MUSOLO WO KUJIJA 26
NGOMA 123 Kubesera Urongwa hwo Umwari Takagondeka
Ivanyi Vanozvidodokesa Kuti Mutendere Makapfava Zviya Zvamusingakoni
‘Atikwanisi kuzwisisa wo masimba ese.’—JOBE 37:23.
ZVATISAJIJA
Tingarwisana kudini no kutama kuthemba kudai tikatendera zviro zvatisingazwisisi no zvatisingazivi tobatikana ngozvatinoziva uye tothemba Jehovha.
1. Jehovha wakatipa zvikwaniriso zvipi uye ngenyi?
JEHOVHA wakatisika tesikwanisa kulangarira, tino uzivi, kukhombija kuzwisisa uye ungwaru. Ngenyi iyena wakatisika kudai? Iyena unoda kuti “tiwane uzivi wa Mwari” uye tomushandira ngo cipo catinaco cokulangarira.—Zvi. 2:1-5; VaR. 12:1.
2. (a) Ngazvipi zvatisingakoni kuita? (Jobe 37:23, 24) (Wonanyi foto.) (b) Tingabesereka kudini ngo kutendera zvatisingakwanisi kuita?
2 Kunyange tesikwanisa kujija, tino patinogumira pa zviya zvatinoziva. (Verenganyi Jobe 37:23, 24.) Ambowonanyi muezanso wa Jobe. Jehovha wakamuita muvhunjo jakatevererana zvakakhombija kuti wainga asingazivi zvakawanda. Ciitiko ici cakaita kuti azvidodokese uye cakaita kuti anase kulangarira. (Job. 42:3-6) Na yesuwo tinobeserekawo ngo kuzvidodokesa toziva kuti atizivi zvese. Kuzvidodokesa uku kunotiita kuti tithembe Jehovha kuti unotitvhunja zvese zvatinoda zvinozoita kuti tiite zvikhetwa ngo ungwaru.—Zvi. 2:6.
Kutendera zvatisingazivi kungatibesa inga zvakaita Jobe (Wonanyi ndima 2)
3. Tinozojijenyi mucijijo cino?
3 Mu cijijo cino, tinozobhuisana ngo pamusolo po zviro zvimweni zvatisingazivi uye no muviyo jinozovepo patinosangana no muejo. Tinozoongororazve kuti ngenyi zvakanaka kutama kuziva zviro zvimweni. Kubhuisana ngo pamusolo pazvo kunozovangisa kuthemba kedu Jehovha, “wiya wakakwana muzivo,” unotivhunja zvese zvatinoda kuziva kamare.—Job. 37:16.
ATIZVIZIVI KUTI MUGUMO UNOVIYA RINI
4. Maererano na Mateu 24:36, ngazvipi zvatisingazivi?
4 Verenganyi Mateu 24:36. Atizivi kupera ko mugariro uno wakashata. Kunyange Jesu paainga pasi pano wainga asingazivi ‘zuva uye no nguva.’a Mu kuhamba ko nguva iyena wakavhunja vapostori kuti Jehovha mupimi mukuru wo nguva, unongwarira nguva yo zvinoitika ‘mukutonga kake kamare’ no ukuru wake. (Mabasa 1:6, 7) Jehovha wakalonga nguva hei yo kupera ko mugariro uno, atina citenderwa cokuziva kuti zvinozoitika rini kamare.
5. Kutama kuziva kuti mugumo unoviya riini, zvingatipsasisa kudini?
5 Tesilangarira ngo zvakabhuya Jesu, atizvizivi kuti tinodikana kuemera mbhera riini kuti mugumo uviye. Muviyo wazvo, nguva jimweni tinoramwa kana kupera simba kudai tasoterera ko nguva yakareba zuva la Jehovha. Nguva jimweni tingadikana kucungirira kushorwa ngo vo pambhuri pedu kana kuti vandhu vamweni. (2 Ped. 3:3, 4) Zviri nyore kulangarira kuti dai ndaiziva zuva raizoviya mugumo ndaizosengerera no kukwanisa kucungirira kushorwa.
6. Ngenyi zvakanaka kutama kuziva kuti mugumo unoviya riini?
6 Cokwadi ngo kutama kutivhunja zuva lo mugumo, Jehovha unotipa mukana wo kukhombija kuti tinomushandira ngokuti tinomuda uye tinomuthemba. Atidi kushandira Jehovha no parazo mu mulangariro inga kuti kutenda kedu maari pano zuva lakunopera. Pano kubatikana kuti ‘zuva la Jehovha’ rinoguma rini, zvakanaka kuti tibatikane kuti zvicinyi zvinozoitika pazuva iri. Tikaita kudalo, tinozolamba tesiengejera kuzvipira kedu kuna Mwari uye toita zvese zvatinokona kuti timudakajise.—2 Ped. 3:11, 12.
