MUSOLO WO KUJIJA 15
NGOMA 30 Baba Wangu, Mwari Wangu zve Shamwari
“Kuva no Ushamwari na Mwari Kakanakira” Yesu!
‘Zvakanaka kuti tikwedere phedo na Mwari.’—PISAREMA 73:28.
ZVATISAJIJA
Tinozowona kuti tingaitisa kudini kuti tive no ukama wakavanga na Jehovha uye ngenyi zvakatinakira.
1-2. (a) Icinyi cinodiwa kuti muve no ushamwari wakavanga no mundhu umweni? (b) Zvicinyi zvatinozowona mucijijo cino?
IMWIMWI muno shamwari yo pamweyo here? Ushamwari wenyu wakatangisa kudini? Zvingadaroko ngokuti makapeja nguva naye, makaziva ngozvo matambujiko aakasangana nawo uye makaziva zviro zvaanoda no zvaasingadi uye makawona kuti shamwari yenyu yainga no undhu wamaiemura uye maitodawo kumutevejera. Uye ngo kuhamaba ko nguva, makaguma pakudawo shamwari iyi.
2 Kuva no ushamwari wakavanga no mundhu umweni kunoda nguva no kuvangisira. Uye tingatodikanawo kubhuya zvimwezvo no ushamwari wedu na Jehovha. Mu cijijo cino tinozowona kuti tingaitisa kudini kuti tive no ushamwari wakavanga na Mwari uye ngenyi zvinokosha kuti tidaloko. Asi pakutanga ngatiwone kuti ngenyi zvakanaka kukhwedera phedo no shamwari yedu yo pamweyo Jehovha.
3. Ngenyi tinodikana kulangaririra kuti zvakanaka kukhwedera phedo na Jehovha? Ezanisanyi.
3 Zvinokosha maningi kuti tieme tilangarire kuti ngenyi zvakanaka kukhwedera phedo na Jehovha. Asi langarijisisanyi kuti zvakanakisa kudini kamare kuti izvi zvingatindunda kuti tilambe tesiita ushamwari wo phedo naye. (Ps. 63:6-8) Inga muezaniso, tinozviziva kuti mundhu ave no utano wakanaka, unodikana kurhya zvakanaka, kuvangisa muviri, kuvata zvakakwana uye kumwa kumwa yakawanda asi vandhu vakawanda avazwiri izvi ivona vanosiya zvinoita kuti zvicinje utano wavo. Cokwadi nga ici, kana tikanyanya kulangarira kubesa kunoita upenyu wakanaka tinozwa kuda kuva no tsika jakanaka. Ngokuitawo zvonazvo tinoziva kuti kuva no ushamwari na Jehovha kakanakira isusu asi kulangarira ngozvo besero no shamwari jakadai kunokona kutivangisa kuti ushamwari wedu na Jehovha ukure.—Ps. 119:27-30.
4. Munyori wo mapisarema wakabhuyenyi pana Pisarema 73:28?
4 Verenganyi Pisarema 73:28. Munyori wo Pisarema 73 wainga ari Murevhi wakagajwa kushanda inga muembi pa themberi ya Jehovha. Zvakajeka kuti iyena wainga esishandira Jehovha akagondeka ko makore akawanda. Kunyange zvakadalo wakawona zvesikosha kulangarira uye kuejurira vamweni kuti ngenyi zvakanaka “kukhwedera phedo na Mwari”. Ngaripi rimwe besero lokuita izvi?
“KUVA SHAMWARI YA MWARI” KUNOVIISA MUDAKALO
5. (a) Ngenyi kuvangisa ushamwari wedu na Jehovha kunotiviisira mudakalo? (b) Maererano na Zvirevo 2:6-16, ipanyi muezaniso kuti uzivi wa Jehovha unomubesesa kudini uye uno mujiviririsa kudini.
5 Kudai ushamwari wedu na Jehovha wakavanga tinova no mudakalo mukuru. (Ps. 65:4) Tingakona kubhuya izvi ngo zvikonzero zvakawanda. Inga muezaniso, patinoverenga zvinobhuiwa ndi Jehovha mu Bhaibheri tozvishandisa. Tinova no uzivi, uzivi uwu unotingwarira pakuita zviro zvakashata uye pakuita cishaishi cakakula. (Verenganyi Zvirevo 2:6-16.) Ngo iyo ndava Bhaibheri resiti: ‘Unodakala mundhu unowana uzivi no mundhu anowana zwisiso.’—Zvi. 3:13.
