Sotanyi Kuna Jehovha Kuti Munyalajwe

1. Sananguranyi mugariro wo Vajudha vainga varanda.

AMBOLANGARIJANYI, Vajudha vainga varanda ku Bhabhiloni. Vakazvizwa kudini. Vainga vaona nyika yavo yapalajwa. Ngo ndava yo zvishaishi zvavo no zvo majiteteguru avo ivona vakavhiswa mu nyumba javo voendeswa nyika imweni. (2 Mk. 36:15, 16, 20, 21) Icokwadi kuti ku Bhabhiloni varanda vainga vano rusujunuko wo kuitawo mabasa ozuva ngo zuva. (Jer. 29:4-7) Ngo kudalo, upenyu wakanesa maningi uye andiwopi wavaizokheta. Vakazvizwa kudini ngo mugariro uwu? Ambowonanyi masoko akabhuiwa ngo muranda umweni wakagondeka kuti: “Tiri pamwepo ku mulambo jo Bhabhiloni. Konayo taigara tesicema tesilangarira Zioni.” (Ps. 137:1) Varanda povaisurukirwa ivona vaida nyalajo, asi vaizowana kupi nyalajoyo?

2-3. (a) Jehovha wakaitirenyi Vajudha vainga varanda? (b) Tinozowonenyi mu cijijo cino?

² Jehovha ndi ‘Mwari wo kunyalaja kese.’ (2 VaK. 1:3) Inga Mwari ano rudo, iyena unodisisa maningi kunyalaja vese vanokumbira besero kaari. Jehovha waizviziva kuti varanda vamweni vaizozwira mbhangiro yake uye vozohwirira kaari. (Isa. 59:20) Mu makore anodarika 100 izvi zvisati zvaitiaka, iyena wakafemera mu porofita Isaya kuti anyore bhuku rino zina lake. Ngo cinangwa cenyi? Isaya wakanyora kuti: “‘Vangisanyi, vangisanyi vandhu vangu,’ unobhuya kudalo Mwari wenyu.” (Isa. 40:1) Hina, ngo ndava yo zvinyorwa zvo vaporofita Jehovha wakapa vangiso yaidiwa ngo Vajudha vainga varanda.

³ Inga Vajudha vainga varanda, isusuwo tinodawo kuvangiswa nguva jimweni. Mu cijijo cino tinozowona njira ndhatu jakashandisa Jehovha kuti avangise varanda: (1) Iyena wakathembesa kuregerera vaya vanonga vakhauya, (2) wakapa soterero vandhu vake uye (3) wakapeja kutya kavo. Patinonga tesijija mafundo aya, wonanyi kuti tingabesereka kudini ngo masoko akanaka a Jehovha.

JEHOVHA NGO UNYASHA WESE WAKATIREGERERA

4. Jehovha wakakhombijisa kudini kuti ndi Mwari ano unyasha? (Isaya 55:7)

⁴ Jehovha ‘ndi Baba vo unyasha wese.’ (2 VaK. 1:3) Iyena wakakhombija vara iri ngo kuthembesa kuregerera varanda vainga vakhauya. (Verenganyi Isaya 55:7.) Iyena wakati: “Ngo rudo wese ndinozova no unyasha newe.” (Isa. 54:8) Jehovha waizokhombijisa kudini unyasha uwu? Kunyange Vajudha vaitambujika ngo zvishaishi zvavakaita, Jehovha wakavathembesa kuti avasaizogara ku Bhabhironi kwenda no kwenda. Ivona vaizogara mu ciitiko ici ko nguva shoma basi. (Isa. 40:2) Masoko aya akavanyalaja zvakadini no kuvangisa vaya vainga vakhauya vainga pakati pavo!

5. Ngenyi tino zvikonzero zvakawanda kudarika zvo Vajudha vainga varanda zvo kuwona unyasha wa Jehovha?

⁵ Tajijenyi? Jehovha wakanasiririka kuregerera vanamati vake vakawanda. Mazuva ano, tino zvikonzero zvakawanda zvokuthemba kuti Jehovha unotiregerera kudarika mathembere aiita Vajudha. Kuitisa kudini? Tinozwisisa zvinoita kuti Jehovha aregerere. Mu zana lo makore rakazotevera Isaya aaporofita, Jehovha wakatumira mwana wake waanoda maningi kuti abhadhare vashaishi vese vanonga vakhauya. Mupiro uwu unoita kuti zvishaishi zvedu “zvipfuthwe”, kupfuthwa kamare. (Mabasa 3:19; Isa. 1:18; VaE. 1:7) Unyasha wakadini una Mwari wedu watinoshandira!

