Ngenyi Tinodikana Kukumbira Vamweni Mazano?

1. Tingaitenyi kuti tiite zvikhetwa zvakanaka uye kuti zvatinoronga zvinase kubudirira? (Zvirevo 13:10; 15:22)

TESE tinoda kuita zvakanaka. Uye tese tinoda kuti zvatinoronga zvibudirire. Soko ra Mwari rinotivhunja zvatingaita kuti tikwanirise zvinangwa zviviri izvi.—Verenganyi Zvirevo 13:10; 15:22.

2. Jehovha unothembesa kutiitirenyi?

² Zvakajeka kuti ungatipa mazano akanakisisa ndi Baba vedu, Jehovha. Iyena wakatithembesa kutibesa paakabhuya kuti: ‘Ndinozokupangira majiso angu akakusota.’ (Ps. 32:8) Masoko aya anokhombija kuti Jehovha unoita zvakawanda kudarika kutipa mazano, Iyena unobatikana kuna umwe nga umwe wedu uye unotibesa kuti tishandise mazano ake.a

3. Zvicinyi zvatinoda kuona mucijijo cino?

³ Mu cijijo cino, tinozoshandisa soko ra Mwari kuti ritibese kudavira muvhunjo murongomuna: (1) Undhu upi wandinodika kuva nawo kuti ndibesereke ngo mazano akanaka? (2) Ndiyani ungandipa mazano akanakisisa? (3) Ndingakhombijisa kudini kamare kuti ndinoda mazano? (4) Ngenyi andidikani kukumbira kuti vamweni vandiitire zvikhetwa?

UNDHU UPI WANDINODIKA KUVA NAWO?

4. Kudai tesida kubesereka ngo mazano akanaka, undhu upi watinodika kuva nawo?

⁴ Tinodikana kuva vanozvidodokesa no kuva ari pakati no pakati kuti tibesereke ngo mazano akanaka. Tinodikana kuziva kuti atidiki hedu kuva no uzivi wo kujija kana kuti uzivi wo kuita cikhetwa tiri tega. Kudai tisingazvidodokesi no kuva ari pakati no pakati, Jehovha aazotibesi.uye patinoverenga soko rake atizowoni cikonzero cokushandisa mazano aanotipa. (Mika 6:8; 1 Ped. 5:5) Asi, patinova anozvidodokesa no kuezanana tinozova no cido co kuzwa no kushandisa mazano o Bhaibheri.

5. Zvicinyi zvakaizwa ndi Mambo Dhavhidhi zvaizoita kuti azvikuje?

⁵ Wonanyi kuti tingajijenyi pamuezaniso wa Mambo Dhavhidhi. Kunyisa kaiita kaizoita kuti azvikuje. Kare asati atanga kushanda inga mambo, iyena waizivika maningi inga muembi. Iyena wakatokokwawo kuti aende koorijira mambo. (1 Sam. 16:18, 19) Dhavhidhi pasure pokuzojwa inga mambo waizotevera, Jehovha wakamupa simba ro mweya wake mupsene. (1 Sam. 16:11-13) Iyena waitozivikanwawo ngo vandhu vake kubatanijawo no muFiristiya waizwi Goriyati. (1 Sam. 17:37, 50; 18:7) Kudai Dhavhidhi waizvikuja, iyena waizorangarira kuti ngo ndava yo kukona kuita zviro zvese izvi, iyena aasaizodikana kuashira mazano o vamweni. Asi Dhavhidhi waizvidodokesa.

6. Tinozvizivisa kudini kuti Dhavhidhi waidakara ngo kupuwa mazano? (Wonanyi pakhavha.)

⁶ Pasure po kugajwa inga mambo, Dhavhidhi wakakheta shamwari jaizomupa mazano. (1 Mk. 27:32-34) Izvi azvishamisi ngokuti, kunyange asati agajwa kuva mambo, Dhavhidhi wainga akanasiririka kuti azwire mazano o vamweni. Iyena aasaizwira basi mazano o vanarume asi waizwirawo o vanakaji, inga muezaniso wakazwira mazano o mwanakaji umweni waizwi Abhigairi. Iyena wainga akarovorwa ndi Nabhari, uwo waizvikuja maningi, wainga asingareremeji vamweni uye wainga asingabongi. Dhavhidhi ngo kuzvidodokesa kese wakazwira mazano uye inga muviyo, aato kuita cishaishi cikuru.—1 Sam. 25:2, 3, 21-25, 32-34.

