Lambanyi Mesihamba no Kutenda

1. Ngenyi mupostori Pauro paaisota zvaakaita sure waidakala ngo upenyu wake?

PANGUVA imweni, mu postori Pauro waiziva kuti waizouraiwa asi wainga anocikonzero cakanaka cokudakajwa ngo upenyu wake. Paakasota sure, iyena wakati: ‘Ndakagogoma mbhera kumugumo, ndakangwarira kutenda.’ (2 Tim. 4:6-8) Pauro wakaita zvikhetwa zvakanaka mu basa lake lo kuparijira uye wakagonda kuti Jehovha wakadakala ngozvaiita. Yesuwo tinoda kuita zvikhetwa zvakanaka kuti tidakajise Mwari. Tingazviitisa kudini?

2. Zvinobhuyenyi kuhamba nokutenda?

² Pauro wakabhuya ngozvake uye no vaKristu vamweni vakagondeka: “Tiri kuhamba nokutenda, haiwa ngokuwona.” (2 VaK. 5:7) Pauro waibhuyenyi? Mu Bhaibheri, soko lokuti: “kuhamba” nguva jimweni rinobhuya mararamire anokheta mundhu mu upenyu wake. Kudai mundhu esihamba nokuwona, unoita zvikhetwa zvake zvesivha pa zviro zvaanozwa zvesibhuiwa, zvaanowona uye no mazwire o mumuwiri make. Ngo divi rimweni, mundhu paanohamba no kutenda, unoita zvikhetwa zvake zvesivha pakuthemba kaanoita Jehovha Mwari. Zvaanoita zvinokhombija kuti ano cokwadi cokuti Jehovha Mwari unozomupa mubayiro. Iyena unozomubesa kutevera mutemo jaanowana mu soko lake.—Ps. 119:66; VaH. 11:6.

3. Makomborero api atinowana patinohamba nokutenda? (2 VaKorinde 4:18)

³ Cokwadi, nguva jimweni tese hedu tinomboita zvikhetwa zvesivha pamazwiro edu omuwiri. Ngo kudalo, tinosangana no zvineso kudai tikaita zvikhetwa zvedu basi mu zviro zvatinowona no zvatinozwa, pazviro zvinokosha. Ngenyi? Mazwiro edu omuwiri nguva jimweni angaticengeja. Kunyange zvisito kudalo, tikahamba no kuwona basi, tinopejisira tooshora mutemo wa Mwari no mazano ake. (Mup. 11:9; Mateu 24:37-39) Kudai tikahamba no kutenda, tinozoita zvikhetwa zvakawanda “zvinoashirika kaMambo.” (VaE. 5:10) Kutevejera mazano a Mwari kunotipa runyaralo no mudakalo wo cokwadi. (Ps. 16:8, 9; Isa. 48:17, 18) Uye kudai tikalamba tesihamba nokutenda, tinozova no upenyu usikaperi muno lamangwana.—Verenganyi 2 VaKorinde 4:18.

4. Mundhu ungazvizivisa kudini kuti uri kuhamba nokutenda kana kuti uri kuhamba nokuwona?

⁴ Tingazvizivisa kudini kuti tiri kuhamba nokutenda kana ngo kuwona? Tingazviziva ngo kuzvivhujisa kuti: Zvicinyi zvinotitungamirira pazvikhetwa zvedu? Tinotungamirirwa basi ngo zviro zvatinowona here? Kana kuti tinotungamirirwa ngo kuthemba kedu uye mazano anovha kuna Jehovha here? Ngatimbowona kuti tingaitisa kudini kuti tilambe tesihamba nokutenda mumativi matatu anokosha: Pakukheta basa, pakukheta wokurovorana naye uye patinoashira ndhungamiriro jinovha kusangano la Mwari. Cimwe nga cimwe co zviro izvi, tinozobhuya ngo zviro zvinoita kuti tiite zvikhetwa zvakanaka.

PAKUKHETA BASA

5. Zvicinyi zvatinodikana kulangarira patinokheta basa?

⁵ Tese hedu tinoda zvokurarama ndizvona uye zvokuraramisa mbhuri yedu. (Mup. 7:12; 1 Tim. 5:8) Mabasa amweni ano mare yakawanda. Kana zvakadalo tinokona kuwana zvokusapota mbhuri yedu zuva ngo zuva uye tinokona kungwarira mare imweni kuti tizoshandisa mberiyo. Mabasa amweni mare yatinobhadharwa inokona basi kusapota mbhuri yedu. Patinokheta kutendera basa riri rese, cokwadi tingarangarira mare yatinozobhadharwa. Asi, kana zviri zvona basi zvatinolangarira patinonga tesipsaka basa tiri kuhamba no kuwona.

