तिनीहरू आनन्दित प्रशंसकहरूको हैसियतमा भेला भए
परमेश्वरका पुरातन जनहरू उपासना गर्न भेला हुँदा तिनीहरूलाई “औधी हर्षित” हुने आज्ञा दिइएको थियो। (व्यवस्था १६:१५) निस्सन्देह, सन् १९९५/९६ को “आनन्दित प्रशंसकहरू” जिल्ला अधिवेशनहरूले यहोवाका साक्षीहरूलाई आनन्दित हुने कारण प्रदान गरेको छ।
यी अधिवेशनहरूको श्रृंखला सुरु भएदेखि त्यसले विश्वास बढाएको छ। त्यसले आनन्दरहित संसारमा आनन्द पाउने तरिका पनि देखाएको छ। आउनुहोस्, अधिवेशनका दिनहरू एक एक गरेर विचार गरौं।
‘परमप्रभुको प्रशंसा गर, . . . आनन्दित होऊ!’
अधिवेशनको प्रथम दिनको माथि उल्लिखित मुख्य विषय भजन १४९:१, २ मा आधारित थियो। “हामीसित आनन्दित हुने कारण छ” नामक भाषणले यशैया अध्याय ३५ को भविष्यवाणीको पूर्तिलाई केलायो। यसको पूर्ति पुरातन इस्राएलमा र विशेषगरि हाम्रो समयमा भयो जब यहोवाका उपासकहरू संवृद्ध तथा स्वस्थ भएर आध्यात्मिक प्रमोदवनमा पुनःस्थापित भए। तसर्थ, परमेश्वरले आफ्ना जनहरूलाई आध्यात्मिक प्रमोदवनका साथै निकट भविष्यको वास्तविक प्रमोदवनमा प्रदान गर्नुहुने कुराहरूले गर्दा अधिवेशनमा उपस्थित सबैसित आनन्दित हुने कारण थियो।
“विश्वव्यापी आनन्दित प्रशंसकहरूको हैसियतमा अलग पारिएकाहरू” शीर्षक भएको मुख्य भाषणले यस प्रश्नको जवाफ दियो: हामी कुन कुराले गर्दा संसारबाट अलग छौं? यो यहोवाको एकताबद्ध उपासना हो। यहोवाका साक्षीहरू पृथ्वीमा जहाँसुकै भए तापनि तिनीहरूले एउटै कुरा गर्छन् र सिकाउँछन्। यहोवाको राज्य मार्फत उहाँको पवित्र नाउँलाई पवित्र गर्ने तथा उहाँको सार्वभौमिकतालाई उच्च पार्ने महान् उद्देश्यमा पनि तिनीहरू रमाउँछन्। तर यहोवाले हामीलाई उहाँको उद्देश्यमा भाग लिन कसरी मदत दिनुहुन्छ? उहाँले हामीलाई पवित्र वचनको सच्चाइ दिनुभएको छ। परमेश्वरले हामीलाई उहाँको पवित्र आत्मा दिनुभएको छ। उहाँले हामीलाई विश्वव्यापी भ्रातृत्व र शुद्ध उपासनाद्वारा आशिष् दिनुभएको छ। हाम्रो अन्तरराष्ट्रिय परिवारले हामीलाई अझ बढी आनन्दित भएर यहोवाको सेवा गर्न मदत दिन्छ।
“यस संसारबाट अलग र निष्कलंकित रहने” भन्ने भाषणले पक्षपात र वर्गीय भिन्नताबाट निष्कलंक रहनुपर्ने आवश्यकतालाई जोड दियो। (याकूब २:५-९) केहीले एकै प्रकारको पृष्ठभूमि वा आर्थिक अवस्था भएकाहरूसित मात्र घुलमिल गरेर गरिब तथा असम्पन्न सँगी मसीहीहरूलाई बेवास्ता गर्नसक्छन्। अरूले मण्डलीमा जिम्मेवार व्यक्तिहरूको पक्ष लिनसक्छन्। तिनीहरू यो कुरा बिर्सन्छन्, सबैभन्दा ठूलो सुअवसर त यहोवाको साक्षी हुनु हो। तसर्थ, आफूलाई सांसारिक झुकाउहरूले दागी बनाउन वा मण्डलीको शान्ति भंग गर्न दिनु हुँदैन।—२ पत्रुस ३:१४.
