यरूशलेम—के त्यसलाई ‘आफ्नो सारा आनन्दभन्दा श्रेष्ठ मान्नुहुन्छ’?
“यदि मैले यरूशलेमलाई मेरो सारा आनन्दभन्दा श्रेष्ठ मानिनँ भने, मेरो जिब्रो मेरो तालुमा टाँसिजाओस्।”—भजन १३७:६.
१. परमेश्वरले छान्नुभएको शहरप्रति थुप्रै निर्वासित यहूदीहरूको कस्तो मनोवृत्ति थियो?
निर्वासित यहूदीहरूको पहिलो डफ्फा सा.यु.पू. ५३७ मा यरूशलेम फर्केको पनि झन्डै सात दशक बितिसके। परमेश्वरको मन्दिर पुनर्निर्माण गरिसकियो। तर शहर भने अझै खण्डहर नै थियो। त्यतिञ्जेल निर्वासनमा छँदै नयाँ पुस्ता हुर्किसकेका थिए। निस्सन्देह, तिनीहरूमध्ये थुप्रैले भजनरचयिताले गाएझैं महसुस गर्थे: “हे यरूशलेम, मैले तँलाई बिर्सेको भए मेरो दाहिने हात कुहिजाओस्।” (भजन १३७:५) कतिपयले त यरूशलेमलाई सम्झने मात्र गरेनन्; तिनीहरूले आफ्नो कामद्वारा यरूशलेमलाई ‘तिनीहरूको सारा आनन्दभन्दा श्रेष्ठ माने।’—भजन १३७:६.
२. एज्रा को थिए र तिनी कसरी आशिषित् भए?
२ उदाहरणका लागि, पूजाहारी एज्रालाई लिनुहोस्। मातृभूमि फर्कनुअघि पनि तिनले यरूशलेममा साँचो उपासनालाई बढावा दिन जोसिलो भई काम गरेका थिए। (एज्रा ७:६, १०) त्यसो गर्दा एज्राले प्रशस्त आशिष् पाए। यहोवा परमेश्वरले फारसी राजाको मन फिराइदिनुभयो। अनि एज्रालाई निर्वासित यहूदीहरूको अर्को डफ्फाको नेतृत्व लिंदै तिनीहरूलाई यरूशलेम फर्काउने विशेषाधिकार प्रदान गर्न लगाउनुभयो। यसबाहेक, “परमेश्वरको भवनको महिमा बढ़ाउन” राजाले थुप्रै सुनचाँदी पनि दान दिए।—एज्रा ७:२१-२७.
३. यरूशलेम नै आफ्नो चिन्ताको मूल कारण थियो भनेर नहेम्याहले कसरी प्रमाणित गरे?
३ बाह्र वर्ष जतिपछि निर्णायक कदम चाल्ने अर्को यहूदी नहेम्याह थिए। तिनले शूशनको फारसी दरबारमा सेवा गर्थे। तिनले राजा आर्टजारसेजलाई मद्य टक्राउने ठूलो ओहदा पाएका थिए तर नहेम्याहको लागि त्यो “सारा आनन्दभन्दा श्रेष्ठ” थिएन। बरु, तिनी यरूशलेम गएर त्यसको पुनर्निर्माण गर्न चाहन्थे। महिनौंदेखि नहेम्याहले यस विषयमा प्रार्थना गरेका थिए र तिनले यसो गरेको कारण यहोवा परमेश्वरले आशिष् दिनुभयो। नहेम्याहको चिन्ता बुझेर फारसी राजाले तिनलाई सैन्य दलको प्रबन्ध गरिदिनुका साथै यरूशलेम पुनर्निर्माण गर्ने आज्ञापत्र पनि दिए।—नहेम्याह १:१–२:९.
४. यहोवालाई उपासना गर्नु आफ्नो सारा आनन्दभन्दा सर्वश्रेष्ठ छ भनेर हामी कसरी देखाउनसक्छौं?