6. Ngenyi munyori wo mapisarema akarasikirwa ngo mudakalo wake?
6 Icokwadi kuti shamwari ja Jehovha jinotonyangajwawo nguva imweni. Munyori wo Pisarema 73 wakarasikirwa ngo mudakalo wake apo paakapinda mu mulangariro jakashata. Iyena wainga akasuruvara uye wainga no shanje ngokuti vandhu vaiita zvakashata uye vasikatevejeri mutemo jake vainga no upenyu wakanaka. Iyena wailangarira kuti vandhu ava vainga no utano wakanaka, vainga vakaganya uye vainga vasina matambujiko. (Ps. 73:3-7, 12) Pakupejisira munyori wo mapisarema wakaguma pakulangarira kuti zvese zvaiita pakushandira Jehovha zvainga zvisingashandi. Tingakona kuwona kunyangajwa kake paakati: ‘Icokwadi kuti ndakangwarira mweyo wangu wakacena pasina uye ndakageza muhoko jangu ndisina ndava.’—Ps. 73:13.
7. Tingaitenyi paya patinonyangajwa? (Wonanyi pakhavha.)
7 Munyori wo mapisarema uwu aato kutendera kuti kunyangajwa kucinje mulangariro wake. Iyena wakanyisa. Iyena ‘wakazopinda mu ndau yakacena ya Mwari,’ uye ponapo Jehovha wakacenesa mulangariro wake. (Ps. 73:17-19) Na nyamasi uno, Jehovha iShamwari yedu yo pamweyo unoziva paya patinonyangajwa. Tikakumbira ndhungamiriro jake, toashira besero lake kubatanijawo no soko lake uye ungano yake tinova no simba lo kunyisa kunyangajwa. Tikaneseka mu mweyo zvokuti atizivi no zvokuita, Jehovha unozotitondhoja uye unozotinyalaja.—Ps. 94:19.a
Mu Revhi wakanyora Pisarema 73, wakaema pamberi po ‘ndau yakacena ya Mwari’ (Wonanyi ndima 7)
“KUVA SHAMWARI YA MWARI” KUNOTIPA CINANGWA MU UPENYU NO SOTERERO
8. Ngaapi makomborero maviri atinowana ngo kuva shamwari ya Mwari?
8 Kuva shamwari ya Mwari kakanaka kuna isusu ngo ndava yo zvikonzero zviviri. Co kutanga kunotipa cinangwa co cokwadi mu upenyu. Co cipiri kunotipa soterero yo cokwadi yo muno lamangwana. (Jer. 29:11) Ngatibhuye padoko ngo pamusolo po zvinangwa zviviri izvi.
9. Ngenyi kuva shamwari ya Jehovha kesitipa cinangwa mu upenyu?
9 Kukhwedera phedo na Jehovha kunoita kuti upenyu wedu uve no cinangwa. Vandhu vakawanda nyamasi uno vanoti Mwari aako hino vanolangarira kuti upenyu auna cinangwa uye ngo kuhamba ko nguva vandhu avazowonekizve. Asi, kuva Shamwari ya Jehovha kunotipa cinangwa mu upenyu, kujija Bhaibheri kunotithembesa kuti Mwari “uriyo uye kuti unopa mubairo vese vanomupsaka ngo mweyo wese.” (VaH. 11:6) Uye Jehovha wakatisika tino cikonzero cokumushandira. Patinoita izvi upenyu wedu unodakajisa maningi.—Dhe. 10:12, 13.
10. Maererano na Pisarema 37:29 Jehovha unogondesenyi vaya vanomuthemba?
10 Nyamasi uno, vakawanda avana soterero yo cokwadi yo muno lamangwana vanolangarira kuti upenyu unotova pamusolo po kushanda kulovora kana kulovorwa, kuva no vana uye kueja kungwarira mare imweni kuti vazojisapota pavanonga vakura. Mwari aaiti divi lo upenyu wavo. Asi vashandiri va Jehovha soterero yavo yakacijikira paari. (Ps. 25:3-5; 1 Tim. 6:17) Iyesu tinothemba na Mwari wedu uye shamwari yedu uye tino cokwadi cokuti unozozajisa zvese zvaakatithembesa. Tino soterera zviro zvakawanda zvakanaka zvo nguva yo mberi maningi-ningi kuti tikone kurarama nokusingaperi mu Paradhiso.—Verenganyi Pisarema 37:29.
