यर्मिया
२२ यहोवा यसो भन्नुहुन्छ: “यहुदाका राजाको महलमा जाऊ र मेरो सन्देश सुनाऊ। २ तिमीले यसो भन्नू: ‘ए दाउदको सिंहासनमा बस्ने यहुदाका राजा अनि यी ढोकाहरूबाट प्रवेश गर्ने तिनका नोकर-चाकर र सबै मानिस हो! यहोवाको वचन सुन। ३ यहोवा यसो भन्नुहुन्छ: “जे सही र न्यायोचित छ, त्यही गर। धोकेबाजहरूको हातबाट ठगिएकाहरूको उद्धार गर। परदेशीहरूलाई दुर्व्यवहार नगर अनि अनाथ* र विधवाहरूलाई बेवास्ता नगर।+ यस ठाउँमा निर्दोष मानिसको रगत नबगोस्।+ ४ तिमीहरूले यी कुरा होसियार भई पालन गऱ्यौ भने दाउदको सिंहासनमा बस्ने राजाहरू+ घोडा र रथमा सवार भएर यस महलका ढोकाहरूबाट प्रवेश गर्नेछन्। तिनीहरू, तिनीहरूका सेवकहरू र तिनीहरूका मानिसहरू त्यहाँबाट प्रवेश गर्नेछन्।”’+
५ “यहोवा घोषणा गर्नुहुन्छ, ‘तर तिमीहरूले मेरा यी कुराहरू पालन गरेनौ भने म आफ्नै शपथ खाएर भन्छु, यो महल खण्डहर बन्नेछ।’+
६ “यहुदाका राजाको महलबारे यहोवा यसो भन्नुहुन्छ,
‘तिमी मेरो लागि गिलादजस्तै छौ,
लेबनानको टाकुराजस्तै।
तर म तिमीलाई निर्जनभूमि बनाउनेछु;
तिम्रो कुनै पनि सहरमा मानिसहरू बसोबास गर्नेछैनन्।+
७ अनि तिमीलाई नाश गर्न म मानिसहरू खटाउनेछु।
तिनीहरू सबै आ-आफ्नो हतियार भिरेर आउनेछन्।+
अनि तिम्रा राम्रा-राम्रा देवदारका रूखहरू ढाल्नेछन्
र तिनलाई आगोमा हाल्नेछन्।+
८ “‘जातिजातिका मानिसहरू यस सहर भएर जाँदा एकअर्कालाई यसो भन्नेछन्: “यहोवा परमेश्वरले यस भव्य सहरको किन यस्तो हालत बनाउनुभयो?”+ ९ अनि तिनीहरूले यस्तो जवाफ दिनेछन्: “किनकि तिनीहरूले आफ्ना परमेश्वर यहोवासित गरेको करार भङ्ग गरे अनि अरू नै देवताहरूलाई ढोगे र उनीहरूको पूजा गरे।”’+
१० जो मरिसक्यो, उसलाई सम्झेर नरोऊ,
उसको निम्ति शोक नगर।
बरु जसलाई कैदमा लगियो, उसको निम्ति डाँको छोडेर रोऊ
किनकि ऊ कहिल्यै आफ्नो जन्मभूमिमा फर्कन पाउनेछैन।
११ “किनकि योसियाहका छोरा, यहुदाका राजा साल्लुम,*+ जसले आफ्ना पिता योसियाहको+ सट्टामा शासन गरिरहेका छन् र जो कैदमा लगिएका छन्, तिनीबारे यहोवा यसो भन्नुहुन्छ: ‘तिनी कहिल्यै यहुदामा फर्कनेछैनन्। १२ तिनलाई कैद गरेर लगिएको ठाउँमै तिनी मर्नेछन्। तिनले यो देश फेरि कहिल्यै देख्न पाउनेछैनन्।’+
१३ छलकपटले आफ्नो घर निर्माण गर्ने
र धुर्त्याइँ गरेर आफ्नो घरको तला थप्ने मानिसलाई* धिक्कार छ!
विनादाम आफ्नो छिमेकीलाई काममा जोताउने
अनि उसले पाउनुपर्ने ज्यालासमेत नदिने मानिसलाई धिक्कार छ!+
१४ त्यसले यस्तो विचार गर्छ: ‘म थुप्रै कोठा भएको घर बनाउँछु;
माथिल्लो तलामा फराकिला कोठाहरू बनाउँछु
अनि ती कोठाहरूमा झ्यालहरू राख्छु।
त्यसका भित्ताहरूमा देवदारका फल्याक लगाउँछु र त्यसमा सिन्दूरे रङ्ग पोत्छु।’
१५ अरूको तुलनामा तिमीसित देवदारका काठहरू प्रशस्तै छन् भन्दैमा तिम्रो शासन टिकिरहन्छ र?