6. Tingahambisa kudini nokutenda patinokheta basa? (VaHebheru 13:5)

⁶ Kana tesihamba nokutenda, tinozolangarirawo kuti basa ratiri kukheta kuita arizokanganisi ushamwari wedu na Jehovha. Tingazvivhunjisa kuti: ‘Basa iri arizoiti kuti ndiite zvisikadiwi ndi Jehovha here?’ (Zvi. 6:16-19) ‘Basa iri arizoiti kuti ndiruze musangano kana kuti arizondipi nguva shoma yo kuparijira no kujija Bhaibheri rozoitazve kuti ndipeje nguva yakawanda ndiri ndhambo no mbhuri yangu here?’ (VaF. 1:10) Kana umwe womuvhunjo iji tikadavira kuti hina, zvaizova zvakanaka kulamba basa iri, kunyange zvesinesa kuwana basa. Iyesu tinohamba nokutenda, ngo kudalo tinoita zvikhetwa zvinokhombija kuthemba kedu Jehovha kuti unozotipa zvese zvatinoda pakurarama.—Mateu 6:33; verenganyi VaHebheru 13:5.

7-8. Hama imweni yoku Amerika dhu suri yakahambisa kudini no kutenda? (Wonanyi foto.)

⁷ Wonanyi muezaniso wo hama yoku Amerika dhu Suri inozwi Javier,a vakawona kukosha kokuhamba no kutenda. Ivona vakati: “Ndakaeja kupinda pa basa raizondibhadhara mare yakawanda maningi uye raizoita kuti ndiwane zvese zvondaida.” Asi, Javier waidawo maningi kuita piyona. Iyena wakati: “Ndakavhunjwa kuti ndiende koovhunjurujwa ndi gerente nacional. ndisati ndatanga kubhuisana naye ndakaita mukumbiro kuna Jehovha ndesikumbira kuti andibese, ndainga no cokwadi cokuti Jehovha unoziva zvakandinakira. Iyeni ndaida basa rakanaka uye rinobhadhara mare yakawanda, asi ndainga ndisikadi basa raizondivhiringija kuti ndisazajisa zvinangwa zvangu zvokunamata.”

⁸ Javier wakabhuya kuti: “Pondaibhuisana na gerente mukuru wopa basa apa, iyena wakandivhunja kuti: Ndaidikana kudarika nguva yondaishanda. Ngo njira yokureremeja ndakamudavira kuti azvikwanisiki ngo ndava yo basa lo kuparijira.” Hina, Javier wakakheta kulamba basa iri. Pakapera mavhiki maviri, iyena wakava piyona. Uye mu gore rimwero wakawana basa raimutendera kushanda nguva doko. Iyena wakati: “Jehovha wakazwa mukumbiro wangu uye wakandibesa kuti ndiwane basa rinonditendera kuita upiyona. Iyeni ndinodakala maningi ngo basa iri ngokuti rinondipa nguva yakawanda yokuti ndishandire Jehovha no hama jangu.”

9. Zvicinyi zvomajija ngo muezaniso wa Trésor?

⁹ Kudai tikawona kuti basa ratiri kuita zvino, riri kutivhiringija kuhamba nokutenda keni? Ambolangariranyi ngozvakaitika no hama imweni yokuCongo inozwi Trésor. Iyona yakati: “Basa langu ipsa rakava mukana umwe basi mu upenyu wangu. Ndaibhadharwa mare yakawanda maningi kudarika mare yondaibhadharwa pa basa rangu rokutanga, uye ndaireremejwa maningi ngo vandhu.” Asi, Trésor wainga asikapindi musangano jimweni ngo ndava yo basa lo kunyama. Iyena wakavangirijwawo kunyepa kuti avige zvakashata zvaiizwa ngo khambani. Trésor waida kusiya basa asi waithya kuti aasaizowana basa rimweni. Icinyi cakamubesa? Iyena wakati: “Abhakuki 3:17-19 yakandibesa kuzwisisa kuti Jehovha waizokona kundingwarira kunyange ndikasiya basa iri uye kana ndikawana mare shoma. Hino ndakakumbira kusiya basa.” Iyena wakasanangura kuti: “Mapatarau akawanda anolangarira kuti vashandi vavo vanoda kusiya zvese kuti vawane mare yakawanda, kubatanija nguva yavanopeja no mbhuri javo uye nguva yavanopeja pakunamata Mwari. Iyeni ndinodakala ngokuti ndakajivirira ukama wangu na Jehovha uye no mbhuri yangu. Gore rakazotevera, Jehovha wakandibesa kuwana basa rakanaka ndinohora mare inokwana kusapota mbhuri yangu uye ndino nguva yakawanda yokushandira Jehovha. Patinokanda Jehovha pakutanga, tingatova no zvineso zvo mare, asi Jehovha unozogara esitingwarira.” Hina, kudai tikathemba mazano a Jehovha uye nozvaakatigondesa, tinozolamba tesihamba nokutenda uye cokwandi iyena unotikomborera.

