Khombijanyi Nderemejo Kuvamweni

1. Ngenyi vandhu vanodakarira kureremejwa? (Zvirevo 22:1)

MUNODAKARA, vandhu vamweni pavanomukhombijira nderemejo here? Pasina kurangarija, hina. Vandhu vese vanoda kuzwa vesireremejwa. Ndizvona kuti patinoreremejwa ngo vamweni tinozvizwa takadakara. Musashamisika kuti Bhaibheri rinobhuya kuti ‘kureremejwa kunodarika kuva no sirivha no goridhe’!—Verenganyi Zvirevo 22:1.

2-3. Pamugariro upi patinodikana kukhombijira nderemejo vamweni? Ngazvipi zvatinozojija mucijijo cino?

² Azvito kureruka kukhombijira nderemejo kuno vamweni. Ngo divi rimweni, atikwanisi kurega kuwona zvinoshaishwa nga vaya vakatitendeneja. Kunja kaizvi, tiri kupona pa nguva yokuti vandhu avasina nderemejo. Asi tinodikana kuva vakasiyana. Ngenyi? Ngokuti Jehovha unoda kuti tireremeje, ‘vandhu vo mukhaindi wese.’—1 Ped. 2:17.

³ Tingabesereka ngo kuzvivhunjisa kuti zvinobhuyenyi kureremeja vamweni uye tingazvikhombijisa kudini (1) vo pambhuri, (2) vatinonamata navo uye (3) no vatisinganamati navo. Ngatiwone kuti tingakhombijisa kudini nderemejo pamugariro unonesa.

ZVINOBHUYENYI KUREREMEJA VAMWENI?

4. Zvinoda kubhuyenyi kureremeja vamweni?

⁴ Maizotsanangurisa kudini nderemejo? Mundumi jimweni magama okuti “nderemejo” uye “kukujwa” anozwirana. Kuitisa kudini? “Kureremeja” zvinobhuira mawonere atinoita mundhu. Patinoreremeja vamweni, tinonga tesivawona vesikosha katiri ngo zvavanoita nguva jimweni, zvakadai inga mabasa avo, zvavanazvo kana kuti zvimweniwo. “Kukuja,” zvingabhuirazve mabatire atinoita mundhu. Patinokuja vamweni tinoita kuti vazwe vesikosheswa, vesidiwa uye kukujwa. Zvakajeka kuti rukujo, rinodikana kuvha mu mwoyo.—Mateu 15:8.

5. zvicinyi zvingatibesa kuti tikhombije nderemejo kuvamweni?

⁵ Jehovha unoda kuti tikhombije nderemejo vamweni, icokwadi, iyena unoda kuti tiite izvi “kuvatongi.” (VaR. 13:1, 7) Asi vamweni vangabhuya kuti: “Ndinodakara ngo kukhombija nderemejo kuvaya vanofaneya.” Marangarire api akanaka? Inga vashandiri va Jehovha, tinozwisisa kuti kureremeja katinoita vandhu akucijikiri pa mabasa avo, asi kunocijikira pa rudo ratinaro na Jehovha uye cido cokuda kumudakajisa.—Jos. 4:14; 1 Ped. 3:15.

