आनन्दित हुन छुट्याइएका विश्वव्यापी प्रशंसकहरू
“परमप्रभुको प्रशंसा गर। हे परमप्रभुका दास हो, प्रशंसा गर। परमप्रभुको नाउँको प्रशंसा गर।”—भजन ११३:१.
१, २. (क) भजन ११३:१-३ अनुरूप तनमनले प्रशंसा गर्न योग्य को हुनुहुन्छ? (ख) कुन प्रश्न सोध्नु उचित छ?
यहोवा परमेश्वर स्वर्ग र पृथ्वीको महान् सृष्टिकर्ता, सदा सर्वदाको ब्रह्माण्डीय सार्वभौम हुनुहुन्छ। उहाँ दिलोज्यानले प्रशंसा गर्न योग्यको हुनुहुन्छ। त्यसैले भजन ११३:१-३ ले हामीलाई यस्तो आज्ञा दिन्छ: “परमप्रभुको प्रशंसा गर। हे परमप्रभुका दास हो, प्रशंसा गर। परमप्रभुको नाउँको प्रशंसा गर। परमप्रभुको नाउँ अहिलेदेखि लिएर सधैंभरि धन्यको भइरहोस्। सूर्योदयदेखि लिएर सूर्यास्तसम्म परमप्रभुको प्रशंसा हुनुपर्छ।”
२ परमेश्वरका साक्षीहरूको हैसियतमा हामी यसो गर्न रमाउँछौं। आज हामीले गाइरहेको यो आनन्ददायी स्तुतिगान यहोवा परमेश्वरले सारा पृथ्वीमा गुञ्जाउनुहुनेछ भनेर थाह पाउनु कत्ति रोमाञ्चक कुरा! (भजन २२:२७) यस विश्वव्यापी गायन टोलीमा के तपाईंको आवाज पनि गुञ्जिंदैछ? यदि त्यसो हो भने, यस गोलमाल र आनन्दरहित संसारबाट अलग हुनु पाएकोमा तपाईं अवश्य पनि खुशी हुनुहुन्छ!
३. (क) कुन कुराले यहोवाका जनहरूलाई भिन्नै र अनुपम बनाउँछ? (ख) कुन कुन तरिकाहरूमा हामीलाई छुट्याइएको छ?
३ एकताबद्ध भएर यहोवाको प्रशंसा गर्दा हामी अवश्यै भिन्न र अनुपम बन्छौं। हामी एउटै कुरा बोल्छौं, सिकाउँछौं र ‘यहोवाका ठूलो भलाइ’ घोषणा गर्न एकै तरिका अपनाउँछौं। (भजन १४५:७) हो, यहोवाका समर्पित जनहरूको हैसियतमा हामीलाई परमेश्वरको सेवा गर्न छुट्याइएको छ। परमेश्वरले आफ्ना पुरातन समर्पित जनहरू अर्थात् इस्राएललाई आफू वरपरका राष्ट्रहरूबाट अलग रहनू र तिनीहरूका प्रचलनहरूबाट प्रदूषित नहुनू भन्नुभयो। (प्रस्थान ३४:१२-१६) त्यसको लागि उहाँले आफ्ना जनहरूलाई व्यवस्थाहरू दिनुभयो। आज पनि त्यसरी नै यहोवाले हामीलाई उहाँको पवित्र वचन, बाइबल दिनुभएको छ। यसमा दिइएका निर्देशनले हामीलाई यस संसारबाट अलग बस्ने बाटो देखाउँछ। (२ कोरिन्थी ६:१७; २ तिमोथी ३:१६, १७) महान् बेबिलोनका भिक्षु तथा भिक्षुणीहरूजस्तो अरूबाट छुट्टिएर गुम्बा र मठहरूमा एकलास जीवन बिताउन हामीलाई छुट्याइएको छैन। हामी त येशू ख्रीष्टको पदचिह्नमा हिंड्ने यहोवाका जन प्रशंसकहरू हौं।
यहोवाको प्रमुख प्रशंसकको अनुकरण गर्नुहोस्
४. यहोवाको प्रशंसा गर्ने सन्दर्भमा येशूले कसरी उदाहरण बसाल्नुभयो?