४ निस्सन्देह, एज्रा, नहेम्याह तथा तिनीहरूलाई सहयोग गर्ने थुप्रै यहूदीहरूले यरूशलेममा केन्द्रित यहोवाको उपासनाभन्दा महत्त्वपूर्ण कुरा अरू कुनै पनि छैन भनी देखाए। तिनीहरूले त्यसलाई ‘तिनीहरूको सारा आनन्दभन्दा श्रेष्ठ माने,’ अर्थात् तिनीहरूले आनन्द मनाउने मुख्य कारण थियो भन्ने प्रमाण दिए। आज यहोवा, उहाँको उपासना र उहाँको आत्मा-निर्देशित संगठनप्रति यस्तै दृष्टिकोण राख्नेहरूको निम्ति त्यस्ता व्यक्तिहरू साँच्चै प्रोत्साहनका स्रोत हुन्! के यो तपाईंमा पनि लागू हुन्छ? उहाँको समर्पित जनहरूसँगसँगै यहोवाको उपासना गर्ने विशेषाधिकारलाई आफ्नो सारा आनन्दभन्दा सर्वश्रेष्ठ मान्नुहुन्छ भनेर के तपाईंले ईश्वरीय कार्यहरूमा लागिरहेर देखाउनुहुन्छ? (२ पत्रुस ३:११) त्यसो गर्नका लागि प्रोत्साहित हुन आउनुहोस्, एज्राले यरूशलेमतर्फ यात्रा गर्दा प्राप्त गरेका असल परिणामहरूलाई केलाऔं।
आशिष् तथा जिम्मेवारीहरू
५. एज्राको पालामा यहूदाका बासिन्दाहरूले कस्ता प्रशस्त आशिष्हरू पाए?
५ एज्रासित फर्किरहेका झन्डै ६,००० कैदीहरूको डफ्फाले यहोवाको मन्दिरमा दान दिन सुनचाँदी पनि ल्याएका थिए। वर्तमान बजारभाउअनुसार यसको परिमाण ३.५ करोड अमेरिकी डलरजति हुन आउँछ। तिनीहरूअघि यरूशलेम फर्कने कैदीहरूले ल्याएको सुनचाँदीभन्दा यो सात गुणा बढी थियो। यसरी जनशक्ति तथा भौतिक सम्पत्ति पाउँदा यरूशलेम तथा यहूदाका बासिन्दाहरू यहोवाप्रति कति कृतज्ञ भए होलान्! तर यहोवाबाट प्रशस्त मात्रामा आशिष्हरू पाउनेले जिम्मेवारी पनि पाउँछन्।—लूका १२:४८.
६. एज्राले आफ्नो मातृभूमिमा के भेट्टाए र तिनले कस्तो प्रतिक्रिया देखाए?
६ केही पूजाहारी तथा प्राचीनहरूलगायत थुप्रै यहूदीहरूले मूर्तिपूजक स्त्रीहरूसित विवाह गरेर यहोवाको व्यवस्था उल्लंघन गरेका रहेछन् भनी एज्राले थोरै समयमै देखिहाले। (व्यवस्था ७:३, ४) यहोवाको व्यवस्था करार भंग भएको देख्दा स्वाभाविकतः तिनी असाध्यै आकुलव्याकुल भए। “जब मैले यो कुरा सुनें तब आफ्नो पोशाक र खाष्टो फारें, . . . र अवाक् भइरहें।” (एज्रा ९:३) त्यसपछि, उपस्थित उत्सुक इस्राएलीहरूसामु यहोवालाई प्रार्थना गरेर एज्राले आफ्नो मनको बह पोखे। सबैले सुन्नेगरि, एज्राले विगतमा इस्राएलीहरूले देखाएको अनाज्ञाकारीता र त्यस मुलुकका मूर्तिपूजकहरूसित विवाह गर्दा हुनसक्ने परिणामबारे परमेश्वरले दिनुभएको चेताउनी दोहऱ्याए। तिनले अन्तमा भने: “हे परमप्रभु इस्राएलका परमेश्वर, तपाईं न्यायी हुनुहुन्छ। अब अघिझैं, बाँचेकाहरूको हामी एक बचति भाग मात्रै हौं। तपाईंको दृष्टिमा हामी दोषी भए तापनि हामीमाथि कृपादृष्टि राख्नुहोस्। किनभने हाम्रो दोषले गर्दा हामीमध्येको कोही पनि तपाईंको सामने टिक्नसक्तैन।”—एज्रा ९:१४, १५.
