‘ Imwimwi Muri Mundhu Anokosha Maningi’!

1-2. Zvicinyi zvingatibesa kuti tive no cokwadi cokuti tinokosha maningi mumaonero a Jehovha?

VASHANDIRI va Jehovha vanokosha maningi kaari. Asi vamweni avathembi kuti Jehovha unovada ngo ndava yokuti vakambobathwa zvisito kunaka, ngo kudaro vanorangarira kuti avakoshi kuna Jehovha. Imwimwi munozvizwawo kudaro here? Kudai zviri izvona, zvicinyi zvingamubesa kuti muve no cokwadi cokuti imwimwi munokosha pamberi pa Jehovha?

² Ciro cimwe cingamubesa, ngo cokurangarira ngo pamusoro po zviitiko zviri mu Bhaibheri zvinokhombija kuti Jehovha unoda kuti vandhu vawonekwe uye no kubatwa zvakanaka. Mwana wa Jehovha, Jesu Kristu, waikuja vandhu uye no kuvareremeja. Ngokuita izvi, iyena wakakhombija kuti vaya vanozvizwa vasikakoshi, kubhuya cokwadi ndivona vanokosha maningi kuna iyena uye kuna Abake. (Johani 5:19; VaH. 1:3) Mucijijo cino, tinozowona kuti: (1) Jesu wakabesesa kudini vandhu kuti vazive kukosha kovanoita kuna Jehovha uye (2) tingazvizivisa kudini kuti tinokosha maningi pamberi pa Jehovha.—Agayo 2:7.

JESU WAKABESESA KUDINI VANDHU KUTI VAZIVE KUKOSHA KAVO?

3. Jesu wakabatisa kudini vandhu vaiviya kaari kuGarireya?

³ Jesu paainga esiparijira mu Garireya, vandhu vakawanda vakaviya kaari kuti vamuyaeye no kurapwa. Jesu wakawona kuti vandhu ava “vainga vasikanasi kubathwa zvakanaka, vesiherereka inga magundata asina muhavisi.” (Mateu 9:36; wonanyi masoko okujija.) Vatungamiriri vo maceci okunyepa vaiwona vandhu inga vasikabesi uye vesizvikoshesa pacavo, ngo kudaro ivona vakaguma pakuvadaija kuti “vandhu vakatukwa.” (Johani 7:47-49 uye masoko okujija.) Asi Jesu waivabata zvakanaka no nderemejo, uyezve waivhisa nguva kuti avajijise no kurapa ndhendha javo. (Mateu 9:35) Kusiyapo izvi, kuti abese vandhu vakawanda, Jesu wakajijisa vapostori vake kuti vaparijire uye wakavapa simba rokuti varape vaiwaja.—Mateu 10:5-8.

4. Tinojijenyi ngo mabatire aaita Jesu vandhu vainga vasingakosheswi?

⁴ Ngo kubata vandhu zvakanaka uye no nderemejo, Jesu wakakhombija kuti kaari no kuna Baba vake vandhu vanobathwa zvisito kunaka vanokosha maningi. Kudai mesishandira Jehovha asi mesikaya-kaya kuti munokosha kaari, emanyi mumborangarira mazwisisire aiita Jesu vandhu vakaderera uye vaida kujija naye. Kuita izvi zvinozomubesa kuwona makoshere amunoita mu mawonero a Jehovha.

5. Zvicinyi zvatinoziva ngo pamusoro po mwanakaji wakaziva Jesu ku Garireya?

⁵ Jesu asaijijisa basi vandhu vakawanda asi waizwisisa mundhu umwe nga umwe. Inga muezaniso, mukati mo basa rake ro kuparijira ku Garireya iyena wakaziva mwanakaji umweni waitambujika ngo kubuda ngazi ko makore 12. (Mako 5:25) Mukuzwirana no mutemo, ndhendha iyi yaiita kuti ave asito kucena uye mundhu wese waimubata waiva asito kucena. Ngo kudaro, aasaidikana kubhuisana no vamweni uye izvi zvaiita kuti ajizwe ari ega. Ngo ndava yo ndhendha iyi, aasaidikana koonamata Jehovha no vamweni Musinagoga no koiita mutambo jimweni. (Rev. 15:19, 25) Pasina muvhunjo, mwanakaji uwu waineseka mu njira yo kunyama uye mu murangariro.—Mako 5:26.