6. Zvingakwanisika here kukhombijira nderemejo mundhu asingatireremeji? Tsananguranyi. (Wonanyi foto yo)

⁶ Vamweni vangavhunjisa kuti: ‘Zvinokwanisika here kukhombijira nderemejo mundhu asingatibati ngo nderemejo?’ Hina. Ngatimbowona muezaniso jimweni. Mambo Sauro wakapseruja mwana wake Jonatani pamberi po vamweni. (1 Sam. 20:30-34) Kunyange zvakadaro, Jonatani wakareremeja baba vake Sauro ngo kuramba esivabesa pa hondo javaiita mbhera povakafa. (Eki. 20:12; 2 Sam. 1:23) Mupristi Eri wakapumbha Ana kuti wainga amwa doro. (1 Sam. 1:12-14) Ngo kudaro, Ana wakabhuya na Eri ngo nderemejo, kunyange vese mu Iziraeri vainga vesizviziva kuti Eri aato kurambija vana vake vaiita zvakashata, zvaaidikana kuita inga baba uye mupiristi mukuru. (1 Sam. 1:15-18; 2:22-24) Uye vandhu vo muAtena vakatuka muPostori Pauro ngo kumudanija kuti ‘unovereketa maningi.’ (Mabasa 17:18) Kunyange zvakadaro, Pauro wakabhuya navo ngo nderemejo. (Mabasa 17:22) Muezaniso iji, jinojekesa kuti rudo ratinaro kuna Jehovha uye kutya kumunyangajisa, zvingatindundira kuti tikhombijire nderemejo kuvamweni haiwa basi pazvinonga zvakareruka, asi kunyange pazvinonga zvesinesa. Ngatibhuisane kuti ndiyani wakafaneya nderemejo uye ngenyi.

KHOMBIJIRANYI NDEREMEJO VO PAMBHURI PENYU

7. Zvicinyi zvingatiita kuti zvinese kubata vo pambhuri yedu ngo nderemejo?

⁷ Cineso. Tinopeja nguva yakawanda tino mbhuri yedu. Ngo kudaro, tinonasa kuziva undhu wavo wakanaka no povakarembera. Vamweni vangava no ndhendha ingatinesa kuti tivangwarire kana kuti vangatambujika ngo kuzviha mwoyo maningi. Vamweni vangatobhuya kana kuita zviro ngo maitire anotiwaja. Kunja kokuita pamuzi pavo ndau yokuzorora no runyararo, vamweni vanoita musindo ngo kubata vo pambhuri pavo zvisina nderemejo. Inga muviyo, apana kuzwirana. Inga ndhendha yo mumajoini, inokoreresa kuti mativi o muviri ashande pamwepo pasina cineso, pasina nderemejo zvinokoreresa vo pambhuri kuti vashande vakabatana. Kusiyana no ndhendha yo mumajoini isingaperi zvacose, isusu tinokona kuita kuti kutama ndereremejo kusamosha kubatana ko mbhuri yedu.

8. Ngenyi zvesikosha kuti kureremeja vo pambhuri yedu? (1 Timoti 5:4, 8)

⁸ Ngenyi tinodikana kukhombija nderemejo? (Verenganyi 1 Timoti 5:4, 8.) Pa tsamba yokutanga ya Pauro kuna Timoti, Pauro wakabhuya kuti vandhu vo pambhuri vangakhombijisa kudini kureremeja zvido zvo vamweni. Iyena wakatsanangura kuti cinangwa cedu cinokosha cokuti tikuje vo pambhuri pedu ngo gwanja iri, acidikani kuva co kuvangirijwa, asi co “kuzvipira kuna Mwari.” Masoko aya anobhuira kuzvipira kokugondeka kuna Jehovha uye mu basa rake. Jehovha ndiyena wakatanga kusika mbhuri. (VaE 3:14, 15) Ngo kudaro, patinokuja umwe wo pambhuri pedu, zvo cokwadi, tinonga tesikuja Musiki wo mbhuri, Jehovha. (Wonanyi masoko okujija pana 1 Tim. 5:4 mu ciputukezi.) Tino cikonzero cakanaka cokukhombija nderemejo vo pambhuri pedu!

