MUSOLO WO KUJIJA 7
NGOMA 15 Kusimba Mwana wo Dangwe ra Jehovha!
Kuregerera ka Jehohva Kunobhuyenyi Kamuri
‘Kuregerera ko cokwadi kuri kamuri.’—PISAREMA 130:4.
ZVATISAJIJA
Kuengejera kubonga kedu ngokuwona kuezanisa kunoita Bhaibheri ngokuregerera ko cokwadi kunoita Jehovha.
1. Ngenyi nguva jimweni zvinonesa kuzwisisa kuregerera?
“YENI NDAKUREGERERA.” Zvakanaka kuzwa masoko aya, maningi-ningi kudai mesineseka ngokuti makabhuya kana kuti kuita ciro cinonyangajisa mundhu umweni! Asi masoko aya “anobhuyenyi kamare”? Kubhuya kuti mundhuwo munozoenderera mberi muri shamwari no shamwari here? Kana kuti mundhuwo Wakanda buwe pandauyo asi ushamwari wenyu auzoiti inga zvawaiita kare? Vandhu povanonga vesibhuya ngo pamusolo pokuregerera vanonga vesilangarira ngo zviro zvakasiyana maningi.
2. Bhaibheri rinobhuyenyi ngo kuregerera ka Jehovha? (Wonanyi masoko opasi.)
2 Kuregerera kunoita Jehovha kakasiyana no uregerera kunoita isusu vandhu vano cishaishi kuna umwe nga umwe wedu. Apana unokona kuregerera kunoita Jehovha. Munyori wo pisarema wakati ngozva Jehovha: ‘Kuregerera ko cokwadi kuri kamuri kuti vandhu vamureremeje.’a (Ps. 130:4) Cokwadi ngo cokuti, “kuregerera ka Jehovha ngoko cokwadi.” Jehovha basi ngaanoziva kuti kuregerera kunobhuyenyi. Mu vhesi jimweni povanonga vesibhuya ngo kuregerera ka Jehovha, vakashandisa soko lo Cihebheru risingashandiswi pamaregerere anoita vandhu.
3. Ngenyi kuregerera ka Jehovha kakasiyana no kedu? (Isaya 55:6, 7)
3 Jehovha paanoregerera, iyena unopfuta kamare cishaishi co mundhuwo. Ngo kudalo, ushamwari wake waiinga aruza na Jehovha unoviyazve. Tinobonga maningi Jehovha ngokuregera kake kunoshamisa.—Verenganyi Isaya 55:6, 7.
4. Jehovha unotibesesa kudini kuti tizwisise kuregerera ko cokwadi?
4 Kuregerera ka Jehovha kakasiyana no kedu, kubhuya kuti tinokwanisa kuzwisisa kuti kuregerera ko cokwadi kunobhuyenyi? Kuti atibese Jehovha unoshandisa kuezanisira kuti atisanangurire kuregerera kaanoita. Mu cijijo cino tinozoona kuezanisira kunganani. Kuezanisira uku kunokhombija kuti Jehovha unoitisa kudini uye kuti unovhisisa kudini cishaishi, pa nguva imweyo ushamwari woviyazve inga zvawaiita kare. Kujija kuezanisira uku kunozotibesa kuengejera rudo wedu no kubonga katiinoita Baba vedu vano usizi no kunaka mweyo vanotiregerera ngo maitiro akasiyana-siyana.
JEHOVHA UNOVHISA CISHAISHI
5. Zvicinyi zvinoitika Jehovha paanoregerera zvishaishi zvedu?
5 Mu Bhaibheri, zvishaishi zvinoezaniswa no ciro cinorema maningi. Mambo Dhavhidhi wakabhuya ngo zvishaishi zvaakaita esiti: ‘Zvishaishi zvangu zvandiwandira mbhera kumusolo inga mutoro unorema wandisikakwanisi kuthwala.’ (Ps. 38:4) Asi Jehovha unoregerera zvishaishi zva wiya anokhauya. (Ps. 25:18; 32:5) Soko lo Cihebheru lokuti “kuregerera” rikasandujwa rinobhuya kuti “kumujula” kana kuti “kuthwala.” Isusu tingakwanisa kulangarira Jehovha inga mundhu unosimba unovhisa zvishaishi zvinorema mumakhaja edu ozvikanda ndhambo.
