Tevejeranyi Kuvangisira ka Jesu paBasa lo Kuparijira

1. Icinyi cinosiyanisa vandhu va Jehovha no vonyika?

CIRO cimweni cinosiyanisa vandhu va Jehovha na vaya vanozviti va Kristu, kuvangisiraa mu basa lo kuparijira. (Tito 2:14) Nguva jimweni, azvito kureruka kuzwa mesida kuenda kooparijira. Mungakonawo kuzwisisa masoko omukuru umweni wo ungano, iyena wakati: “Nguva jimweni, ndinozwa ndisina simba lo kuparijira.”

2. Ngenyi nguva jimweni zvingaita inga zvinonesa kuzwa tesidakala patinonga tesiparijira?

² Mungazwa mesida mativi amweni o basa rokuitira Jehovha kupinda basa lo kuparijira. Ngenyi izvi zvesiitika? Tingawana muviyo ngo kukasika tozwa kubudirira patinovaka no kunasirira-nasirira zvivako zvo uMwari no kubesa hama no hanzvaji pajinosangana no ngozi jinoitika jega no kujivangisa. Tinodakarira mugariro wo rudo watinozwa patinoshanda no hama no hanzvaji jedu uye tinozviziva kuti zvatinovaitira zvinovadakaja. Ngo divi rimweni dangani taano makore tesiparijira mundau imweyo uye amuna vandhu vanodakarira. Kana kuti tinogumira vandhu vasikatendi kuparijirwa. Uye tinozviziva kuti mugumo paunokwedera zvatinoparijira zvingaengejera kutama kudiwa. (Mateu 10:22) Icinyi cisatibesa kuti tilambe tesivangisira mu basa lo kuparijira?

3. Ruka 13:6-9 inotijijisenyi ngo zvokuvangisira ka Jesu?

³ Tingajija kuvangisira mu basa lo kuparijira ngo kulangarira ngo zvo muezaniso wa Jesu. Mukati mo basa rake, aato kumboregera kuvangisira kake. Kubhuya cokwadi, iyena wakavangisira maningi mu basa rake sezvo nguva yainga yasara padoko. (Verenganyi Ruka 13:6-9.) Jesu wakaezanisa basa rake ngo kuvangisira kunoizwa ngo mwanarume anowonerera munda wo muvhinyu mwanarume uwu wakapeja makore matatu esieja kurima muvhinyu usikabari, ngo njira yakaezana Jesu wainga apeja makore anokwana kuita matatu esiparijira vaJudha, asi vakawanda vavo avato kuvaashira zvakanaka masoko. mukutojanawo no mwanarume uwu asito kuremba kungwarira muvhinyu, Jesu aatowo kuremba kuparijira ngokuti vandhu vainga vasikamuyaeyi kana kuti aatowo kusiya basa rake lo kuparijira. Mukusiyana, iyena wainga akazvipira maningi kuti abese vandhu kuashira masoko akanaka.

4. Ngazvipi zviro zvilongomuna zvatinozojija kuvha pa muezaniso wa Jesu?

⁴ Mucijijo cino, tinozojija kuti Jesu wakakhombijisa kudini kuvangisira mu basa rokuparijira, maningi-ningi pa mweji mutandhatu jokupejisira jo upenyu wake pasi pano. (Wonanyi masoko okujija anoti: ‘Kupera ko Zviro izvi.’ ari pana Ruka 10:1.) Kujija ngo pamusolo po zviro zvakajijiswa ndi Jesu no kutevejera muezaniso wake kunozotibesa kuti tilambe tesivangisirawo. Ngatibhuye ngo zviro zvilongomuna zvatinojija kuvha ku muezaniso wa Jesu: (1) Iyena wainyanya kulangarira zvaidiwa ndi Jehovha, (2) wailamba esilangarira ngo zvo uporofita wo Bhaibheri, (3) waithemba kuti Jehovha waizomubesera, uye (4) wailamba anomawonero akanaka ku vandhu.

IYENA WAIBATIKANA NGO ZVINODIWA NDI JEHOVHA

5. Jesu wakakhombijisa kudini kuti wainyanya kulangarira ngo zvokuita kuda ka Mwari?

⁵ Jesu waivangisira kuparija “masoko akanaka o Umambo” ngokuti waiziva kuti lainga basa raidiwa ndi Mwari kuti aite. (Ruka 4:43) Kuna Jesu kuparijira lainga basa rinokosha maningi mu upenyu wake. Kunyange mu mweji wokupejisira wo basa lake, Jesu wakalamba esihamba “muthaundi ngo thaundi uye muzi ngo muzi,” esijijisa vandhu. (Ruka 13:22) Iyena wakajijisazve vajiji vake vamweni kuti vave vapariji.—Ruka 10:1.