6. Ngazvipi zvakaita mwanakaji kuti arapike?

⁶ Mwanakaji uwu waiwajari waida kuti Jesu amurape. Asi iyena aato kukumbira kuti aite izvi. Ngo ndava yenyi? Nguva jimweni iyena waipseruka ngo ndava yo ndhendha yake. Kana kuti waithya kuti Jesu waizomugogomera ngokuti wainga asito kucena uye aasaidikana kugara phedo no vandhu vakawanda. Ngo kudaro, iyena wakapsasa nguwo ya Jesu esithemba kuti akadaro unozorapika. (Mako 5:27, 28) Iyena wainga no kutenda kakavanga. Ndhendha yake yakapera. Kunja ka izvi, Jesu wakavhunjisa kuti ndiyani amubata uye iyena wakatendera kuti ndiyena wamubata. Jesu wakaitenyi?

7. Jesu wakabatisa kudini mwanakaji waitambujika maningi? (Mako 5:34)

⁷ Jesu wakabata mwanakaji uwu ngo njira yakanaka no nderemejo. Iyena wakawona kuti mwanakaji uwu ‘waitetemera ngo kuthya.’ (Mako 5:33) Esizwisisa mazwiro ake no kuwona kuti wainga pamugariro unonesa, iyena wakamukhombijira rudo no kumuvangisa. Iyena wakatomudanija kuti “mwana”, Jesu aato kukhombijira nderemejo basi ku mwanakaji uwu asi wakakhombija usizi uye rudo. (Verenganyi Mako 5:34.) Masoko okujija o gama iri anoti: “Ciitiko ici tinociwana kamwe basi mu Bhaibheri Jesu paakadanija mwanakaji uwu kuti ‘mwana,’ iyena nguva jimweni wakaita izvi ngokuti mugariro wake wainesa uye mwanakaji uwu wainga ‘esitetemera.’” Amborangariranyi kusujunuka kaakava nako uye mudakaro! Kudai Jesu wainga asito kumubata ngo gwanja rakanaka, iyena waizovhepo arapika kunyama asi waizoenderera mberi esineseka uye no mazwiro okuzvipa ndava. Jesu waida kuita zvakawanda kupinda kumurapa basi ku nyama. Iyena waida kuti awone pacake kuti wainga mwana unokosha kuna Baba vedu vano rudo vo kudenga.

8. Zvineso zvipi zvaidikana kurwisana no hanzvaji yo Brazil?

⁸ Nyamasi unowo vashandiri vamweni va Mwari, vanogara vesineseka ngo ndava yo zvineso zvo utano, zvoita kuti vagare vakanyangajwa uye no kuzvizwa vasingakosheswi. Wonanyia mugariro wo hanzvaji imweni inozwi Mariya, iri kushanda inga piyona wo nguva jese ku Brazil, ngo ndava yo cineso co utano ivona vakabarwa vasina makumbo uye vainga vasina muhoko boshwe. Ivona vakati: “Inini ndaisekwa maningi kucikora uye ndaishaishwa kubathwa ngo ndava yokuremara kangu. Vadoni vangu vo kucikora vaindidanija ngo mazina aindinyangaja. Uye nguva jimweni mbhuri yangu yainga isingandireremeji.”

9. Ngazvipi zvakabesa hanzvaji Mariya kuti vawone kuti vanokosha kuna Jehovha?

⁹ Zvicinyi zvakabesa hanzvai Mariya? Povakava umwe wo Capupu ca Jehovha, hama no hanzvaji jo mu ungano yavo jakavavangisa no kuvabesa kuti vazviwone pacavo inga mawonerwe avanoizwa ndi Jehovha. Ivona vakati: “Kadherino rangu arina mapheji anokwana kuti ndinyorere mazina o hama no hanzvaji jakandibesa! Inini ndinobonga maningi Jehovha ngo mwoyo wese ngo kundipa mbhuri yo kumujimu inodadisa.” Hama no hanzvaji iji jakabesa hanzvaji Mariya kuti vawone kuti vanokosha maningi mumaonero a Mwari.

10. Mugariro upi wainga na Mariya Magadharena uye iyena waizvizwa kudini ndiwona? (Wonanyi foto.)

¹⁰ Wonanyi kuti Jesu wakabesesazve kudini Mariya Magadharena. Iyena wainga no madhimoni anokwana kuita 7! (Ruka 8:2) Iyena kazinji waiita zviro zvinonyangajisa esindundirwa ngo madhimoni uye ngo iyo ndava vandhu vaigara ndhambo naye. Mukati mo upenyu uwu, iyena waizvizwa asingadiwi uye asito kujiviririka esirangarira kuti wainga asingakoshi. Jesu wakagogomera madhimoni aaitaro kuti atambujike uye wakazova muteveri wakagondeka kaari. Igwanja ripizve Jesu wakabesa Mariya Magadharena azwisise kuti waikosha maningi kuna Mwari?

