Ivanyi Makanasirira Kuitira kudavira Vaya Vari Kudakarira Masoko Akanaka

1. Vandhu vanoashirisa kudini masoko atinoparijira? (Mabasa 13:47, 48; 16:14, 15)

VANDHU vakawanda vo muzana rokutanga romakore vakatenda cokwadi povakazwa masoko o ciKristu. (Verenganyi Mabasa 13:47, 48; 16:14, 15.) Mukutojanawo, nyamasi uno, vamweni vanodakara povanotanga kuzwa masoko akanaka. Vaya vanokhombija inga vasingadakariri masoko oUmambo, ngo kuhamba ko nguva vangazovhura mwoyo yavo kuti vamatendere. Zvicinyi zvatinodikana kuita patinowana vandhu vanoda “kuzwa” masoko akanaka mu basa rokuparijira?

2. Kuitisa kudini basa redu rokuita kuti vandhu vave vajiji rakatojana no basa ro murimi?

² Basa ro kuparijira ringafananijwa no basa ro murimi. Paanowona kuti pano mbeu yaivha unoikoka nguveyo, uye unoramba esisima no kungwarira mbeu jimweni jisati jaivha. Mukutojanawo kudai tikawana mundhu anoda kuzwa masoko atinoparijira, tinoda kumubesa kuti ave mujiji wa Kristu ngo kukasika. Asi kuna vaya vasati vada kujija, tinoramba tesivabesa kuti vawone kuti ngenyi zvakanaka kujija ngo pamusoro pa Mwari no Bhaibheri. (Johani 4:35, 36) Tikaziva kuti vandhu vakanasiririka kana kuti avato, tinozoziva njira yakanaka yokuvabesa. Zvino ngatiwone zvatingaita patinobhuisana no vandhu kokutanga vanoda kujija ngo pamusoro pa Mwari no Bhaibheri. Tisajijazve kuti tingabesesa kudini vandhu ava kuti varambe vesihambira mberi.

TINGABESESA KUDINI VAYA VANODA KUJIJA NGO PAMUSORO PA MWARI NO BHAIBHERI

3. Zvicinyi zvatinodikana kuita patinowana vanodakarira mu basa redu rokuparijira? (1 VaKorinde 9:26)

³ Patinowana vandhu vanodakarira mu basa redu rokuparijira, tinoda kuvabesa kuti vatange kuhamba mugwanja ro upenyu. Pakadai, atidikani kukorera kuitisa jijo yo Bhaibheri uye kuvakoka kumusango jedu patinobhuisana navo ko kutanga.—Verenganyi 1 VaKorinde 9:26.

4. Bhuyanyi zvakaitika no mundhu umweni ainga akanasirira kujija Bhaibheri ngo kukasika.

⁴ Kuitisa jijo. Vamweni vatinobhuya navo, vakanasiririka kuti vajije Bhaibheri ngo kukasika. Inga muezaniso, zuva rimweni ngo cina, musikane umweni wo kuKanadha wakakwederera cingoro comabhuku uye wakatora bhurushura ra Raramanyi Nokusingaperi Mesidakara! Hanzvaji yainga no cingoro co mabhuku, yakatsanangurira musikane uwu kuti Bhurushura iri rinoshandazve kuitira jijo yo Bhaibheri isingabhadharwi. Musikane uwu wakakhombija kudakarira uye wakavapa namba jake jo foni. Risati rapera zuva iri, musikane uwu wakazovanyorera mesajhe esibhuya ngo pamusoro po jijo yo Bhaibheri. Hanzvaji iyi poyakazvipira kuti iyende kumuzi kake mu kupera ko vhiki, musikane uwu wakavhunjisa kuti: “Zvainga zvakadini kuti muviye mangwana? Ndakasujunuka mangwana.” Ivona vakatanga kujija ngo cishanuco. Musikane uwu wakayenda kumusangano kokutanga pakupera ko vhiki ronaro uye wakaramba esihambira mberi muno zvokunamata.

5. Zvicinyi zvingatibesa kuziva njira yakanaka yo kutangisa jijo yo Bhaibheri? (Wonanyi foto.)

⁵ Zvakajeka kuti atisotereri kuti vandhu vese vanozwa masoko edu, vadakarire inga zvakaizwa ngo musikane uwu. Vamweni vangada nguva yakareba kuti vakhombije kudakarira. Nguva jimweni zvingada kuti titange mabhuyo ngo pamusoro po shwiro inodakarirwa ngo mundhuwo. Kunyange zvakadaro, kana tikaramba tinomawonero akanaka, toramba tesikhombija kudakarira mundhuwo, panguva doko tingatanga kujija naye Bhaibheri. Tingati kudini ngo pamusoro pokutangisa jijo yo Bhaibheri? Muvhunjo uwu, wakavhunjiswa hama no hanzvaji jakawanda jinobudirira pakutangisa zvijijo zvo Bhaibheri.