7. Zvicinyi zvatinoziva?
7 Tingaita zvakanaka ngo kubatikana ngo zvatinoziva kuti mazuva okupejisira akatanga mugore la 1914. Jehovha wakapa uphorofita wo Bhaibheri usingakhombiji basi gore iri asi unoverengeja zviitiko zviri kuwoneka mbhera mazuva ano. Izvi zvinoita kuti tive no cokwadi cokuti “zuva guru la Jehovha laaphedo. (Zaf. 1:14) Tinozivawo basa laanoda Jehovha kuti tiite kana kuti kuvhunja vakawanda ngo pamusolo pomasoko akanaka o “Umambo wa Mwari.” (Mateu 24:14) Masoko aya ari kuparijirwa munyika jinokwana kuita 240 uye ndumi jinopindirija 1.000. Atidikani kuziva “nguva no zuva” kuti tizvipire kuita basa iri takagondeka.
ATIZVIZIVI KUTI JEHOVHA UNOZOZVIITISA KUDINI
8. Zvinoda “kubhuyenyi kuti mabasa aMwari o cokwadi”? (Mupariji 11:5)
8 Asipi nguva yese yatinoziva “basa la Mwari wo Cokwadi.” (Verenganyi Mupariji 11:5.) Mabhuire aya anokhombija kuti Jehovha unoita kuti zviitike kana kuti unotendera kuti zviri zvese zviitike kuti aite kuda kake. Atidikani kunasa kuziva kuti ngenyi Jehovha unotendera kuti zviro zviitike kamare katiri. (Ps. 37:5) Uzivi wakadai wakakura maningi zvokuti auzwisisiki katiri, inga kukura kunoita mwana ari mundani, zviro zvokuti vo sinyesiya avasati vazvizwisisa zvakanaka. Ngo gwanja lakatojana atinasi kuziva kuti Jehovha unozoitisa kudini zviro izvi.
9. Zvesiwoneka kuti atizivi kuti Jehovha unozoitenyi kuti atibese, zvineso zvipi zvatingasangana nazvo?
9 Kutama kuziva kuti Jehovha unozotiitirenyi zvingatiita kuti titame kuziva zvokuita. Tingazotama kuita zviro zvimweni mubasa lo kuparijira zvakadai inga kurerusa upenyu wedu kana kuenda kunodiwa vapariji vo Umambo vakawanda. Tingazvivhunjisa kudai: Ndinotenderwa ndi Mwari kudai ndikatama kukwanirisa zvinangwa zvangu zvo kunamata? Ndinotenderwa ndi Mwari kudai ndisikabudiriri mubasa lo kuparijira kana kuti ndikasangana no zvineso mu basa lo kunamata?
10. Undhu upi wakanaka watingava nawo ngo kutama kuziva kuti Jehovha unozotibesesa kudini?
10 Kutamata kuziva kuti Jehovha unozoitisa kudini kuti atibese, kunokhwijirija undhu wedu wakanaka wo kuzvidodokesa. Taguma pakuziva kuti mulangariro wa Jehovha no njira yaanoita ndiyona zviro yakakwirira kupinda yedu. (Isa. 55:8, 9) Tinojijawo kuthemba maningi Jehovha tesimuthemba kuti tibudirire. Patinova no muviyo wakanaka mu basa lo kuparijira kana kuti basa lo kuzvipira ngo njira yakarurama tinopa Jehovha rukujo. (Ps. 127:1; 1 VaK. 3:7) Kudai zviro zvikatama kuita inga zvataisoterera tinodikana kulangarira kuti Jehovha uri kuwona zvese zviri kuitika. (Isa. 26:12) Toita divi redu uye tolamba tesithemba kuti Jehovha unozoitawo divi lake. Tinothemba kuti unozotipa ndhungamiriro jatinoda kunyange zvikatama kuita ngo mushamiso inga zvaaita mu nguva yo kare.—Mabasa 16:6-10.
11. Zvicinyi zvatinoziva zvingazotibesa?
11 Langariranyi kuti Jehovha uno rudo nguva yese wakarurama uye uno uzivi. Tinozviziva kuti iyena unokoshesa maningi zvatinomuitira uye no zvatinoitira hama no hanzvaji jatinonamata najo. Tinozvizivazve kuti Jehovha unokomborera vaya vanolamba vakagondeka kaari.—VaH. 11:6.