6. Basa lo kuparijira rakabatana papi no mabasa amweni a Mwari? (Wonanyi foto.)

⁶ Mazuva anowo kuparijira masoko akanaka risiri basa rinokosha maningi iro Jehovha na Jesu ravanoda kuti tiite. (Mateu 24:14; 28:19, 20) Kubhuya cokwadi basa rese ratinoitira Jehovha rinobatanijawo pa basa rokuparijira. Inga muezaniso, tinovaka zvivako zvosangano tinoshanda pa bheteri kuitira kubesa basa lo kuparijira. Uye patinobesa hama no hanbzvaji jedu jinonga jawirwa ngo ngozi atisotereri basi kuvabesa ngo zviro zvokunyama, asi tinovabeserawo ngo zviro zvovanoda pakunamata kubatanijawo kuparijira masoko akanaka. Ngo kudalo apo patinolangarira kuti kuparijira ibasa rinokosha maningi iro Jehovha raanoda kuti tiite, izvi zvinozotiita kuti tiite zvese zvatinokona pakuita basa iri. Janos, mukuru umweni wo kuHungriya, wakati: “Nguva jese ndinolangarira kuti apana basa rimweni ratinoitira Jehovha ringafakeya basa lo kuparijira masoko akanaka, iri ndilona basa redu guru.”

7. Ngenyi Jehovha esida kuti tilambe tesiparija? (1 Timoti 2:3, 4)

⁷ Tingaengejera kuvangisira katinoita mu basa lo kuparijira kudai tikava no mawonero akafanana no aJehovha ngo pamusolo po vandhu. Iyena unoda kuti vandhu vakawanda vazwe uye vatende masoko akanaka. (Verenganyi 1 Timoti 2:3, 4.) Ngo iyo ndava, iyena unotibesa kuti tiitise nane mu basa redu lo kuparijira. Inga muezaniso, brushura Indanyi Vandhu rinotipa mazano anoshanda kuti titangise mabhuyo no cinangwa cokutangisa cijijo. Kunyange vandhu vasikanamati Jehovha zvino, ivona dangani vangazova no mukana wokuita izvi dambujiko guru risati rapera. Ngo kudalo zvatinovaparijira zvino zvinozovavangisa mberiyo kuti vaite cikhetwa ici. Asi izvi zvingazoitika kudai tikalamba tesiparijira.

IYENA WAIGARA AKANGWARIRA UPOROFITA WO MUBHAIBHERI

8. Kuziva uporofita wo Bhaibheri kakabesesa kudini Jesu kuti ashandise nguva yake zvakanaka?

⁸ Jesu waizwisisa kuti uporofita wo Bhaibheri waizozajika kudini. Iyena waiziva kuti basa lake raizopeja makore matatu no hafu basi. (Dha. 9:26, 27) Iyena waizivazve uporofita ngo pamusolo po mafire aaizoita uye waizofa riini. (Ruka 18:31-34) Jesu aato kuita kuti zvaaziva zviphingaije mashandisire aaita nguva yake. Inga muviyo, iyena wakavangisira mbhera kupeja basa laakapuwa kuti aite.

9. Ngenyi kuzwisisa uporofita wo Bhaibheri kesitibesa kuvangisira mu basa lo kuparijira?

⁹ Kuzwisisa uporofita wo Bhaibheri zvinotibesa kuti tide kuparijira no kuvangisira. Ngokuti tinoziva kuti mugumo wo mugariro wo nyika ino waaphedo. Tiri kukwanisa kuwona kuti zviitiko zvo nyika ino uye mufambiro wo vandhu zviri kuzajisa kudini uporofita wo Bhaibheri ngo pamusolo po mazuva okupejisira. Tiri kuwonawo kurwisana pakati po majimambo anosimba akadai inga Anglo-Amerikana no Rusia uye no vabeseri vavo izvi zviri kuzajisa uporofita wokuti mambo wo kumavhazuva na mambo wokumavirira vaizorwisana ‘pa nguva yo kupejisira.’ (Dha. 11:40) Uye tinozwisisa ngozvo soka yomudhori iri mu uporofita wa Dhanyeri 2:43-45 yesiemerera simba lo nyika yo Anglo-Amerikana. Tino cokwadi cokuti ngo kukasika Umambo wa Mwari unozoparaja utongi wese wo vandhu. Uporofita uwu unokhombija kuti tiri mu nguva ipi uye tinodikana kuparijira masoko akanaka ngo kukasika.

