Gwanja Rakanaka ro Kurwisana no Kutama Kururama

1-2. Vandhu vakawanda vanorwisana kudini no kutama kururama, uye ngazvipi zvatingadikana kuzvivhunjisa?

TIRI kupona munyika isito kururama. Vandhu vakawanda nyamasi uno avaripi kubatwa zvakanaka. Ivona vanoizwa izvi ngokuti varombo, ngo ndava yo kavanovha, zvavari kana kuti no zvimweniwo. Vandhu vakawanda vanotambujika ngokuti vamweni vakaganya kana kuti vatongi vanobatikana basi kuti vawane mare yakawanda. Izvi no zvimweniwo zvinotipsasa ngo njira yakajeka no isito kujeka.

² Azvitishamisi kuti vakawanda vari kunyangajwa ngo ndava yo kutama kururama kuri kuitika munyika nyamasi. Tese tinoda kupona munyika yatinojizwa takangwaririka uye tesibatwa zvakarurama. Vandhu vamweni vanoeja kuda kupeja zvineso zvavanoona munyika yese kana kuti munyika yavo. Ivona vanoita magerevhe Kuitira utongi uye mutemo kana kuti vanovhota mambo unothembesa kupeja zvineso. Ngo kudaro, inga maKristu, tiri kujijiswa kuti “tisaita divi ro nyika” uye kuti tiyemere Umambo wa Mwari unozopeja kutama kururama. (Johani 17:16) Nguva jimweni, tingasuruvara uye kutova no shungu patinowona vandhu vesibatwa zvisito kunaka. Tingazvivhunjisa kudai: ‘Zvicinyi zvandinodikana kuita kudai izvi zvikaitika? Pano ciro candingaita zvino ngo pamusoro po kururama here?’ Kuti tidavire muvhunjo iji, ngatitange ngo kuwona kuti Jehovha na Jesu vanozwa kudini ngo pamusoro po kutama kururama.

JEHOVHA NA JESU VANOZONDA KUTAMA KURURAMA

3. Ngenyi zvinozwisisika kuti tinganyangajwa ngo ndava yokutama kururama? (Isaya 5:7)

³ Bhaibheri rinotsangura kuti ngenyi tisikadakariri kubatwa zvisito kururama kana kuti kuwona vamweni vesibatwa zvisito kururama. Rinotsanangura kuti Jehovha wakatisika no muezaniso wake uye kuti iyena ‘unoda zvakarurama uye kutonga zvakarurama.’ (Ps. 33:5; Gen. 1:26) Iyena aaiti zvisito kururama uye aadi kuti ari wese aite zvisito kururama! (Dhe. 32:3, 4; Mika 6:8; Zak. 7:9) Inga muezaniso, panguva yo muporofita Isaya, Jehovha wakazwa ‘kucema ko vaIziraeri ngo ndava yo zvineso’ zvokutama kubatwa zvakanaka ngo vandhu vo munyika yavo. (Verenganyi Isaya 5:7.) Jehovha wakapanica vaya vaisiya mutemo jake no kubata vamweni zvisito kururama.—Isa. 5:5, 13.

4. Jesu unozwa kudini paanowona mundhu esibatwa zvisito kururama? (Wonanyi foto.)

⁴ Inga ndi Jehovha, Jesu unoda ururami uye unozonda kutama kururama. Pa ciitiko cimweni, paainga esiita basa rake pasi pano iyena wakawona mwanarume wainga akaremara nyara. Jesu wakazwira usizi mwanarume uwu uye omurapa, asi vatungamiriri vo maceci pavakawona izvi vakanyangajwa maningi. Ivona vakabhuya kuti Jesu wainga esipwanya mutemo wo mugubera. Ivona avasaineseka ngo pamusoro po mwanarume uwu waingari esitambujika maningi. Jesu wakazwa kudini ngo maitire avo? Jesu ‘wainga akanyangajwa maningi ngo kushata mwoyo ko vandhu ava.’—Mako 3:1-6.

5. Ngazvipi zvatinodikana kurangarira ngo pamusoro po kunyangajwa katingazwa ngo ndava yo kutama kururama?

⁵ Zvesiwoneka kuti Jehovha na Jesu vanonyangajwa maningi ngo kutama kururama, ngo kudaro, azvitowo kushata kuti tivewo no mazwire akadai. (VaE. 4:26 masoko okujija muciputukezi “Nyangajwanyi”) Ngo kudaro, tinodikana kurangarira kuti kunyangajwa kese katingava nako kunyange kakanaka, asi akunganasiriri kutama kururama. Icokwadi, kunyangajwa kunganyanyisa kana kutama kuzvibata kungapsasa murangariro wedu uye muwiri wedu. (Ps. 37:1, 8; Jak. 1:20) Asi tingaitenyi kuti tihwisane no kutama kururama? Tingajija zvakawanda ngo muezaniso wa Jesu.