PAKUKHETA WOKUROVORANA NAYE

10. Icinyi cingaita kuti tihambe no kuwona pakukheta wokurovorana naye?

¹⁰ Roorano cipo cinovha kuna Jehovha, uye azvito kushata kuzwa kuda kurovora kana kuroworwa. Pakukheta mundhu wokurovorana naye, hanzvaji ingalangarira undhu wo hameyo, mawonekere ake, mbiri yake, mashandisire aanoita mare, unomutoro wo mbhuri here uye zvaanoita kuti hanzvajiyo izwe kudiwa.b Kulangarira izvi zvinokosha maningi. Ngo kudalo, kudai hanzvajiyo yesiwona zviro izvi basi, inonga yesihamba nokuwona.

11. Tinodikana kuitenyi kuti tihambe nokutenda patinokheta wokurovorana naye? (1 VaKorinde 7:39)

¹¹ Jehovha unodada maningi ngo hama no hanzvaji jinotevejera mazano ake pakukheta wokurovorana naye! Inga muezaniso, ivona vanokoshesa maningi ndhungamiriro yokuti vaemere mbhera vadarika makore “okuyaruka” vasati vatanga kudanana. (1 VaK. 7:36) Vanova no cokwadi cokuti wovanoroorana naye uno undhu unozwi ndi Jehovha mwamuna kana mukaji wakanaka. (Zvi. 31:10-13, 26-28; VaE. 5:33; 1 Tim. 5:8) Avadisani no mundhu asiripi Capupu ca Jehovha asi kunja kaizvi vanotevejera ndhungamiriro yokuti varoorane ‘muna Ishe basi’ inga zvakanyorwa pana 1 VaKorinde 7:39. (Verenganyi.) Vanolamba vesihamba nokutenda uye vesithemba kuti Jehovha unozogara esivangwarira mu mulangariro kudarika mundhu upi zvake.—Ps. 55:22.

12. Majijenyi ngo muezaniso wa hanzvaji Rosa?

¹² Wonanyi zvakaitika kuno hanzvaji imweni yaishanda inga piyona ku Kolombiya inozwi Rosa. Ngo ndava yo basa rayo, iyona yakajaerana maningi no mwanarume umweni asiripi Capupu ca Jehovha uye mwanarume uwu wakadakarira hanzvaji iyi. Uye hanzvaji Rosa vakatangawo kumudakarira. Iyona yakati: “Iyena waiita inga mwanarume wakanaka maningi. Iyena waiita mabasa okuzvipira uye wainga no upenyu uri pakati no pakati. Uye ndakadakarira mabatire aaindiita. Iyena wainga na zvese zvondaida ku mwanarume asi iyena wainga asiripi Capupu ca Jehovha.” Iyena wakaenderera mberi esiti: “Zvainga zvesinesa kumulamba ngokuti cainga ciro cimweni condaida mu mulangariro mangu. Panguva iyi, ndaizwa ndiri ndega uye ndaida kurovorwa, asi ndainga ndisati ndawana mundhu wokurovorwa ndiyena musangano.” Ngo kudalo, hanzvaji Rosa avato kukanda mulangariro wavo pazviro zvavaiwona basi. Uye ivona vakalangarira kuti cikhetwa ici caizopsasisa kudini ushamwari wavo na Jehovha.. Ngo kudalo, vakakheta kugura ushamwari wavo naye vokanda mulangariro wavo wese pa mabasa okunamata. Pasure pa izvi, ivona vakakokwa kucikola covazivisi vo Umambo, uye zvino vari kushanda inga piyona especial. Hanzvaji Rosa vakati: “Jehovha wakazaja mweyo wangu ngo mudakalo mukuru.” Icokwadi kuti azvito kureruka kulamba nguva jese takangondeka mu shwiro jinopsasa mazwiro edu asi patinosiya Jehovha esititungamirira nguva jese tinova no muviyo wakanaka katiri.

PATINOASHIRA NDHUNGAMIRIRO JINOVHA KU SANGANO LA JEHOVHA

13. Icinyi cingatiita kuti tihambe nokuwona patinoashira ndhungamiriro inovha kusangano?

¹³ Kakawanda tinoashira ndhungamiriro jo sangano jingadai jesivha ku vakuru vomuungano, vawonereri wondharaundha, kuBheteri no ku Dare Rinotungamirira avo vanotitungamirira pa kunamata kedu. Asi zvakadini kudai tisikazwisisi kuti ndhungamiriro iyi iri kuizirwenyi? Nguva jimweni tingatolangarira zvineso zvingazoviisa ndhungamiriroyo. Tingatotanga kulangarira kutama kukwana ko hama japa ndhungamiriroyo.