6. Zvicinyi zvatingabhuya kuti tibese mundhu kuti awone kuti kujija Bhaibheri kakanaka kaari?

⁶ Hama no hanzvaji iji, jakatsanangura kuti munyika jimweni zviri nane kutama kubhuya masoko akadai inga “kujija,” “jijo yo Bhaibheri” kana kuti “kumujijisa” pamunonga mesitsanangurira mundhu jijo yo Bhaibheri. Ivona vakawona kuti zviri nane kushandisa magama akadai inga kuti “kubhuisana” uye “kupsakisisa zviri muBhaibheri.” Kuti mubese mundhu kuti arambe esida kubhuya na imwimwi, mungabhuya masoko akadai: “Zvinoshamisa kuwona madavirire aanoita Bahibheri muvhunjo jinokosha jo upenyu,” kana kuti “Bhaibheri asipi basi bhuku ro ceci asi rino mazano anotibesa.” Mungayengejera kuti: “Azvitori nguva yakawanda 10 mbhera 15 minutu basi jinokwana kuti mujije zviro zvimweni zvinokosha.” Amudikani henyu kushandisa masoko akadai inga “kugaja” kana kuti “vhiki ngo vhiki,” zvingaita kuti vazvizwe vesivangirijwa kuti varambe vesisangana na imwimwi.

7. Ndirini vandhu vamweni vakaziva cokwadi co Bhaibheri pakutanga? (1 VaKorinde 14:23-25)

⁷ Vakokenyi kuti vaende kumusangano. Zvinoita inga kuti, mu nguva yo mu positori Pauro, vamweni vakaziva cokwadi co Bhaibheri povakatanga kupinda musangano wo ciKristu. (Verenganyi 1 VaKorinde 14:23-25.) Izvi, ndizvona zviri kuitikawo mazuva ano. Vakawanda vapsa, vanohambira mbheri muno zvokunamata povanotanga kuenda kumusangano jedu. Ndirini pamunodikana kuvakoka? Bhuku ra Raramanyi Nokusingaperi Mesidakara! Rinobhuyawo ngo pamusoro pokukoka mu cijijo 10, asi, amudikani henyu kuemera mbhera mugume pacijijo ici kuti muzomukoka. Kuvhira pamunotanga kubhuya no mundhu, mungamukoka kumusangano wo kumbhiri ko vhiki, muvhunjenyizve ngo pamusoro po hurukuro kana kuti musoro wokujija wovhiki ronaro.

8. Zvicinyi zvatinodikana kuvhunja mundhu watinonga takoka kuti aviye kumusangano kedu? (Isaya 54:13)

⁸ Pamunokoka mundhu kumusangano yedu, mutsanangurirenyi kuti ngenyi musangano jedu jakasiyana no jinoizwa kuceci yaakajaera. Mujiji umweni wo Bhaibheri paakapinda musangano kokutanga, panguva yo cijijo co Mungwaji, wakavhunjisa mujijisi wake kuti: “Muitisi unoziva mazina ovandhu vese here?” Hanzvaji, vakamutsanangurira kuti tese tinoeja kuziva mazina ovari muungano medu, inga mazivire atinoita mazina ovandhu vo pambhuri pedu. Mujiji uwu wo Bhaibheri wakabhuya kuti vandhu vakawanda vomuceci yake, avazivani mazina avo. Mukufanana, cinangwa comusangano yedu, cipsa kuno vandhu vakawanda. (Verenganyi Isaya 54:13.) Tinoungana kuti tinamate Jehovha, tijijiswe ndiyena uye kuti tivangisane. (VaH. 2:12; 10:24, 25) Ngo iyo ndava musangano yedu yakarongeka kuti itibese kujija uye ajibataniji tsika. (1 VaK. 14:40) Kunja ka izvi, ndau yedu yo musangano yakareruka uye yakanasirirwa kuti zvive zvakareruka kujija. Ngo kuti atipindiri zvo politika, atibhuyi ngo pamusoro po mapartidho. Zvingava zvakanaka kutanga kukhombija mujiji wenyu wo Bhaibheri vidhiyo inoti: Zvicinyi Zvinoizwa pa Nyumba yo Umambo? Ngo gwanja iri, iyena unozoziva zvaanosoterera.

