बाइबलका विद्यार्थीहरूलाई परमेश्वरको सङ्गठनसित सङ्गत गर्ने मदत दिन
१ एकाग्रता साथ यहोवाको इच्छा गर्ने उहाँको एक मात्र सङ्गठन छ र यसले आफूलाई संसारको धार्मिक, राजनैतिक र व्यापारिक सङ्गठनहरूबाट सम्पूर्णतया अलग पारेको छ। बाइबललाई राम्ररी बुझ्ने र परमेश्वरका उद्देश्यहरूबारे सही अन्तरदृष्टि प्राप्त गर्ने महत्त्वपूर्ण काम यस सङ्गठनले गरिरहेको छ। तर यति मात्र होइन। प्रत्येक विद्यार्थीलाई यहोवा परमेश्वरको पार्थिव सङ्गठनतिर निर्देशित गर्नु र यस सङ्गठनद्वारा गरिने काम बुझ्ने मदत दिनु पनि सो सङ्गठनको जिम्मेवारी हो।
२ तथापि मसीही धर्मसित अपरिचित भएका र कुनै पनि “सङ्गठन”-मा सम्मिलित हुनु एउटा ठूलो बोझ र जिम्मेवारी हो भनी ठान्ने मानिसहरूलाई परमेश्वरको सङ्गठनबारे सिकाउनु सजिलो छैन। यसबाहेक थुप्रै मानिसहरूले यहोवाका साक्षीहरू पनि अन्य नयाँ धार्मिक सम्प्रदायहरू जस्तै हुन् भनी ठान्दछन् र रगतको विषय लगायत साक्षीहरूको अनेक शिक्षाहरूबारे पूर्वाग्रह राख्छन्। यसले गर्दा यहोवाको सङ्गठनबारे अरूलाई बताउन कुनै कुनै प्रकाशकहरूलाई गाह्रो हुन सक्छ। अतः सङ्गठनबारे तिनीहरूले धेरै कुरा गरे तापनि त्यसमा कुनै दम हुँदैन। परिणामस्वरूप बाइबल विद्यार्थी सभाहरूमा आउँदै आउँदैनन् नता कुनै ठोस कदम नै चाल्छन्।
३ विद्यार्थीको प्रगति र पृष्ठभूमिलाई विचार गर्नुहोस्: बाइबल विद्यार्थीहरू मध्ये धेरै यस्ता छन् जसले बाइबल र मसीही धर्ममा भन्दा बच्चाहरूको प्रशिक्षण र पारिवारिक जीवनमा चासो राखेको हुनाकारण गृह बाइबल अध्ययन गर्न तयार भएका थिए। अब यस्ता व्यक्तिहरूसित इस्राएली जातिको इतिहास भएको यहोवाका साक्षीहरू—परमेश्वरको इच्छा भन्ने ब्रोश्यर एक्कासि पढ्न थालेर राम्रो नतिजाको आशा राख्नु व्यावहारिक हुँदैन। बरु यस्तो परिस्थितिमा मानवजातिले सुखी पारिवारिक जीवनको आनन्द उठाउन सकोस् भन्ने उद्देश्य राखेर मानवजातिको सृष्टि गर्ने परमेश्वरबारे सिकाउन सकिन्छ। साथै मानवजातिका लागि “मार्ग दर्शक”-को रूपमा यहोवाले दिनु भएको पुस्तक बाइबल हो भनेर बताउन सुरुमा नै केही समय बिताउनु बढी प्रभावशाली हुन सक्छ। अर्कोतिर, मसीहीजगतका प्रायः सबै जना हाल वा बितेको समयमा कुनै न कुनै गिर्जाको सदस्य भएका हुन्छन्। यी मानिसहरू यहोवाका साक्षीहरूको सङ्गठनलाई आफ्नो गिर्जासित तुलना गरेर कुन चाहिं सङ्गठन प्रथम शताब्दीको मसीही मण्डलीसित सबैभन्दा बढी मिल्दो छ, सो पता लगाउन सक्ने अवस्थामा हुन्छन्।
४ अतः विद्यार्थीको धार्मिक पृष्ठभूमिलाई ध्यानमा राखेर यहोवाका साक्षीहरू—परमेश्वरको इच्छा ब्रोश्यर सुरु देखि नै प्रयोग गर्ने हो कि गृह बाइबल अध्ययन केही समयसम्म चलि सके पछि मात्र त्यसलाई पढ्न थाल्ने हो, सो फैसला अध्ययन सञ्चालकले गर्न सक्ने छन्।
५ अथवा तपाईंले जेहोवास विटनेसेस् इन द ट्वेन्टीयथ सेन्च्युरी ब्रोश्यर अथवा रिजनिङ्ग पुस्तकमा “यहोवाका साक्षीहरू” शीर्षक अन्तर्गत दिएको विषयवस्तुलाई प्रयोग गर्न चाहनु होला। आफ्नो विद्यार्थीलाई मदत दिनु होस् ताकि यहोवाका साक्षीहरूको गतिविधि बाइबलसम्बन्धी विश्वव्यापी शैक्षिक कार्य हो र बाइबलबारे शुद्ध ज्ञान लिन मानिसहरूलाई मदत दिने तिनीहरू मात्र एउटा समूह हुन् भनेर तपाईंको विद्यार्थीले विश्वस्तता साथ अरूलाई भन्न सकून्।