14. Icinyi cingatibesa kuti tihambe nokutenda patinoashira ndhungamiriro jo sangano? (VaHebheru 13:17)

¹⁴ Patinohamba nokutenda, tinothemba kuti Jehovha ari kutungamirira sangano lake uye unonasa kuziva maemere o zviro a umwe nga umwe wedu. Inga muviyo, tinokasika kuzwira ndhungamirirojo uye tinozviita tinomulangariro wakanaka. (Verenganyi VaHebheru 13:17.) Tinoziva kuti kuzwira kedu kunoita kuti ungano yedu ilambe yakabatana. (VaE. 4:2, 3) Tinothemba kuti kunyange hama jinotungamirira jino cishaishi, tino cokwadi cokuti Jehovha unozotikomborera kudai tikajizwira. (1 Sam. 15:22) Kudai pano zvinoda kunasiriswa, Jehovha unozozvinaririsa panguva yake kamare.—Mika 7:7.

15-16. Icinyi cakabesa hama imweni kuti ihambe no kutenda kunyange hazvo kuti yainga isina cokwadi no ndhungamiriro yo sangano yo yakaashira? (Wonanyi foto.)

¹⁵ Wonanyi muezaniso unokhombija makomborero anoviya ngokuhamba nokutenda. Mu Peru, vandhu vakawanda vanovereketa Espanyora asi vandhu vamweni vakawanda vanovereketa ndumi javo jo cibarirwe. Imwe yakona iQuechua. Ngo kudalo, kuti vazwire mutemo jo utongi pakaizwa nasiriro kuti vawane vandhu. (VaR. 13:1) Inga muviyo, vamweni vakatanga kuzvivhujisa kuti nasiriso iyi aizophingaiji here basa lo mu ndaumo. Ngo kudalo, hama pojakazwira ndhungamiriro iyi, Jehovha wakakomborera kuvangisira kavo kuti vawane vandhu vakawanda vanovereketa Quechua.

¹⁶ Kevin, mukuru wo ungano imweni yo Quechua wainga ari umwe wo vaya vaineseka. Unosanangula kuti: “Iyeni ndailangarira kuti, ‘hino tinowanisa kudini vandhu vanovereketa Quechua’?” Hama kevin vakaitenyi? Ivona vakati: Ndakalangarira zvakanyorwa pana “Zvirevo 3:5 zvakandibesa kulangarira ngozva Mosi. Iyena waidikana kutungamirira vaIsraeri kubuda muEjipita kupinda ku jombe lo kupsuka zvaiita inga kuti avasazowana gwanja rokubuda ndirona. Kunyange zvakadalo, Mosi wakazwira uye Jehovha wakakomborera kuzwira kake.” (Eki. 14:1, 2, 9-11, 21, 22) Hama Kevin vainga vanasiririka kuti vaitise nane basa lavo lo kuparijira. Ngaupi wakava muviyo wakona? Ivona vakati: “Ndakashamiswa ngo makomborerwe otakaizwa ndi Jehovha. Kare, taihamba kakawanda mundima uye nguva imweni taisangana no mundhu umwe kana vaviri basi vanovereketa Quechua. Uye zvino taakukanda mulangariro wedu mu ndau jinovandhu vakawanda vanovereketa Quechua. Inga muviyo, tinokona kubhuya no vandhu vakawanda, uye kuita hwiririro no zvijijo zvoBhaibheri zvakawanda. Ngo kudalo, kuwanda ko vandhu vari kupinda musangano kaengejeka.” Hina, nguva jese patinohamba nokutenda, Jehovha unotikomborera.

17. Tajijenyi mucijijo cino?

¹⁷ Tawona zvatingaita kuti tilambe tesihamba no kutenda patinokheta zviro zvitatu zvinokosha. Asi tinodikana kulamba tesihamba no kutenda mu ndau jese mu upenyu wedu, zvakadai inga patinokheta varaijo zvatinoita panguva yokuzorora uye patinoita zvikhetwa ngo pamusolo po jijo kana ngo pamusolo pokurera vana. Pazvikhetwa zvese zvatinodikana kuita, tinodikana kutungamirirwa haiwa basi ngozvatinokona kuwona asi ngo ukama wedu na Jehovha uye cipikirwa cake cokutisoterera nguva jese. Kana tikadalo, tinokwanisa “kuhamba muzina la Jehovha Mwari wedu nokusingaperi.”—Mika 4:5.