यर्मिया
४१ एलिसामाका नाति, नेथन्याहका छोरा इस्माएल+ राजघरानाका सदस्य थिए। तिनी राजाका प्रमुख मानिसहरूमध्ये एक थिए। सातौँ महिनामा तिनी १० जना मानिससित मिस्पामा अहिकामका छोरा गदल्याहकहाँ आए।+ मिस्पामा गदल्याहसँगै बसेर खाना खाइरहेको बेला २ नेथन्याहका छोरा इस्माएल र तिनीसितै आएका १० जना मानिस उठे र अहिकामका छोरा गदल्याहलाई तरबारले मारे। यसरी यहुदाको रेखदेख गर्न बेबिलोनका राजाले नियुक्त गरेका मानिसको इस्माएलले हत्या गरे। ३ मिस्पामा गदल्याहसँग रहेका सबै यहुदी र कल्दियाली सिपाहीहरूलाई पनि इस्माएलले मारे।
४ गदल्याहको हत्या भएको भोलिपल्टै, कसैले चाल पाउनुअघि नै ५ सकेम,+ सिलो+ र सामरियाबाट+ ८० जना मानिस आए। तिनीहरूले दाह्री खौरेका थिए, तिनीहरूको लुगा पनि च्यातिएको थियो र तिनीहरूले आफ्नो जीउमा घाउ बनाएका थिए।+ अनि यहोवाको भवनमा चढाउन तिनीहरूले आफूसित अन्नभेटी र सेतो धूप* पनि ल्याएका थिए।+ ६ नेथन्याहका छोरा इस्माएल मिस्पाबाट तिनीहरूलाई भेट्न गए। तिनीहरूलाई भेट्न जाँदा इस्माएल बाटोमा रुँदै गए। अनि तिनीहरूलाई भेटेपछि तिनले यसो भने: “अहिकामका छोरा गदल्याहकहाँ आउनुहोस्।” ७ तर जसै तिनीहरू सहरभित्र पसे, नेथन्याहका छोरा इस्माएल र तिनका मानिसहरूले तिनीहरूलाई मारे र तिनीहरूको लासलाई इनारमा फालिदिए।
८ तर तिनीहरूमध्ये १० जनाले इस्माएललाई यस्तो बिन्ती गरे: “हामीलाई नमार्नुहोस्! हामीले थुप्रै गहुँ, जौ, तेल र मह लुकाएर राखेका छौँ।” त्यसकारण इस्माएलले ती १० जनालाई मारेनन्। ९ आफूले मारेका सबै मानिसको लास इस्माएलले एउटा ठूलो इनारमा फालिदिए। यो त्यही इनार थियो, जुन इस्राएलका राजा बासाले धम्की दिएकोले राजा आसाले बनाएका थिए।+ नेथन्याहका छोरा इस्माएलले मानिसहरूको लासले भरेको इनार त्यही थियो।
१० पहरेदारहरूका कप्तान नबुजरदानले अहियाकिमका छोरा गदल्याहको निगरानीमा राखेका+ सबै मानिस अर्थात् सबै राजकुमारी र मिस्पामा बाँकी रहेका सबैलाई इस्माएलले कैद गरेर लगे।+ नेथन्याहका छोरा इस्माएल तिनीहरू सबैलाई लिएर पारिपट्टि अम्मोनीहरूको देशमा जानलाई निस्के।+
११ जब कारेहका छोरा योहानान+ र तिनीसित भएका सबै सेनापतिले नेथन्याहका छोरा इस्माएलको कर्तुतबारे सुने, १२ तब तिनीहरू आफ्ना सबै मानिससहित नेथन्याहका छोरा इस्माएलसित लडाइँ गर्नलाई निस्के। तिनीहरूले इस्माएललाई गिबोनमा पानीको ठूलो मुहाननजिकै* भेट्टाए।
१३ कारेहका छोरा योहानान र तिनीसित आएका सबै सेनापतिलाई देखेपछि इस्माएलले कैद गरेर लगिरहेका सबै मानिस रमाए। १४ अनि इस्माएलले मिस्पाबाट कैद गरेर लगेका ती सबै मानिस+ कारेहका छोरा योहानानसँगै फर्किए। १५ तर नेथन्याहका छोरा इस्माएल र तिनका आठ जना मानिस योहानानको हातबाट उम्केर अम्मोनीहरूको देशमा भागे।
१६ नेथन्याहका छोरा इस्माएलले अहिकामका छोरा गदल्याहको हत्या गरेपछि+ कैद गरेर लगेका मिस्पाका बाँकी मानिसलाई कारेहका छोरा योहानान र तिनीसित भएका सबै सेनापति मिलेर इस्माएलको हातबाट छुटाए अनि आफूसित लिएर गए। तिनीहरूले बाँकी रहेका पुरुष, स्त्री, केटाकेटी, सिपाही र दरबारका अफिसरहरूलाई गिबोनबाट फर्काए। १७ तिनीहरू मिश्रतिर जान अघि बढे+ अनि बेतलेहेमनजिकै+ किमहाममा बास बसे। १८ तिनीहरू कल्दियालीहरूदेखि डराएर मिश्र जान लागेका थिए किनकि नेथन्याहका छोरा इस्माएलले अहिकामका छोरा गदल्याहको हत्या गरेका थिए, जसलाई बेबिलोनका राजाले यहुदाको रेखदेख गर्न नियुक्त गरेका थिए।+