७. (क) गल्ती गर्नेहरूसित व्यवहार गर्दा एज्राले कस्तो असल उदाहरण बसाले? (ख) अनि गल्ती गर्नेहरूले कस्तो प्रतिक्रिया देखाए?
७ एज्राले “हामी” भन्ने अभिव्यक्ति प्रयोग गरे। हो, व्यक्तिगत तवरमा आफू दोषी नभए तापनि तिनले आफूलाई पनि त्यसमा समावेश गरे। एज्राको नम्र प्रार्थना र गहिरो चिन्ताले मानिसहरूको हृदय छोयो र तिनीहरू पश्चात्तापअनुरूप काम गर्न उत्प्रेरित भए। तिनीहरूले राजीखुसी पीडादायी समाधान रोजे अर्थात् परमेश्वरको व्यवस्था उल्लंघन गर्नेजति सबैले आ-आफ्ना विदेशी पत्नीहरूलाई तिनीहरूको तर्फबाट जन्मेका छोराछोरीसहित माइत फर्काउने योजना गरे। उक्त योजनालाई एज्राले समर्थन गर्नुका साथै दोषीहरूलाई त्यसैअनुरूप गर्न प्रोत्साहन दिए। फारसी राजाले अख्तियार दिएको हुनाकारण एज्राले व्यवस्था पालन नगर्नेहरूलाई मृत्युदण्ड दिनसक्थे वा यरूशलेम र यहूदाबाट निकाल्नसक्थे। (एज्रा ७:१२, २६) तर तिनले त्यसो गर्नु परेन जस्तो देखिन्छ। “तब भेला भएका सबै मानिसहरूले” भने: “हो, तपाईंले भन्नुभएबमोजिम हामीले गर्नैपर्छ।” यसबाहेक, तिनीहरूले स्वीकारे: “यस विषयमा हामीले घोर अपराध गरेका छौं।” (एज्रा १०:११-१३) यो आज्ञा पालन गरेर आ-आफ्ना विदेशी पत्नीहरू र तिनीहरूबाट जन्मिएका छोराछोरीलाई पठाउने १११ पुरुषहरूको नाउँ एज्रा अध्याय १० मा उल्लेख छ।
८. विदेशी पत्नीहरू फिर्ता पठाउने निर्णायक कदम किन सम्पूर्ण मानिसजातिको हितको कुरा थियो?
८ यो इस्राएलको लागि मात्र होइन तर सारा मानिसजातिको हितको विषय थियो। त्यतिखेर केही नगरिएको भए इस्राएलीहरू वरपरका राष्ट्रहरूसित छ्यासमिस हुनसक्थ्यो। फलतः सारा मानिसजातिको निम्ति आशिष्को कारण हुने भनी प्रतिज्ञा गरिएको सन्तानको वंशज बिटुलो हुनेथियो। (उत्पत्ति ३:१५; २२:१८) प्रतिज्ञा गरिएको वंश यहूदा कुलको राजा दाऊदको घरानामै जन्मिएका हुन् भनी प्रमाणित गर्न गाह्रो हुने थियो। यसको लगभग १२ वर्षपछि “इस्राएली वंशकाहरूले सबै विदेशीहरूबाट आफैलाई अलग” गरेर यो महत्त्वपूर्ण विषयप्रति फेरि ध्यान दिइयो।—नहेम्याह ९:१, २; १०:२९, ३०.
