दोस्रो इतिहास
४ त्यसपछि तिनले तामाको वेदी बनाए।+ त्यसको लम्बाइ २० हात, चौडाइ २० हात र उचाइ १० हात थियो।
२ तिनले धातु* ढालेर एउटा विशाल खड्कुँलो बनाए,+ जसलाई ‘समुद्र’ भन्ने नाम दिइयो। त्यो गोलाकार थियो। त्यसको मुखको व्यास १० हात र गोलाइ ३० हात थियो।* त्यसको उचाइ ५ हात थियो।+ ३ खड्कुँलोको मुखको तलतिर दुई लहर खरबुजाजस्तो देखिने ससाना फलका आकृतिहरू थिए।+ खड्कुँलोको चारैतिर एक-एक हातभित्र दस-दस वटा त्यस्ता आकृतिहरू थिए। यी आकृतिहरू खड्कुँलोसँगै ढालेर बनाइएका थिए। ४ त्यो खड्कुँलोलाई १२ वटा साँढेमाथि+ अड्याइएको थियो। तीन वटा साँढे उत्तरतिर, तीन वटा पश्चिमतिर, तीन वटा दक्षिणतिर र तीन वटा पूर्वतिर फर्केका थिए। ती सबै साँढेको पछिल्तिरको भाग भित्रपट्टि फर्केको थियो। त्यस खड्कुँलोलाई ती साँढेहरूमाथि अड्याइएको थियो। ५ त्यो खड्कुँलो चार अङ्गुल* बाक्लो थियो। त्यसको मुख कचौराको मुखजस्तो थियो; त्यो फक्रेको लिली फूलजस्तै देखिन्थ्यो। त्यस खड्कुँलोमा ३ हजार बाथ* पानी अटाउँथ्यो।
६ तिनले सरसफाइको लागि १० वटा बाटा पनि बनाए। तिनले पाँच वटा बाटा दायाँतिर र बाँकी पाँच वटा बायाँतिर राखे।+ अग्निभेटी+ चढाउँदा प्रयोग गरिने सरसामान ती बाटाहरूमा पखालिन्थ्यो। तर ‘समुद्र’ भनिने विशाल खड्कुँलोको पानीचाहिँ पुजारीहरूले हातखुट्टा धुन प्रयोग गर्थे।+
७ त्यसपछि तिनले आफूलाई दिइएको नमुनाअनुसारै+ सुनका १० वटा पानस बनाए+ र त्यसलाई मन्दिरमा राखे। तिनले पाँच वटा दायाँतिर र बाँकी पाँच वटा बायाँतिर राखे।+
८ त्यसपछि तिनले १० वटा टेबुल बनाए र त्यसलाई मन्दिरमा राखे। तिनले पाँच वटा दायाँतिर र बाँकी पाँच वटा बायाँतिर राखे।+ तिनले सुनका १०० वटा कचौरा पनि बनाए।
९ अनि तिनले पुजारीहरूको चोक बनाए।+ तिनले ठूलो चोक+ र त्यसका ढोकाहरू पनि बनाए। तिनले ती ढोकाहरू तामाले मोहोरे। १० तिनले ‘समुद्र’ भनिने विशाल खड्कुँलोलाई चाहिँ दायाँतिर, दक्षिण-पूर्व दिशामा राखे।+
११ हिरामले कोइला राख्ने भाँडाहरू, साबेलहरू र कचौराहरू पनि बनाए।+
यसरी हिरामले साँचो परमेश्वरको भवनमा ती सबै काम गरिसिद्ध्याए, जुन राजा सुलेमानले उनलाई दिएका थिए। उनले यी सबै थोक बनाए:+ १२ दुई वटा खम्बा+ र ती खम्बाहरूका शिरहरू, जुन कचौरा आकारका थिए; ती कचौरा आकारका शिरहरूलाई सिङ्गार्न दुई वटा जाली;+ १३ ती दुई वटा जालीको निम्ति ४०० वटा अनारका आकृति;+ प्रत्येक जालीको निम्ति दुई लहर अनारका आकृति, जसले खम्बाहरूका शिरलाई सिँगारेका थिए;+ १४ दस वटा ठेलागाडा र ठेलागाडामा राखिने १० वटा बाटा;+ १५ ‘समुद्र’ भनिने विशाल खड्कुँलो र त्यसमुनि भएका १२ वटा साँढे+ १६ अनि कोइला राख्ने भाँडाहरू, साबेलहरू, काँटाहरू+ र सबै सरसामान, जुन टल्काइएका तामाले बनाइएका थिए। राजा सुलेमानले भनेअनुसारै हिराम-अबिभले+ यहोवा परमेश्वरको भवनको निम्ति सबै सरसामान बनाएका थिए। १७ राजाले यी सबथोक यर्दनको इलाकामा सुक्कोथ+ र जेरेदाहको बीचमा बनाए। यी सबथोक माटाका साँचाहरूमा ढालेर बनाइएका थिए। १८ सुलेमानले असाध्यै धेरै भाँडाकुँडा बनाएका थिए। त्यसैले ती सब बनाउन कति तामा लाग्यो भनेर थाह पाउन सम्भव थिएन।+
१९ सुलेमानले साँचो परमेश्वरको भवनको निम्ति यी सब सरसामान बनाए:+ सुनको वेदी;+ भेटीको रोटी* राख्न टेबुलहरू;+ २० निखुर सुनका पानसहरू र त्यसका दियोहरू,+ जुन नियमअनुसार भित्री कोठाको अगाडिपट्टि बालिन्थ्यो; २१ फूलहरू, दियोहरू र चिम्टाहरू—यी सबै निखुर सुनले बनाइएका थिए; २२ सलेदो निभाउने साधनहरू, कचौराहरू, प्यालाहरू र सलेदोदानीहरू*—यी सबै निखुर सुनले बनाइएका थिए; साथै महापवित्र कोठाका+ र मन्दिरका* ढोकाहरू, जुन सुनका थिए।+