11. Jesu wakaitisa kudini kuti Mariya Magadharena awone kuti waikosha maningi kuna Mwari?

¹¹ Jesu wakakoka Mariya Magadharena kuti amuperekeje murwendo rake mu basa rake ro kuparijira.b Ngo gwanja iri, iyena wakaenderera mberi no mukana wokuzwa Jesu paainga esijijisa vamweni. Jesu wakamugumirazve pa zuva raakamuswa iyena wakava mundhu wo kutanga kubhuya na Jesu paakamuswa. Uye Jesu wakatomukumbira kuti aende koovhunja vapostori vake kuti wainga amuswa. Ngo zvese izvi, Jesu wakabesa Mariya Magadharena kuti awone kuti waikosha maningi kuna Jehovha!—Johani 20:11-18.

12. Zvicinyi zvakaita kuti hanzvaji Ridhiya varangarire kuti avasaifaneya kudiwa?

¹² Inga ndi Mariya Magadharena, vakawanda mazuva ano vari kutambujikawo ngo kujizwa vasingadiwi. Hanzvaji imweni inozwi Ridhiya yo kuEspanya yakabhuya kuti Mai wayo povainga no mimba yavo vairangarira kuivhisa. Hanzvaji Ridhiya vasiri kurangarira kuti kunyange povainga mwana mudoko mai wavo avasaivabata zvakanaka uye vaivavhunja zviro zvakashata nguva jese. Ivona vanoti: “Ngokuti mai wangu avato kundikhombijira rudo asi ndaidawo kuti vandhu vamweni vandide uye vaitewo shamwari jangu. Inini ndaithyira kuti apana na umwe waizondida ngokuti mai wangu vakandikhohwesa kuti inini ndainga mundhu wakashata.”

13. Zvicinyi zvakabesa hanzvaji Ridhiya kuti vaone kuti vanokosha maningi kuna Jehovha?

¹³ Hanzvaji Ridhiya povakatanga kujija Bhaibheri zviro zvakacinja. Kuita mukumbiro, kuverenga Bhaibheri uye magama no zviito zvakanaka zvo hama no hanzvaji zvakavabesa kuzwisisa kuti ivona vaikosha maningi mumaonero a Jehovha. Ivona vakati: “Mwamuna wangu unogara esindivhunja kuti unondida maningi. Uye iyena nguva jese unondibonga ngo zviro zvakanaka zvandinoita. Shamwari jimweni jo phedo jinondikhombijirawo kuti jinondida.” Inga ndi hanzvaji Ridhiya, zvingaita kuti mu ungano menyu muno mundhu ari wese anoda besero kuti azvizwe kuti iyena unokosha maningi mumaonero a Jehovha. Imwimwi munokwanisa kurangarira mundhu ari pa mugariro wakadai here?

TINGAITISA KUDINI KUTI TIJIWONE INGA MAONERWE ATINOIZWA NDI JEHOVHA?

14. Kuitisa kudini masoko anowanika pana 1 Samueri 16:7 anotibesa kuti tijiwone inga maonerwe atinoizwa ndi Jehovha? (Wonanyi bhokiso rinoti: “Ngenyi Vandhu va Jehovha Vanokosha Maningi Kari?”)

¹⁴ Rangariranyi kuti Jehovha aamuwoni inga maonerwe amunoizwa ngo vandhu vo nyika. (Verenganyi 1 Samueri 16:7.) Vandhu vakawanda munyika, vanoreremeja mundhu kudai akaseja, uno mare uye akajija maningi. Asi Jehovha aatiwoni ngo ngwanja iri. (Isa. 55:8, 9) Ngo kudaro, pano kurangarira maonerwe amunoizwa ngo vandhu vo nyika, kandanyi murangariro wenyu pa maonerwe amunoizwa ndi Jehovha. Bhaibheri rinobhuya ngo pomusoro po vandhu vokuti nguva jimweni vairangarira kuti kushandira kavo Jehovha kainga ka mahara. Inga muezaniso, Eriya, Naomi uye Ana. Pamunoverenga ngo pamusoro pavo, sotesesanyi madirwe avaiizwa ndi Jehovha uye imwimwi munganyorerawo zviro zvese zvakamuitikira mu upenyu zvinokhombija kuti Jehovha unomuda uye unomukoshesa. Kunja ka izvi, imwimwi mungapsakisisa shwiro jinobhuya ngo pamusoro po “maonerwe” atinoizwa mu mabhuku edu.c

