Muhoko wa Jehovha Auto Kufupika

1. Mosi wakakhombijisa kudini kuthemba Jehovha paakatungamirira vaIziraeri kubuda mu Igipita?

PANO vanobhuiwa mubhuku la VaHebheru vakakhombija muezaniso wokutenda, Mosi nga umwe wakona wakakhombija kutenda kunoshamisa. (VaH. 3:2-5; 11:23-25) Iyena wakakhombija kutenda paakatungamirira vaIziraeri kubuda mu Ijipita. Iyena wakalamba kuthisijirwa ndi Farao no masoca ake. Esithemba Jehovha, iyena wakatungamirira vandhu kuti vadarike ngo kuJombe lo Kupsuka uye wakazovatungamirirazve muzvipare. (VaH. 11:27-29) VaIziraeri vakawanda vakatanga kusiya kuthemba Jehovha kuti waizovangwarira asi Mosi wakalamba esithemba Mwari wake. Kutenda ka Mosi akuto kurasika, ngokuti Mwari wakaita cishamiso co kuvapa zvokurhya no kumwa povainga mu zvipare. a—Eki. 15:22-25; Ps. 78:23-25.

2. Ngenyi Mwari wakavhunjisa Mosi kuti: “Muhoko wa Jehovha wakafupika here?” (Numeri 11:21-23)

² Pasinei nokutenda kakavanga ka Mosi, pakapera gore vaIziraeri vanunurwa ngo njira inoshamisa, iyena aato kuthemba izvo zvakabhuiwa ndi Jehovha zvokuti ape nyama ku vandhu vake. Mosi aasaidikana kulangarira kuti Jehovha waizovapasisa kudini nyama inokwana mamiriyau ovandhu vainga muzvipare. Esidavira, Jehovha wakavhunjisa Mosi kuti: ‘Muhoko wa Jehovha wakafupika here?’ (Verenganyi Numeri 11:21-23.) Apa, soko lokuti ‘muhoko wa Jehovha’ rinobhuya mweya mupsene wa Mwari, kana kuti simba lake raanoshandisa. Cokwadi, Jehovha waivhunjisa Mosi kuti: ‘Yewe unolangarira kuti yeni andikoni kuita zvandinonga ndesida kuita here?’

3. Ngenyi muezaniso wa Mosi no vaIziraeri wesikosha katiri?

³ Iyemwi makambozvivhunjisa kuti Jehovha unozomupa zvamunoda kuti murarame no mbhuri yenyu here? Kudai makambozvivhunjisa izvi kana kuti amusati, ngatijije ngo pamusolo pa Mosi no vaIziraeri vainga vasina cokwadi kuti Mwari waizovapa zvovaida. Cokwadi co Bhaibheri cinozotibesa kuti tiyengejere kuthemba kuti nyara ya Jehovha aito kufupika.

NGATIJIJE KUVHA KUNA MOSI NO VAIZIRAERI

4. Ngenyi vaIziraeri vakawanda vakatama kuva no cokwadi cokuti Jehovha waizovapa zvovaida pakurarama?

⁴ Langariranyi ngo masoko aya. Jinja lo vaIziraeri “cikwata co vandhu vakasanganiswa” novasiripi vaIziraeri vesibuda mu Ijipiti povainga vaano nguva yakareba vesihamba muzvipare vesiyenda Kunyika yo Vakapikirwa. (Eki. 12:38; Dhe. 8:15) Cikwata co vandhu vakasanganiswa no vaiziraeri vakaremba kurhya manaa uye ndizvona zvakaitikawo ku vaIziraeri vakawanda, avo vakabatanawo pakugunu’una. (Num. 11:4-6) Vandhu vakatanga kulangarira nyama uye no zvokurhya zvimweni zvainga zviri mu Ijipita. Ngokuti vandhu, vaigunu’una kuna Mosi iyena wailangarira kuti ndiyena waidikana kutovapa nyama.—Num. 11:13, 14.

5-6. Tingajijenyi ngo kukanganiswa kakaita vaIziraeri ngo cikwata co vandhu vo vakasanganiswa navo?