“Yemwi makaregerera” (Ps. 32:5)
6. Jehovha unokanda zvishaishi zvedu ndhambo kakadini nesu?
6 Bhaibheri rinoshandisa kuezanisira kumweni kunokhombija kuti Jehovha unotora zvishaishi zvedu ozvikanda ndhambo nesu. Pisarema 103:12 inoti: ‘Inga kumavhazuva kuri ndhambo no kumavirira, ngo ndava yazvo iyena unokanda zvishaishi zvedu ndhambo nesu.’ Kubuda ko zuva no kuvira karinoita akumbosangani ngokuti zvinoitika pa nguva yakasinaya no ndau yakasiyana. Ngo magama amweni pisarema iyi inobhuya kuti Jehovha unotora zvishashi zvedu ozvikanda ndhambo nesu zvokuti atizombokwanisi kuzviwona. Izvi zvinokhombija kuti Jehovha unotiregerera kamare uye izvi zvinonyalaja mweyo jedu!
“Inga kumavhazuva kuri ndhambo no kumavirira” (Ps. 103:12)
7. Bhaibheri rinosanangurisa kudini zvinoizwa ndi Jehovha no zvishaishi zvedu? (Mika 7:18, 19)
7 Kunyange Jehovha unotora zvishishi zvedu ozvikanda ndhambo nesu, kubhuya kuti Jehovha unonga akazviviga here? Haiwa. Mambo Ezekiya wakati ngozva Jehovha: ‘Makhandira zvishaishi zvangu zvese sure kenyu.’ Kana kuti inga zvinobhuya masoko okuengejera kuti, “mavhisa zvishaishi zvangu zvese pamberi penyu.” (Isa. 38:9, 17) Izvi zvinokhombija kuti Jehovha unovhisa zvishaishi zvo mundhu wakhauya uye aazombozvisotizve. Dhisiyonariyo rimweni rakasanangura kuti magama a Ezekiya aida kusandujwa kudai: ‘Makaita kuti zvishaishi zvangu zviite inga zvisito kumboitika.’ Bhaibheri rinovangisa fundo iri ngokuezanisira kumweni kuri pana Mika 7:18, 19. (Verenganyi.) Mu mavhesi aya anobhuya kuti Jehovha unotora zvishaishi zvedu ozvikhandira mu jombe rakajika maningi. Mu nguva yo kare, kudai ciro cikawira mujombe zvainesa kuciwanazve.
‘Makakhandira zvishaishi zvangu zvese sure kenyu’ (Isa. 38:17)
‘Munozokhandira mujombe rakajika maningi zvishaishi zvavo zvese’ (Mika 7:19)
8. Zvicinyi zvatajija mbhera zvino?
8 Kuezanisira uku kunotijijisa kuti Jehovha paanotiregerera iyena unovhisa kamare mumakhaja edu. Inga zvakabhuiwa ndi Dhavhidhi kuti ‘vanodakala vaya vakaregererwa maitere avo ano pesana no mutemo uye vano zvishaishi zvakafukijwa. Unodakala mundhu uno zvishaishi zvokuti Jehovha aazozvilangariri.’ (VaR. 4:7, 8) Uku ndikona kuregerera ko cokwadi!
JEHOVHA UNOPFUTA ZVISHAISHI
9. Bhaibheri rinoshandisa kuezanisira kupi kuti ritibese kuzwisisa kuti Jehovha unotiregerera kamare?
9 Jehovha unoshandisa kuezanisira kumweni kuti atibese kuzwisisa kuti pesishandiswa muripo kuitisa kudini iyena unoregerera vashaishi vanokhauya. Jehovha unocenesa uye unopfuta zvishaishi zva wiya unonga akhauya. Bhaibheri rinobhuya kuti zvakaita inga kuti Jehovha unosuka uye unocenesa zvishaishi zvedu, izvi zvinoita kuti mushaishi ave akacenazve. (Ps. 51:7; Isa. 4:4; Jer. 33:8) Uye Jehovha kamare unosanangura kuti unozviitisa kudini pana Isaya 1:18: ‘Kunyange zvishaishi zvenyu zvakapsukuruka zvinozocena inga mbhute, kunyange zvishaishi zvenyu zvakapsuka inga jira lo kupsuka zvinozocena inga thonje.’ Zvinonesa maningi kuvhisa dondhwe lo muto wo matimati pa hembe. Ngo ndava yazvo, Jehovha wakaita kuezanisira uku kuti atikhombije kuti zvishaishi zvedu zvingava zvakacena zvoita inga zvisito kumboitikazve.
‘Kunyange zvishaishi zvenyu zvakapsuka zvinozoceneswa inga thonje’ (Isa. 1:18)
10. Ngakupi kuezanisira kumweni kunoshandiswa ndi Jehovha kuti atikhombije kukura ko kuregerera kake?
10 Inga zvatakawona mu cijijo cakapera, zvishaishi zvedu zvinoezaniswa no “magava.” (Mateu 6:12; Ruka 11:4) Ngo kudalo pese patinoshaishira Jehovha zvinoita inga kuti magava edu ari kukura. Magava aya akakura! Asi Jehovha paanotiregerera zvinoita inga kuti uri kutosiyana nawo magavewo. Iyena aaemeri kubhadharwa pazvishaishi zvaapera kuregerera. Mukutojanawo mundhu anogava unodakala maningi paanoregerwa uye yesu tinodakalawo Jehovha paanotiregera!
