दोस्रो इतिहास
१७ तिनीपछि तिनका छोरा यहोसापात+ राजा भए र उनी इस्राएलमा झन्झनै शक्तिशाली हुँदै गए। २ उनले यहुदाका पर्खालले घेरिएका सबै सहरमा सिपाहीहरू तैनाथ गराए। उनले यहुदामा र एप्रैमका ती सहरहरूमा सैन्य चौकीहरू खडा गरे, जुन सहरहरूलाई उनका बुबा आसाले कब्जा गरेका थिए।+ ३ यहोवा परमेश्वरले यहोसापातलाई निरन्तर साथ दिनुभयो। किनकि उनका पुर्खा दाउद पहिला जुन मार्गमा हिँडेका थिए, उनी पनि त्यही मार्गमा हिँडे।+ उनले बाआल देवताहरूको उपासना गरेनन्। ४ बरु उनले आफ्ना बुबाका परमेश्वरको खोजी गरे+ अनि उहाँका आज्ञा पालन गरे। उनले इस्राएलको तौरतरिका अपनाएनन्।+ ५ यहोवा परमेश्वरले उनको राज्यलाई स्थिर पार्दै लैजानुभयो।+ यहुदाका सारा मानिसले उनको निम्ति उपहारहरू ल्याउने गर्थे। उनले थुप्रै धनसम्पत्ति र मानसम्मान हासिल गरे।+ ६ उनी साहसी भएर यहोवा परमेश्वरको मार्गमा हिँडिरहे। उनले यहुदाबाट अग्ला थानहरू*+ र पवित्र खामाहरू* समेत हटाए।+
७ उनले आफ्नो शासनकालको तेस्रो वर्षमा आफ्ना भारदारहरू बेन-हेल, ओबदियाह, जकरिया, नेथनेल र मिकायाहलाई बोलाए अनि तिनीहरूलाई यहुदाका सहरहरूमा मानिसहरूलाई शिक्षा दिन पठाए। ८ तिनीहरूसँग यी लेवीहरू पनि गए: सेमायाह, नेथन्याह, जबदियाह, आसाहेल, सेमिरामोथ, यहोनाथान, अदोनियाह, तोबियाह र तोब-अदोनियाह। पुजारीहरू एलिसामा र यहोराम पनि तिनीहरूसँगै गए।+ ९ अनि तिनीहरूले यहुदाका मानिसहरूलाई शिक्षा दिन थाले। तिनीहरूले मानिसहरूलाई यहोवा परमेश्वरको व्यवस्थाको पुस्तकबाट सिकाए।+ मानिसहरूलाई शिक्षा दिँदै तिनीहरू यहुदाका सबै सहरमा गए।
१० यहुदावरपरका सम्पूर्ण राज्यहरूमा यहोवा परमेश्वरको त्रास फैलियो र उनीहरूले यहोसापातसित लडाइँ गरेनन्। ११ पलिस्तियालीहरूले यहोसापातलाई थुप्रै सौगात चढाए अनि तिरो पनि बुझाए। अरबीहरूले पनि आफ्नो बगालबाट उनको निम्ति ७ हजार ७ सय थुमा र ७ हजार ७ सय बोका ल्याए।
१२ यहोसापात झन्झन् शक्तिशाली भए।+ उनले यहुदामा किल्लाहरू+ र भण्डार गर्ने सहरहरू+ बनाइ नै रहे। १३ उनले यहुदाका सहरहरूमा ठूलठूला परियोजना सञ्चालन गरे। यरुसलेममा उनका वीर योद्धाहरू थिए। १४ उनीहरूलाई आ-आफ्नो बुबापट्टिको घरानाअनुसार यी दलहरूमा बाँडिएको थियो: यहुदाको कुलमा हजार-हजारका नाइकेहरू यी थिए—नाइके अद्नाह, जसको नेतृत्वमा ३ लाख वीर योद्धा थिए।+ १५ तिनको अधीनमा नाइके यहोहानान थिए, जसको नेतृत्वमा २ लाख ८० हजार योद्धा थिए। १६ जिक्रिका छोरा अमास्याह पनि अद्नाहकै अधीनमा थिए। अमास्याह राजीखुसीले यहोवा परमेश्वरको सेवा गर्न अघि सरेका थिए र तिनको नेतृत्वमा २ लाख वीर योद्धा थिए। १७ बिन्यामिनको कुलबाट+ वीर योद्धा एलियादा थिए। तिनको नेतृत्वमा २ लाख योद्धा थिए र उनीहरू सबै भाला र ढालले सुसज्जित थिए।+ १८ एलियादाको अधीनमा यहोजाबाद थिए, जसको नेतृत्वमा हतियार भिरेका १ लाख ८० हजार योद्धा थिए। १९ यी योद्धाहरूले राजाको सेवा गर्थे। यिनीहरूबाहेक राजाका अरू योद्धाहरू पनि थिए, जसलाई उनले यहुदाका पर्खालले घेरिएका सबै सहरमा तैनाथ गरेका थिए।+