तिम्रो बुबाले पनि खाए र पिए,
तैपनि तिनले न्यायोचित र असल काम गर्न छोडेनन्।+
त्यसैले तिनको भलो भयो।
१६ मारमा परेकाहरू र गरिबहरूले आफ्नो मामिला पेस गर्दा तिनले उनीहरूको पक्षमा बोले।
त्यसैले तिनको भलो भयो।
‘के परमेश्वरलाई चिन्ने मानिसले त्यसै गर्नुपर्ने होइन र?’ यहोवा घोषणा गर्नुहुन्छ।
१७ ‘तर तिमी भने सधैँ छलकपट गरेर नाफा कमाउने बाटो खोजिरहन्छौ र त्यसैबारे मात्र सोचिरहन्छौ।
तिमीलाई निर्दोषको रगत बगाउन,
छलछाम गर्न र जबरजस्ती अरूको सरसम्पत्ति धुत्न मन पर्छ।’
१८ “त्यसैले योसियाहका छोरा, यहुदाका राजा यहोयाकिमको+ विषयमा यहोवा यसो भन्नुहुन्छ,
‘मानिसहरूले एकअर्कालाई यसो भन्दै बिलौना गर्नेछैनन्:
“हाय, मेरो भाइ! हाय, मेरी बहिनी!”
तिनीहरूले तिनको निम्ति यसो भन्दै शोक गर्नेछैनन्:
“हाय, मेरा मालिक! हाय, मेरा सरकार!”
१९ गधाको सिनुलाई झैँ
तिनको लासलाई घिसारेर लगिनेछ+
र यरुसलेमको ढोकाबाहिर मिल्काइनेछ।’+
२० लेबनानमा गएर ठूलो स्वरले कराऊ,*
बासानमा गएर चिच्याऊ।
अबारिममा जाऊ र डाँको छोडेर रोऊ।+
किनकि तिम्रा सबै कामुक प्रेमीहरू कुल्चीमिल्ची पारिएका छन्।+
२१ तिमी ढुक्कसित बसेको बेला मैले तिमीलाई सम्झाएँ।
तर तिमीले ‘म तपाईँको कुरा सुन्दिनँ’ भन्यौ।+
सानैदेखि तिमीले यसै गऱ्यौ;
तिमीले मेरो कुरा कहिल्यै सुनेनौ।+
२२ तिम्रा गोठालाहरूलाई बतासले उडाएर लैजानेछ,+
तिम्रा कामुक प्रेमीहरू कैदमा पर्नेछन्।
अनि तिमीमाथि आइपरेका विपत्तिहरूको कारण तिमी लाजमा पर्नेछौ र तिम्रो अपमान हुनेछ।
२३ ए लेबनानका बासिन्दाहरू हो,+
जो देवदारका रूखहरूमा गुँड लगाएर बसेका छौ;+
बेथा लागेकी स्त्रीझैँ तिमीहरू पीडाले छटपटाउनेछौ।
त्यसबेला तिमीहरू पीडाले सुस्केरा हाल्नेछौ।+
२४ “यहोवा यस्तो घोषणा गर्नुहुन्छ, ‘म आफ्नै कसम खाएर भन्छु, ए यहोयाकिमका+ छोरा, यहुदाका राजा कोन्याह!*+ तिमी मेरो दायाँ हातको छापऔँठी थियौ भने पनि म तिमीलाई मेरो औँलाबाट थुतेर हुर्ऱ्याइदिने थिएँ। २५ तिम्रो ज्यान लिन खोज्नेहरूको हातमा म तिमीलाई सुम्पनेछु। बेबिलोनका राजा नबुकद्नेजरको* र कल्दियालीहरूको हातमा तिमीलाई सुम्पनेछु, जससित तिमी डराउँछौ।+ २६ म तिमीलाई र तिमीलाई जन्म दिने तिम्री आमालाई बिरानो भूमिमा हुर्ऱ्याएर फ्याँकिदिनेछु र त्यहीँ तिम्रो मृत्यु हुनेछ। २७ अनि तिमीहरू सबै आफूले फर्कन लालसा गरेको देशमा कहिल्यै फर्कन पाउनेछैनौ।+
२८ के कोन्याह हेला गरेर एकातिर मिल्काइएको
अनि कसैले पनि आफूसित राख्न नचाहने फुटेको भाँडो हुन् र?
तिनी र तिनका सन्तान किन हुर्ऱ्याइए?
किन तिनीहरू बिरानो देशमा धपाइए?’+
२९ ए पृथ्वी,* ए पृथ्वी, ए पृथ्वी, यहोवाको वचन सुन!
३० यहोवा यसो भन्नुहुन्छ:
‘यी मानिस निस्सन्तान हुन्
अनि जीवनभर सफलता हासिल नगरेका मानिस हुन् भनेर लेख।
किनकि यिनका कुनै पनि सन्तानले दाउदको सिंहासनमा बसेर यहुदामा शासन गर्न पाउनेछैनन्।’”+