६ यसपछि विभिन्न सभा र सम्मेलनहरूको उद्देश्य, विषयसामग्री र उपस्थित हुनेहरूले उठाउन सक्ने लाभ इत्यादि सजिलैसित बुझ्ने भाषामा विद्यार्थीलाई बताउने प्रयास गर्नुहोस्। विद्यार्थीले हाल सिकिरहेका कुराहरू परमेश्वरको वचनमा आधारित सच्चाइ हो र यसलाई सांसारिक पुस्तकहरूबाट हासिल गर्न सकिन्दैन। अतः हाम्रा सभाहरू पनि बाइबलमा चासो लिने मानिसहरूका लागि यहोवा परमेश्वरको तर्फबाट बाइबल सम्बन्धी एउटा विशेष शैक्षिक कार्यक्रम हो। यसकारण सभाहरूमा छलफल गरिने विषयवस्तुलाई एक पटक सरसरती पढेर मात्र पुग्दैन। बरु सभाहरूलाई विभिन्न दृष्टिकोणबाट विचार गर्नु आवश्यक छ। जस्तो कि त्यहाँ भेला हुने मानिसहरू र त्यहाँबाट उठाउन सकिने लाभहरू। तपाईंले अझसम्म सिक्नु र अनुभव गर्नु भएका कुराहरूमा आधारित उत्साहवर्धक छलफलहरू गर्नुहोस्।
७ दृश्य आकर्षण: विद्यार्थीको ध्यानलाई ब्रोश्यर र पत्रिकाहरूका चित्रहरूतिर आकर्षित गराउनु होस्। तपाईंले भन्न खोज्नु भएको कुराको गहिरो प्रभाव छाडने कोसिस गर्नुहोस्। चित्रहरू देख्दा विद्यार्थीको मनमा जे जस्तै विचार उत्पन्न भए तापनि त्यसलाई व्यक्त गर्ने प्रोत्साहन दिनु होस्। यहोवाको सङ्गठनतर्फ धेरै मानिसहरूलाई निर्देशित गर्न सकेका थुप्रै फलदायक प्रकाशकहरूले यस कामका लागि आफैले बनाएका एल्बमहरू प्रयोग गर्छन्।
८ विद्यार्थीले व्यक्तिगत रूपमा यहोवाका मानिसहरूलाई देख्न पाउने प्रबन्ध सकेसम्म चाँडो मिलाउनु होस्। राज्य सभा-गृह र सम्मेलनहरूमा यहोवाका मानिसहरूसित सम्पर्क राख्ने मौका उनलाई दिनुहोस्। यहोवाका मानिसहरू साधारण मानिसहरू हुन् तर तिनीहरूले बाइबलमा विश्वास गर्छन् र यहोवाका मार्गहरूको मोल गर्दै हिंड्छन् भनेर उनलाई बुझ्ने मदत दिनुहोस्। यसबाहेक सभा नचलेको बेलामा उनलाई राज्य सभा-गृह देखाउन र यो कुन प्रकारको ठाउँ हो भनी बताउन पनि निकै नै प्रभावशाली हुन सक्छ। सम्भवतः उनलाई बेथेल भ्रमण गर्न जाने प्रोत्साहन पनि दिनु होस्।
९ यसका साथै, अध्ययन गर्ने बेलामा तपाईंले आफूसित उचित साथि लगेर जान सक्नुहुन्छ र यहोवाका मानिसहरूले अनुभव गरेको आनन्दबारे तिनीहरूलाई कुरा गर्न लाउन सक्नुहुन्छ। उदाहरणका लागि, यहोवाको सङ्गठनले प्रदान गर्ने शैक्षिक कार्यक्रमबाट पाएको मदतबारे एक जना जवान प्रकाशकलाई कुरा गर्न लाउन सक्नुहुन्छ। मसीही परिवारको एउटा सिरलाई उनी साक्षी भएपछि पिता र पतिको हैसियतमा गर्नु परेको परिवर्तनहरू बारे कुरा गर्न लाउनु भयो भने विद्यार्थीले यहोवाका साक्षीहरू र तिनीहरूको सङ्गठनसित अझ बढी घनिष्ठता महसुस गर्नेछन्।
१० पहिलादेखि गर्दै आएको जस्तैगरी अध्ययनअघि वा पछि रमाइलो ढङ्गमा १०-१५ मिनेट विद्यार्थीलाई यहोवाको सङ्गठनको मोटामोटी ज्ञान लिने मदत दिन बिताउनु होस्। यसबाहेक, विद्यार्थीलाई यहोवाको सङ्गठन देख्ने र त्यस्को मर्म बुझ्ने थुप्रै मौका दिन विभिन्न अवसरहरूको प्रयोग गर्नुहोस्। तपाईंले यी सबै कुरा गर्नु भयो भने विद्यार्थीले यहोवाको पार्थिव सङ्गठनलाई चिन्नेछन्, त्यस्का गतिविधिहरूलाई बुझ्ने छन् र उनी हामीसित मिलेर परमेश्वरको एक जना प्रशंसक हुनेछन्।