४ यहोवाको प्रशंसा गर्नदेखि येशू कहिल्यै पछि हट्नुभएन। त्यसैले उहाँ संसारभन्दा अलग हुनुहुन्थ्यो। उहाँले सभाघरहरू र यरूशलेमको मन्दिरमा परमेश्वरको पवित्र नाउँको प्रशंसा गर्नुभयो। पर्वतको टाकुरामा होस् या समुद्रीतटमा, जहाँ मानिसहरू भीड लाग्थे त्यहीं येशूले यहोवाबारे सत्य कुराहरू खुल्लमखुल्ला प्रचार गर्नुभयो। उहाँले घोषणा गर्नुभयो: “हे पिता स्वर्ग र पृथ्वीका परमप्रभु, म [“तपाईंको खुल्लमखुल्ला प्रशंसा गर्छु,” NW]।” (मत्ती ११:२५) पोन्तियस पिलातसअघि पुर्पक्षको समयमा समेत येशूले यसरी प्रमाण पेश गर्नुभयो: “यसैको निम्ति म जन्मेको हुँ, र त्यसैको निम्ति गवाही दिऊँ भनेर म यस संसारमा आएको हुँ।” (यूहन्ना १८:३७) येशूले आफ्नो कामको महत्त्व बुझ्नुभएको थियो। उहाँ जहाँ जानुहुन्थ्यो त्यहीं यहोवाबारे साक्षी दिनुभयो र उहाँको प्रशंसा गर्नुभयो।
५. भजन २२:२२ कोमाथि लागू हुन्छ र त्यसमा हाम्रो मनोवृत्ति कस्तो हुनुपर्छ?
५ यहोवाका यी प्रमुख प्रशंसकबारे भजन २२:२२ मा यस्तो भविष्यसूचक कुरा लेखिएको पाउँछौं: “म आफ्ना दाज्यू-भाइहरूलाई तपाईंको नाउँको वर्णन गर्नेछु। समुदायको बीचमा म तपाईंको प्रशंसा गर्नेछु।” अनि हिब्रू २:११, १२ मा प्रेरित पावलले यी पदहरूलाई प्रभु येशूमा र यहोवा परमेश्वरले स्वर्गीय महिमाको निम्ति पवित्र गर्नुभएका मानिसहरूमा लागू गर्छन्। येशूजस्तै तिनीहरू पनि मण्डलीबीच यहोवाको नाउँको प्रशंसा गर्न लजाउँदैनन्। के हामी मण्डलीका सभाहरूमा त्यसै गर्छौं? हामीले सभाहरूमा जोसिलो भई तनमन लगाउँदा, टिप्पणी दिंदा र गाउँदा यहोवाको प्रशंसा हुन्छ। तर के त्यो आनन्ददायी प्रशंसा हामीले त्यहाँ मात्र गर्ने हो कि?
६. येशूले आफ्ना चेलाहरूलाई के आज्ञा दिनुभयो र कसरी ज्योतिका प्रेमीहरूले परमेश्वरको महिमा गर्छन्?
६ मत्ती ५:१४-१६ अनुसार येशूले अनुयायीहरूलाई ज्योति चम्काउन पनि अह्राउनुभयो ताकि अरूले यहोवाको प्रशंसा गरून्। उहाँले यसो भन्नुभयो: “तिमीहरू जगत्का ज्योति हौ। . . . तिमीहरूको ज्योति मानिसहरूका सामु चम्कोस्, र तिनीहरूले तिमीहरूका सुकर्म देखून्, र स्वर्गमा हुनुहुने तिमीहरूका पिताको महिमा गरून्।” ज्योतिका प्रेमीहरू परमेश्वरको महिमा गर्छन्। के तिनीहरूले असल तथा परोपकारी कुरा बोलेर र गरेर मात्र यसो गर्छन्? अहँ होइन। तिनीहरू एकताबद्ध भई यहोवाको महिमा गरेर त्यसो गर्छन्। हो, ज्योतिका प्रेमीहरू परमेश्वरमा समर्पित भएर उहाँका आनन्दित प्रशंसकहरू हुन्छन्। के तपाईंले यो प्रसन्नदायी कदम चाल्नुभएको छ?
यहोवाको प्रशंसा गर्नमा आनन्द
७. यहोवाका प्रशंसकहरू किन यति बिघ्न आनन्दित छन् र सा.यु. ३३ पेन्तिकोसको दिन तिनीहरूले कस्तो आनन्द पाए?