10. Maitire api amweni o uporofita wo Bhaibheri anotiita kuti tiparijire?

¹⁰ Uporofita wo Bhaibheri uno masoko osoterero atinodawo kuvhunja vamweni. “Hanzvaji imweni inozwi Karie inoshanda ku Republica Dhominikana iyona yakati: “Pandinoema ndorangarijisisa ngo zviro zvinoshamaisa zvakagondeswa ndi Jehovha zvaanozoita muno lamangwana, ndinozvizwa ndesida kubhuyawo no vamweni vari kusangana no zvineso zvakawanda, uye vanokona kuwona kuti vanodikana kuziva ngo pamusolo po zvatakagondeswa ndi Jehovha.” Unotizve: “Pandinowona zviri kusangana no vandhu mazuva ano, ndinozwisisa kuti zvigondiso izvi asipi zvangu ndenga asi naivonawo”. ngo kudalo uporofita wo Bhaibheri unokhombija kuti Jehovha uri kutibesa nguva jese mu basa iri. Leila, unogara ku Hungriya, wakati: Vhesi ya “Isaya 11:6-9 inondilangarijisisa kuti vandhu vese havo vanokona kucinja ngo besero la Jehovha ngo kudalo ndinoda kuparijira masoko akanaka ku vandhu vese, kunyange kuna vaya vangaita inga kuti avangatendi asi ngo besero ra Jehovha vangacinja.” Kristovha, hama imweni inogara ku Zambia, yakati: “Mako 13:10 inobhuya kuti, masoko akanaka aizoparijirwa mu nyika yese, uye cidakajiso cakakura kubesa kuzajisa uporofita uwu.” Uye yemwiwo keni uporofita upi wo Bhaibheri unomukurujira kuti mulambe mesiparijira?

IYENA WAITHEMBA BESERO LA JEHOVHA

11. Ngenyi Jesu waidikana kuthemba Jehovha kuti alambe esivangisira mu basa lo kuparijira? (Ruka 12:49, 53)

¹¹ Jesu waithemba kuti Jehovha waizomubesa kuti alambe esiparijira no kuvangisira. Kunyange zvakadalo, Jesu waibhuya no ruremekejo, uye waikheta zvakanaka masoko ake waizviziva kuti masoko akanaka aizoviisa kuvereketejana uye kutevererwa. (Verenganyi Ruka 12:49, 53.) Ngo ndava yokuparijira kaaita, vatungamiriri vomaceci vakaeja kakawanda kumuulaya. (Johani 8:59; 10:31, 39) Asi kunyange zvakadalo Jesu wailamba esiparijira ngokuti waiziva kuti Jehovha wainga naye. Iyena wakati: “Iyeni andiripi ndega Aba vakandituma vaneni. . . . Ivona avato kundisiya ndega ngokuti nguva jese ndinoita zvinovadakaja.”—Johani 8:16, 29.

12. Jesu wakaitisa kudini kuti avangise vajiji vake kuti valambe vesiparijira povaizosangana no kutevererwa?

¹² Jesu wakayeujira vajiji vake kuti vanodikanawo kuthemba besero la Jehovha. Nguva jese iyena waivathembesawo kuti Jehovha waizovabesa kumyange povaizosangana no kutevererwa. (Mateu 10:18-20; Ruka 12:11, 12) Jesu wakavakumbirazve kuti vave vakangwarira. (Mateu 10:16; Ruka 10:3) Iyena wakavavhunjazve kuti vasavangirija vandhu vasikadi kuzwa masoko avanobhuya. (Ruka 10:10, 11) Uye wakavavhujawo kuti vatize kudai vakatevererwa. (Mateu 10:23) Kunyange hazvo kuti Jesu waivangisira, uye kuti waithemba Jehovha, iyena aato kuzvikanda pa ngozi.—Johani 11:53, 54.

13. Ngenyi mungava no cokwadi cokuti Jehovha unomubesa?

¹³ Nyamasi uno yesu tinodawo besero la Jehovha kuti tiparijire no kuvangisira kese patinosangana no kuzondwa. (Zvak. 12:17) Ngenyi mungava no cokwadi cokuti Jehovha unozomubesa? Wonanyi mukumbiro wa Jesu wakanyorwa pana Johani citsauko 17. Jesu wakakumbira kuti Jehovha angwarire vapostori. Uye Jehovha wakadavira mukumbiro uwu. Bhuku la Mabasa rinokhombija kuti Jehovha wakabesesa kudini vapostori kuti vaparijire no kuvangisira kunyange povaizondwa. Mumukumbiro wake, Jesu wakakumbirawo kuti Jehovha azobesa vaya vaizoashira masoko ovapostori. Izvi zvinobatanijawo na iyemwi. Jehovha uri kuenderera mberi esidavira mukumbiro uwu mbhera zvino; Iyena uri kumubesa inga mabesere aakaita vapostori.—Johani 17:11, 15, 20.