“के म विवाह गर्न तयार छु?” भन्ने भाषणद्वारा धेरैले हतपत विवाह गर्छन् भन्ने कुरा औंल्याइयो। केहीले घरको कठिन समस्याबाट उम्कन वा आफ्ना साथीभाइहरूले विवाह गरेको देखेर विवाह गर्छन्। तथापि, विवाह गर्नुका वैध कारणहरूमा ईश्वरतान्त्रिक लक्ष्यहरू पूरा गर्ने पारस्परिक इच्छा, निष्कपट प्रेम, संगति र सुरक्षाको आवश्यकता अनि छोराछोरी हुर्काउने इच्छा हुनु खाँचो छ। विवाह गर्ने तयारी गर्दा आध्यात्मिक प्रशिक्षण चाहिन्छ। अन्य कुराहरूको साथै नयाँ व्यक्तित्व धारण गरेर राम्रा गुनहरू विकास गर्नु खाँचो छ। सम्भाव्य जोडीले यहोवासित साँचो सम्बन्ध राखेको र अरूसित आदरपूर्वक व्यवहार गरेको प्रमाण दिएको छ कि छैन, त्यो बुझ्नु पनि बुद्धिमानी हो। परिपक्व मसीहीहरूको सल्लाह लिनु पनि बुद्धिमानी हो।—हितोपदेश ११:१४.
यस्तो छलफलपछि “आफ्ना छोराछोरीहरूदेखि आनन्दित हुने आमाबाबुहरू” भन्ने भाषण दिइयो। बच्चा जन्मिंदा प्रायजसो निकै रमाहट हुन्छ। तथापि, छोराछोरीलाई जन्माउनुको साथै गहन जिम्मेवारी पनि आउँछ। (भजन १२७:३) तसर्थ, यहोवालाई प्रेम गर्न छोराछोरीलाई सिकाउनु महत्त्वपूर्ण छ। आमाबाबुले छोराछोरीसित नियमित तवरमा यहोवाबारे कुरा गरेर अनि उहाँको वचनका सिद्धान्तहरू परिवारमा प्रयोग गरेर त्यसो गर्नसक्छन्।
अधिवेशनको प्रथम दिनको अन्तमा जेहोभास् विट्नेसेज् एण्ड एजुकेशन (यहोवाका साक्षीहरू र शिक्षा) नामक नयाँ पुस्तिका विमोचन हुँदा सबै चकित भए। साक्षीहरूले “आफ्ना छोराछोरीलाई कडा मेहनत गर्न र स्कूलमा आफूलाई सुम्पिएका कार्यहरू गम्भीरतापूर्वक लिन प्रोत्साहन गर्छन्” भनेर यसमा स्पष्टसित वर्णन गरिएको छ। यस प्रकाशनमा यहोवाका साक्षीहरूद्वारा नाइजेरिया, मेक्सिको र अन्य मुलुकहरूमा सञ्चालित साक्षरता कक्षाहरूबाट प्राप्त उल्लेखनीय परिणामहरू पनि वर्णन गरिएका छन्। हामीले शिक्षालाई महत्त्वपूर्ण ठान्छौं भन्ने दृष्टिकोण बुझ्न यो पुस्तिकाले शिक्षकहरूलाई मदत गर्नुपर्ने हो।
“निरन्तर स्तुतिको बलिदान परमेश्वरलाई चढाऔं”
दोस्रो दिनको माथि उल्लिखित मुख्य विषय हिब्रू १३:१५ मा आधारित थियो। बिहानको कार्यक्रममा “यहोवाको प्रशंसा गर्ने आह्वानलाई सुन्ने” नामक गोष्ठी प्रस्तुत गरिएको थियो। यो आह्वान जुनसुकै उमेरका मानिसहरूले सुन्नसक्छन्। भजन १४८:१२, १३ ले जवान पुरुष, कन्या, वृद्ध पुरुष तथा केटाहरूलाई यहोवाको प्रशंसा गर्न आग्रह गर्छ। यहोवाका आनन्दित प्रशंसकहरूमध्ये थुप्रैले उहाँलाई अझ बढी प्रशंसा गर्न सकेका छन्। विश्वभरि, पूर्ण-समय प्रचारकार्य अर्थात् अग्रगामी सेवामा ६,००,००० भन्दा बढी मानिसहरूले भाग लिएका छन्। त्यसमध्ये १५,००० भन्दा बढी विशेष अग्रगामी र १५,००० भन्दा बढी बेथेल सेवामा कार्यरत छन्।
परमेश्वरका जनहरू वफादार हुनु महत्त्वपूर्ण छ भनेर “वफादारीका साथ यहोवाको संगठनसँगै सेवा गर्ने” विषयक भाषणले देखायो। यहोवाप्रति वफादार हुनु भनेको उहाँप्रति पूर्णतया भक्त हुनु हो र त्यो शक्तिशाली गुँदजस्तो हुन्छ। वफादार छौं भने अरूले चाहे देखोस् या नदेखोस्, जानाजानी बाइबलका आज्ञाहरू भंग गर्नेछैनौं। साथै प्रहरीधरहरा र ब्यूँझनुहोस्! अनि वाच टावर सोसाइटीले प्रबन्ध गरेका सबै आध्यात्मिक आहारमा पाइने बाइबल सिद्धान्तहरू वफादारीपूर्वक पालना गर्छौं। यो भाषणपछि बप्तिस्माबारे भाषण दिइयो। बप्तिस्मा लिने उम्मेदवारहरूले यहोवाप्रति आफ्नो समर्पणको प्रमाण दिंदा कति धेरै आनन्दित भयौं!