6. Tinobesereka kudini tikakanda mulangariro wedu panyasha ja Jehovha? (Wonanyi foto.)

⁶ Masoko akafemerwa ndi Jehovha pana Isaya 55:7 angatinyalaja paya patinova no mazwiro okuzvipa ndava. Vamweni vedu vanolamba vesizvipa ndava ngo zvishaishi zvavakaita kare kunyange vakhauya. Izvi zvingaitika maningi-ningi kudai tesitambujika ngo zvishaishi zvotakaita. Ngo kudalo, patinopupura zvishaishi zvedu tonasirisa maitire edu tingava no cokwadi cokuti Jehovha watiregerera. Jehovha paanoregerera iyena unokheta kutama kulangarirazve cishaishi cedu. (Ezanisanyi na Jeremiya 31:34.) Ngo kudalo, Jehovha aalangaririzve zvishaishi zvotakaita kare, nayesuwo atidikani kuita zvezvo. Jehovha unowona zvatinoita zvino haiwa zvatakaita kare. (Ezek. 33:14-16) Ngo kukasika Baba vedu vo unyasha wese vanozovhisa matambujiko ese akaviiswa ngo zvishaishi.

7. Cicinyi cingatibesa kuti tipsake besero kudai pano cishaishi catiri kuviga?

⁷ Tingaitenyi kudai hana yedu yesitipa ndava ngo kuviga cishaishi? Bhaibheri rinotivangisa kuti tikumbire besero ku vakuru. (Jak. 5:14, 15) Ngo kudalo, nguva jimweni azviripi nyore kutendera zvishaishi zvatakaita. Zvaizova zvakanaka kukhwederera vanarume ava vakagondeka, kudai tikakhauya uye tolangarira kuti Jehovha wakagaja vanarume ava kuti vatibese ivona vanozoita izvi ngo rudo wese uye ngo unyasha. Wonanyi unyasha wa Jehovha manyalajire owakaita hama imweni inodanijwa Arturi,a poyainesaka mu mulangariro. Arturi unoti: “Ndakaita gore rese ndesiwona zvo umitu-mitu”. “Asi pondakazwa mabhuisano ngo pamusolo po hana, ndakapupura zvishaishi zvangu ku mukaji wangu uye kuno vakuru. Mu masure maizvi ndakapejisira ngo kuzwa kurerukirwa asi ndainga ndesizvipa ndava ngozvo ndakaita. Vakuru vakandilangarija kuti Jehovha wainga asito kundisiya. Iyena unotipangira ngokuti unotida. Masoko avo akandibaya mweyo maningi uye akandibesa kuti ndive no mulangariro mupsa.” Zvino hama Arturi vari kushanda inga piyona uye mubeseri wo ungano. Zvinonyalaja zvakadini kuziva kuti Jehovha unokhombija unyasha paya patinokhauya!

JEHOVHA UNOTIPA SOTERERO

8. (a) Jehovha wakapa soterero ipi varanda? (b) Maererano na Isaya 40:29-31, soterero iyi yaiita kuti Vajudha vakakhauya vaitenyi?

⁸ Mu mawonero ovandhu Vajudha vainga vari mu nguva inonesa. Munyika yo Bhabhiloni, yaizivikanwa ngo kutama kusujunura varanda vavo. (Isa. 14:17) Ngo kudalo, Jehovha wakapa soterero vandhu vake. Iyena wakathembesa kusujunula vandhu vake uye apana caizomukoreresa kuzviita. (Isa. 44:26; 55:12) Mu meso ma Jehovha, Bhabhiloni rainga rakatojana no zvimavhu zvidoko. (Isa. 40:15) Ngo zvidutu zvidoko basi zvimavhuzvo azvitozve kuzowoneka. Varanda ava vakazwa kudini ngo soterero iyi? Izvi zvaizovavangisa. Asi yaizovaitira zvakawanda. Isaya wakanyora kuti: ‘Vaya vakaemera Jehovha vakazowanazve simba’ (Verenganyi Isaya 40:29-31.) Hina, soterero yaizovavangisa ivona ‘vaizomburuka ngo mapapiro inga shiri.’