⁵ VaIziraeri vainga vasingakhombiji kubonga pa zvese zvovaipuwa ndi Jehovha kuezana no vandhu vovainga vakavhengana navo. Iyesuwo tingakanganiswawo ngo vamweni ngo mulangariro wokutama kubonga uye totama kugutsikana ngozvatinonga tapuwa ndi Jehovha. Izvi zvingatoitikawo patinolangarira ngo zvotainga tinazvo kare kana kuti kuyemura zvinonga zvinovamweni toti kudai zvainga zvedu. Ngo kudalo, tinozodakala kudai tikasakurira vara lo kugutsikana ngozvatinazvo, pasinenyi no maemere edu ozviro.

⁶ VaIziraeri vaidikana kulangarira zvovainga vakathembeswa ndi Mwari kuti vaizowana zvese zvovaida povaizoguma ku nyika yakapikirwa. Zvovakathembeswa izvi zvaizoitika mu Nyika ya Kapikirwa, haiwa povaihamba muzvipare. Ngo njira yakatojana, pano kulangarira ngo zviro zvatisina mu nyika ino zvakanaka maningi kuti tilangarire ngozvo takathembeswa ndi Jehovha zvaanozotipa mu nyika ipsa. Tingakonawo, kulangarijisisa ngo zvo mavhesi amweni anotibesa kuti tiyengejere kuthemba katinoita Jehovha.

7. Ngenyi tingava no cokwadi cokuti muhoko wa Jehovha auto kufupika maningi?

⁷ Kunyange zvakadalo, yemwi mungatozvivhujisawo kuti ngenyi Mwari wakavhunjisa Mosi kuti: “Muhoko wa Jehovha wakafupika here?” Jehovha waibesa Mosi kuti azive kuti simba la Mwari arina parinogumira iyena unokona kushandisa simba lake pazvese zvaanoda. Mwari waikona kupa vaIziraeri nyama yakawanda kunyange vainga muzvipare. Esishandisa “nyara ino simba uye no muhoko wakatambanujwa,” Mwari wakakhombija simba lake. (Ps. 136:11, 12) Ngo kudalo, patinosangana no muejo, tinokona kuva no cokwadi kuti Jehovha anokona kutibesa pese patinonga tiri.—Ps. 138:6, 7.

8. Icinyi cingatibesa kuti tisaita cishaishi inga cakaizwa ngo vandhu vakawanda vainga muzvipare? (Wonanyi foto.)

⁸ Jehovha wakaita zvaakathembesa; uye wakatumira zvishiri zvakawanda ku vandhu vake. Asi vaIziraeri avato kubonga Mwari ngo cishamiso ici. Panokudalo, vakawanda vakaita makharo nazvo. Vesishanda vasikazorori, vaiunganija zvishiri zvakawanda. Jehovha wakanyangajwa kuna vaya vakakhombija makharo,’ uye iyena wakavapanica. (Num. 11:31-34) Tinokonawo kujija kuvha ku muezaniso uwu. Tinodikana kungwarira kuti tisava no mukhuva wokuita makharo. Tingava vakaganya kana kuti valombo, tinodikana kutanga kuunganija “pfuma kudenga” kuti tiite izvi tinodikana kuenderera mberi tesishandira ushamwari wedu na Jehovha uye na Jesu. (Mateu 6:19, 20; Ruka 16:9) Patinoita izvi, tinothemba kuti Jehovha unozotipa zvese zvatinoda.

9. Tingava no cokwadi cenyi ngo pamusolo pobesero la Jehovha?

⁹ Jehovha unotambanuja muhoko wake kuti abese vandhu vake mazuva ano. Ngo kudalo, izvi azvibhuyi kuti tinolamba tino zvese zvatinoda pakurarama kana kuti nguva yese tinonga tinazvo zvokurhya.b Asi Jehovha aazotisiyi. Iyena unotibesa mumuejo jedu jese jatinosangana najo. Tingaezanisira cokwadi ici ngokulangarira mativi maviri atinokona kukhombija kuthemba kedu kuti Jehovha unotambanuja muhoko wake uye otipa zvese zvatinoda pakurarama; (1) patinosanagana no zvineso zvo mare uye (2) patinolonga ngo zvatinoda kuzoshandisa zvomunguva yo mberi.