९. मसीहीधर्म नमान्ने पति वा पत्नी भएका मसीहीहरूका लागि बाइबलमा कस्तो असल सल्लाह पाइन्छ?
९ यहोवाका वर्तमान सेवकहरूले यो विवरणबाट के सिक्नसक्छन्? मसीहीहरू व्यवस्थाको करारअन्तर्गत त पक्कै पनि छैनन्। (२ कोरिन्थी ३:१४) बरु, तिनीहरू “ख्रीष्टको व्यवस्था[प्रति]” आज्ञाकारी छन्। (गलाती ६:२) तसर्थ, मसीहीधर्म नमान्ने पति वा पत्नी भएको मसीहीले पावलको यो सल्लाहअनुसार गर्छन्: “कुनै ख्रीष्टियानको विश्वास नगर्ने पत्नी छ, र त्यो उसित बस्न चाहन्छे भने उसले त्यसलाई नछोड़ोस्।” (१ कोरिन्थी ७:१२) यसको अलावा, मसीहीधर्म नमान्ने पति वा पत्नी भएका मसीहीहरूले धर्मशास्त्रअनुसार आफ्नो विवाहलाई सफल बनाउनैपर्ने बाध्याता पनि छ। (१ पत्रुस ३:१, २) यो असल सल्लाह पालन गरेको हुँदा अक्सर मसीहीधर्म नमान्ने पति वा पत्नीको मन साँचो उपासनातर्फ फिरेको देखिएको छ। कोही कोही त बप्तिस्मा प्राप्त विश्वासी मसीहीहरूसमेत भएका छन्।—१ कोरिन्थी ७:१६.
१०. आफ्ना विदेशी पत्नीहरूलाई फर्काउने १११ इस्राएली पुरुषबाट मसीहीहरूले के पाठ सिक्नसक्छन्?
१० यद्यपि, आ-आफ्ना विदेशी पत्नीहरूलाई फर्काउने इस्राएलीहरूले अविवाहित मसीहीहरूलाई उत्तम पाठ सिकाएका छन्। मसीही विश्वासमा नभएकाहरू पुरुष वा स्त्रीसित विवाह गर्ने उद्देश्यले सम्बन्ध बढाउनु हुँदैन। यस्ता सम्बन्धहरू कायम नगर्नु गाह्रो हुन वा कष्टप्रदसमेत हुनसक्छ तर परमेश्वरको निरन्तर आशिष् पाउने हो भने त्यस्तो सम्बन्ध गाँस्दै नगाँस्नु उत्तम हुन्छ। मसीहीहरूलाई यस्तो आज्ञा दिइएको छ: “विश्वास नगर्नेहरूसँग समान भएर एउटै हलोमा नजोतियौ।” (२ कोरिन्थी ६:१४) विवाह गर्न चाहने जुनसुकै अविवाहित मसीहीले साँचो सँगी विश्वासीसितै विवाह गर्ने योजना बनाउनुपर्छ।—१ कोरिन्थी ७:३९.
११. इस्राएली पुरुषहरूको जस्तै हाम्रो पनि आनन्दित हुने कारण कसरी जाँचिनसक्छ?