15. Ngenyi Jehovha waiwona Dhanyeri inga mundhu “unokosha maningi”? (Dhanyeri 9:23)

¹⁵ Zivanyi kuti kugondeka kenyu kunoita kuti muve anokosha kuna Jehovha. Pa nguva imweni, muporofita Dhanyeri paainga no makore anopindirija 90 wakambozvizwa ‘akaremba’ uye akasuruvara. (Dha. 9:20, 21) Jehovha wakamuvangisa kudini? Iyena wakatumira ngirosi Gabrieri kuti amuejurire kuti wainga mundhu ‘waikosha maningi’ uye mukumbiro jake jainga jazika kuna Jehovha. (Verenganyi Dhanyeri 9:23.) Zvicinyi zvakaita kuti Dhanyeri ave anokosha kuna Mwari? Ikuda kaiita zviro zvakanaka uye no kugondeka kake. (Ezek. 14:14) Jehovha wakaita kuti ciitiko ici cinyorwe mu Bhaibheri kuitira kutivangisa. (VaR. 15:4) Jehovha unozwawo mukumbiro jenyu uye unokoshesa rudo wenyu ngo kuita kenyu zviro zvakanaka uye ngo kushanda kenyu makagondeka.—Mika 6:8, VaH. 6:10.

16. Icinyi cingamubesa kuti muwone Jehovha inga Baba vano rudo? (Wonanyi foto.)

¹⁶ Wonanyi Jehovha inga Baba vanomuda. Iyena unoda kutibesa haiwa basi kuwona zvakashata katiri. (Ps. 130:3; Mateu 7:11; Ruka 12:6, 7) Kurangarijisisa izvi, zviri kubesa vandhu vakawanda vano mawonero okujizwa vasingakoshi. Inga muezaniso, wonanyi zvakaitika na hanzvaji Michelle vo kuEspanya, avo vokuti vaijizwa vasingadiwi, vasingashandi uye pamakore akatevera vakatambujika ngokuti mwamuna wavo waivapopotera maningi. Ivona vakati: “Nguva jese pondaijizwa ndisingakoshi, inini ndaieja kurangarira Jehovha akandibata ngo nyara jake, esindikhombijira rudo uye esindijivirira.” (Ps. 28:9) Hanzvaji imweni inozwi Raureni yoku Afrika dhu Suri, vasiri kurangarira kuti: Ngokuti Jehovha wakandikwevera ngo rudo wake, uri kundibesa mu upenyu wangu uye no kundishandisa pa kujijisawo vamweni, ngo kudaro, zvakajeka kuti unondiwona inga mundhu anokosha maningi uye anotoshandawo.”—Oze. 11:4.

17. Mungaitisa kudini kuti muve no cokwadi cokuti munodiwa ndi Jehovha? (Pisarema 5:12)

¹⁷ Ivanyi no cokwadi cokuti munodiwa ndi Jehovha. (Verenganyi Pisarema 5:12.) Dhavhidhi wakaezanisa kudiwa katinoizwa ndi Jehovha, no ‘cijiviriro cakakura’ cinojivirira varurami. Kuziva kuti munodiwa uye muno besero ra Jehovha, zvingashanda inga muvhiko unomujivirira paya pamunova no murangariro wakashata. Munozvizivisa kudini kuti munodiwa ndi Jehovha? Inga zvatawona, tingava no cokwadi ici ngo kuverenga Bhaibheri, umo matinowanira zvinorangarirwa ndi Jehovha kuna isusu. Kunja ka izvi, iyena unoshandisa vakuru vo ungano, shamwari jo phedo uye vandhu vamweni kuti vatirangarije kuti tinokosha maningi mumaonero a Jehovha. Zvicinyi zvamungaita kudai mundhu umweni angamuvhunja zviro zvakanaka?

18. Ngenyi imwimwi munodikana kutendera kusimbwa ngo vamweni?

¹⁸ Tenderanyi kusimbwa kamunoizwa ngo vamweni. Zivanyi kuti Jehovha ungashandisa vandhu vonavo kuti muzwisise kuti iyena unomuda. Hanzvaji Michelle vabhuiwaya pakutanga, vakati: “Padoko ngo padoko ndiri kujijira kutendera ngo mwoyo wese kusimbwa kandinoizwa ngo vamweni. Kandiri kuita izvi zvinondinesa maningi asi ndinozviziva kuti Jehovha unoda kuti ndizviite.” Ngo rudo wese, vakuru vakabesa hanzvaji Michelle kuti vaone kuti vanodiwa maningi ndi Jehovha. Ivona vari kushanda inga piyona uye vari kubesa Bheteri vari ngo kanyi.

19. Ngenyi imwimwi mungava no cokwadi cokuti munokosha maningi mumaonero a Mwari?

¹⁹ Jesu ngo rudo wese wakatirangarija kuti tinokosha maningi kuna Baba vedu vo kudenga. (Ruka 12:24) Tingava no cokwadi cokuti Jehovha unotiwona inga vandhu vanokosha maningi. Ngo kudaro, musazombofa makazvikanganwa izvi! Uye tinoda kuita zvese zvatinokona kuti tebese vamweni kuti vaone kuti vanokosha maningi mumaonero a Mwari!