9. Zvicinyi zvakapa varanda zvikonzero zvokuti vathembe zvo vakagondeswa ndi Jehovha?

⁹ Jehovha wakapa varanda zvikonzero zvokuti vathembe zvovakagondeswa. Kuitisa kudini? Ambolangariranyi ngozvo zviporofita zvainga zvakazajika. Ivona vaizviziva kuti vaAsiriya vainga vanyisa umambo wo kumaojanyemba o Iziraeri uye votora vandhu vovaita varanda. (Isa. 8:4) Ivona vakaona vaBhabhiloni vesipwanya Jerusarema uye votora vandhu vemo koovaita varanda. (Isa. 39:5-7) Ivona vainga vesirarama Mambo Zedhekiya paakaizwa bofu uye otorwa kuendeswa ku Bhabhiloni. (Jer. 39:7; Ezek. 12:12, 13) Zvese zvakathembeswa ndi Jehovha zvakazajika. (Isa. 42:9; 46:10) Zvese izvi zvakavangisa kudini kutenda kavo zvokuziva kuti Jehovha waizovasujunura zvaizozajika!

10. Zvicinyi zvingatibesa kuti tilambe tino soterero mu mazuva ano okupejisira?

¹⁰ Tajijenyi? Patinoneseka mu mweyo soterero ingatibesa no kutivangisa kuti tivezve no simba. Tiri kurarama mu nguva inonesa uye tiri kurwisana no vavengi vano simba maningi. Ngo kudalo, atidikani kuremba pasoterero yedu. Jehovha wakatipa soterero yakanaka maningi upenyu usingaperi, mudakalo wo cokwadi uye no jiviriro. Tinodikana kuita kuti soterero iyi ilambe yakavanga mu mulangariro medu uye no mu mweyo medu. Tikatama kudalo soterero yedu inoremba, inga masotere atinoita maruva akaseja inga akashata tesisota ngo pajhanela lakasvipa. Tingaitisa kudini kuti “ticenese majhanela,” tesilamba tino soterero yakavanga? Nguva yese tingapsaka nguva yo kulangarijisisa kuti upenyu unozonga wakanakisa kudini munyika ipsa. Tingaverenga mabhuku, kuwona mavhidhiyo uye kuzwa ngoma jinobhuya ngo pamusolo po soterero. Uye tingabhuya na Jehovha ngo kuita mukumbiro ngo pamusolo po soterero yatinoemera kuwona yesizajika.

11. Zvicinyi zviri kubesa hanzvaji imweni ino cineso co utano kuti iwanezve simba?

¹¹ Ambowonanyi kuti soterero yakavangisa kudini no kunyalaja hanzvaji imweni inozwi Joy, ino cineso co utano. Ivona vakati: “Pandinozvizwa ndakasuruvara ndinovhunja Jehovha mazwire angu omukati-kati ndesiziva kuti iyena unondizwisisa. Jehovha wakandipingura ngo kundipa simba kudarika randaiemera .’” (2 VaK. 4:7) Hanzvaji Joy vanolangarija mu nyika ipsa umo munonga musina mugari wemo unozobhuya kuti: ‘Ndiri kuwaja.’” (Isa. 33:24) Kudai yesu tingavhura mweyo jedu kuna Jehovha no kukanda mulangariro pa soterero yedu tingawanazve simba.

12. Zvikonzero zvipi zvatinazvo zvinotiita kuti tithembe zvigondiso zva Jehovha? (Wonanyi foto.)

¹² Inga zvaakaita ku varanda, Jehovha unotipawo zvikonzero zvakawanda kuti tithembewo zvigondiso zvake. Ambolangarijanyi ngo zviporofita zvatiri kuwona zvesizajika. Inga muezaniso, tiri kuwona umambo wo nyika yese wakati ‘divi lakavanga divi rimweni lakaremba.’ (Dha. 2:42, 43) Tinozwawo kesibhuiwa ngo ‘mudhuma ngo pasi mu ndau jakasiyana-siyana,’ uye tiri kubatikana ngo kuparijira masoko akanaka ‘mu nyika yese.’ (Mateu 24:7, 14) Zviporofita izvi uye no zvimweni zvakawanda zvinovangisa kutenda kedu pa zvigondiso zvinonyalaja zva Jehovha zvisati zvazajika.

JEHOVHA UNOPEJA KUTYA KEDU

13. (a) Zvineso zvipi zvaizosangana no Vajudha povaizosunungurwa? (b) Maererano no zvakanyorwa pana Isaya 41:10-13, Jehovha wakanyalajisa kudini Vajudha vainga varanda?