9-10. Kudai tikakoka mundhu kuti aviye kumusangano, zvicinyi zvatinodikana kuita kuti azvizwe akasujunuka? (Wonanyi foto)

⁹ Vandhu vamweni avadi kupinda musangano ngokuti vanotya kukumbirwa kuti vave “Zvapupu zva Jehovha.” Vavhunjenyi kuti tinodakarira maningi kuvhakacirwa uye kuti vangaviya kuzoyaeya musangano vasingaiti ciri cese kana kubhuya ciro. Mbhuri jinoashirwa zvakanaka kubatanijawo na jiyana jino vana. Pamusangano jedu, vana avajijiswi vari pavega. Kunja ka izvi, vabereki no vana vanogara pamwepo uye vanojija vese. Ngo gwanja iri, vabereki vanoziva kuti vana vavo vanaani uye ndiyani ari kuvajijisa. (Dhe. 31:12) Kumusangano jedu akukumbirwi mare. Pano kudaro, tinotevejera mutemo wa Jesu wokuti: ‘Makapuwa mahara, ipanyiwo mahara.’ (Mateu 10:8) Imwimwi mungamuvhunjazve kuti aadikani hake kupfeka nguvo jinodhura kuti apinde musangano. Mwari unowona zviri mumwoyo mo mundhu haiwa zvinowoniwa ngo mundhu.—1 Sam. 16:7.

¹⁰ Kudai mundhu akaviya kumusangano, itanyi zvese zvamunokona kuti azwe kuti waashirwa zvakanaka. Mukhombijenyi vakuru vo ungano no vapariji vamweni. Kudai akawona kuti vandhu vanoushamwari uye vanoneseka ndiyena, ungadazve kuzoviyazve. Paunonga wesiizwa musangano, kudai iyena asina Bhaibheri, shandisanyi naye Bhaibheri renyu uye mubesenyi kuti azwisise hurukuro inonga yesiizwa uye no majijire atinoita Mungwaji.

PATINOTANGA JIJO YO BHAIBHERI

11. Mungakhombijisa kudini kuti munoreremeja nguva no urongwa wo mujiji wenyu?

¹¹ Zvicinyi zvatinodikana kurangarira patinojija no mundhu Bhaibheri? Reremejanyi nguva no urongwa wo mujiji wenyu. Inga muezaniso, kudai mukapangana naye, ivanyi vanobata nguva, azvinenyi no mawonere anoita vandhu vo mundharaunda menyu pamusoro po kubata nguva. Kunja ka izvi, zvakanaka maningi kuti pajijo yenyu yo kutanga musapeja nguva yakareba. Vapariji vakawanda vano ruzivo, vanowona zvakanaka kukasika kupeja, kunyange mundhuwo asada kuziva zvakawanda. Musavereketa maningi, ipanyi mujiji wenyu wo Bhaibheri nguva yakakwana kuti abhuye ngo pamusoro po mazwire ake uye zvaanorangarira.—Zvi. 10:19.

12. Ngacipi cinodikana kuva cinangwa cedu kuvhira patinotanga cijijo co Bhaibheri no mundhu?

¹² Kuvhira pakutanga, cinangwa cenyu cinodikana kuva cokubesa mujiji wenyu kuti azive Jehovha na Jesu uye no kuvada. Kuti tiite izvi, nguva jese tinodikana kuvakhombija zvinobhuya Bhaibheri haiwa kuvavhunja basi zvatinorangarira. (Mabasa 10:25, 26) Nguva jakawanda, muPostori Pauro waijijisa ngo pamusoro pa Jesu, uwo akatumwa ndi Jehovha kuti aviye kuzotibesa kuti tizive Jehovha no kumuda. (1 VaK. 2:1, 2) Pauro wakajekesa kuti zvinokosha kubesa vajiji vapsa kuti vasakurire undhu wakanaka, unoezaniswa no goridhe, sirivha no mapuwe anokosha. (1 VaK. 3:11-15) Undhu uwu unokosha unobatanija kutenda, ungwaru, kuzwisisa uye kutya Jehovha. (Ps. 19:9, 10; Zvi. 3:13-15; 1 Ped. 1:7) Tevejeranyi njira ya Pauro yokujijisa ngo kubesa vajiji venyu kuti vasakurire kutenda kakavanga uye ushamwari wavo na Baba vavo vano rudo.—2 VaK. 1:24.