“सद्गुण वा दुर्गुण—तपाईं कुनलाई पछ्याउनुहुन्छ?” शीर्षक भएको अपरान्हको भाषण होशे ४:१-३ मा आधारित थियो। सद्गुनबारे संसारको दृष्टिकोण खस्किसकेको भए तापनि मसीहीहरूले नैतिक श्रेष्ठता कायम गर्न “प्रयत्न” गर्नैपर्छ। (२ पत्रुस १:५) यो व्यक्तिको सोचाइबाट सुरु हुन्छ। तिनका विचारहरू सद्गुनी छन् भने तिनले सफा, स्वस्थकर तथा उत्थानदायी कुराहरू गर्नेछन् र अरूसित व्यवहार गर्दा इमानदार हुने प्रयास गर्नेछन्। सद्गुनी हुन प्रयास गर्नु भनेको विपत्ति भोगिरहेको वा निराश भएको सँगी मसीहीप्रति समझदार वा अनुकम्पापूर्ण हुनु पनि हो।—१ थिस्सलोनिकी ५:१४.
“दियाबलका पासोहरूदेखि जोगिनुहोस्” भन्ने अर्को भाषणले मसीहीहरूलाई शैतानी प्रभावहरूबाट जोगिने चेताउनी दियो। रोगबिमार उपचार गर्दा मसीहीहरू सम्मोहनवादजस्ता प्रेतवादसित सम्बन्धित प्रविधिहरूबाट सतर्क हुनुपर्छ। यसबाहेक, शारीरिक सुस्वास्थ्यको हेरचाह गर्न व्यक्तिविशेषले जे जति गर्छन्, त्यो व्यक्तिगत कुरा हो।
खल्तीमै अटाउने नयाँ प्रकाशन, दोस्रो दिनको अन्ततिर विमोचन हुँदा सबै हर्षले विस्मित भए। त्यो पुस्तक इमानदार हृदय भएका मानिसहरूले समर्पण र बप्तिस्माको लागि चाँडचाँडो प्रगति गरोस् भनेर तयार पारिएको हो। यस १९२ पृष्ठ भएको नयाँ पुस्तकको शीर्षक हो, ज्ञान जसले अनन्त जीवनतर्फ डोऱ्याउँछ। ज्ञान पुस्तकले उत्थानवर्धक ढंगमा सच्चाइ प्रस्तुत गर्छ। यसले झूटा धर्मसिद्धान्तहरू सविवरण प्रस्तुत गर्दैन। यो पुस्तकको सुस्पष्ट भाषा तथा तार्किक स्पष्टीकरणले बाइबल अध्ययनहरू सञ्चालन गर्नुका साथै परमेश्वरको हृदयस्पर्शी ज्ञान बुझ्न मानिसहरूलाई मदत गर्नुपर्ने हो।
“सदा सर्वदा आनन्द गर र हर्ष मनाऊ”
यशैया ६५:१८ बाट लिइएका यी शब्दहरू अधिवेशनको तेस्रो दिनको मुख्य विषय थियो। सन् १९१४ देखि दुष्ट रीतिरिवाजको आखिरी दिन सुरु भयो भनी बाइबल भविष्यवाणीको पूर्तिले औंल्याउछ। यसर्थ, “यस रीतिरिवाजको अन्तमा आनन्दित प्रशंसकहरू” शीर्षक भएको गोष्ठी भाषणले श्रोतागणलाई ध्यानमग्न तुल्यायो। यस संसारको लोभी तथा हिंस्रक मनोवृत्तिले अरबौं मानिसहरूलाई कसरी असर गरेको छ भनी वक्ताहरूले देखाए। समयमा ती मानिसहरूले पनि शैतानको संसार सँगसँगै न्यायदण्ड भोग्नेछन्। तसर्थ, छनौट गर्ने समय अहिले नै हो। हामी कसको पक्षमा हुन चाहन्छौं? के हामी यहोवाको उपासना गरेर उहाँको सार्वभौमिकतालाई उच्च पार्न चाहन्छौं वा शैतानलाई मन पर्ने कुराहरू गरेर त्यसलाई आफ्नो शासक बनाउँछौं? स्पष्ट छ, हामी सबै यहोवाको पक्षमा खडा हुनुपर्ने हो।