‘Tiregererenyi zvishaishi zvedu’ (Mateu 6:12)
11. Bhaibheri parinobhuya kuti zvishaishi zvedu “zvapfutwa” zvinoda kubhuyenyi kamare? (Mabasa 3:19)
11 Jehovha aaregereri basi magava edu kana kuti zvishashi zvedu iyena unozvipfuta kamare. (Verenganyi Mabasa 3:19.) Magava paanoregererwa, tingalangarira pakandwa shishi (X) mukuru pamutengo womagavewo. Kunyange zvakadalo, imwimwi musiri kukwanisa kuwona numero pasi pa shishi (X) asi kupfuta ciro zvakasiya kamare. Kuti tizwisise izvi tinodikana kulangarira kuti mu nguva yo kare, pendi yaiizwa pesishandiswa marasha, namo uye kumwa. Zvainga zvakareruka kuti mundhu atore ciponji cakacururika kuti apukute painga pakanyorwa ngo pendi iyi. Ngo kudalo, kudai gava rikapfuthwa, “rinonga rapfutwa kamare,” azvisakwanisiki kuwona zvainga zvakanyorwa ponapo zvinoita inga kuti painga pasito kumbonyorwa. Kuziva kuti Jehovha aasiyani basi no zvishashi zvedu unozvipfuta kamare. Izvi zviro zvinodakajisa maningi mweyo wedu.—Ps. 51:9.
‘Kuitira kuti zvishaishi zvenyu zvipfuthwe’ (Mabasa 3:19)
12. Kuezanisira ko gore lakakura kunobhuyenyi katiri?
12 Mu Bhaibheri Jehovha unoshandisa kuezanisira kumweni kuti asanangure mapfutire aanoita zvishaishi zvedu. Ipona panoti: ‘Ndinopfuta kukanganisa kenyu uye zvishaishi zvenyu ndozvifukija ngo gore rakakura.’ (Isa. 44:22) Jehovha paanotiregerera, zvinoita inga uri kushandisa gore rakakura kuti afukije zvishaishi zvokuti isusu na iyena atizokwanisi kuzviwona.
‘Ndinozopfuta kukanganisa kenyu, inga kufukija kunoita gore’ (Isa. 44:22)
13. Munozwa kudini ngo kuziva kuti Jehovha unoregerera zvishaishi zvedu?
13 Izvi zvinotijijisenyi? Jehovha paanotiregerera isusu atidikanizve kutwara mutwalo wo zvishaishi mu upenyu wedu. Zvishaishi zvedu zvinoregererwa kamare pesishandiswa muripo wa Jesu Kristu, zvinoita inga zvisito kumboitikazve, uku ndikona kuregerera ko cokwadi Jehovha kaanotipa paya patinokhauya.
JEHOVHA UNOTITENDERAZVE KUTI TIVE SHAMWARI JAKE
Kuregerera ka Baba vedu vokudenga kunotiita kuti tive no ushamwari wo phedo navo (Wonanyi ndima 14)
14. Ngenyi tingathemba kuregerera ka Jehovha? (Wonanyi .)
14 Patinoashira kuregerera ko cokwadi ka Jehovha tinova no cokwadi cokuti tinovazve no ushamwari inga zvataiita kare. Izvi zvinotibesa kuti tisaramba tino mazwiro okuzvipa ndava uye atidikani kutya kuti Jehovha unoviga zvishaishi zvedu ozoemera mukana wokuti atipanice. Apana cikhombijiro cingaita kuti titi izvi zvingatika, ngenyi izvi tinodikana kuva no cokwadi nazvo? Jehovha wakati kuno mu porofita Jeremiya: ‘Ndinozoregerera kukanganisa kako uye andizolangaririzve cishaishi cako.’ (Jer. 31:34) Mu postori Pauro wakavangisa fundo iri esishandisa masoko amwewo okuti: ‘Andizolangaririzve zvishaishi zvako.’ (VaH. 8:12) Izvi zvinoda kubhuyenyi kamare?