JESU WAKARWISISA KUDINI NO KUTAMA KURURAMA

6. Kutama kururama kupi kaiwanda panguva ya Jesu painga ari pasi pano? (Wonanyi foto.)

⁶ Jesu wakawona kutama kururama kakakura paainga pasi pano. Iyena waiziva kuti vatungamiriri vo maceci vaiengejera zvimutemo zvakawanda zvaiita kuti vandhu vakawanda vatambujike. (Mateu 23:2-4) Iyena waizivazve kuti utongi wo Roma waibata vandhu zvisito kururama. VaJudha vakawanda vaida kusunungurwa pa utongi wo Roma. Vamweni vakadai inga vaZeroti vainga vakanasiririka kuti varwisane ngo pamusoro pazvo. Asi, Jesu aato kuita divi ro cikwata ciri cese kuti varwise pa kucinja utongi. Asi Jesu paakazvizwa kuti vaida kumuita mambo iyena wakabudepo.—Johani 6:15.

7-8. Ngenyi Jesu aato kueja kupeja kutama kururama painga panyika pano? (Johani 18:36)

⁷ Paainga pasi pano, Jesu aato kueja kushanda no vaiita zvomatongerwe onyika panguveyo kuitira kupeja kutama kururama. Ngenyi? Ngo kuti iyena waizviziva kuti vandhu avana citenderwa uye avakwanisi kuzvitonga pacavo. (Ps. 146:3; Jer. 10:23) Uye kuti vandhu avakwanisi kupeja cineso cokutanga cinotiita kuti titambujike. Nyika yese iri kutongwa ndi Sathana Dhiyabhu cisikwa co kumweya cinouraya, cinoshandisa utongi waco kuitira kukukumijira vandhu kuti vaite zvisito kururama pa nyika. (Johani 8:44; VaE. 2:2) Uye cishaishi cinoitawo kuti zvinesere vandhu, kunyange vaya vanowoneka inga vanoita zvakanaka kuti vakwanise kuita zviro ngo njira yakarurama nguva jese.—Mup. 7:20.

⁸ Jesu waizviziva kuti Umambo wa Mwari unozovhisa zvese zvinoviisa matambujiko. Ngo pamusoro pazvo, iyena wakapeja nguva yake no simba ‘esiparijira masoko akanaka oUmambo wa Mwari.’ (Ruka 8:1) Ngo njira iyi, “iyena wakanyaraja vandhu” vaida kuwona kupera ko matambujiko no ushati. (Mateu 5:6 masoko okujija muciputukezi; Ruka 18: 7, 8) Ngo kudaro, izvi zvinozokwanisika haiwa ngo kuita gerevhe, asi ngo utongi wo kuDenga wa Mwari, ‘usingaiti divi ro nyika.’—Verenganyi Johani 18:36.

TEVEJERANYI JESU PAKURWISA KUTAMA KURURAMA

9. Cicinyi cinotithembesa kuti Umambo wa Mwari ndiwona wega basi unozopeja kutama kururama?

⁹ Nyamasi uno, tiri kuwona kutama kururama kudarika zvakawoniwa ndi Jesu paainga pasi pano. Asi kudai inga mu mazuva a Jesu, zvineso izvi zviri kuviiswa ndi Sathana na vaya vari kutungamirirwa ndiyena. (2 Tim. 3:1-5, 13; Zvak. 12:12) Mukutojana na Jesu, tinozviziva kuti Umambo wa Mwari ndiwona basi unozopeja zvese zvinoviisa kutama kururama. Zvesiwoneka kuti tinoparijira masoko akanaka o Umambo wa Mwari, ngo kudaro, atiiti gerevhe nee kuthemba utongi wo vandhu kuti unozopeja kutama kururama. Ngatimbowona muezaniso wa hanzvaji Estasi.a Vasati vajija cokwadi, nguva jese vaishanda ngo simba kuitira kupeja kutama kururama ngo kuita magerevhe. Asi ivona vakatanga kukana-kana ngo zvavaiita, ivona vakati: “Pandainga ndesiita gerevhe ndaijivhunjisa kuti ndiri kudivi rakanaka here. Zvino ngo kubesa Umambo wa Mwari, ndaakuziva kuti ndiri kudivi rakanaka. Ndinozivazve kuti Jehovha unozopeja kutambujika kese, zvokuti andingazvikwanisi kuzvipeja.”—Ps. 72:1, 4.