9. Mukaji no mwamuna vangakhombijisa kudini kuti vanoreremejana? (Wonanyi foto.)

⁹ Tingakhombijisa kudini nderemejo? Mwamuna unokuja mukaji wake, unozvikhombija kuti iyena unokosha pano vandhu uye vari vega. (Zvi. 31:28; 1 Ped. 3:7) Iyena aamutaki, kumupseruja kana kumuita kuti azvizwe asingakoshi. Hama Ariel,a vanogara ku Argentina, vakati: “Ngo ndava yo ndhendha yo mukaji wangu, nguva jimweni unobhuya zvinondiwaja. Pazvinoitika izvi, ndinorangarira kuti masoko aabhuyaro aayenderani no mazwiro ake. Panguva yakawoma iyi, ndinorangarira 1 VaKorinde 13:5, inondindundira kuti ndibhuye ngo nderemejo haiwa ngo mavereketere anopseruja.” (Zvi. 19:11) Mukaji unokuja mwamuna wake ngo kubhuya zvakanaka zvake no vamweni. (VaE. 5:33) Iyena unongwarira kuti asamupopotera, asamuseka, asamutuka kana kumudainja ngo mazina anomupseruja ngokuti unozviziva kuti maitire akadaro, anoparaja mucadho. (Zvi. 14:1) Hanzvaji imweni yo ku Itariya ino mwamuna anorwisana no kuzvirhya mwoyo, yakati: “Pa nguva jimweni, ndinozwa kuti mwamuna wangu ari kuneseka maningi ngo zviro zvakawanda. Kare, masoko angu uye zvandaita mumeso mangu zvaikhombija kutama kumureremeja. Asi ndinowona kuti pandinoengejera kushamwarijana no vandhu vanonderemejo pavanobhuya no vamweni, ndinozwa ndesida kureremejawo mwamuna wangu.”

10. Vocidoko vangakhombijisa kudini kuti vanoreremeja vabereki vavo?

¹⁰ Vocidoko zwiranyi mutemo yo mumbhuri menyu yamakapuwa ngo vabereki venyu. (VaE. 6:1-3) Bhuyanyi no vabereki venyu ngo nderemejo. (Eki. 21:17) Vabereki venyu povanonga vesikura, vangada kubeswa ndimwi. Itanyi zvese zvamunokona kuti muvangwarire. Wonanyi muezaniso wa hanzvaji Mariya, vana baba vasiripi Capupu ca Jehovha. Baba vavo povakawaja, zvakanesa kuti avangwarire ngokuti ivona vainga vakashaisha kumubata. Ivona vanorangarira kuti: “Andito kuita mukumbiro kuti ndireremeje baba vangu, asi kuti ndikonewo kukhombijira nderemejo. Inini ndakati: Kudai Jehovha esindikumbira kuti ndikuje vabereki vangu, ngo kudaro zvinozwisisika kuti iyena ungandipa simba rokuti ndiite zvonazvo. Ngo kuhamba ko nguva, ndakazwisisa kuti baba vangu avasaidikana kucinja maitire avo kuti ndivabate ngo nderemejo.” Patinokuja vo mumbhuri medu pasinenyi no zvovanoshaisha, tinokhombija kuti tinoreremeja Jehovha, Musiki wo mbhuri.

KHOMBIJANYI NDEREMEJO MU UNGANO

11. Ngenyi zvinganesa kubata hama no hanzvaji ngo nderemejo?

¹¹ Cineso. Vanamati vanorarama mukuzwirana no zvinojijiswa ngo Bhaibheri, ngo kudaro, nguva jimweni vangashaisha kutibata kana kutinyangajisa. Kudai vamweni vatinonamata navo “vakaita zviro zvinoita kuti tinyangajwe”, zvingatinesa kuti tirambe tesivabata ngo ndereremejo. (VaK. 3:13) Zvicinyi zvingatibesa kuti tirambe tesikhombija ndereremejo?

