CIJIJO 01
Bhaibheri Ringamubesesa Kudini?
Tese hedu tinomboneseka ngo ndava yo upenyu, matambujiko, rufu pamwe no lamangwana. Tinonesekawo kuti tingawana kupi zviro zvatinoda zuva ngo zuva, zvakadai inga kuwana mare yo kusapota mbhuri no kuti tingaitenyi kuti tive no mbhuri inomudakalo. Vandhu vakawanda varikukwanisa kuwona kuti Bhaibheri rinopingula muvhunjo inokosha yo upenyu, rinopawo mazano anobesa mazuva ese. Kunasa kubhuya, Bhaibheri ringakwanisa kubesa ani na ani hake!
1. Muvhunjo ipi inopingurwa ngo Bhaibheri?
Bhaibheri rinopingula muvhunjo iyi inokosha: Upenyu wakatangisa kudini? Takasikirwenyi pasi pano? Ngenyi vandhu vesitambujika? Mundhu afa anoenda kupi? Kudai vandhu vese vesida runyararo, ngenyi kuno hondo zinji? Kubhuya kuti nyika ino inozopalajwa here? Zvakashata here kuzviita muvhunjo iyi? Haiwa, Bhaibheri rinotivhunja kuti tipsake mupingulo yo muvhunjo iyi. Vandhu vazinji vari kudakala maningi ngo kuwona kuti Bhaibheri ririkupa mupingulo yakajeka yo muvhunjo iyi.
2. Bhaibheri ringatibesesa kudini kuti tidakajwe ngo upenyu wedu?
Bhaibheri rinotipa mazano anobesa. Inga muezaniso, rinotijijisa zvatingaita kuti tidakare mu mbhuri yedu. Rinotipawo mazano ozvatingaita kudai mulangariro yedu yesineseka, no zvatingaita kuti tidakajwe ngo basa ratinoita. Patinonga tesijija nemwi bhuku rino, munozowona kuti Bhaibheri rinopingula muvhunjo iyi no imweniwo. Ngo kudalo, munozozviwonera mega kuti ‘zvinyorwa zvese zviri mu Bhaibheri zvinobesa.’—2 Timoti 3:16.
Bhuku heri asi Bhaibheri. Ilona rinozomubesa kuti muzwisise zvinojijiswa ngo Bhaibheri. Ngo ndava yazvo, tinomuvangisa kuti muverenge mavhesi ese anowanika mu cijijo cimwe nga cimwe co bhuku iri, mesiwona kuti anozwirana papi no zvamunonga mesijija.
JIJANYI ZVIZINJI
Wonanyi kuti Bhaibheri lakabesesa kudini vandhu vamweni, no zvamungaita kuti mudakarire kuriverenga. Wonanyizve kuti ngenyi zvakanaka kuti mupsake mundhu angamubesa kuzwisisa Bhaibheri.
3. Bhaibheri ringatitungamirira mu upenyu
Bhaibheri lakatojana no thoci rinonasa kuvheneka. Bhaibheri rinotibesa kuti tikhete kuita zviro zvakanaka, no kunasa kuziva zvinozoitika muno lamangwana.
Verenganyi Mapisarema 119:105, mapeja bhuisananyi ngo muvhunjo jinotevera:
Munyori wo pisarema iri waiwona Bhaibheri inga cinyi?
Iyemwiwo munowona Bhaibheri inga cinyi?
4. Bhaibheri rinopingula muvhunjo yedu
Wonanyi kuti Bhaibheri lakabesesa kudini mwanakaji umweni, kuwana mupingulo yo muvhunjo yaimunesa ko makore akawanda. Wonanyi VHIDHIYO, mapeja bhuisananyi ngo muvhunjo jinotevera:
Mu vhidhiyo iyi, mwanakaji uwu wainga no muvhunjo ipi?
Wakabeswa kudini ngo kujija Bhaibheri?
Bhaibheri rinotivangisa kuti tiite muvhunjo. Verenganyi Mateu 7:7, mapeja bhuisananyi ngo muvhunjo unotevera:
Ngaipi muvhunjo yamunayo yamunoda kuti Bhaibheri rimudavire?
5. Mungadakajwa ngo kuverenga Bhaibheri
Vandhu vakawanda vari kudakajwa ngo kuverenga Bhaibheri, ilona riri kuvabesa maningi. Wonanyi VHIDHIYO, mapeja bhuisananyi ngo muvhunjo jinotevera:
Mu vhidhiyo iyi, ngenyi majaha no vasikane ava vainga vasikadakariri kuverenga?
Ngenyi zvino vaakudakajwa ngo kuverenga Bhaibheri?
Masoko ari mu Bhaibheri angatinyalaja, no kutipa soterero. Verenganyi VaRoma 15:4, mapeja bhuisananyi ngo muvhunjo unotevera:
Munoda kuziva zvakawanda ngo zvo soterero inobhuiwa mu Bhaibheri, no kunyalaja karingatiita here?
6. Tingabeswa ngo vamweni kuzwisisa Bhaibheri
Zvakanaka maningi kuverenga Bhaibheri tiri tega, asi vakawanda vakawona kuti zvirinane maningi kubeswa ngo vamweni kuti varizwisise. Verenganyi Mabasa 8:26-31, mapeja bhuisananyi ngo muvhunjo unotevera:
Ngazvipi zvatingaita kuti tizwisise Bhaibheri? —Wonanyi mavhesi 30 na 31.
Mwanarume umweni wo ku Etiyopiya wakapsaka besero kuti azwisise Bhaibheri. Mazuva ano, vandhu vakawanda vakawona kuti zvirinane maningi kubeswa ngo vamweni kuti vazwisise Bhaibheri
VAMWENI VANOTI: “Kujija Bhaibheri kutamba no nguva.”
Iyemwi munotiwo kudini? Ngenyi madalo?
TAJIJENYI
Tajija kuti Bhaibheri rinotipa mazano angatibesa zuva ngo zuva, tawonazve kuti rinopingula muvhunjo inokosha yo upenyu, no kutipa soterero yo lamangwana lakanaka.
Muvhunjo Jokuhwirijira
Mazano api atingawana mu Bhaibheri?
Muvhunjo ipi inopingurwa ngo Bhaibheri?
Ngazvipi zvamaidakarira kujija mu Bhaibheri?
JIJANYI ZVIMWENI
Wonanyi kuti mazano ari mu Bhaibheri arikubesa kudini mazuva ano.
“Mazano Anowanika mu Bhaibheri Anobesa Nguva Yese” (Nharireyomurindi N.º 1 ya 2018 Mucishona)
Wonanyi kuti mwanarume umweni waizvizwa inga asingashandi kuvhira asiri mwana mudoko, wakabeseswa kudini ngo kujija Bhaibheri.
Jijanyi kuti Bhaibheri rinobesesa kudini kuti mbhuri idakare.
“Zvijijo 12 Zviri Kubesa Mbhuri kuti Jidakare” (Mukai! N.º 2 wa 2018 Mucishona)
Vakawanda vanoti Mwari ndiyena ari kutonga nyika ino, kubhuya kuti izvi ndizvona here?