‘Andizolangaririzve zvishaishi zvenyu’. (Jer. 31:34)
15. Jehovha aalangaririzve zvishaishi zvedu ngo gwanja ripi?
15 Mu Bhaihberi, soko lokuti “kulangarira” asi pese parinobhuya ngo kulangarira zviro zvakaitika kare. Kunja kaizvi irona ringabhuira ciitiko. Inga muezaniso, mushaishi wainga akapaikwa padanda pa divi la Jesu wakati: ‘Ndilangarirewo paunozopinda mu Umambo wako.’ (Ruka 23:42, 43) Mwanarume uwu wainga asikakumbiri kuti Jesu amulangarire basi. Mupingulo wa Jesu waikhombija kuti wazoita ciito kumushaishi. Iyena unozomumusa, ngo kudalo Jehovha paanobhuya kuti, aazolangaririzve zvishaishi zvedu izvi zvinoda kubhuya kuti aazotiitiri zvakashata. Jehovha aazotipanici muno lamangwana ngo ndava yo zvishaishi zvaakaregerera.
16. Bhaibheri rinosanangurisa kudini rusununguko rinoviya ngokuregerera ko cokwadi?
16 Bhaibheri rinoshandisa kuezanisira kumweni kunobesa kunovha pa rusununguko lo kuregerera ko cokwadi. Irona rinoti ‘taiva varanda vocishaishi.’ Asi Jehovha paanotiregerera, ‘tinosunungurwa pa cishaishi.’ (VaR. 6:17, 18; Zvak. 1:5) Kuregerera ka Jehovha kunotivhisa pa cishaishi uye kunodakajisa.
“Imwimwi makasunungurwa pa zvishaishi”. (VaR. 6:18)
17. Kuregerera kunobhuya kulapwa ngo gwanja ripi? (Isaya 53:5)
17 Verenganyi Isaya 53:5. Kuezanisira ko kupejisira katisawona, mundhu unondhendha iri yese yakakula maningi. Ngo ndava yo muripo wo takapuwa ndi Jehovha esishandisa mwana wake, isusu tingatoti takalapwa. (1 Ped. 2:24) Mukutojanawo mundhu uno ndhendha yakakula paanolapwa unodakala maningi nesuwo tinodakala maningi patinova no ushamwari na Jehovha uye kuregererwa zvishaishi zvedu. Zvese izvi zvinokwanisika ngo ndava yo muripo, ngo kudalo Jehovha paanotiregerera tinova no ushamwari wo phedo naye.
‘Ngo ndava yo zvironda zvake, isusu takalapwa’ (Isa. 53:5)
KUREGERERA KA JEHOVHA KUNODA KUBHUYENYI KATIRI
18. Tinojijenyi ngo kuezanisira kakawanda kunoita Bhaibheri ngo pamusolo po kuregerera kunoita Jehovha? (Wonanyi bhokiso rakazwi “Jehovha Unotiregereresa Kudini”?)
18 Tajijenyi ngo kuezanisira kunoita Bhaibheri pakuregerera kunoita Jehovha? Tajija kuti, Jehovha paanoregerera zvinoita inga kuti atito kumboshaisha. Jehovha zvaakaregerera zvishaishi zvotakaita. Ngo ndava yazvo, tinova no ushamwari wakavanga na Baba vedu vo kudenga. Pa nguva imweyo, cipo ca Jehovha katiri, cikhombijo co rudo uye co unyasha caanokhombija kuvashaishi. Isusu pacedu tinozviziva kuti atifanei zvakadalo.—VaR. 3:24.
19. (a) Icinyi catinodikana kubonga? (VaRoma 4:8) (b) Zvicinyi zvatinozowona mu cijijo cinotevera?
19 Verenganyi VaRoma 4:8. Kubonga kedu Jehovha Mwari ‘wokuregerera ko cokwadi kakakula’! (Ps. 130:4) Asi kudai tesida kuregererwa ndi Jehovha tinodikana kuita ciro cinokosha cakabhuiwa ndi Jesu kuti: ‘Mukatama kuregerera vamweni zvishaishi zvavo Baba venyu avazomuregereriwo zvishaishi zvenyu.’ (Mateu 6:14, 15) Zvakajeka kuti, zvinokosha maningi kutevejera kuregerera ka Jehovha. Asi tingazviitisa kudini izvi? Mu cijijo cinotevera tinozojija zvakawanda ngo pamusolo poshwiro iyi.
NGOMA 46 Tobonga, Jehovha
a Tsamba yo citatu yo ciHebheru yakashandisa gama lokuti “kuregerera,” risingabhuiri basi kuregerera. Kuregerera uku ndikona kega kuregerera ko cokwadi kunyange kunomaitire amweni okuregerera. Vasanduji vakawanda vo Bhaibheri vakasiya fundo iri rinokosha, asi Shanduro Yenyika itsva yo mangwaro matsvene, yakashandisa fundoro pakusanduja Pisarema 130:4.