७ यहोवाका प्रशंसकहरू किन यति बिघ्न आनन्दित? किनकि आनन्द भनेको परमेश्वरको पवित्र आत्माको फल हो। गलाती ५:२२ मा यसलाई प्रेमको पछि सूचिबद्ध गरिएको छ। येशूको प्रथम शताब्दीका चेलाहरूले यहोवाको आत्माको यस फललाई प्रदर्शित गरे। त्यसैले, सा.यु. ३३ पेन्तिकोसको दिन परमेश्वरले येशूका लगभग १२० चेलाहरूमाथि पवित्र आत्मा खन्याउनुहुँदा तिनीहरू सबैले विभिन्न भाषामा यहोवाको प्रशंसा गरे। थुप्रै राष्ट्रबाट यरूशलेम आएका श्रद्धालु यहूदीहरू ‘अकमक्क र छक्क’ परे। तिनीहरूले यसरी आश्चर्य प्रकट गरे: “तिनीहरूले हाम्रा भाषामा परमेश्वरका महाकार्यहरूका विषयमा बोलिरहेका हामी सुन्छौं”! (प्रेरित २:१-११) यसरी अनेकन् भाषामा यहोवाको अद्भुत प्रशंसा भएपछि के भयो? जन्मजात यहूदी र धर्म परिवर्तन गरी यहूदी बनेकाहरू गरेर करिब ३,००० जतिले मसीहसम्बन्धी राज्य सुसमाचार ग्रहण गरे। तिनीहरूले बप्तिस्मा लिए, पवित्र आत्मा पाए र उत्साहसाथ यहोवाका आनन्दित प्रशंसकहरूको हैसियतमा उहाँको जयजयकार गर्न थाले। (प्रेरित २:३७-४२) आहा, साँच्चै कस्तो महान् आशिष्!
८. पेन्तिकोसपछि मसीहीहरूले आफ्नो आनन्दलाई बढाउन के गरे?
८ रिपोर्ट अझ बताउँछ: “दिनहुँ एकै मनका भई एकोहोरो मन्दिरमा धाएर, औ आफ्ना आफ्ना घरमा रोटी भाँचेर, तिनीहरू हर्ष र शुद्ध हृदयसाथ सम्मिलित रूपमा भोजन गर्थे, परमेश्वरको स्तुति गर्दै, र सबै मानिसहरूबाट शुभेच्छा पाउँदै बस्थे। उद्धार पाउनेहरूलाई प्रभुले दिनदिनै तिनीहरूमा बढ्ती गराउनुहुन्थ्यो।” (प्रेरित २:४६, ४७) के तिनीहरू जमघट हुन र खान पाएकोले मात्र रमाएका हुन्? होइन, तिनीहरू रमाउनुको मुख्य कारण त दिनहुँ यहोवा परमेश्वरको प्रशंसा गरेर हो। अनि तिनीहरूले सुनाउने मुक्तिको सन्देश हजारौं मानिसहरूले स्वीकार्दा तिनीहरूको त्यो रमाहट झन् बढ्यो। आज हामीलाई पनि त्यस्तै हुन्छ।
सारा राष्ट्रमा आनन्दित प्रशंसकहरू
९. (क) परमेश्वरले सारा राष्ट्रका मानिसहरूलाई कहिलेदेखि र कसरी उहाँको सुसमाचार सुन्ने अवसर दिन सुरु गर्नुभयो? (ख) कर्निलियस र तिनका सँगीहरूमाथि बप्तिस्माअघि नै किन पवित्र आत्मा खन्याइयो?