7. Tinojijenyi ngo muezaniso wa Dhavhidhi? (Mupariji 4:13) (Wonanyi foto.)

⁷ Tingajija zvakawanda kuvha ko zvakaizwa ndi Dhavhidhi. Inga muezaniso, tingaziva kuita zviro ngo gwanja rakanaka kana kuti kuzwawo maonero o vamweni. Asi, atidikani kurangarira kuti tinoziva zvese uye kuti atidi mazano o vandhu vamweni. Inga ndi Dhavhidhi, tinodikana kuva takanasiririka kuzwira mazano atinonga tapuwa azvinenyi kuti ari kuvha kupi. (Verenganyi Mupariji 4:13.) Kudai tikaita izvi, atizoiti zvishaishi zvikuru zvingazotitambuja uye zvingazotambujawo vamweni.

NDIYANI VANGANDIPA MAZANO AKANAKA?

8. Ngenyi Jonatani wainga akanasiririka kuti ape mazano Dhavhidhi?

⁸ Rangariranyi ngo cijijo cimweni catingajija kuvha ku muezaniso wa Dhavhidhi. Iyena wakazwira mazano akanaka aakapuwa ngo vandhu vainga no ushamwari wakavanga na Jehovha uye vaizwisisa zvineso zvaaisangana nazvo. Inga muezaniso, paaida kumusijira ushamwari wake na Mambo Sauri, Dhavhidhi wakazwira mazano aakapuwa ndi Jonatani mwana wa Sauri. Ngenyi Jonatani wakakwanisa kupa mazano akanaka Dhavhidhi? Ngokuti Jonatani wainga no ushamwari wakavanga na Jehovha uye wainasa kuziva abake. (1 Sam. 20:9-13) Izvi zvinotijijisenyi?

9. Ndiyani watingavhunjisa paya patinoda mazano? Sananguranyi. (Zvirevo 13:20)

⁹ Patinonga tesida mazano, zvakanaka maningi kumapsaka kuvha ku vandhu vano ushamwari wakavanga na Jehovha uye vanonasa kuzwisisa zviro zvatiri kusangana nazvo.b (Verenganyi Zvirevo 13:20.) Inga muezaniso, ngatiti mujaha ari kupsaka hanzvaji yo kurovorana nayo. Ndiyani angamupa mazano akanaka? Kudai iyena akakumbira mazano kumujaha asati arovora, iyena angamupa mazano akanaka akacijikira mu Bhaibheri. Asi hama iyi yaizoashira mazano anobesa kudai ikavhunjisa varovorani vanonasa kumuziva zvakanaka uye vari kushandira Jehovha ko makore akawanda varovorana. Ivona vangamubesa haiwa basi kushandisa mazano o muBhaibheri asi ungajija zvakawanda ngo muezaniso wavo.

10. Tiri kuda kuonenyi zvino?

¹⁰ Mbhera zvino, taona undhu uviri watinodikana kuva nawo, uye ndiyani ungakwanisa kutipa mazano akanaka. Zvino ngatiwone kuti ngenyi tinodikana kuva no murangariro no mweyo wakavhurika kudai tesida kukumbira mazano ku vamweni.

NDINGAKHOMBIJISA KUDINI KUTI NDINODA MAZANO?

11-12. (a) Nguva jimweni, zvicinyi zvatisikadikani kuita? (b) Zvicinyi zvakaizwa ndi Mambo Jerobhoamu paainga esida kuita cikhetwa cinokosha?

¹¹ Nguva jimweni, mundhu ungakumbira mazano o vandhu vamweni, asi unonga apeja kuita kare cikhetwa. Cinangwa cake cinonga ciri cokuda kuzwa kuti vamweni vanotenderana nazvo kana kuti haiwa. Kudai mundhu akaita izvi, unonga asikadi mazano. Iyena unodikana kujija no zvakaitika na Mambo Jerobhoamu.