PATINOSANGANA NO ZVINESO ZVO MARE

10. Zvineso zvipi zvo mare zvatingasangana nazvo?

¹⁰ Patinonga tesikwedera ku mugumo wo nyika ino, zvineso zvo mare zvinoenderera mberi. Maemere akashata o politika, hondo, ngozi jinoitika jega, ndhendha ipsa, izvi zvingaita kuti pave no sapoti jotainga tisingasotereri kana kuti kuruza basa, zviro zvedu kana nyumba yedu. Izvi zvingatoda kuti tipsake basa rimweni kana kulangarira kuthutha kenda nyika imweni kuti tisapote mbhuri yedu. Zvicinyi zvingatibesa kuita zvikhetwa zvinokhombija kuti tinothemba no muhoko wa Jehovha?

11. Icinyi cingatibesa kuti tihwisane no cineso cokutama mare? (Ruka 12:29-31)

¹¹ Ciro cokutanga cinokosha maningi tinodikana kuita kuvhunja Jehovha zvese zvinotinesa. (Zvi. 16:3) Kumbiranyi uzivi wamunoda kuti muite zvikhetwa zvakanaka uye unomupa mweyo wakagajana kuti “musaneseka mu mweyo” ngo maemere enyu o zviro. (Verenganyi Ruka 12:29-31.) Mukumbirenyi kuti amubese kuti mulambe mesigutsikana ngo zviro zvamunazvo pakurarama. (1 Tim. 6:7, 8) Psakisisanyi mumabhuku edu kuti mungararamisa kudini no zvineso zvokutama mare. Vakawanda vakabesereka ngo zvinowanika mu saiti jw.org ngo pamusolo po zvineso zvo mare.

12. Muvhunjo jipi jingabesa muKristu kuti aite cikhetwa cakanaka ngo pamusolo po mbhuri yake?

¹² Vamweni vakatenda mabasa ovaita kuti vathuthe kuti vaende kogara ndhambo no mbhuri yavo, ngo kuhamba ko nguva vakazozviwona kuti cainga cisiripi cikhetwa cakanaka. Musati matendera basa, musalangarira basi ngozvo mare yamunozohora asi munodikanawo kulangarira ngozvo ushamwari wenyu na Jehovha. (Ruka 14:28) Zvivhujisenyi kuti: ‘Icinyi caizoitika mumucadho wangu kudai ndikagara ndhambo no umweni wangu? Basa iri rinozonditendera kuti ndipinde musangano jese, kooparijira uye kupeja nguva yakareba no hama no hanzvaji jangu here?’ Kudai iyemwi muno vana, mungazvivhujisawo muvhunjo uwu unokosha: ‘Ndinozoreresa kudini vana vangu “kuti vakwedere phedo na Jehovha” kudai ndisiripi navo?’ (VaE. 6:4) Tungamirirwanyi ngo mulangariro wa Mwari, haiwa kutungamirirwa ngo mulangariro wo hama kana shamwari jisingareremeji ndhungamiriro jo Bhaibheri.c Tony, unogara ku Asia Ocidental, wakawana mabasa akawanda kunja ko nyika aizomubhadhara mare yakawanda. Ngo kudalo, paakapeja kuita mukumbiro ngo pamusolo po shwiro iyi no kubhuisana no mukaji wake, iyena wakakheta kulamba mabasa aya, wakapungura mashandisire aiita mare. Paakasota sure, Tony wakati: “Ndakawana makomborero okubesa vandhu vakawanda kuti vazive Jehovha, uye vana vangu vanodakala maningi ngo kunamata Jehovha. Mbhuri yedu yakajija kuti, tingararama mukuzwirana no masoko ari pana Mateu 6:33, Jehovha unozotingwarira.”

KULONGA ZVATINOZODA KURARAMA NDIZVONA MUNGUVA YO MBERI

13. Mazano api anozwisisika atingakona kutora zvino, kuti atibese kuzowana zvatinoda pakurarama mberiyo patinonga taazvikalahwa?