९ यहोवा, आफ्ना सेवकहरूको त्यो ज्योतिवाहन क्रियाकलाप एउटा राष्ट्रमा मात्र सीमित भएको चाहनुहुन्न थियो। तसर्थ, सा.यु. ३६ देखि उहाँले सबै जातिका मानिसहरूलाई उहाँको सुसमाचार सुन्ने अवसर दिनुभयो। परमेश्वरको निर्देशनअनुसार पत्रुस सिजरियामा बस्ने एक अन्यजाति सैनिक कप्तानको घरमा गए। त्यहाँ तिनले कर्निलियसलाई तिनका घनिष्ठ मित्रवर्ग र परिवारसित जमघट गरिरहेको भेटाए। तिनीहरूले पत्रुसका कुरा ध्यानपूर्वक सुने र हृदयबाटै येशूलाई विश्वास गरे। हामी त्यो कसरी भन्नसक्छौं? किनभने परमेश्वरको पवित्र आत्मा ती अन्यजाति विश्वासीहरूमाथि खन्याइयो। साधारणतया, परमेश्वरको आत्माको वरदान बप्तिस्मा पछि मात्र दिइन्थ्यो तर यस पटक भने यहोवाले पवित्र आत्मा खन्याउनुभएर यी गैरयहूदीहरूलाई बप्तिस्माअघि नै अनुमोदन गर्नुभएको संकेत दिनुभयो। यदि यहोवाले त्यसो नगर्नुभएको भए, अन्यजातिहरू परमेश्वरद्वारा स्वीकृत भएको र पानीमा बप्तिस्मा लिन योग्य मानिएको कुरा पत्रुसले थाह पाउन सक्नेथिएनन्।—प्रेरित १०:३४, ३५, ४७, ४८.
१०. सारा राष्ट्रका मानिसहरूले यहोवाको प्रशंसा गर्नेछन् भनेर पुरातन समयदेखि कसरी अगमवाणी गरिएको थियो?
१० सम्पूर्ण राष्ट्रका मानिसहरूले यहोवाको प्रशंसा गर्नेछन् भनेर उहाँले पुरातन समयदेखि अगमवाणी गर्नुभएको थियो। सबै मुलुकमा उहाँको आनन्दित प्रशंसकहरू हुनेथिए। यस कुरालाई प्रमाणित गर्न प्रेरित पावलले हिब्रू धर्मशास्त्रबाट भविष्यवाणीहरू उद्धृत गरे। तिनले रोमको अन्तरराष्ट्रिय मसीही मण्डलीलाई यसो भने: “परमेश्वरको महिमाको निम्ति ख्रीष्टले हामीलाई सत्कार गर्नुभएबमोजिम, तिमीहरूले पनि एउटाले अर्कोलाई सत्कार गर। किनकि म भन्दछु, पिता-पुर्खाहरूलाई दिइएका प्रतिज्ञा पुष्टि गर्नालाई परमेश्वरको सत्यताको निम्ति ख्रीष्ट खतनाका सेवक हुनुभएको छ। औ अन्यजातिहरूले उहाँको कृपाको निम्ति परमेश्वरको महिमा गरून्। जस्तो [भजन १८:४९ मा] लेखिएको छ: ‘यसैकारण म अन्यजातिहरूका बीचमा तपाईंलाई प्रशंसा गर्नेछु, औ तपाईंको नाउँको भजन गाउनेछु।’ औ फेरि उनी [व्यवस्था ३२:४३ मा] भन्छन्: ‘ए अन्यजाति हो, उहाँको प्रजासित आनन्द गर।’ औ फेरि [भजन ११७:१ मा]: ‘ए सबै अन्यजाति हो, प्रभुको प्रशंसा गर, औ सबै मानिसहरूले उहाँको प्रशंसा गरून्।’ ”—रोमी १५:७-११.
११. परमेश्वरले मानिसहरूलाई सत्य सिक्न कसरी मदत गर्नुभएको छ र त्यसको परिणाम के भएको छ?
११ परमेश्वरले जाति जातिमाथि शासन गर्न नियुक्त गर्नुभएको येशू ख्रीष्टलाई मानिसहरूले विश्वास नगरूञ्जेल एकताबद्ध भएर यहोवाको प्रशंसा गर्न सक्दैनन्। परमेश्वरले तिनीहरूलाई अनन्त जीवनतर्फ डोऱ्याउने सत्य बुझाउन अन्तरराष्ट्रिय शैक्षिक कार्यक्रमको प्रबन्ध गर्नुभएको छ। उहाँले आफ्ना विश्वासी दासवर्ग मार्फत निर्देशन दिइरहनुभएको छ। (मत्ती २४:४५-४७) परिणाम? लगभग २३० भन्दा बढी मुलुकहरूमा ५० लाखभन्दा पनि धेरै आनन्दित मानिसहरूले यहोवाको प्रशंसा गाइरहेका छन्। अनि अझ लाखौंले त्यसै गर्ने चासो देखाइरहेका छन्। हेर्नुहोस् त १९९६ को स्मरणार्थमा कति उपस्थित भए: १,२९,२१,९३३। अद्भुत उपस्थिति होइन र!