10. Maererano na Mateu 5:43-48 ngenyi tisingaeji kucinja mutemo jo hurumende? (Wonanyi foto.)

¹⁰ Vandhu vakawanda nyamasi uno vanoita cikwata kuti vaeje kucinja utongi. Ngo kudaro, vakawanda vavo vanonyangajwa voramba kuzwira mutemo uye votoshaishira vamweni. Andizvopi zvatakajijiswa ndi Jesu kuti tiite. (VaE. 4:31) Hama imweni inozwi Jefiri yakabhuya kuti: “Ndinoziva kuti kuita gerevhe rinotanga ngo runyararo, ropejisira ngo kurwisana uye umbavha.” Ngo kudaro, Jesu wakatijijisa kubata vandhu vese ngo rudo, kunyange vaya vanotizonda kana kuti vanotiteverera. (Verenganyi Mateu 5:43-48.) Inga maKristu tinoita zvese zvatinokona kuitira kujivirira zviro zvisingaenderani no muezaniso watakasiirwa ndi Jesu.

11. Ngenyi nguva jimweni zvinganesa kutevejera Jesu?

¹¹ Kunyange tesiziva kuti Umambo wa Mwari unozopeja kutama kururama mbhera riini, asi tingawona inga zvinonesa kutevejera Jesu patinonga tesibatwa zvisito kururama. Ngatimbowona zvakaitika na hanzvaji Janiya, vakatambujika ngo ndava yo mukheto. Ivona vakati: “Ndakanyangajwa maningi. Vandhu ava zvavakabhuya zvakandisiya ndakasuruvara. Ndaida kuti vandhu ava vatambujwe. Ngo kudaro, ndakarangarirawo kubesera kamwe pa gerevhe kuitira kuhwisawo pa mukheto. Ndakajizwa kuti iyi ndiyona njira imwe yokuzvibata pa kunyangajwa kangu.” Ngo kuhamba ko nguva, Janiya, wakazwisisa kuti waidikana kuita cinjo. “Ivona vakati: Ndakawona kuti pano kuthemba Jehovha, ndakatanga kuthemba zvaibhuiwa ngo vandhu. Ndakakheta kugura kutama kubatana navo.” Tinodikana kungwarira kunyangajwa kuri kese katingazwa, kusaiita kuti tingenere muno zvo matongerwe onyika.—Johani 15:19.

12. Ngenyi tinodikana kungwarira ngo pamusoro po zviro zvatinoverenga, zvatinowona uye zvatinozwa?

¹² Zvicinyi zvingatibesa kungwarira mazwire edu okunyangajwa ngo pamusoro po kutama kururama? Zviro zvatingaita kungwarira zvatinoverenga, zvatinowona, no kuzwa. Ndhorovondho jimweni jiri mu maredhi sociais, jinobhuiwa kuitira kuti vandhu vaite magerevhe. Kakawanda, vatori vo masoko vanobhuya zvavanorangarira. Kunyange patinozwa masoko akanaka o kutama kururama, kubhuya kuti kuramba tesimayaeya zvaizotibesa? Kudai tikapeja nguva yakawanda tesiyaeya masoko aya, zvingatiita kuti tinyangajwe maningi kana kuneseka. (Zvi. 24:10) Zvingaita kuti tiruze soterero yedu yokuzowona kutama kururama kesipejwa ngo Umambo wa Mwari.

13. Kuverenga Bhaibheri zuva ngo zuva kungatibesesa kudini kuti tive no murangariro wakanaka ngo pamusoro po pokutama kururama?

¹³ Kuita jijo yo mundhu ega yo Bhaibheri no kurangarijisisa, kungatibesa kuti tihwisane no kutama kururama. Hanzvaji imweni inozwi Alia, yakaneseka maningi ngo kushaisha kubatwa kaiizwa vandhu vanogara mundharaunda mavo. Zvinowoneka kuti vaiita izvi, avasaipanicwa ngo ndava yazvo. Ivona vakati: “Ndakadikana kuzvivhunjisa kuti: ‘Kubhuya kuti inini ndinothemba kamare kuti Jehovha unozopeja zvineso zvese here?’ Ndiyona nguva yo ndakaverenga bhuku ra Jobe 34:22-29. Vhesi iji jakandirangarija kuti apana angavanda Jehovha. Ndiyena basi unoziva kuti icinyi kururama, ngo kudaro unozopeja zvineso zvese zvo vandhu.” Patinonga tesiemera kuti Umambo wa Mwari uviise kururama ko cokwadi, tinodikana kuhwisana no kutama kururama zvino. Kuitisa kudini?