¹³ Kunyange kuti Jehovha waivangisa varanda pa soterero inoshamaisa, ivona vaizviziva kuti vaizosangana no matambujiko akawanda pavaizoda kusujunurwa. Jehovha wainga akabhuya kuti kumbhiri ko uranda wo vaJudha, munyisi waizopalaja nyika jainga phedopo uye otyisijira Bhabhiloni. (Isa. 41:2-5) Vajudha vaidikana kuneseka ndizvona here? Jehovha wainga akanyalaja kare vandhu vake paakabhuya kuti: ‘Musatya ngokuti ndinemwi. Musatetemera ngokuti ndiri Mwari wenyu.’ (Verenganyi Isaya 41:10-13.) Jehovha waida kubhuyenyi paakati: ‘Inini ndiri Mwari wako’? Jehovha aasaiejurirepi Vajudha kuti vamunamate asi kunamata uku kaidikana. Pane kudalo, iyena waivaejurira kuti wainga ari divi lavo.—Ps. 118:6.

14. Injira jipi jimweni Jehovha jaakashandisa kuti anyalaje varanda?

¹⁴ Jehovha wakanyalaja kutya ko varanda ngo kuvaejurira kuti simba lake uye uzivi wake azvina ko zvinogumira. Jehovha paakakoka Vajudha vainga varanda kuti vasote kudenga kainga kakazala ngo nyereji. Iyena wakavavhunja kuti aato kusika nyereji basi unotoziva nyereji jese ngo mazina ajo. (Isa. 40:25-28) Zvakadini no vandhu iyena unotoziva zina lo mundhu umwe nga umwe la vaya vanomunamata! Uye kudai Jehovha uno simba lo kusika nyereji iyena unosimbawo kamare lo kubesa vandhu vake. Varanda vainga Vajudha vainga vasina zvikonzero zvo kuneseka kana kutya.

15. Mwari wakanasirisa kudini Vajudha vainga varanda kuitira zvaizoitika?

¹⁵ Jehovha wakanasirirazve vandhu vake pa zviro zvaizoitika. Ngo divi rimweni lo bhuku la Isaya, Mwari wakabhuya kuti ku vandhu: ‘Ngenanyi mumba menyu uye vharanyi musuwo jenyu. Vandanyi monamo mbhera hasha jipere.’ (Isa. 26:20) Divi iri rinoita inga lakazajika pokutanga Bhabhiloni polakapalajwa ndi Mambo Silo. Mundholovondho imweni yo ciGiriki co kare, inoti: Silo paakangena mu Bhabhiloni “wakavhunja masoca ake kuti vaulaye vese wovaizowona kunja ko musuwo.” Ambolangariranyi kutya kakaita vagari vo Bhabhiloni! Asi varanda vainga Vajudha vangadai vakasiiwa kamare ngokuti vakazwira mbhangiro ya Jehovha.

16. Ngenyi atidikani kuzwa tesineseka maningi ngo ndava yo lamangwana redu? (Wonanyi foto.)

¹⁶ Tajijenyi? Ngo kukasika tinozosangana no kutambujika kukuru kusati kamboitika mundholovondho jo vandhu. Pazvinotanga vandhu vese vanozovhiringijika uye vanozotya. Asi haiwa vanamati va Jehovha. Tinozviziva kuti Jehovha ndi Mwari wedu. Tinozogara ‘takamuka tesiziva kuti rusujunuko wedu waaphedo.’ (Ruka 21:28) Kunyange mu batanijwa wo nyika yese akatirwisa tinozolamba takavanga. Jehovha unozotijivirira esishandisa ngirosi uye no ndhungamiriro kuti aponese upenyu wedu. Ndhungamiriro iji tinozojiwanisa kudini? Tinodikana kuemera kuzozviwona. Ngo kudalo, dangani tinozoashira ndhungamiriro jinovha kuungano kedu. Ngo divi rimweni jinozova nyumba jedu jatinozowana “jiviriro”. Tingazvinasirisa kudini kuitira zvinozoitika? Tinodikana kuvangisa ushamwari wo hama no hanzvaji jedu, tozwira ndhungamiriro uye tova no cokwadi cokuti Jehovha ari kutungamirira sangano redu.—VaH. 10:24, 25; 13:17.

17. Tingaendesa kudini kuna Jehovha kuti tiwane nyalajo?

¹⁷ Kunyange Vajudha vainga varanda vaisangana no mugariro unonesa Jehovha wakavapa jiviriro yavaida. Iyena unozoita zvakatojana kuna isusu. Ngo kudalo azvinenyi no zvinozoitika muno lamangwana, lambanyi mesisota kuna Jehovha kuti muwane kuvangiswa. Hina, thembanyi nyasha jake huru. Itanyi kuti soterero yenyu ilambe yakavanga. Langariranyi kuti muna Jehovha Mwari wenyu imwimwi apana camungatya.