आनन्दित प्रशंसकहरूको ठूलो भीड हुनेछन् भनी अगमवाणी भइसक्यो
१२. कुन रोमाञ्चक दर्शन प्रेरित यूहन्नाले देखे र त्यो कसरी पूरा भएको छ?
१२ प्रेरित यूहन्नाले दर्शनमा सबै जातिबाटको “ठूलो भीड” देखे। (प्रकाश ७:९) यस ठूलो भीडले परमेश्वरका शेष अभिषिक्त जनहरूसँगसँगै गाइरहेको प्रशंसाको विषय के हो? यूहन्ना बताउँछन्: “सिंहासनमा विराजमान हुनुहुने हाम्रा परमेश्वर र थुमामा मुक्ति छ।” (प्रकाश ७:१०) यही कुरा त आज संसारको कुनाकाप्चामा जोडतोडले घोषणा गरिंदैछ। भनौं भने, एक अर्थमा हामी खजूरको हाँगा हल्लाएर परमेश्वरलाई ब्रह्माण्डीय सार्वभौमको रूपमा एकसाथ जयजयकार गर्छौं र हाम्रो मुक्तिको लागि उहाँ र उहाँको पुत्र अर्थात् थुमा, येशू ख्रीष्टमा ‘ऋणी छौं’ भनेर स्वर्ग अनि पृथ्वीअघि आनन्दित हृदयले स्वीकार्छौं। आहा, यो ठूलो भीडको रोमाञ्चक दर्शन देखेर प्रेरित यूहन्ना कत्ति रोमाञ्चित भए होलान्! अनि यूहन्नाले देखेको दर्शन आज पूरा भएको देख्दा र त्यसको भाग समेत हुन पाउँदा हामी कत्ति रोमाञ्चित छौं!
१३. कुन कुराले गर्दा यहोवाका जनहरू संसारभन्दा अलग छन्?
१३ यहोवाका सेवकहरूको हैसियतमा हामी उहाँको नाउँ धारण गर्न गर्व गर्छौं। (यशैया ४३:१०, १२) हामी यहोवाका साक्षीहरू भएकोले यस संसारभन्दा बेग्लै छौं। परमेश्वरको विशिष्ट नाउँ धारण गर्नु र ईश्वरीय कार्यलाई नै आफ्नो जीवनको लक्ष्य बनाउन पाउनु कति आनन्ददायी! आफ्नो राज्य मार्फत आफ्नो पवित्र नाउँलाई पवित्र पार्ने र ब्रह्माण्डीय सार्वभौमिकतालाई उच्च पार्ने यहोवाको महान् उद्देश्यले हाम्रो जीवनलाई अर्थपूर्ण बनाएको छ। अनि उहाँको नाउँ तथा राज्यसम्बन्धी उद्देश्यमा हामीलाई सहभागी बनाउन उहाँले मदत गर्नुभएको छ। उहाँले यो तीन तरिकामा गर्नुभएको छ।
सत्य सुम्पनुभयो
१४, १५. (क) परमेश्वरले आफ्नो नाउँ र राज्यसम्बन्धी उद्देश्यमा सहभागी हुन हामीलाई मदत गर्नुहुने एउटा तरिका के हो? (ख) सा.यु.पू. ६०७ मा सत्ता पल्टिएको राज्यभन्दा सा.यु. १९१४ मा स्थापित राज्य कसरी बेग्लै हो?