११ गैरशास्त्रीय काम गरिरहेका मसीहीहरूलाई त्यसबारे अवगत गराउँदा तिनीहरूले अन्य कतिपय तरिकाहरूमा पनि काँटछाँट गरेका छन्। (गलाती ६:१) समय समयमा यो पत्रिकाले कुनै पनि व्यक्ति परमेश्वरको संगठनको सदस्य भइरहन अयोग्य ठहराउने गैरशास्त्रीय आचरणहरूबारे जानकारी दिइरहेको छ। उदाहरणका लागि, १९७३ मा लागू पदार्थको दुर्व्यसन र सूर्तीको प्रयोग गम्भीर पापहरू हुन् भनेर यहोवाका जनहरूले पूर्णतया बुझे। ईश्वरीय मार्गमा हिंड्न “शरीर र आत्माका सबै किसिमका अशुद्धपनाहरूबाट हामी आफैलाई शुद्ध” गर्नैपर्छ। (२ कोरिन्थी ७:१) थुप्रै व्यक्तिहरूले बाइबलका यस्ता सल्लाहहरू पालना गरे; तिनीहरू परमेश्वरका स्वच्छ मानिसहरूमध्ये हुन यसरी कुनै पनि अशुद्ध चिजहरूसितको संगत छोड्दा सुरुमा लाग्ने तलतल सहनसमेत तयार थिए। यौन सम्बन्ध, लुगाफाटा, श्रृंगारपटार अनि रोजगार, मनोरञ्जन तथा गीतको छनौट पनि बुद्धिमानीसाथ गर्नेबारे स्पष्ट धर्मशास्त्रीय निर्देशनहरू दिइएका छन्। हाम्रो ध्यान कुनै पनि धर्मशास्त्रीय सिद्धान्तहरूतिर खिचिंदा १११ जना इस्राएली पुरुषहरूजस्तै हामी पनि “सिद्ध” हुने इच्छा गर्नसकौं। (२ कोरिन्थी १३:११) यसले उहाँका पवित्र जनहरूसित यहोवाको उपासना गर्ने विशेषाधिकारलाई हामीले ‘आफ्नो सारा आनन्दभन्दा श्रेष्ठ मानेको’ प्रमाणित गर्छ।
१२. सा.यु.पू. ४५५ मा के भयो?
१२ विदेशी पत्नीहरूसित सम्बन्धित विवरणपछिका १२ वर्षमा यरूशलेममा के भयो, बाइबलले बताएको छैन। निस्सन्देह, इस्राएलका छिमेकी राष्ट्रहरूसित वैवाहिक सम्बन्धहरू नगाँसिने भएकोले झन् रुष्ट भए होलान्। सा.यु.पू. ४५५ मा नहेम्याह सैन्य दलसहित यरूशलेममा आइपुगे। तिनी यहूदाका राज्यपाल नियुक्त भएका थिए र यरूशलेम पुनर्निर्माण गर्न फारसी राजाको आज्ञा-पत्रहरू पनि ल्याएका थिए।—नहेम्याह २:९, १०; ५:१४.
ईर्ष्यालु छिमेकीहरूको विरोध
१३. यहूदीहरूका झूटो धर्म मान्ने छिमेकीहरूले कस्तो मनोवृत्ति देखाए र नहेम्याहले कस्तो प्रतिक्रिया व्यक्त गरे?
१३ झूटो धर्म मान्ने छिमेकी राष्ट्रले नहेम्याह आउनुको उद्देश्य थाह पाएपछि त्यसको घोर विरोध गरे। तिनीहरूका नेताहरूले तिनलाई धम्क्याउँदै यसरी सोधे: “के यो राजाको विरुद्धमा गरेको विद्रोह होइन र?” यहोवामाथि विश्वास देखाउँदै नहेम्याहले जवाफ दिए: “स्वर्गका परमेश्वरले हामीलाई सफल तुल्याउनुहुनेछ। हामी, उहाँका दासहरू पुनर्निर्माणको काम शुरू गर्दैछौ। यरूशलेममा तिमीहरूको केही भाग, दाबी र परम्पराको अधिकार छैन।” (नहेम्याह २:१९, २०) पर्खाल निर्माण गर्ने काम सुरु हुँदा तिनै शत्रुहरूले यसरी गिल्ला गरे: ‘यी निर्बल यहूदीहरू के गर्दैछन्? ती जलिसकेका देखेर पनि के तिनीहरूले धूलोबाट ढुंगाहरू निकाल्नसक्छन् र? तिनीहरूले जेसुकै बनाइरहे तापनि एउटा स्याल ढुंगाको त्यस पर्खालमा चढ्यो भने, त्यो पक्कै भत्किनेछ।’ यी टिप्पणीहरूको जवाफ दिनुको साटो नहेम्याहले जवाफ दिए: “हे हाम्रा परमेश्वर, हाम्रो प्रार्थना सुन्नुहोस्। किनभने तिनीहरूले ता हाम्रो अपमान गरिरहेका छन्। तिनीहरूको गिल्ला तिनीहरूकै शिरमाथि फर्काइदिनुहोस्।” (नहेम्याह ४:२-४) तर नहेम्याहले यहोवामाथि निरन्तर भर पर्दै यो उत्तम नमुना बसाले!—नहेम्याह ६:१४; १३:१४.