ZVICINYI ZVATINODIKANA KUITA NGO PAMUSORO PO KUTAMA KURURAMA ZVINO

14. Ngazvipi zvatinodikana kuita kuti titame kubesera kutama kururama ko nyika ino? (VaKorose 3:10, 11)

¹⁴ Atidikani kucinja mabatirwe anoitwa vamweni, asi tingava no cokwadi cokuti tiri kubata vamweni zvakanaka. Inga zvatapera kubhuya, tinotevejera Jesu no kukhombija rudo. Rudo iri, rinotindundira kuti tibate vamweni zvakanaka, kunyange vaya vakarurama. (Mateu 7:12; VaR. 12:17) Jehovha unodakara patinobata vamweni ngo unyasha uye ngo kururama.—Verenganyi VaKorose 3:10, 11.

15. Tingabesesa kudini vandhu patinobhuya navo ngo pamusoro po cokwadi ciri muBhaibheri?

¹⁵ Gwanja rakanakisisa ro kuhwisana no kutama kururama, ngoro kubhuya no vamweni ngo cokwadi co Bhaibheri. Ngenyi tingabhuya kudaro? Ngo kuti “uzivi wa Jehovha” ungacinja mundhu wokuti kareko waida zvokutakana ova mundhu wakapfava uye anoda runyararo. (Isa. 11:6, 7, 9) Hama Jemari vasati vajija cokwadi, vakabatana no cikwata co zvigevenga kuti vahwise utongi wovaiwona inga wakashata. Ivona vakati: “Imwimwi amudikani kucinja vandhu ngo simba. Andito kucinjwa ngo cisimba, asi ndakacinjwa ngo cokwadi co Bhaibheri co ndakajija.” Zvakajijwa ndi hama Jemari zvakavaita kuti vasiye kurwisana. Ngo kudaro, patinojijisa vandhu cokwadi co Bhaibheri, tinovabesa kuti vasiye zviro zvinophingaija vamweni.

16. Ngenyi Imwimwi mesida kubhuya no vandhu ngo pamusoro po umambo wa Mwari?

¹⁶ Kudai inga ndi Jesu, tinoda maningi kuvhunja vandhu vamweni kuti Umambo wa Mwari ndiwona wega unozopeja kutama kururama. Soterero iyi ingavangisa vaya vakabatwa zvisito kunaka. (Jer. 29:11) Hanzvaji Estasi vambobhuiwaya pakutanga, vatsanangura kuti: “Kujija cokwadi kakandibesa kuhwisana no kutama kururama kandakawona uye nokutambujika ndikona. Jehovha unoshandisa masoko o Bhaibheri kuti atinyaraje.” Kuitira kuparijira masoko anonyaraja ari muBhaibheri ngo pamusoro po kutama kururama, imwimwi munodikana kuva makanasiririka zvakanaka. Kudai imwimwi munonasa kuziva zvinobhuya Bhaibheri ngo pamusoro po matambujiko, zvinozomubesa kuva no cokwadi co jijiso iyi. Ngo kudaro, munozojijisa vamweni, kungadai kuri kucikora kana kubasa, kuti ngenyi tiri kutambujika uye Jehovha unobhuyenyi ngo kuzopeja kutambujika.b

17. Jehovha unotibesesa kudini kuti tirwisane no kutama kururama mazuva ano?

¹⁷ Tinoziva kuti tinozohwisana no kutama kururama Sathana panoenderera mberi “esitonga nyika ino.” Asi tinodikana kuemera padoko ngo kuti Jehovha wakatithembesa kutibesa zvino uye nokuvhisa Sathana “no ushati wese.” (Johani 12:31) Esishandisa zvinyorwa, Jehovha aakhombiji basi kuwanda ko matambujiko, asi iyena unonesekawo ngo vaya vasiripi kubatwa zvakanaka. (Ps. 34:17-19) Esishandisa Mwanake, Jehovha unotijijisa kuti tingaitisa kudini kuti tirwisane no kutama kururama uye kuti Umambo wake ngo kukasika unozopeja zvineso zvokutama kururama ngo nguva imwe basi. (2 Ped. 3:13) Ngatienderere mberi tesiparijira masoko akanaka oUmambo ngo kuvangisira, patinonga tesiemera ngo cido cese nguva yokuti nyika yese inozozara ngo ururami.”—Isa. 9:7.