१४ प्रथमतः, यहोवाले आफ्ना जनहरूलाई सत्य सुम्पनुभएको छ। सबैभन्दा रोमाञ्चक प्रकटीकरण त के हो भने, उहाँको राज्यले सन् १९१४ मा शासन सुरु गऱ्यो। (प्रकाश १२:१०) यो स्वर्गीय सरकार यरूशलेमको वास्तविक राज्यभन्दा बेग्लै हो। यरूशलेमको त्यस राज्यमा दाऊदको वंशबाट राजाहरू नियुक्त गरिन्थे। त्यस राज्यको सत्ता पल्टियो र सा.यु.पू. ६०७ देखि यरूशलेम पूर्णतया अन्यजातिहरूको हातमा पऱ्यो। तर, यहोवाले सन् १९१४ मा स्थापना गर्नुभएको नयाँ राज्य स्वर्गीय शक्ति हो र यहोवाबाहेक त्यो कसैको हातमा कहिल्यै सुम्पिनेछैन, नता नाश नै हुनेछ। (दानियल २:४४) त्यति मात्र होइन, यसको शासन पनि बेग्लै प्रकारको हुन्छ। कसरी? प्रकाश ११:१५ ले यसरी जवाफ दिन्छ: “त्यसपछि स्वर्गमा यसो भन्ने ठूला ठूला आवाज भए: ‘पृथ्वीको राज्य हाम्रा प्रभुको र उहाँका ख्रीष्टको राज्य भएको छ, उहाँले सदा सर्वदा राज्य गर्नुहुनेछ।’ ”
१५ “हाम्रा प्रभुको र उहाँका ख्रीष्टको राज्यले” सम्पूर्ण मानिसजातिमाथि अख्तियार जमाउँछ। यहोवाको सार्वभौमिकतामा उहाँका मसीह पुत्र येशू र येशूका १,४४,००० भाइहरू मुछिएका छन् अनि तीमध्ये अधिकांश स्वर्गीय महिमामा अहिले पुनरुत्थान भइसकेका छन्। यस्तो सार्वभौमिकताको नयाँ अभिव्यक्ति विद्यार्थीहरूलाई छलफल गर्न मनपर्ने खालको चासोपूर्ण सैद्धान्तिक कुरा मात्र होइन। हो, यो स्वर्गीय राज्य वास्तविक सरकार हो। अनि यस राज्यले शासन गरेपछि सिद्धतामा सधैंभरि बाँच्ने आनन्ददायी मौका हामीले पाउने भएकोले रमाइरहनसक्ने प्रशस्त कारण छ। यहोवाको वचनबारे त्यस्तो सत्य सुम्पिएकोले हामी सधैं यसको प्रशंसा गर्न उत्प्रेरित हुन्छौं। (भजन ५६:१०) परमेश्वरको मसीह राज्यले स्वर्गमा अहिले शासन गर्दैछ भन्ने कुरा सबैलाई बताएर के तपाईंले यसो गरिरहनुभएको छ त?
पवित्र आत्मा र विश्वव्यापी भ्रातृत्वद्वारा मदत
१६, १७. परमेश्वरले आफ्नो ईश्वरीय उद्देश्यमा सहभागी गराउन हामीलाई मदत गर्नुहुने दोस्रो र तेस्रो तरिकाहरू के के हुन्?
१६ परमेश्वरले हामीलाई ईश्वरीय उद्देश्यको सहभागी हुन मदत दिनुहुने दोस्रो तरिका पवित्र आत्मा हो। त्यस पवित्र आत्माले हामीलाई आफ्नो जीवनमा मूल्यवान् फल फलाउन र परमेश्वरको अनुमोदन प्राप्त गर्न सक्षम बनाउँछ। (गलाती ५:२२, २३) त्यसबाहेक, पावलले अभिषिक्त मसीहीहरूलाई यसो लेखे: “परमेश्वरबाट हामीलाई सित्तैंमा दिनुभएको कुरा जानौं भनेर हामीले . . . परमेश्वरबाटका आत्मा पाएका छौं।” (१ कोरिन्थी २:१२) हामी प्रत्येकले परमेश्वरको आत्मा पाएर अहिले उहाँले हामीलाई कृपागरि दिनुभएका असल कुराहरू अर्थात् उहाँका प्रतिज्ञा, व्यवस्था, सिद्धान्त र अरू त्यस्तै कुराहरू थाह पाउन र बुझ्नसक्छौं।—मत्ती १३:११ तुलना गर्नुहोस्।
१७ परमेश्वरले हामीलाई मदत गरिरहनुभएको तेस्रो तरिका हो, हामीले विश्वव्यापी भ्रातृत्व र उपासनाको लागि आनन्ददायी संगठनात्मक प्रबन्ध पाएका छौं। प्रेरित पत्रुसले “भाइ-बन्धुहरूलाई प्रेम गर” भनेर बताउँदा त्यही संगठनात्मक प्रबन्धको कुरा गर्दैथिए। (१ पत्रुस २:१७) हाम्रा मायालु भाइबहिनीहरूको अन्तरराष्ट्रिय पारिवारिक बन्धनले हामीलाई भजन १००:२ मा आज्ञा दिएझैं आन्तरिक हृदयदेखि रमाउँदै यहोवाको सेवा गर्न मदत दिन्छ: “आनन्दसाथ परमप्रभुको सेवा गर, भजन गाएर उहाँको सामने आओ।” पद ४ ले अझ यसो भन्छ: “धन्यवादसाथ उहाँका मूल-ढोकाभित्र, र प्रशंसा गर्दै उहाँका चोकभित्र पस। उहाँलाई धन्यवाद चढाओ, र उहाँको नाउँलाई धन्यको भन।” त्यसैले, खुल्लमखुल्ला प्रचार गर्दा होस् या सभाहरू धाउँदा, हामी आनन्दको अनुभव गर्नसक्छौं। यहोवाको आध्यात्मिक मन्दिरका सुन्दर चोकहरूमा हामीले कस्तो शान्ति र सुरक्षा पाएका छौं!