11. Ngaapi makomborero amweni okuva shamwari ja Mwari?
11 Kuita ushamwari na Mwari kunoita kuti tiwane makomborero akawanda. Inga muezaniso, patinoshaisha tokhauya Jehovha unotithembesa kutiregerera. (Isa. 1:18) Ngo kudalo, tingakona kurarama no hana yakacena tisingazvipi ndava yo zvishaishi zvotakaita kare. (Ps. 32:1-5) Uye mukuengejera tino makomborero makuru okuita kuti Jehovha adakare. (Zvi. 23:15) Cokwadi iyemwi mungatolangarira makomborero akawanda otinowana ngo kuva shamwari ja Mwari. Asi, tingaitisa kudini kuti tienderere mberi tesikhwedera phedo na Jehovha?
LAMBANYI “MESIKHWEDERA PHEDO NA MWARI”
12. Icinyi comakaita kuti yemwi muve shamwari ya Mwari?
12 Kudai muri muKristu wakabhabhatijwa makatoita zvakawanda kuti muve shamwari ya Mwari. Makajija zvakawanda ngo pamusolo pa Jehovha na Jesu Kristu, makakhauya zvishaishi zvenyu, makakhombija kutenda kenyu kuna Mwari uye makaeja kuita kuda kake. Asi kuti tive no ushamwari wakavanga na Mwari, tinodikana kulamba tesiita zviro izvi.—VaK. 2:6.
13. Ngazvipi zviro zvitatu zvinotibesa kuti tilambe tesikhwedera phedo na Jehovha?
13 Icinyi cinozotibesa kuti tilambe tesikhwedera phedo na Jehovha? (1) Tinodikana kulamba tesiverenga uye tesijija Bhabheri. Asi cinangwa cedu acidikani kuva cokujija basi zviro zvinokosha ngozva Mwari. Tinodikana kueja kuzwisisa kuti Mwari unolangarira kudini uye zvaanoda kuti tiite tozoshandisa zvonazvo mu upenyu wedu. (VaE. 5:15-17) (2) Tinodikana kuvangisa kutenda kedu no kulangarijisisa njira jakawanda Jehovha jaanokhombija ndijona kuti unotida. (3) Tinodikana kulamba tesinyenya zviro zvisingadakaji Jehovha uye tisingashamwarijani no vandhu vanoita zviro zvonazvo.—Ps. 1:1; 101:3.
14. Inga zvinobhuiwa pana 1 VaKorinde 10:31, tingaitenyi mu upenyu wedu wo zuva ngo zuva kuti tidakaje Jehovha? (Wonanyi foto.)
14 Verenganyi 1 VaKorinde 10:31. Zvinokosha kueja kuita zviro zvinodakaja Jehovha. Izvi zvinotodarika kuenda kooparijira no kuenda kumusangano. Zvakanaka zvinodakaja Jehovha zvinobatanija zvatinoita zuva ngo zuva. Inga muezaniso, patinonga takagondeka mu zviro zvese uye kupawo zvatinazvo vamweni kunoita kuti Jehovha adakare. (2 VaK. 8:21; 9:7) Iyena unodazve kuti tireremeje cipo co upenyu. Tinokhwedera phedo na wiya Wakatipa upenyu ngo kurhya no kumwa zviri pakati no pakati uye no kusoterera utano wedu mu njira jimweni. Kuvangisira kese katinoita kuti tidakaje Jehovha, kunyange mu zviro zvinokhombijika inga zvidoko izvi zvinoengejera rudo wake katiri.—Ruka 16:10.
Njira jimweni jatingaita kuti tidakaje Jehovha nga iji: Kucovha zvakanaka karu jedu, kuvangisa muviri, kurhya zvo kurhya zvakanaka uye kuva vandhu vanokova (Wonanyi ndima 14)
15. Tinodikana kubata zvakadini vamweni?
15 Jehovha uno unyasha no vakarurama no vasito kururama. (Mateu 5:45) Iyena unosoterera kuti tiitewo zvonazvo. Inga muezaniso, ‘iyesu atibhuyi zvakashata ngo pamusolo po mundhu upi na upi hake, . . . atipopotejani uye tinokhombija kupfava ku vandhu vese.’ (Tito 3:2) Ngo kudalo, atisoteri pasi vamweni ngokuti avana kutenda kakafanana no kedu. (2 Tim. 2:23-25) Atilangariri kuti tiri nane kudarika vamweni, apo tinonga tino unyasha uye tesilangarira vamweni tinonga tesekhwedera phedo na Mwari wedu.