12. Ngenyi zvinokosha kukhombija nderemejo ku hama no hanzvaji? (2 Pedhru 2:9-12)

¹² Ngenyi tinodikana kukhombijira nderemejo? (Verenganyi 2 Pedhru 2:9-12.) Mutsamba yake yocipiri yakafemerwa, Pedhru wakabhuya kuti vamweni vake vo muungano yo coKristu yo muzana rokutanga romakore, vaibhuya vasina ndereremejo ngo pamusoro po “vanokujwa” zvinobhuya vakuru vociKristu. Ngirozi jakagondeka jakawona zvainga zvesiitika, asi ijona jakaitenyi? “Ngo ndava yokureremeja Jehovha,” ajito kubhuya soko rimwe rokutuka vandhu ava vaiitari zvakashata. Rangariranyi izvi! Ngirozi iji jisina cishaishi jakaramba kubhuya ngo ushungu ngo pamusoro po vandhu ava vaizvikuja. Kunyange zvakadaro, ijona jakasiya kuti Jehovha atonge shwiro iyi. (VaR. 14:10-12; ezanisanyi na Judha 9.) Tingawana cijijo kuvha pano zvakaizwa ngo ngirosi. Kudai tesidikana kubata vanotishora ngo ndereremejo, izvi zvinokhombija kuti tino cikonzero cakanaka cokuti tibate ngo ndereremejo hama no hanzvaji jedu. Tinodikana ‘kutanga kureremejana ngo cedu’ kuti tikone kureremeja vaya vatisinganamati navo. (VaR. 12:10) Patinoita izvi, tinokhombija kuti tinoreremeja Jehovha.

13-14. Tingakhombijisa kudini nderemejo vo muungano? Ipanyi muezaniso. (Wonanyi foto.)

¹³ Tingakhombijisa kudini nderemejo? Vakuru vangisiranyi kujijisa vamweni ngo rudo. (Fir. 8, 9) Kudai mesida kupa mazano mundhu umweni, zviitenyi ngo rudo haiwa makanyangajwa. Hanzvaji munokonawo kuita zvakawanda no kujivirira nderemejo mu ungano ngo kutama kuita ndhango kana kubhuya masoko okunyepa. (Tito 2:3-5) Tese hedu tinokona kukhombija kuti tinoreremeja vakuru vo ungano ngo kushanda pamwepo navo, uye kukhombija kubonga basa guru ravanoita pakuitisa musangano, kutungamirira basa rokuparijira uye kubesera vaya ‘vakaenda mu gwanja rakashata.’—VaG. 6:1; 1 Tim. 5:17.

¹⁴ Hanzvaji imweni inodainjwa Rosio yakawona zvisito kureruka kureremeja mukuru akaipa mazano. Iyona yakati: “Ndakazvizwa inga kuti wainga andiwomesera”. “Ndiri kumuzi, ndakabhuya zvakashata ngo pamusoro pake. Kunyange hazvo andito kuzvikhombija pambhene, asi ngo comumwoyo andito kuva no cokwadi cokuti iyena waida kundibesa uye ndakaramba zano rake.” Zvicinyi zvakabesa Rosio? Iyena unotsanangura kuti: “Pakuverenga kangu Bhaibheri, ndakaverenga 1 VaTesaronika 5:12, 13. Pandakazwisisa kuti ndainga ndisingareremeji hama iyi, hana yangu yakatanga kunditongesa. Ndakaita mukumbiro kuna Jehovha uye ndakapsakisisa mumabhuku edu kuti ndiwane masoko anganasa kundibesa kuti ndinasirise murangariro wangu. Ndakazwisisa kuti cineso cainga cisiripi co hama iyi, asi kainga kuri kuzvikuja kangu. Zvino ndaakuzwisisa kuti panokuzwira ko kuzvidodokesa kangu no kukwanisa kangu kureremeja vamweni. Ndisiri kudikana kuitisa nane, asi pandinonga ndesivangisira kukhombijira nderemejo, ndinozvizwa ndino runyararo na Jehovha.”