13. Tingakhombijisa kudini kusengerera no kuzwisisa patinobesa vaya vanodakarira? (2 VaKorinde 10:4, 5) (Wonanyi foto.)

¹³ Tevejeranyi majijisire aiita Jesu, ngo kukhombija kusengerera no kuzwisisa. Ngwariranyi kuita muvhunjo jinosiya mundhuwo asingazvizwi zvakanaka. Kudai pano ciro ciri kumunesa kuzwisisa, amudikani kuramba mesibhuya shwiroyo, kunja ka izvi, imwimwi mungaenderera mberi no jijo uye mozohwirirazve pashwiro iya. Kunja ko kumuvangirija kuti atende zvaanojija asati anasiririka, mupenyi nguva kuti cokwadi cimere muji mu mwoyo make. (Johani 16:12; VaK. 2:6, 7) Bhaibheri rinoezanisa jijiso jo kunyepa jatiri kueja kusiya no zviro zvakavanga zvinonesa kupwanya. (Verenganyi 2 VaKorinde 10:4, 5; wonanyi masoko okujija anoti “zviro zvakavanga zvinonesa kupwanya.”) Zvingatama kuva zvakareruka kuti mujiji asiye kutenda zviro zvaitenda kare. Ngo kudaro, tinodikana kubesa mujiji kuti asiye zvaaitenda no zvaaidakarira.—Ps. 91:9.

VAPSA POVANOENDA KUMUSANGANO

14. Tingabatisa kudini vapsa vanoviya kumusangano jedu?

¹⁴ Jehovha unoemera kuti tisakheta pakubata vapsa, pasinenyi no tsika yavo, mugariro wavo kana kuti kavakabarihwa. (Jak. 2:1-4, 9) Ngo kudaro, tingakhombijisa kudini rudo ku vaya vanoviya kumusangano jedu?

15-16. Tingabesesa kudini vapsa, kuti vazvizwe kuti vaashirwa zvakanaka pamusangano jedu?

¹⁵ Vamweni vanoviya kumusangano ngo kuti vanoda kuzowona zvinoizweyo kana kuti mundhu umweni womundharaundha yavo wakavavangisa kuenda kumusangano. Ngo kudaro, ativhiri kuramba kukwederera vandhu ava vanozari kumusangano. Vaashirenyi zvakanaka musingavavangiriji, vakokenyi mugare navo, wonanyi mese Bhaibheri renyu no bhuku rinonga resijijwa kana kuti vapenyiwo Bhaibheri renyu. Kunja ka izvi, rangariranyi zvimweni zvamungaita kuti vazvizwe zviri nane. Mwanarume umweni wakavhakacira Nyumba yo Kunamatira wakavhunja hama imweni yakamuashira kuti wainga akanyangajwa ngokuti wainga akasimira nguvo jisito kunaka. Hameyo yakamuita kuti azvizwe akasujunuka uye yakamutsanangurira kuti Zvapupu zva Jehovha ivandhuwo vakafanana no vamweni. Mwanarume uwu wakavangisira mbhera abhabhatijwe uye aato kuzokanganwa mupinguro wo hama iyi. Ngo kudaro, kudai tikakhombija kudakarira vandhu vapsa tinongwarira kuti tisaita muvhunjo jinovapseruja kana kuti jo undhu wavo.—1 Ped. 4:15.

¹⁶ Uye tinodikana kuita kuti vanotivhakacira vazvizwe vaashirwa zvakanaka, kuvareremeja patinobhuya navo, patinopa mupinguro uye patinoita mativi pamusangano anobhuya ngo pamusoro povasiri Zvapupu kana zvavanotenda. Ngwariranyi kushandisa masoko anokhugunya vamweni kana kuti anowoneka inga anotuka. (Tito 2:8; 3:2) Inga muezaniso, atidikani kurerusa zvitendwa zvavayani vatisinganamati navo. (2 VaK. 6:3) Ngo ndava yazvo, hama jinoita hurukuro yavese jinodikana kungwarira maningi izvi. Khombijanyi kuti munorangarira kuti muunganomo muno vasiripi Zvapupu zva Jehovha, mesitsanangura magama kana kuti masoko okuti vandhu avangamazwisisi.

17. Ngacipi cinangwa cedu patinowana vandhu “vanonga vakanasirira kuti vaashire masoko akanaka” mu basa redu rokuparijira?

¹⁷ Basa redu rokuita vajiji, zuva ngo zuva ririkuramba resikura ngo kukasika. Tinodikana kuenderera mberi tesipsaka “vandhu vanomurangariro wakanaka okuti vawane upenyu usingaperi.” (Mabasa 13:48) Ngo kudaro, atidikani kusiya kuvajijisa Bhaibheri kana kuvakoka kumusangano jedu. Patinoita kudaro, tingavabesa kuti vaite mudanyu jokutanga “kuhamba mugwanja rinoendesa ku upenyu.”—Mateu 7:14.