisi ndicona cinoitisa kuti mundhu ave no runyararo na Jehovha no kuva no ushamwari naye.
9. Ngazvipi zvaakaita Jehovha kuti zvishaishi zvo Vaiziraeri zviregererwe?
9 Jehovha wakaita kuti zvishaishi zvo Vaiziraeri zviregererwe no kuva shamwari jake. Mu makore ese, Vaiziraeri vaiviisa zvipo zvo kuviiranisa. Pa zuva iri, mupiri waipira zvinyama kuitira zvishaishi zvo vandhu. Zvakajeka kuti mupiro iji jo zvinyama ajisaizokwanisa kupfuta zvishaishi zvo vandhu ngokuti zvinyama zvakaderera maningi tikaezanisa no vandhu. Asi Vaiziraeri vainga vakhauya voenda koita mupiro, vaiva no cokwadi cokuti Jehovha wainga aregerera zvishaishi zvavo. (VaH. 10:1-4) Kunja kaizvi, kuita mupiro nguva yese kwaiizwari ngo Vaiziraeri, kwaivalangarija kuti ivona vainga vashaishi, cimwenizve, kuti zvishaishi zvavo zviregererwe paidikana mupiro wakakura.
10. Jehovha wakaitenyi kuti zvishaishi zvo vandhu zviregererwe mukuperera?
10 Jehovha wakaitenyi kuti zvishaishi zvo vandhu zviregererwe nokusingaperi? Iyena wakaita kuti Mwana wake Jesu Kristu, ape cipo ‘kamwe basi kuti atore zvishaishi zvo vakawanda.’ (VaH. 9:28) Jesu wakapira ‘upenyu wake kuti aponese vandhu vakawanda.’ (Mateu 20:28) Asi muripo icinyi?
MUTENGO WO MURIPO WA JESU
11. (a) Maererano no Bhaibheri, muripo icinyi? (b) Ndiyani basi waizokwanisa kubhadhara muripo?
11 Bhaibheri rinobhuya kuti Jehovha wakawona zvesifaneya kuti abhadhare muripo kuti zvishaishi zvedu zviregererwe no kuva shamwari jake.a Asi ngaupi mutengo wo muripo waizokwanisa kubhadhara zvakaruzwa ndi Adhamu? Langariranyi kuti Adhamu na Evha vakaruza upenyu wakakwana no mukana wo kurarama nokusingaperi. Ngo iyo ndava, mutengo wo muripo waidikana kuva wakaezana no mutengo wo zviro zviya zvakaruzikaya. (1 Tim. 2:6) Mutengo uwu, waizobhadharwa ngo mwanarume wainga akula. (1) Wainga asina cishaishi, (2) wainga no mukana wo kurarama pasi pano nokusingapri uye (3) wainga akanasiririka kuti ape upenyu wake kuti abhadhare zvishaishi zvedu. Ngo maitire aya, upenyu wake waizokwanisa kubhadhara zviro zviya zvakaruzikaya.
12. Ngenyi Jesu waizokwanisa kubhadhara muripo?
12 Ngenyi Jesu waizokwanisa kubhadhara muripo? Wonanyi zvikonzero zvitatu. (1) Wainga asina cishaishi, “iyena aato kuita cishaishi.” (1 Ped. 2:22) (2) Iyena waizokwanisa kurarama nokusingaperi pasi pano, uye (3) wainga akanasiririka kuti afe no kupira upenyu wake katiri. (VaH. 10:9, 10) Jesu wainga asina cishaishi inga ndi Adhamu paainga asati ashaisha. (1 VaK. 15:45) Ngo iyo ndava, ngo kufa kake Jesu wakakwanisa kubhadhara zvese zvakaruzwa ndi Adhamu ngo mutengo wakakwana. (VaR. 5:19) Mukutojanawo, Jesu wakava ‘Adhamu wokupejisira.’ Apanazve dikano kuti paviye mundhu umweni wakakwana kuti abhadhare zvakaruzwa ndi Adhamu. Jesu paakafa, ‘wakaita mupiro kamwe basi paakajipira.’—VaH. 7:27; 10:12.
13. Ngaupi musiyano wo mupiro wo kufukija zvishaishi no muripo?
13 Ngaupi musiyano wo mupiro wokufukija zvishaishi no muripo? Mupiro wokufukija zvishaishi ndiwona unoizwa ndi Mwari kuti tive shamwari jake. Muripo ndi mutengo wakabhadharwa kuitira kuti mupiro wo kufukija zvishaishi ushande ku vandhu vanoshaisha. Mutengo wo muripo unoimirira ngazi yakapopomejwa ngo ndava yedu.—VaE. 1:7; VaH. 9:14.
JEHOVHA WAKATISUNUNGULA KU CISHAISHI NO RUFU NO KUTIDANIJA VARURAMI
14. Tiri kuda kuwonenyi zvino, ngenyi?
14 Tinobesereka kudini ngo zvatakaizirwa ndi Jehovha? Kuti tidavire muvhunjo uwu, ngatiwone zvinobhuya magama maviri anowanika mu Bhaibheri anotibesa kuzwisisa kuti tinobeseswa kudini ngo kuregererwa kotakaizwa ndi Jehovha.