ATIZVIZIVI ZVINOZOITIKA MUNO LAMANGWANA
12. Maererano na Jakobe 4:13, 14, zvicinyi zvatisina cokwadi nazvo?
12 Verenganyi Jakobe 4:13, 14. Cokwadi ngo cokuti atizvizivi kuti upenyu wedu unozonga wakadini muno lamangwana. Mu nguva yatiri kuraramari, tiri kuemera kusangana no zviro “zvatisingasotereri pa nguva yatisingalangariri.” (Mup. 9:11) Inga muviyo, atizvizivi kuti zvatakalonga zvinozobudirira kana kuti tinozonga tiri vapenyu here kuti tiwone zvatakalonga zvesiitika.
13. Ngenyi kutama kuziva kuziva zvinozoitika muno la mangwana kungatipsasa?
13 Kutama kuva no cokwadi no upenyu zvinoita kuti zvitinesere kucungirira zvineso. Kuitisa kudini? Kugara tesineseka ngo zvinozoitika zvinokwanisa kutitorera mudakalo. Upenyu wedu ungacinja ngo gwanja zvatainga tisingasotereri, kana kuti zviro zvakashata zvikaitika ngo civhumbu. Izvi zvingaita kuti tisuruvare no kucamwa. Uye kudai zvataisoterera zvikatama kuitika, tingapera simba uye tosuruvara.—Zvi. 13:12.
14. Zvicinyi zvatinodikana kuita uye kuziva kuti tive vandhu vakadakala? (Wonanyi foto.)
14 Patinorwisana no zvineso, tinowonesa pambhene kuti azvinenyi no matambujiko, tinoshandira Baba vedu vo kudenga ngo rudo haiwa ngo kuda zviro. Bhaibheri rinokhombija kuti Jehovha aatingwariri pazvineso zvatingasangana nazvo uye aagari akalonga zvinozoitika mu upenyu wedu. Iyena unoziva kuti mudakalo wedu auvhi pakuziva kuti lamangwana redu rinozova lakadini. Pano kudalo, zvinofira pakupsaka ndhungamiriro uye no kumuzwira. (Jer. 10:23) Patinosota Jehovha toita zvikhetwa, cokwadi tinonga tesibhuya kuti: “Kudai Jehovha akada tinozolalama uye tinozoita izvi, na izvo.”—Jak. 4:15.
Kupsaka ndhungamiriro ja Jehovha no kujizwira iyena unozotipa jiviriro yakathembeka (Wonanyi ndima 14-15)b
15. Zvicinyi zvatinoziva ngo zvo muno lamangwana?
15 Kunyange kuti atizvizivi zvinozoitika zuva ngo zuva tinoziva kuti Jehovha wakatithembesa upenyu usingaperi ungava wo kudenga kana panyika pano. Tinozviziva kuti iyena aanyepi uye apana cinomukoreresa kuzajisa zvese zvaakathembesa. (Tito 1:2) Iyena basi “unokona kubhuya muviyo wo zviro zvinozoitika, kuvhira kare waibhuya zviro zvisati zvaitika.” Izvi zvakava zvo cokwadi pa zviro zvakadarika uye no zvinozoitika muno lamangwana. (Isa. 46:10) Tinozviziva kuti apana cinokoreresa Jehovha kuti atide. (VaR. 8:35-39) Iyena unotipa uzivi, unotivangisa uye unotipa simba kuti tirwisane no zviro zvatinozosangana nazvo mu upenyu wedu. Tingava no cokwadi cokuti Jehovha unozotibesa uye unozotikomborera.—Jer. 17:7, 8.
ATINGAKWANISI KUNASA KUZWISISA MAZIVIRE AANOTIITA JEHOVHA
16. Maererano no zvakanyorwa pana Pisarema 139:1-6, uzivi upi una Jehovha watisinganasi kuzwisisa?
16 Verenganyi Pisarema 139:1-6. Musiki wedu unoziva masikire aakatiita, ciemo cedu no mulangariro wedu. Cido cake ngoco nguva yese katiri. Iyena unoziva zvatinobhuya, uye ngenyi tinoda kuzvibhuya, zvatinoita uye ngenyi tinoda kuzviita. Inga zvakabhuiwa ndi Mambo Dhavhidhi, nguva yese Jehovha unotingwarira uye atizombovi tega. Zvinoshamisa kuti Mambo wo kudenga, mukuru mukuru Musiki wo denga no pasi unonasa kutizwisisa! Inga zvakabhuiwa ndi Dhavhidhi kuti: ‘Zivo yakakura kudalo andikwanisi kuizwisisa. Yakakura maningi zvokuti andingakwanisi kuva nayo.’—Ps. 139:6.