REREMEJANYI VAYA VATISINGANAMATI NAVO

15. Ngenyi tingadikana kuvangisira kuti tikhombije nderemejo kuna vaya vatisinganamati navo?

¹⁵ Cineso. Nguva jimweni patinonga tesiita basa rokuparijira tinosangana no vandhu vasingadi cokwadi co Bhaibheri. (VaE. 4:18) Vandhu vamweni vanoramba kuzwa masoko atinoparijira ngo ndava yo zvovakajija. Asi vamweni vatinoshanda navo kubasa kana kuti vatinojija navo kucikora avatidakariri kana kudakarirawo basa redu. Ngo kuhamba ko nguva, kureremeja katinoita vandhu vakadaro kungapunguka uye tingakonerwa kuvabata ngo njira yatinoda kuti vatiitirewo.

16. Ngenyi zvinokosha kukhombijira nderemejo vaya vasinganamati Jehovha? (1 Pedhru 2:12; 3:15)

¹⁶ Ngenyi tinodikana kukhombijira nderemejo? Rangariranyi kuti Jehovha unowona mabatire atinoita vandhu vaya vasinganamati. Mupositori Pedhru wakarangarija maKristu kuti muhambiro wavo wakanaka ungaita kuti vamweni “vakuje Mwari.” Ndiyo ndava, esivakurujira kuti vangwarire kutenda kavo, ngo “kupfava uye no nderemejo.” (Verenganyi 1 Pedhru 2:12; 3:15.) Kunyange pamunotevererwa ngo ndava yo kutenda kenyu, kana pamunonga mesibhuya no zvigarisano zvenyu, maKristu vanodikana kubata vaya vasinganamati inga zvavanoita pa mberi pa Mwari. Icokwadi kuti Jehovha unowona no kuzwa zviya zvatinobhuya no mabhuyire atinozviita. Cikonzero cakadini catinaco cokubata ngo ndereremejo vaya vatisinganamati navo!

17. Tingakhombijisa kudini kuti tinoreremeja vaya vatisinganamti navo?

¹⁷ Tingakhombijisa kudini nderemejo? Patinoparijira atidikani kuwonera vamweni pasi vano ruzivo padoko kana kuti vasitona no padoko ruzivo ngo pamusoro po Bhaibheri. Kunja ka izvi, tinodikana kuwona vamweni inga vanokosha kuna Mwari uye vakuru katiri. (Agayo 2:7; VaF. 2:3) Kudai mundhu akamutuka ngo ndava yo zvamunotenda, musava no murangariro wokuda kuhwirijira, inga muezaniso, kubhuya zviro zvinovanyangajisa. (1 Ped. 2:23) Kudai mukabhuya zviro zvamunocumba, kumbiranyi kuregererwa ngo kukasika. Mungakhombijisa kudini ndereremejo kuvaya vamunoshanda navo? Ivanyi mushandi wakanaka uye ejanyi kusakurira undhu wakanaka kuno vamunoshanda navo uye vamunoshandira. (Tito 2:9, 10) Kudai muri mushandi akagondeka, anovangisira uye anozvipira ngo mwoyo wese, imwimwi mungakwanisa kudakaja kana kutama kudakaja vandhu vamunoshanda navo nguva jese kana vamunoshandira, asi mungadakaja Mwari.—VaK. 3:22, 23.

18. Ngenyi zvakanaka kusakurira no kukhombijira nderemejo vamweni?

¹⁸ Zvikonzero zvakanaka zvakadini zvatinazvo zvokuti tisakurire uye tikhombijire nderemejo kuvamweni! Tawona kuti patinoreremeja mbhuru yedu, tinokuja Jehovha musoro wo mbhuri yedu. Mukutojanawo, patinokhombijira nderemejo hama no hanzvaji jedu jatinonamata najo, tinokuja Baba vedu vokudenga. Kudai tikakhombijira nderemejo vaya vatisinganamati navo, tinonga tesivhura mukana jakanakisisa jo kuti vakuje Mwari wedu mukuru. Kunyange, vandhu vamweni vasingatireremeji, zvinokosha kuti tisakurire uye tikhombijire nderemejo kovari. Ngenyi? Ngokuti Jehovha unozotikomborera. Unogondesa kuti: “Vaya vanondikuja, inini ndinozovakujawo.”—1 Sam. 2:30.