यर्मिया
८ यहोवा घोषणा गर्नुहुन्छ: “त्यसबेला यहुदाका राजाहरू, शासकहरू, पुजारीहरू, भविष्यवक्ताहरू अनि यरुसलेमका बासिन्दाहरूका हाडखोड तिनीहरूको चिहानबाट निकालिनेछ। २ ती हाडखोडहरूलाई सूर्य, चन्द्र अनि आकाशका सारा सेनासामु* फिँजाइनेछ किनकि ती कुराहरूलाई नै तिनीहरूले प्रेम गरे, तिनको सेवा गरे, तिनलाई पछ्याए र दण्डवत् गरे अनि तिनको डोऱ्याइ खोजे।+ ती हाडखोडहरूलाई जम्मा गरिनेछैन न त गाडिने नै छ। ती जमिनमा मलसरह हुनेछन्।”+
३ सेनाहरूका यहोवा घोषणा गर्नुहुन्छ: “यस दुष्ट घरानाको बाँकी रहेकाहरूलाई म जुन-जुन ठाउँमा तितरबितर पार्छु, त्यहाँ तिनीहरूलाई जिउनुभन्दा मर्नु नै बेस लाग्नेछ।”
४ “अनि तिमीले तिनीहरूलाई यसो भन्नू, ‘यहोवा यसो भन्नुहुन्छ:
“मानिसहरू लडे भने के तिनीहरू फेरि उठ्दैनन् र?
यदि कोही आफ्नो मार्गबाट फर्क्यो भने के अर्को पनि फर्किँदैन र?
५ त्यसोभए यरुसलेमका यी मानिसहरू किन मलाई धोका दिइरहन्छन्?
तिनीहरू छल गर्न छोड्दैनन्;
तिनीहरू खराब मार्ग त्याग्न इन्कार गर्छन्।+
६ मैले ध्यान दिएर तिनीहरूको कुरा सुनेँ तर तिनीहरूले ठीक कुरा बोलेनन्।
तिनीहरूमध्ये कोही पनि दुष्ट काम गरेकोमा पछुताएन र यसो भनेन, ‘मैले यो के गरेँ!’+
घोडा रणभूमिमा बेतोडले कुदेझैँ प्रत्येक मानिस एक सुरले भीडको पछि लागिरहेको छ।
ढुकुर, गौँथली र चाँचरले* आफ्नो बसाइँ सर्ने समय थाह पाउँछन्।
तर मेरा मानिसहरूलाई यहोवाको न्यायको दिनबारे थाह छैन।”’+
८ ‘“हामी बुद्धिमान् छौँ, हामीसित यहोवाको व्यवस्था* छ” भनेर तिमीहरूले कसरी भन्न सक्यौ?
किनकि शास्त्रीहरूको* झूटो कलम+ त झूटको लागि मात्र प्रयोग भएको छ।
९ बुद्धिमान् मानिसहरू लाजमा परेका छन्।+
तिनीहरू भयभीत हुनेछन् र पासोमा पर्नेछन्।
तिनीहरूले यहोवाको वचनलाई इन्कार गरेका छन्,
खोइ तिनीहरूको बुद्धि?
१० त्यसैले म तिनीहरूका स्वास्नीहरू अरू पुरुषलाई दिनेछु,
तिनीहरूको खेत अरूलाई नै दिनेछु+
किनकि सानादेखि ठूला सबैले बेइमानी गरेर कमाइरहेका छन्;+
के भविष्यवक्ता, के पुजारी, सबैले ठगिरहेका छन्।+
११ अनि तिनीहरू शान्ति नहुँदा पनि
“शान्ति, शान्ति” भनेर+
मेरा मानिसहरूकी छोरीको* चोटलाई बाहिरबाट मात्र निको पार्न खोज्छन्।
१२ आफूले गरेका घिनलाग्दा कामहरूलाई सम्झँदा के तिनीहरू लज्जित हुन्छन्?
अहँ, रतीभर हुँदैनन्!
लाज के हो, तिनीहरूलाई थाहै छैन!+
त्यसैले लडिसकेकाहरूजस्तै तिनीहरू पनि लड्नेछन्।
मैले तिनीहरूलाई दण्ड दिँदा तिनीहरू लर्खराउनेछन्,’+ यहोवा भन्नुहुन्छ।
१३ यहोवा घोषणा गर्नुहुन्छ: ‘जब म तिनीहरूलाई जम्मा गर्छु, तब म तिनीहरूलाई नाश गर्नेछु।’
‘अङ्गुरको बोटमा एउटै अङ्गुर बाँकी हुनेछैन, अन्जिरको रूखमा एक दाना अन्जिर बाँकी हुनेछैन अनि तिनीहरूको पात पनि ओइलाएर जानेछ।
मैले तिनीहरूलाई दिएको सबै कुरा तिनीहरूबाट खोसिनेछ।’”
१४ “हामी किन यहाँ बसिरहेका छौँ?
बरु हामी एकसाथ भेला होऔँ र पर्खालले घेरिएका सहरहरूभित्र गएर+ त्यहीँ मरौँ।
किनकि यहोवा हाम्रा परमेश्वरले हामीलाई नष्ट गरेरै छोड्नुहुन्छ
अनि उहाँ हामीलाई विष भएको पानी पिउन दिनुहुन्छ+
किनकि हामीले यहोवाविरुद्ध पाप गरेका छौँ।
१५ हामीले शान्ति छाउला भन्ने आशा गरेका थियौँ तर केही पनि राम्रो भएन,
अवस्था सुध्रिएला भन्ने आशा गरेका थियौँ तर आतङ्क पो मच्चियो!+
१६ दानबाट उसका घोडाहरूले फूँ-फूँ गरेको आवाज सुनिन्छ।
उसका घोडाहरू हिनहिनाउँदा
सारा देश हल्लिन्छ।
शत्रुहरू आएर त्यो देश र त्यसमा भएका सबै कुरा सखाप पार्छन्,
त्यो सहर* र त्यसका बासिन्दाहरू सबैलाई।”
१७ यहोवा घोषणा गर्नुहुन्छ: “म तिमीहरूकहाँ सर्पहरू पठाउनेछु,
यस्ता विषालु सर्पहरू, जसलाई मन्त्र फुकेर पनि वशमा राख्न सकिँदैन;
तिनीहरूले तिमीहरूलाई डसेरै छाड्नेछन्।”
१८ मेरो पीडा निको नै नहुने खालको छ;
मेरो हृदय व्याकुल भएको छ।
१९ टाढाको देशबाट गुहार मागिँदै छ
मेरा मानिसहरूकी छोरी यसो भनिरहेकी छे:
“के यहोवा सियोनमा हुनुहुन्न?
के त्यहाँका राजा त्यहाँ छैनन्?”
“खोपिएका मूर्तिहरू र व्यर्थका विदेशी देवताहरूको पूजाआजा गरेर
तिनीहरूले मलाई किन रिस उठाए?”
२० “कटनीको समय सिद्धिसक्यो, ग्रीष्म ऋतु पनि सिद्धिसक्यो,
तैपनि हाम्रो उद्धार भएको छैन!”
२१ मेरा मानिसहरूकी छोरीले चोट पाएकोले मेरो मन छियाछिया भएको छ;+
मेरो मन खिन्न भएको छ।
मलाई त्रासले छोपेको छ।
२२ के गिलादमा कुनै सुगन्धित लेप* छैन?+
मेरा मानिसहरूकी छोरीको चोट किन निको पारिएको छैन?+