१४, १५. (क) शत्रुहरूको हिंसात्मक चेताउनीको सामना नहेम्याहले कसरी गरे? (ख) घोर विरोधको बावजूद यहोवाका साक्षीहरूले कसरी निरन्तर आध्यात्मिक निर्माण गरिरहनसकेका छन्?
१४ प्रचार गर्ने महत्त्वपूर्ण कार्यभार पूरा गर्न आज यहोवाका साक्षीहरू पनि परमेश्वरमा भर पर्छन्। विरोधीहरू गिल्ला गरेर अवरोध खडा गर्ने कोसिस गर्छन्। कहिलेकाहीं परमेश्वरको राज्य सन्देशमा चासो राख्ने व्यक्तिहरूले गिल्ला सहन नसकेर हार मानेका छन्। जति गिल्ला गर्दा पनि केही सीप नलाग्दा ती विरोधीहरू रिसाउनसक्छन्, आखिरीमा हिंसात्मक व्यवहार गर्ने धम्कीसमेत दिनसक्छन्। यरूशलेमको पर्खाल निर्माण गर्नेहरूले यस्तै व्यवहार सामना गरे। तर नहेम्याह डराएनन्। बरु, तिनले शत्रुहरूको हमलाबाट जोगिन डकर्मीहरूलाई हातहतियारले सुसज्जित पारे र तिनीहरूको विश्वासलाई यसो भन्दै बलियो पारे: “तिनीहरूसँग नडराऊ। महान् र भययोग्य परमप्रभुको सम्झना गर, औ आफ्ना दाज्यू-भाइ, छोरा-छोरी, पत्नी र घरहरूका निम्ति युद्ध गर।”—नहेम्याह ४:१३, १४.
१५ नहेम्याहको पालामा जस्तै घोर विरोधको बावजूद यहोवाका साक्षीहरू निरन्तर आध्यात्मिक निर्माण गरिरहन सुसज्जित भएका छन्। “विश्वासी र बुद्धिमान दास[ले]” विश्वास बलियो तुल्याउने आध्यात्मिक भोजन उपलब्ध गरिरहेको छ र यो भोजनले प्रतिबन्ध लगाइएका ठाउँहरूमा समेत परमेश्वरका जनहरूलाई आफ्नो काममा फलदायी हुन मदत गरेको छ। (मत्ती २४:४५) फलतः यहोवाले पृथ्वीभरि वृद्धि गराउनुभएर आफ्ना जनहरूलाई निरन्तर आशिष् दिइरहनुभएको छ।—यशैया ६०:२२.
आन्तरिक समस्याहरू
१६. कस्ता आन्तरिक समस्याहरूले यरूशलेमको पर्खाल बनाउनेहरूको मनोवृत्तिलाई खतरामा पाऱ्यो?