¹² Jerobhamu wakava Mambo wo Izraeri pasure po kufa ka babake Soromoni. Jerobhoamu paakava Mambo, vandhu vainga no zviro zvakawanda zvakanaka asi ivona vaizvizwa kuti Soromoni waivashandisa maningi. Ngokudaro, vakakumbira kuti Jerobhoamu asavashandisa maningi inga zvovaizwa ndi abake Soromoni. Jerobhoamu wakavakumbira kuti vamupe cinguva cokumborangarira ngo pamusoro po cikhetwa caaizoita. Pakutanga iyena wakakumbira mazano kuvakuru vaibesa Soromoni. Izvi zvainga zviro zvakanaka zvaakaitari. (1 Maj. 12:2-7) Ngo kudaro, iyena wakaramba mazano aya aakapuwari ngo vakuru ava. Ngenyi iyena wakaita zvonazvo? Nguva jimweni Jerobhoamu wainga apera kuita zvikhetwa kare asi waida kuzwa kuti vakuru vanotenderana nazvo here kana kuti haiwa. Ngo kudaro paakakumbirazve mazano kumajaha, ivona vakatenderana nazvo uye iyena wakadakara maningi ngo zvakabhuiwa ngo shamwari jake. (1 Maj. 12:8-14) Jerobhoamu wakavhunja vandhu mazano akabhuiwa ngo shamwari jake haiwa aakavhunjwa ngo vakuru. Inga muviyo vandhu vakawanda vakamupandukira uye vakakheta Mambo umweni. Kuvhira ponapo Jerobhoamu wakasangana no zvineso zvakawanda.—1 Maj. 12:16-19.

13. Tingazvizivisa kudini kuti takanasirirka kuashira mazano?

¹³ Tingajijenyi ngo muezaniso wa Jerobhoamu? Tinojija kuti atidikani kookumbira mazano vandhu vamweni pasure pokuita zvikhetwa zvedu kare uye tinodikana kuva vakanasirira kuzwira mazano. Tingazviitisa kudini? Tinodikana kuzvivhunjisa kuti: Pandinokumbira mazano, ndinomazwira ngokuti anoenderana no zvondakheta here?’ Ngatiwone muezaniso unotevera.

14. Patinoashira mazano, Zvicinyi zvatinodikana kurangarira? Ipanyi muezaniso. (Wonanyi foto.)

¹⁴ Amborangariranyi kuti hama imweni yawana basa rinobhadhara zvakanaka. Isati yaritendera, iyona inokumbira mazano kuno mukuru wo ungano. Hama iyi, inobhuya kuti basa iri, rinozokumbira kuti iyona igare ndhambo no mbhuri yayo ko nguva yakareba. Mukuru wo ungano uwu, unoiejurira mazano ari mu Bhaibheri okuti ibasa ro musoro wo mbhuri kupa zvokurhya zvo kunamata ku mbhuri yake. (VaE. 6:4; 1 Tim. 5:8) Ngatimboti hama iyi aizwirani no mbhangiro hei yo yapuwari ngo mukuru uwu uye yonoenderera mberi yesipsaka mazano amweni kuno hama jimweni muungano mbhera iwane hama inovatendera kuti vatende basa iri. Kubhuya kuti hama iyi iri kupsaka mazano kana kuti iri kuda mundhu anotenderana no zvikhetwa zvayo? Tinodikana kurangarira kuti mweyo wedu unocengeja. (Jer. 17:9) Nguva jimweni tingapuwa mazano atisingadakariri asi ndiwona mazano angatibesa kamare.

NDINODIKANA KUVHUNJISA VAMWENI KUTI VANDIITIRE ZVIKHETWA HERE?