TINGAVA NO USHAMWARI “NA MWARI” KUNYANGE PATINOKANGANISA
16. Munyori wo Pisarema 73 wakatanga kuzwa kudini ngo zvishaishi zvake?
16 Mungati kudini kudai mukatanga kuzvizwa kuti amuto kufaneya kukhombijirwa rudo ndi Jehovha? Munyori wo Pisarema 73 wakatanga kuzwa zvakafanana. Iyena wakati: ‘Soka jangu jainga jaaphedo kuti jipauke uye ndainga ndaaphedo kuti ndiwe.’ (Ps. 73:2) Iyena wakatenda kuti wainga no ‘hasha’ uye kuti wainga “aabenji” kuezana no cinyama cisingalangariri. (Ps. 73:21, 22) Asi kubhuya kuti iyena wailangarira kuti ngo ndava yo zvishaishi zvaakaita Jehovha aasaimuda no kumuregerera here?
17. (a) Pozvainga zvooshata muyori wo pisarema wakaitenyi? (b) Muezaniso wake unotijijisenyi? (Wonanyi foto.)
17 Kudai munyori wo mapisarema waizvizwa kuti wainga alasikirwa ngo ushamwari wake na Jehovha mazwiro aya akakasika kudarika. Zvinoita inga kuti panguva yaakaita zvakashatisisa wakawona kuti zvaikosha zvakadini kukhwedera phedo na Mwari, zvokuti wakaguma pakuti kuna Jehovha: ‘Asi zvino ndinemwi Jehovha imwimwi makabata muhoko wangu wo murwo. Imwimwi ngo ndhungamiriro jenyu uye munonditungamirira ngo rukujo wenyu.’ (Ps. 73:23, 24) Isusuwo tinodikana kuwona Jehovha inga buwe rinotivangisa patinozwa takaremba kana kuti takasuruvara. (Ps. 73:26; 94:18) Kunyange tikatsauka kuna Jehovha ko nguva yakareba tingakona kushamwarijana naye ngokuti ‘wakanasirira kuregerera.’ (Ps. 86:5) Tinodikana kulamba tesikhwedera phedo na Mwari wedu pa nguva yakashatisisa.—Ps. 103:13, 14.
Patinonga tisina simba muno zvo kunamata tinodikana kukhwedera phedo na Jehovha kubatanijawo no kushanda ngo simba muno zvokunamata (Wonanyi ndima 17)
“VANGISANYI USHAMWARI WENYU NA MWARI” NOKUSINGAPERI
18. Ngenyi tinodikana kuvangisa ushamwari wedu na Jehovha no kusingaperi?
18 Iyesu tingakona kuvangisa ushamwari wedu na Jehovha no kusingaperi. Tinoziva izvi ngokuti Bhaibheri rinobhuya kuti njira ja Jehovha ngo jo ungwaru uye jino uzivi ‘wakajika maningi’ ngo iyo ndava atingamboregeri kujija ngo zva Jehovha.—VaR. 11:33.
19. Pisarema 73 inotigondesenyi?
19 Pisarema 79:13, inoti: ‘Iyesu vandhu venyu mushambi wo magundata amunohavisa tinozomubonga no kusingaperi tinozivisa kukujwa kenyu kumubarihwana no mubarihwana.’ Mungakonawo kuva no cokwadi cokuti mungavangisawo ushamwari wenyu na Mwari uye kukomborerwa ndiyena no kusingaperi. Mu kuezana no munyori wo mapisarema mungabhuya kuti: ‘Mwari ndiyena buwe lo mweyo wangu uye unozova neni no kusingaperi.’—Ps. 73:26.
NGOMA 32 Beseranyi Jehovha!
a Vaya vari kutambujika vari kuneseka uye vakasuruva ko nguva yakareba vangapsaka besero ku vandhu vano uzivi. Kuti muwane masoko amweni ngo pamusolo pa izvi wonanyi Murindiri wa 1 wo 2023.