१६ यरूशलेमको पर्खाल बनाउने काम प्रगति हुँदै गर्दा जसै पर्खाल अग्लो हुँदै जान थाल्यो, काम पनि उत्तिकै झन् झन् गाह्रो हुन थाल्यो। पर्खाल निर्माण गर्न संघर्ष गरिरहेकाहरूको मनोवृत्तिलाई नै खतरामा पार्ने समस्या तब देखा पऱ्यो। खाद्यान्नको अभावले गर्दा केही यहूदीहरूलाई आफ्नो परिवारको पेट पाल्न र फारसी सरकारलाई कर तिर्न धौ धौ परिरहेको थियो। धनाढ्य यहूदीहरूले तिनीहरूलाई खानेकुरा तथा पैसा सापटी दिए। तथापि, परमेश्वरको व्यवस्था विपरीत गरिब इस्राएलीहरूले व्याजसहित ऋण चुक्ता गर्न आफ्नो जग्गाजमिन तथा बालबच्चाहरू धितो राख्नुपर्थ्यो। (प्रस्थान २२:२५; लेवी २५:३५-३७; नहेम्याह ४:६, १०; ५:१-५) अहिले आएर ती साहूहरूले तिनीहरूको जग्गाजमिन खोज्ने र तिनीहरूलाई आफ्ना सन्तान कमाराकमारीको रूपमा बेच्न दबाब दिन थाले। यो निर्दयी भौतिकवादी मनोवृत्ति देखेर नहेम्याह क्रूद्ध भए। यरूशलेमको पर्खाल पुनर्निर्माण गर्ने काममा यहोवाको निरन्तर आशिष् रहिरहोस् भनेर पक्का गर्न तिनले तुरुन्तातुरुन्तै काम गरिहाले।
१७. निर्माण कार्यमा यहोवाको आशिष् निरन्तर रहिरहोस् भनेर पक्का गर्न नहेम्याहले के गरे र यसको परिणाम के भयो?
१७ “एउटा ठूलो सम्मेलनको” आयोजना गरियो र धनाढ्य इस्राएलीहरूले यहोवालाई रुष्ट पारिरहेका छन् भनी नहेम्याहले प्रष्ट पारे। त्यसपछि तिनले केही पूजाहारीहरूलगायत दोषी आफूले लिएको व्याज तिर्न नसक्नेहरूसित गैरकानुनी तरिकाले हडपेको जमिनसमेत फिर्ता गर्न आग्रह गरे। खुसीको कुरा, दोषीहरूले भने: “हामी फर्काइदिनेछौं औ तिनीहरूबाट अरू केही लिनेछैनौं। तपाईंले जे भन्नुहुन्छ सो हामी गर्नेछौं।” यी फोस्रा आश्वासन थिएनन् किनकि “तिनीहरूले [नहेम्याहसित गरेको] आफ्नो प्रतिज्ञाअनुसार गरे” भनेर बाइबलले भन्छ। अनि त्यसपछि सम्पूर्ण मण्डलीले यहोवाको प्रशंसा गरे।—नहेम्याह ५:७-१३.
१८. यहोवाका साक्षीहरू कस्तो मनोवृत्तिको निम्ति परिचित छन्?
१८ अनि आज हाम्रो समयबारे के भन्न सकिन्छ? यहोवाका साक्षीहरू अरूको अनुचित फाइदा उठाउने व्यक्तिको रूपमा त होइन तर आपत्मा परेका सँगी विश्वासीहरू तथा अरूप्रति उद्धार भाव देखाउने व्यक्तिको रूपमा चिरपरिचित छन्। त्यसैकारण नहेम्याहको समयमा जस्तै आज पनि यहोवाप्रति कृतज्ञ भई तिनीहरूले उहाँको निकै प्रशंसा गरिरहेका छन्। तथापि, यससँगसँगै “विश्वासी र बुद्धिमान दास[ले]” व्यापारमा तथा अरूलाई शोषण नगर्ने सन्दर्भमा धर्मशास्त्रीय सल्लाह दिनु आवश्यक देखेका छन्। कुनै कुनै मुलुकहरूमा दुलहीको चर्को मोल माग्नु सामान्य कुरा हो तर पनि लोभीहरू र धुत्याहाहरू परमेश्वरको राज्यमा पस्नेछैनन् भनी बाइबलले सुस्पष्ट चेताउनी दिएको छ। (१ कोरिन्थी ६:९, १०) यस्तो सल्लाहप्रति अधिकांश मसीहीहरूले देखाएको सकारात्मक प्रतिक्रियाले त्यतिखेर आफ्ना गरिब भाइहरूलाई अनुचित तरिकामा शोषण गर्नु पापपूर्ण रहेछ भनी यहूदीहरूको सम्झना गराउँछ।
यरूशलेमको पर्खाल पूरा हुन्छ
१९, २०. (क) यरूशलेमको पर्खाल बनाउने काम पूरा हुँदा धर्म विरोधीहरूमाथि कस्तो असर पऱ्यो? (ख) थुप्रै मुलुकहरूमा यहोवाका साक्षीहरूले कस्तो विजय हासिल गरेका छन्?