15. Zvicinyi zvatinodikana kungwarira kuti tisaita, uye ngenyi?

¹⁵ Umwe nga umwe wedu, uno mutoro wo kuzviitira zvikhetwa zvake. (VaG. 6:4, 5) Tajija kuti tisati taita cikhetwa, zvinokosha kuti tipsake mazano musoko ra Mwari uye kuna vaya vakagondeka kuna Jehovha ko nguva yakareba. Ngo kudaro, tinodikana kungwarira kuti tisakumbira vamweni kuti vatiitire zvikhetwa. Vamweni vangaita izvi ngo kuvhunjisa wa vanothemba kuti: “Zvicinyi zvamaizoita kudai no mainga pa mugariro wakadai ngo wangu?” Vamweni angazviita ngo gwanja ro cifishe-fishe, ngo kutevejera vamweni vasito kunasa kurangarira ngo pamusoro po shwiroyo.

16. Mugariro upi wakava muKorinde ngo pamusoro po nyama yainga yapirwa ku zvimudhori? Ndiyani vainga no mutoro wo kukheta kuti vorhya kana kutama kurhya nyama iyi? (1 VaKorinde 8:7, 10:25, 26)

¹⁶ Wonanyi zvakaitika ku ungano yo Korinde yo muzana ro kutanga ro makore, ngo pamusoro po nyama yokuti nguva jimweni yaidikana kupirwa ku zvimudhori. Pauro wakanyorera maKristu aya kuti: “Tinozviziva kuti cimudhori asipi ciro munyika uye akuna Mwari umweni, kupinda umwe basi.” (1 VaK. 8:4) Inga zvakabhuiwa ndi Pauro, vandhu vamweni mu ungano, vakakheta kuti vangarhya nyama inotengeswa mu mabazari kunyange yakapirwa ku zvimudhori. Vamweni vakaheta kutama kurhya nyama yakapirwa ku zvumudhori kuti vasakanganisa hana javo (Verenganyi 1 VaKorinde 8:7, 10:25, 26.) Ici cakava cikhetwa co mundhu ega. Pauro aato kuvangisa vo kuKorinde kuti vakhetere vamweni zvokuita kana kutevejera zvinoizwa ngo vamweni, ngokuti umwe nga umwe ‘unozozvidavirira ega kuna Mwari’.—VaR. 14:10-12.

17. Zvicinyi zvingazoitika kudai tikatevejera basi zvinoizwa ngo vamweni? Ipanyi muezaniso (Wonanyi foto.)

¹⁷ Zvingaitikisa kudini izvi mazuva ano? Amborangariranyi ngo pamusoro pa zvimativi zvidoko zvo ngazi. MuKristu umwe nga umwe unodikana kuzvikhetera ega kuti unotenda here zvimataivi zvidoko izvi zvo ngazi kana kuti haiwa.c Tingarangarira kuti zvinonesa kunasa kuzwisisa shwiro iyi, asi kuita cikhetwa inga heci, zvinoita divi ro mutoro wokuti umwe nga umwe wedu unodikana kuutwara. (VaR. 14:4) Kudai tingatevejera zvinokhetwa ngo vamweni, zvingarembesa hana yedu. Asi tingajijisa hana yedu uye kuiitisa nane ngo kuishandisa. (VaH. 5:14) Asi, ngapapi patingakumbira mazano ku muKristu wakakura muno zvo kunamata? Pasure po kupsakisisa, asi tingadazve besero rokuti tizwisise kuti mazano aya o Bhaibheri anobatana papi no mugariro wangu.

RAMBANYI MESIPSAKA MAZANO

18. Jehovha wakatiitirenyi?

¹⁸ Jehovha wakakhombija kuti unotithemba maningi ngo kutendera kuti tizvikhetere zvatinoda. Iyena wakatipa soko rake Bhaibheri. Wakatipa shamwari jino uzivi jingatibesa kurangarira mazano o Bhaibheri. Ngo gwanja iri Jehovha unotingwarira inga Baba vedu vano rudo. (Zvi. 3:21-23) Tingakhombijisa kudini kuti tiri kudakara ngo besero iri?

19. Tingaitisa kudini kuti tirambe tesiita zvinodakajisa Jehovha?

¹⁹ Amborangariranyi muezaniso uwu basi: Vabereki vanodakarira kuwona vana vavo esikura uye vova vashandiri vano ungwaru va Jehovha no kubesa vamweni. Mukutojanawo, Jehovha unodakara maningi ngo kutiona tesikura muno zvo kunamata, tisipsaka mazano uye tesiita zvikhetwa zvinokuja Mwari.