पाठ ६९
गब्रिएल मरियमलाई भेट्छन्
इलिसिबाको मरियम भन्ने एउटी जवान नातेदार थिइन्। तिनी गालिलको नासरत सहरमा बस्थिन्। तिनको सिकर्मी युसुफसँग मगनी भएको थियो। इलिसिबा गर्भवती भएको छैटौँ महिनामा गब्रिएल मरियमकहाँ देखा परे र भने: ‘तिमीलाई मेरो अभिवादन! तिमीले यहोवाको निगाह पाएकी छ्यौ।’ गब्रिएलको कुरा तिनले बुझिनन्। गब्रिएलले तिनलाई भने: ‘तिमी गर्भवती हुनेछ्यौ र छोरा जन्माउनेछ्यौ। तिमीले उहाँको नाम येसु राख्नू। उहाँ राजा हुनुहुनेछ र उहाँको राज्यको अन्त कहिल्यै हुनेछैन।’
मरियमले भनिन्: ‘म त कुमारी नै छु। मैले कसरी बच्चा जन्माउन सक्छु र?’ गब्रिएलले भने: ‘परमेश्वरको लागि केही असम्भव छैन। पवित्र शक्ति तिमीमाथि आउनेछ र तिमीले छोरा जन्माउनेछ्यौ। तिम्री नातेदार इलिसिबा पनि गर्भवती छिन्।’ मरियमले भनिन्: ‘म यहोवाकी दासी हुँ! तपाईँले भन्नुभएअनुसारै होस्।’
मरियम इलिसिबालाई भेट्न पहाडी इलाकामा पर्ने सहर गइन्। तिनले उनलाई अभिवादन गर्दा उनको गर्भको शिशु उफ्रियो। उनले पवित्र शक्तिले भरिएर भनिन्: ‘मरियम तिमीलाई यहोवाले आशिष् दिनुभएको छ। मेरा प्रभुकी आमा मकहाँ आउनु कत्ति ठूलो सम्मान!’ तिनले भनिन्: ‘म सारा हृदयले यहोवाको प्रशंसा गर्छु।’ तिनी तीन महिना इलिसिबासित बसेर नासरत फर्किन्।
मरियम गर्भवती भएको थाह पाएपछि युसुफले तिनीसित सम्बन्धविच्छेद गर्ने निधो गरे। तर एक स्वर्गदूत सपनामा उनीकहाँ आएर भने: ‘मरियमसित बिहे गर्न नडराऊ! किनभने तिनले कुनै गल्ती गरेकी छैनन्।’ त्यसैले युसुफले मरियमलाई पत्नी स्विकारेर घरमा ल्याए।
“आकाशमा, पृथ्वीमा . . . यहोवा आफूलाई जे उचित लाग्छ, त्यही गर्नुहुन्छ।”—भजन १३५:६