15-16. (a) Mu Bhaibheri, gama lokuti “mutengo,” rinoda kubhuyenyi? (b) Tinozvizwa kudini patinoziva kuti takasunungurwa ku cishaishi no rufu?
15 Mu Bhaibheri, gama lokuti mutengo, rinobhuya kusunungurwa kotakaizwa ngo ndava yo kubhadharwa ko muripo. Mupostori Pedhru wakabhuya ngo pamusolo po kusunungurwa uku. Iyena wakati: ‘Ngokuti munozviziva kuti asipi ngo zviro zvinopera inga sirivha no goridhe zvamakasunungurwa ndizvona mu maitiro enyu akashata, amakasiirwa ngo majiteguru enyu. Asi makaponeswa ngo ngazi ya Kristu ino mutengo mukuru, yakaezana no yo gundata risina parakaremara.’—1 Ped. 1:18, 19.
16 Ngo ndava yo muripo, isusu tese tingasunungurwa ku cishaishi no rufu no zvineso zvese zvinoviiswa ngo zviro izvi. (VaR. 5:21) Cokwadi, tino cikonzero cakanaka cokuzwa kuti tino zigava rakakula maningi kuna Jehovha na Jesu ngo kutisunungula ngo ngazi inokosha maningi kana upenyu wa Jesu.— 1 VaK. 15:22.
17-18. (a) Zvinobhuyenyi kudanijwa mururami? (b) Izvi zvinobhuyenyi ku umwe na umwe wedu?
17 Bhaibheri rinobhuya kuti Jehovha unowona vanamati vake inga vakarurama. Izvi zvinobhuya kuti Jehovha, aatiyondi kuti tibhadhare zvishaishi zvatinoita. Asi izvi azvibhui kuti Jehovha aareremeji ndhungamiriro jake jakarurama. Iyena aatidaniji varurami ngokuti tinofaneya. Aabatikani ngo zvishaishi zvedu. Asi, Jehovha wakanasiririka kuti akanganwe magava edu, ngokuti isusu tinotenda muripo wakabhadharwa ndi Jesu.—VaR. 3:24; VaG. 2:16.
18 Izvi zvinopsasa kudini umwe na umwe wedu? Vaya vakakhetwa kuti vaende kootonga na Jesu kudenga, vaakudanijwa vakarurama inga vana va Mwari. (Tito 3:7; 1 Joh. 3:1) Zvishaishi zvavo zvakaregererwa, zvoita inga kuti avato kumboshaisha. Ngo kudalo, ivona vanotenderwa kuti vazova mu Umambo. (VaR. 8:1, 2, 30) Vaya vano soterero yo kurarama pasi pano nokusingaperi, vanodanijwa varurami inga shamwari ja Mwari, cimwenizve, zvishaishi zvavo zvapera kuregererwa. (Jak. 2:21-23) Vandhu vakawanda vanozopona pa Armagedhoni, vanozova no mukana wo kuzotamazve kufa. (Johani 11:26) ‘Vakarurama no vandhu vasito kururama’ vakafaya, vanozomuswa. (Mabasa 24:15; Johani 5:28, 29) Pa kuhamba ko nguva, vanamati vese va Jehovha vanozorarama pasi pano vanozozwira, vanozova no ‘rusununguko ukuru wokuva vana va Mwari.’ (VaR. 8:21) Tinodakala maningi ngo kulangarijisisa nguva yokuti tinozova vana vasina cishaishi va Baba vedu, Jehovha!
19. Mugariro wedu wacinjisa kudini? (Wonanyi bhokiso rinoti: “Zvinobhuyenyi Katiri”?)
19 Icokwadi kuti mugariro wedu wakaezana no wo mujaha wabhuiwaya pa jijo iyi, wakaruza zvese, wosara no magava akawanda okuti aasaizokwanisa kumabhadhara. Asi ngo rudo wa Jehovha isusu takakwanisa kubeswa. Mugariro wedu wakacinja ngo ndava yo mupiro wo kufukija zvishaishi no kubhadharwa ko muripo. Rutendo wedu kuna Jesu Kristu unotiita kuti tisunungurwe ku cishaishi no rufu. Zvishaishi zvedu zvinoregererwa, Jehovha paanoita izvi, zvinoita inga kuti atito kumboshaisha. Cinokosha maningi pa zvese ngocokuti zvino, tinokwanisa kuva shamwari ya Baba vedu vano rudo, Jehovha.
20. Ngazvipi zvatinozojija mu cijijo cinotevera?
20 Isusu tinobongra maningi Jehovha na Jesu patinolangarijisisa nga zvese zvavakatiitira. (2 VaK. 5:15) Pasina besero lavo, isusu atisaizova no soterero iri yese. Kuna umwe na umwe wedu, zvinobhuyenyi kuregerera ka Jehovha? Izvi ndizvona zvatinozowona pa cijijo cinotevera.
NGOMA 10 Ngaakujwe Jehovha, Mwari Wedu!
a Mu ndumi jimweni, gama lokuti “muripo,” rikasandujwa gama ngo gama, rinobhuya “mutengo wo upenyu” kana kuti “mutengo wakabhadharwa.”