¹³ Kuthemba kedu nyala ya Jehovha kungaejwa patinolangarira kuti tinozoraramisa kudini patinonga takura. Bhaibheri rinotivangisa kuti tishande ngo simba kuti tiwane zvokuzorarama nazvo mberiyo. (Zvi. 6:6-11) Azvito kushata, kungwarira mare yokuti tizoshandisa mberiyo. Icokwadi kuti mare inokonawo kutibesa patinonga tesineseka. (Mup. 7:12) Ngo kudalo, atidikani kuita kuti kupsaka mare kuve pokutanga mu upenyu wedu.

14. Ngenyi tinodikana kulangarira masoko ari pana VaHebheru 13:5 patinonga tesilonga zvatinoda ngo pamusolo po mare kuitira muno lamangwana?

¹⁴ Jesu wakaezanisa kuti upenji kuunganija mare usito “kupfuma kuna Mwari.” (Ruka 12:16-21) Apana unoziva zvinoitika mangwana. (Zvi. 23:4, 5; Jak. 4:13-15) Umwe nga umwe wedu tinosangana no dambujiko inga vateveri vaKristu. Jesu wakabhuya kuti tinodikana kugara takanasirira “kusiya” zviro zvedu zvese kuti tive vajiji vake. (Ruka 14:33) VaKristu vo mu zana lo kutanga lo makore vainga muJudhiya, vakatendera kusiya zvese vakadakala. (VaH. 10:34) Mazuva ano, hama jakawanda jakaruza mabasa ajo ngokuti jainga jisingapindiri mu politika. (Rev. 13:16, 17) Icinyi cakavabesa kuti vaite izvi? Ivona vakathemba kamare zvinothembeswa ndi Jehovha zvokuti: “Andizokusinyi, uye Andizokurasi.” (Verenganyi VaHebheru 13:5.) Zviri nane kuti tiite zvatinokona kuti tiwane mare yokuti tizoshandisa mberiyo, uye kana tikasangana no zviitiko zvisikasotererwi, tinothemba kuti Jehovha unozotibesa patinonga tesida besero.

15. Vabereki vo ciKristu vanodikana kuva no mulangariro wakadini ngo pamusolo po vana vavo? (Wonanyi foto.)

¹⁵ Mu tsika jimweni, varovorani vanogara no vana kuti vazovabesa ngo mare povanokura. Ngo njira imweni, vakaroorana ava vanowona vana kuti “ndivona vanozovabesa.” Bhaibheri rinoti vabereki ndivona vanodikana kusapota vana vavo. (2 VaK. 12:14) Cokwadi, vabereki vangatoda kubeswa povanonga vesiita zvikalahwa, uye vana vanodakala povanovabesa. (1 Tim. 5:4) Asi vabereki vo ciKristu vanoziva kuti mudakalo wavo auvhi pakurera vana vesithemba kuti vanozovasapotawo, asi mudakalo wavo unovha pakuvabesa kuti vanamate Jehovha.—3 Joh. 4.

16. Vabereki vangabesesa kudini vana vavo kuti vazvisapote? (VaEfeso 4:28)

¹⁶ Ngo muezaniso wenyu, jijisanyi vana venyu kuthemba Jehovha uye vabesenyi kuti vanasirire kuzozvisapota vakura. Kuvhira vasiri vana vadoko, vajijisenyi kuti kushanda ngo simba zvakanaka maningi. (Zvi. 29:21; verenganyi VaEfeso 4:28.) Povanonga vesikura, vabesenyi kuti vaite zvese zvavanokona kucikola. Izvi zvinozobesa vana venyu kuti vazojisapota uye vazovangisira mu mabasa o ciKristu.

17. Tingava no cokwadi cenyi?

¹⁷ Vanamati va Jehovha vakagondeka vanothemba Jehovha kuti unozovabesa pa zvese zvavanoda pakurarama. Inga zvatiri kukwedera phedo no mugumo wo nyika ino, tinodikana kulamba tesithemba Jehovha ngokuti tingasangana no muejo. Azvinenyi no zvatinosangana nazvo, tinodikana kulamba tesithemba Jehovha kuti unozoshandisa simba lake kutipa zvese zvatinoda pakurarama. Tingava no cokwadi cokuti nyara ya Jehovha inosimba, uye muhoko wake wakatambanujwa unozotibesa pese patinonga tiri.