14. Tinozvizivisa kudini kuti tinozolamba tesivangisira mubasa lo kuparijira? (Wonanyi foto.)

¹⁴ Kunyange zvesinesa kuvangisira mubasa lo kuparijira masoko akanaka mugumo wesikwedera kudai tinoashira besero ratinoda. (Ruka 21:12-15) Mukutojana na Jesu no vajiji vake, tinosiira mundhu umwe nga umwe kuti azvikhetere ega kuti unoda kutiyaeya kana kutama kutiyaeya uye atipopotejani navo. Kunyange munyika munolambijwa basa redu, hama no hanzvaji jedu jinokwanisa kuparijira masoko akanaka ngokuti jinothemba Jehovha, haiwa simba rajo. Kuezana no muzana lo kutanga lo makore Jehovha wakapa simba vanamati vake, munguva inowo iyena anotipa simba kuitira kuti “tilambe tesiita basa lo kuparijira zvakanaka” mukuzwirana nokuda kake. (2 Tim. 4:17) Ivanyi no cokwadi cokuti mukathemba Jehovha, munokwanisa kulamba mesivangisira mubasa lo kuparijira.

IYENA WAKALAMBA ANO MULANGARIRO WAKANAKA

15. Icinyi cinokhombija kuti Jesu wainga nomawonero akanaka mu basa lo kuparijira?

¹⁵ Jesu wakalamba anomulangariro wakanaka ngo pamusolo po basa lo kuparijira. Izvi zvakamubesa kuti aite zvese zvaaida uye kuenderera mberi esiparijira. Inga muezaniso, mukupera komakore 30 K.A, Iyena wakawona kuti vandhu vakawanda vaida kuzwa masoko akanaka, iyena wakaezanisa vandhu ava no munda woda kukokwa. (Johani 4:35) Papera gore rimwe wakavhunja vajiji vake kuti: “Munda wo kukoka wakakura.” (Mateu 9:37, 38) Uye wakazozvibhuyazve kuti: “Munda wo kukoka wakakura . . . Kumbiranyi mune wo munda kuti atumire vashandi kuti vaviye kookoka.” (Ruka 10:2) Jesu aato kumbosiya kuthemba kuti vandhu vaizoashira masoko akanaka uye waidakala maningi pozvaiitika.—Ruka 10:21.

16. Muezaniso ja Jesu jaikhombijisa kudini mawonero akanaka mu basa lo kuparijira? (Ruka 13:18-21) (Wonanyi foto.)

¹⁶ Kuti abese vajiji vake kuti valambe vesivangisira Jesu wakakhombija kuti masoko akanaka ovaiparijira, aizova no muviyo wakanaka. Inga muezaniso, wonanyi muezaniso muviri jaakaita. (Verenganyi Ruka 13:18-21.) Umwe wo muezaniso uwu Jesu wakashandisa mbeu doko yo masitadhi kujijisa kuti soko lo Umambo raizokura ngo gwanja rinoshamisa, uye apana caizokona kuyemesa kukura uku. Uye mu muezaniso umweni Jesu wakashandisa isiti kukhombija kuti masoko oUmambo aizopararira zvakadini kuita cinjo kuna vaya vaimatenda kunyange kuti paizotora nguva yakareba kuti vamazwisise. Ngo kudalo Jesu wakakhombija kuvajiji vake kuti masoko ovazoiparijira aizobudirira.

17. Ngenyi tinodikana kulamba tinomawonero akanaka mu basa lo kuparijira?

¹⁷ Iyesu tinokurujirwa kulamba tesivangisira mu basa lo kuparijira patinolangarira kuti basa redu lo kuparijira ririkubesa vandhu vakawanda kudini mu nyika yese. Makore ese, mamiriyau ovandhu vanodakarira vanopinda Cilangarijo uye vanojija na yesu Bhaibheri. Uye mamiriyau ovandhu vari bhabhatijwa, uye vanobatana nesu mu basa lo kuparijira. Atizvizivi hedu kuti vangana vanozotenda basa redu lo kuparijira, asi tinoziva kuti Jehovha uri kuunganija vandhu vakawanda vanozopona pakutambujika kukuru. (Rev. 7:9, 14) Jehovha Mwari wokukoka unozviziva kuti vandhu vakawanda vasada kutenda masoko akanaka, ngo kudalo tinocikonzero cakanaka cokuti tilambe tesiparijira.

18. Ngazvipi zvatinoda kuti vandhu vaone katiri?

¹⁸ Caiita kuti vajiji va Jesu vazivikanwe inga vapariji vo masoko akanaka kainga kuvangisira kovaiita mu basa lo kuparijira. Vapostori vaiparijira ngo cicunge uye no simba rese,“izvi zvakaita kuti vandhu vazive kuti cokwadi vakambova na Jesu.” (Mabasa 4:13) Pavanotiwona tiri mu basa lo kuparijira, ngavawone kuti nayesu tinotevejera muezaniso wo kuvangisira ka Jesu.