17. Ngenyi zvingava zvinonesa kutendera kuti Jehovha unonasa kutiziva?
17 Nguva jimweni, ngo ndava yo mbhuri yedu tsika jedu kana kuti zvataitenda kare zvingatinesa kuti tiwone Jehovha inga Baba vano rudo uye vanotidakarira. Kana kuti tinozvizwa kuti zvishaishi zvatakaita kare zvakashata maningi zvokuti Jehovha aato kuzomboda kuziva ngo zvedu zvokuti atori ndhambo nesu, Dhavhidhi wakavawo no mazwiro akadalo. (Ps. 38:18, 21) Mundhu ari kueja kuita zvese zvaanokona kuti alalame mukuzwirana no mutemo jakanaka ja Mwari, ungazvivhunjisa kuti: ‘Kudai Mwari unondizwisisa ngenyi unoda kuti ndisiye upenyu wandinoona kuti wakanaka kandiri?’
18. Tinobesereka kudini ngo kutendera kuti Jehovha unotiziva zvakanaka kudarika yesu? (Wonanyi foto.)
18 Tingajija kutendera kuti Jehovha unotiziva maningi kupinda mazivire atinozviita pacedu, uye kuti unowona zviro zvakanaka katiri zvatisingakwanisi kuwona. Ngo kudalo, kunyange esiwona zvatinoshaisha uye unozwisisa kuti ngenyi tesiita zvishaishizvo ngo njira yonayo iyena unondida. (VaR. 7:15) Patinolangarira kuti Jehovha unowona zvatinoita zvakanaka, tinoengejera kutenda kedu no kuda kumushandira takadakala.
Jehovha unotibesa kuti tirwisane no kutama kuthemba ko upenyu watiri kuraramari esivangisa kuthemba kedu nguva inodakaja yatiri kuemera yo nyika ipsa (Wonanyi ndima 18-19)c
19. Zvicinyi zvatinonasa kuziva ngo pamusolo pa Jehovha?
19 Tinozviziva kuti Jehovha irudo. Apana muvhunjo ngo pamusolo pazvo. (1 Joh. 4:8) Tinozviziva kuti mutemo jake jakanaka jinowonesa rudo wake uye iyena nguva yese uno zvido zvakanaka mu mweyo make katiri. Tinozviziva kuti Jehovha unoda kuti tiwane upenyu usingaperi. Iyena wakatipa muripo kuti izvi zviitike. Cipo co muripo cinotithembesa kuti tingabudirira kunyange tino cishaishi. (VaR. 7:24, 25) Uye tinozivazve kuti “Mwari mukuri kupinda mweyo jedu uye unoziva zviro zvese.” (1 Joh. 3:19, 20) Jehovha unoziva zvese ngo zvedu uye tingathemba kuti tinobudirira pakuita zvido zvake.
20. Zvicinyi zvinozotibesa kuti tisanyanya kuneseka ngo zviro zvatisikazivi?
20 Jehovha unotivhunja zvese zvatinodikana kuziva ngo pamusoro pake. Patinozvidodokesa toashira cokwadi, atizoneseki maningi pakuda kungwarira zvatisingakoni uye tinozobatikana pakuita zviro zvinokosha. Patinoita izvi tinokhombija kuti tinothemba maningi Jehovha, ndiyena basi “wakakwana mu uzivi.” (Job. 36:4) Kunyange kuti kuzwisisa kedu kuno kakunogumira zvino, tinozojija zvakawanda no kusingaperi ngo pamusolo pa Mwari wedu.—Mup. 3:11.
NGOMA 104 Mujimu Mucena Cipo Cinobva Kuna Mwari
a Jesu unozotungamirira hondo yo nyika ino yakashata ya Sathana, azvishamisi kubhuya kuti zvino waakuziva zuva lo Armagedhoni uye kuti “unozowina riini.”—Zvak. 6:2, 19:11-16.
b KUSANANGURWA KO FOTO YO: Baba no mwana wavo vari kunasirira pasta kuti mbhuri ive yakanasiririka panoitika ngozi jinoitika jega.
c KUSANANGURWA KO FOTO: Hama iri kusangana no zvineso inosota mberi kumudakalo wairi kusoterera wo munyika ipsa.