अधिवेशनको जनभाषणको विषय, “अनन्तका महाराजाको प्रशंसा गर्नुहोस्!” थियो। यसले उपस्थित सबैलाई विचारणीय कुराहरू प्रदान गऱ्यो। कमजोर मानिसहरूले अनन्तका कुराहरू सोच्नसमेत सक्दैनन् तर यहोवाले त्यो पूर्णतया बुझ्नुहुन्छ। भजनरचयिताले यसप्रकार गाए, “परमप्रभु सदा सर्वदाको निम्ति राजा हुनुहुन्छ।” (भजन १०:१६) यस अनन्तका महाराजाले आफ्नो पुत्र, येशू ख्रीष्टद्वारा सारा मानवजातिलाई अनन्त जीवनको आनन्द उठाउने प्रबन्ध गर्नुभएको छ। (यूहन्ना १७:३) वक्ताले भने, “हो, हामी पापी मानिसले ईश्वरीय शिक्षा र येशूको छुडौतीको बलिदानमा विश्वास गरेर अनन्त जीवन पाउनसक्छौं।”
अधिवेशन सिद्धिनै लाग्दा उपस्थित सबै अन्तिम भाषण सुनेर प्रोत्साहित भए। भाषणको शीर्षक थियो, “आनन्दित भई दिनहुँ यहोवाको प्रशंसा गर्ने।” चेला बनाउने काममा संसारभरि भइरहेको प्रगतिबारे प्रतिवेदनहरू सुन्नु हृदयस्पर्शी थियो। अनि अधिवेशनमा भेला भएकाहरू यहोवालाई ‘धन्यको भन्न र उहाँको सदा सर्वदा स्तुति’ गर्न प्रेरित भए।—भजन १४५:२.
संसारबाट आनन्द हर्ने अमानवीय कुराहरू वर्णन गरेर साध्यै छैन। तापनि, यहोवामा पूर्ण विश्वास राख्नेहरूले ईश्वरीय आनन्द पाउनसक्छन्। तसर्थ, अन्तरराष्ट्रिय भ्रातृत्वको हैसियतमा यहोवाका साक्षीहरूले भजन ३५:२७, २८ का निम्न शब्दहरू दोहोऱ्याउनसक्छन्: “मेरो धार्मिकतामा प्रसन्न रहनेहरू जत्तिचाहिं ठूलो सोरले गाउने र आनन्द गर्ने होऊन्। तिनीहरूले निरन्तर यसो भनी रहून्, ‘परमप्रभुको बड़ाइ होस्, जो आफ्नो दासको प्रगतिमा प्रसन्न हुन्छन्।’ अनि मेरो जिब्रोले तपाईंको धार्मिकताको विषयमा र तपाईंको प्रशंसाको कुरा दिनभरि गर्नेछ।”
[पृष्ठ ७-मा भएको चित्र]
“जेहोभाज् विट्नेसेज एण्ड एजुकेशन” (यहोवाका साक्षीहरू र शिक्षा) पुस्तिकाबाट परिवारहरू लाभान्वित हुनेछन्
[पृष्ठ ८-मा भएको चित्र]
“ज्ञान जसले अनन्त जीवनतर्फ डोऱ्याउँछ” नामक यस नयाँ पुस्तकले उत्थानवर्धक ढंगमा बाइबल सच्चाइलाई प्रस्तुत गर्छ
[पृष्ठ ९-मा भएको चित्र]
यहोवाप्रति आफ्नो समर्पणलाई प्रतीकात्मक रूप दिन धेरैले बप्तिस्मा लिए
[पृष्ठ ९-मा भएको चित्र]
“योग्य जनहरूलाई तिनीहरूका वृद्धावस्थामा आदर गर्ने” नामक नाटकले सम्मेलनमा उपस्थित धेरैलाई गहिरो प्रभाव पाऱ्यो