इजकिएल
२६ एघारौँ वर्षमा महिनाको पहिलो दिन यहोवाको वचन मकहाँ आयो। उहाँले मलाई भन्नुभयो: २ “हे मानिसको छोरा, टायरले यरुसलेमविरुद्ध यसो भनेको छ,+ ‘हेर त! सबै जातिको प्रवेशद्वार तहसनहस भएको छ।+ आहा! अब सबै मकहाँ आउनेछन्। म मालामाल हुनेछु।’ ३ त्यसैले ब्रह्माण्डका मालिक यहोवा यसो भन्नुहुन्छ: ‘ए टायर! म तँविरुद्ध उठेको छु। तँलाई नाश गर्न म जातिजातिका मानिसहरूलाई सुऱ्याउनेछु। समुद्रमा छाल उर्लेझैँ तिनीहरू तँमाथि आइलाग्नेछन्। ४ तिनीहरूले तेरा पर्खालहरू ढाल्नेछन् र तेरा किल्लाहरू भत्काउनेछन्।+ म तेरो माटो सबै खोस्रनेछु र तँ नाङ्गो, चिल्लो चट्टान हुनेछेस्। ५ तँ समुद्रको बीचमा जलारीको जाल सुकाउने ठाउँ हुनेछेस्।’+
“ब्रह्माण्डका मालिक यहोवा घोषणा गर्नुहुन्छ, ‘राष्ट्रहरूले त्यसलाई लुट्नेछन् किनकि म आफैले यसो भनेको हुँ। ६ त्यसका छेउछाउका बस्तीहरूमा* बस्नेहरू तरबारले नाश हुनेछन्। तब म नै यहोवा हुँ भनेर मानिसहरूले जान्नेछन्।’
७ “ब्रह्माण्डका मालिक यहोवा यसो भन्नुहुन्छ: ‘म तँलाई आक्रमण गर्न उत्तरबाट बेबिलोनका राजा नबुकद्नेजरलाई* ल्याउनेछु।+ तिनी राजाहरूका राजा हुन्।+ तिनीसित घोडाहरू,+ युद्धका रथहरू,+ घोडचढीहरू र सिपाहीहरूको* ठूलो दल छ। ८ तिनले छेउछाउका तेरा बस्तीहरूलाई तरबारले नाश गर्नेछन्। तिनले तँलाई घेरा हाल्नेछन्, तेरो वरिपरि घेरा-मचानहरू* बनाउनेछन् र तँविरुद्ध ठूलो ढाल उठाउनेछन्। ९ तिनले बख्तरबन्द गाडीले तेरा पर्खालहरूलाई ढाल्नेछन् र तेरा किल्लाहरू बन्चरोले* हानेर भत्काउनेछन्। १० तिनका यत्ति धेरै घोडा हुनेछन्, ती दौडँदा धुलोको बादलले तँलाई डम्मै ढाक्नेछ। भत्केका पर्खालबाट मान्छेहरू गुटुटु छिरेझैँ ती घोडाहरू तेरा सहरभित्र छिर्नेछन्। तिनका घोडचढीहरू र रथको गडगडाहटले गर्दा तेरा पर्खालहरू थर्थराउनेछन्। ११ तेरा सबै बाटोभरि घोडाको टापको आवाज मात्र सुनिनेछ।+ तेरा बडेमाका खम्बाहरू गर्ल्यामगुर्लुम ढल्नेछन्। तिनले तेरा मानिसहरूलाई तरबारले काट्नेछन्। १२ तिनीहरूले तेरो सम्पत्ति र तेरो व्यापारका मालसामान सबै लुट्नेछन्।+ तिनीहरूले तेरा पर्खालहरू भत्काउनेछन् र तेरा सुन्दर घरहरू तहसनहस पार्नेछन्। तेरा ढुङ्गा र काठका सरसामान र तेरो भूमिको माटो तिनीहरूले समुद्रमा फालिदिनेछन्।’
१३ “‘तेरा गीतहरूको गुञ्जन म बन्द गरिदिनेछु र वीणाको धुन पनि सधैँको लागि बन्द हुनेछ।+ १४ तेरो भूमिमा चट्टानसिवाय अरू केही हुनेछैन। तँ जलारीको जाल सुकाउने ठाउँ हुनेछेस्।+ तँ फेरि कहिल्यै बसालिनेछैनस्। म यहोवाले नै यसो भनेको हुँ,’ ब्रह्माण्डका मालिक यहोवा घोषणा गर्नुहुन्छ।
१५ ब्रह्माण्डका मालिक यहोवा टायरलाई यसो भन्नुहुन्छ: ‘जब तेरो पतन हुनेछ र तेरो बीचमा काटमार मच्चिनेछ अनि मरणासन्न भएकाहरूको रोदन सुनिनेछ, तब टापुहरू डरले थरथर काँप्नेछन्।+ १६ समुद्रका सबै शासक* आफ्नो सिंहासनबाट ओर्लिनेछन् र तिनीहरूले आफ्नो अलखा* र बुट्टेदार वस्त्र उतार्नेछन्। तिनीहरू थरथर काँप्दै भुईँमा थचक्क बस्नेछन् अनि अक्क न बक्क भएर तँलाई हेरिरहनेछन्।+ १७ अनि यसो भन्दै शोकगीत गाउनेछन्:+
“ए सबैको वाहवाही पाएको सहर! समुद्रपारिबाट मानिसहरू तिमीकहाँ आएर बस्ने गर्थे। तर तिम्रो पतन भएको छ;+
समुद्रभरि तिमी र तिम्रा मानिसहरू* कत्ति शक्तिशाली थियौ!+
तिम्रो नाम सुनेर पृथ्वीभरिका मानिसहरू डराउँथे।
१८ तिम्रो पतन भएको दिन टापुहरू थर्थराउनेछन्;
तिम्रो नामोनिसान मेटिँदा समुद्रभरिका टापुहरू त्रसित हुनेछन्।”’+
१९ “ब्रह्माण्डका मालिक यहोवा यसो भन्नुहुन्छ: ‘मानिस नभएका सहरहरूलाई जस्तै म तँलाई उजाड पार्नेछु। समुद्रको उर्लँदो छालले म तँलाई छोप्नेछु र समुद्रले तँलाई निल्नेछ।+ २० अरूलाई जस्तै म तँलाई पनि चिहानमा पुऱ्याउनेछु, त्यस्तो चिहानमा, जहाँ वर्षौँअघि मरेका मानिसहरू छन्। तेरो कहिल्यै आबादी हुनेछैन किनकि म तँलाई गहिरो खाडलमा जाक्नेछु, जहाँ वर्षौँअघि नाश भएका ठाउँहरू छन् अनि जहाँ बाँकी सबै जाकिनेछन्।+ त्यसपछि म जीवितहरूको देशलाई सजाउनेछु।
२१ “‘म तँमाथि अचानक आतङ्क मच्चाउनेछु। त्यसपछि तँलाई कसैले कहिल्यै देख्नेछैन।+ तिनीहरूले तँलाई खोज्नेछन् तर कहिल्यै भेट्टाउनेछैनन्,’ ब्रह्माण्डका मालिक यहोवा घोषणा गर्नुहुन्छ।”