रमाउँदै यहोवाको प्रशंसा गर्नुहोस्!
१८. सतावट वा अरू समस्याहरूले घेरिएको भए तापनि हामी यहोवाको प्रशंसा गर्दा किन रमाउनसक्छौं?
१८ जस्तोसुकै कठिन परिस्थिति, सतावट वा अरू समस्याहरूले घेरेको किन नहोस् हामी यहोवाको उपासनाको भवनमा भएको हुनाले रमाऔं। (यशैया २:२, ३) स्मरण रहोस्, रमाउनु हृदयको गुन हो। हाम्रा प्रारम्भिक मसीही भाइबहिनीहरूले थुप्रै कठिनाइ र नोक्सानी सहनुपरेका थिए, तैपनि तिनीहरूले रमाउँदै यहोवाको प्रशंसा गरे। (हिब्रू १०:३४) आजका हाम्रा सँगी विश्वासीहरू पनि तिनीहरूजस्तै छन्।—मत्ती ५:१०-१२.
१९. (क) कुन आग्रहहरूले हामीलाई यहोवाको प्रशंसा गर्न घरिघरि झकझकाउँछन्? (ख) हाम्रो अनन्त जीवन कुन कुरामा निर्भर छ र हाम्रो संकल्प के हो?
१९ यहोवाको सेवा गर्ने हामी सबै जना बाइबलका आदेशहरू पालन गर्दै उहाँको प्रशंसा गर्न रमाउँछौं। प्रकाशको पुस्तकले “हल्लेलूयाह” भन्ने अभिव्यक्तिद्वारा परमेश्वरको प्रशंसा गर्न बीचबीचमा जोड दिएको छ। (प्रकाश १९:१-६) भजन १५० को छ पदहरूमा यहोवाको प्रशंसा गर्न १३ पटक भनिएको छ। रमाउँदै यहोवाको प्रशंसा गर्ने यो आग्रह ब्रह्माण्डको सबै सृष्टिलाई गरिएको हो। यस महान् हल्लेलूयाहको गानमा सामेल हुनुमा नै हाम्रो अनन्त जीवन निर्भर छ! हो, निरन्तर परमेश्वरको प्रशंसा गर्नेहरू मात्र सधैंभरि बाँच्नेछन्। तसर्थ, अन्त नजीक भएकोले हामी विश्वव्यापी वफादार मण्डलीसित घनिष्ठ सम्बन्ध राख्न कटिबद्ध छौं। अनि मात्र हामी भजन १५० का यी अन्तिम शब्दहरू एक एकगरि पूरा भएको देख्ने आशा गर्नसक्छौं: “सास हुने जति सबैले, परमप्रभुको प्रशंसा गर। परमप्रभुको प्रशंसा गर!”
तपाईं कसरी जवाफ दिनुहुन्छ?
◻ कुन कुराले यहोवाका जनहरूलाई भिन्नै र अनुपम बनाउँछ?
◻ यहोवाका जनहरू किन यति बिघ्न आनन्दित छन्?
◻ कुन कुराले गर्दा हामी संसारभन्दा अलग छौं?
◻ कुन तीन तरिकाद्वारा परमेश्वरले आफ्नो नाउँ र राज्यसम्बन्धी ईश्वरीय उद्देश्यमा सहभागी हुन हामीलाई मदत दिनुहुन्छ?
[पृष्ठ १७-मा भएको चित्र]
येशूले जहाँ पनि यहोवाबारे साक्षी दिनुभयो र खुल्लमखुल्ला उहाँको प्रशंसा गर्नुभयो