१९ यी सब विरोधहरूको बावजूद यरूशलेमको पर्खाल ५२ दिनमा पूरा भयो। विरोधीहरूमाथि यसले कस्तो प्रभाव पाऱ्यो? नहेम्याह भन्छन्: “जब हाम्रा शत्रुहरूले यो कुरा सुने, औ वरिपरिका सब अन्यजातिहरूले यो देखे, तब तिनीहरूले यस्तो विचार गरे, ‘यो ता साह्रै उदेकको काम भयो।’ औ यो काम परमेश्वरको सहायताद्वारा पूरा भएको हो भनी तिनीहरूले स्वीकार गरे।”—नहेम्याह ६:१६.
२० आज पनि थुप्रै तरिका र ठाउँहरूमा परमेश्वरको कार्यको निरन्तर विरोध भइरहेको छ। तथापि, यहोवाका साक्षीहरूको विरोध गर्नु व्यर्थ रहेछ भनेर लाखौं मानिसहरूले देखेका छन्। उदाहरणका लागि, नाजी जर्मनी, पूर्वी युरोप र अफ्रिकाका कतिपय मुलुकहरूमा प्रचार कार्यलाई रोक्न गरिएका प्रयासहरूलाई विचार गर्नुहोस्। यस्ता सबै कोसिसहरू व्यर्थ भए र “यो काम परमेश्वरको सहायताद्वारा पूरा भएको हो भनी” अहिले थुप्रै मानिसहरूले स्वीकारेका छन्। उसबेलादेखि यहोवाको उपासनालाई ‘आफ्नो सारा आनन्दभन्दा श्रेष्ठ मान्ने’ विश्वासी जनहरूको निम्ति कत्रो आशिष्!
२१. अर्को लेखमा कस्ता महत्त्वपूर्ण घटनाहरूबारे विचार गरिनेछन्?
२१ अर्को लेखमा हामी यरूशलेमको पुनर्निर्मित पर्खालको रमाइलो उद्घाटनअघि भएका महत्त्वपूर्ण घटनाहरूको पुनरावलोकन गर्नेछौं। सम्पूर्ण मानिसजातिलाई फाइदा पुऱ्याउने योभन्दा भव्य शहरको निर्माण कार्य कसरी सम्पन्न हुनेछ, हामी त्यो पनि विचार गर्नेछौं।
के तपाईंले सम्झनुभएको छ?
◻ एज्रालगायत अरू यरूशलेममाथि कसरी आनन्दित भए?
◻ एज्रा र नहेम्याहले थुप्रै यहूदीहरूलाई कुन गल्तीहरू सुधार्न मदत गरे?
◻ एज्रा र नहेम्याहसित सम्बन्धित विवरणहरूबाट तपाईं कस्ता पाठहरू सिक्न सक्नुहुन्छ?
[पृष्ठ १५-मा भएको चित्र]
शूशनमा पाएको आदरणीय पदलाई होइन तर यरूशलेमलाई नहेम्याहले सारा आनन्दभन्दा श्रेष्ठ मानेका थिए
[पृष्ठ १७-मा भएको चित्र]
हाम्रो सबैभन्दा महत्त्वपूर्ण काम प्रचार कार्यमा निरन्तर लागिरहन नहेम्याहले जस्तै यहोवालाई प्रार्थना गरेर उहाँसित निर्देशन र बल माग्नु आवश्यक छ