तपाईं परमेश्वरको वचनलाई कत्तिको प्रेम गर्नुहुन्छ?
“आहा! तपाईंको व्यवस्थालाई म कस्तो प्रेम गर्दछु! दिनभरि मेरो ध्यान त्यसैमा रहन्छ।”—भजन ११९:९७.
१. ईश्वरभीरु व्यक्तिहरूले परमेश्वरको वचनप्रति प्रेम देखाउने एउटा तरिका के हो?
लाखौं पुरुष तथा महिलाहरूसित बाइबल छ। तर आफूसित बाइबल हुनु र परमेश्वरको वचनलाई प्रेम गर्नुमा भिन्नता छ। के आकलझुकल मात्र परमेश्वरको वचन पढ्ने व्यक्तिले परमेश्वरको वचनलाई प्रेम गरेको दाबी गर्न सुहाउँछ? अहँ पटक्कै सुहाउँदैन! त्यसको विपरीत कुनै समय परमेश्वरको वचनको वास्तै नराख्ने मानिसहरू अहिले दिनहुँ बाइबल पढ्छन्। तिनीहरूले परमेश्वरको वचनलाई प्रेम गर्न सिकेका छन् र भजनरचयिताले जस्तै परमेश्वरको वचनमा “दिनभरि” ध्यान दिन्छन्।—भजन ११९:९७.
२. कठिन परिस्थितिको बेला यहोवाको एक जना साक्षीले कसरी आफ्नो विश्वास सँभालिराखे?
२ परमेश्वरको वचनलाई प्रेम गर्न सिकेका त्यस्तै एक व्यक्ति नाशो डोरी हुन्। तिनले सँगी विश्वासीहरू सँगसँगै आफ्नो देश अल्बेनियामा दशकौंसम्म सतावटहरू सहँदै यहोवाको सेवा गरे। त्यतिबेला अधिकांश समय यहोवाका साक्षीहरूको कार्यमाथि प्रतिबन्ध लगाइएको थियो र यी विश्वासी मसीहीहरूले बाइबल साहित्यहरू कमै मात्र हात पार्थे। तैपनि भाइ डोरी विश्वासमा दृढ रहे। कसरी? तिनी भन्छन्, “प्रत्येक दिन कम्तीमा पनि एक घण्टा बाइबल पढ्ने लक्ष्य मैले राखेको थिएँ र मैले आँखा धमिलो नहोउञ्जेल ६० वर्षसम्म त्यसै गरें।” केही समय अघिसम्म अल्बेनियाली भाषामा सम्पूर्ण बाइबल उपलब्ध थिएन तर भाइ डोरीले बाल्यकालमा युनानी भाषा सिकेको हुँदा युनानी भाषामै बाइबल पढे। नियमित बाइबल पढाइको कारण भाइ डोरी अनेकन् परीक्षाहरूको बावजूद सँभालिए जस्तै हामीलाई पनि सँभाल्नसक्छ।
परमेश्वरको वचनको “तृष्णा” गर्नुहोस्
३. मसीहीहरूले परमेश्वरको वचनप्रति कस्तो मनोभाव विकास गर्नुपर्छ?
३ प्रेरित पत्रुसले यसो लेखे: “नयाँ जन्मेका बालकहरूजस्तै छलरहितको आत्मिक दूधको तृष्णा गर, र त्यसबाट तिमीहरू मुक्तिको निम्ति बढ़दै जाओ।” (१ पत्रुस २:२) शिशुले आमाको दूधको तृष्णा गरेजस्तै आफ्नो आध्यात्मिक आवश्यकताप्रति सजग मसीहीहरूले पनि परमेश्वरको वचन पढ्दा उत्कट आनन्द महसुस गर्छन्। के तपाईंले पनि त्यस्तै महसुस गर्नुहुन्छ? त्यस्तो महसुस गर्नुहुन्न भने हरेस नखानुहोस्। तपाईं पनि परमेश्वरको वचनप्रति तृष्णा जगाउन सक्नुहुन्छ।
४. दिनहुँ बाइबल पढ्ने बानी बसाल्न के गर्नुपर्छ?
४ परमेश्वरको वचनप्रति तृष्णा खेती गर्न पहिलो कुरा त नियमित तवरमा र अझ सम्भव भए दिनहुँ बाइबल पढ्ने बानी बसाल्नुहोस्। (प्रेरित १७:११) तपाईंले नाशो डोरीले जस्तै दिनहुँ एक घण्टा बाइबल पढ्ने समय त नपाउनु होला। तर तपाईंले परमेश्वरको वचन दिनहुँ पढ्न केही समय पक्कै निकाल्न सक्नुहुन्छ। बाइबलको एउटा अंश पढेर मनन गर्न थुप्रै मसीहीहरू बिहान सबेरै उठ्छन्। आफ्नो दिनको थालनी गर्ने त्योभन्दा उत्तम तरिका अरू के होला र? अरू कतिपयले सबै काम सिद्धयाएर राती सुत्नुअघि बाइबल पढ्न रुचाउँछन्। कसैले चाहिं आफूलाई मिल्ने समयमा बाइबल पढ्छन्। महत्त्वपूर्ण कुरा हो, नियमित बाइबल पढ्ने। अनि आफूले पढेको कुरामा एकछिन मनन गर्नुहोस्। आउनुहोस्, परमेश्वरको वचन पढेर मनन गर्दा लाभ उठाएका केही व्यक्तिहरूको उदाहरण हामी हेरौं।
परमेश्वरको व्यवस्थालाई प्रेम गर्ने भजनरचयिता
५, ६. भजन ११९ का लेखकको नाउँ हामीलाई थाह नभए तापनि तिनले लेखेको कुरा पढेर मनन गर्दा हामीले के सिक्नसक्छौं?
५ भजन ११९ का लेखकले पक्कै पनि परमेश्वरको वचनको गहिरो मूल्यांकन गर्थे। उक्त भजनका लेखक को हुन्? यही हुन् भनी बाइबलमा बताइएको छैन। तथापि, विषयवस्तु पढ्दा हामीले तिनी र तिनले जीवनमा भोगेका समस्याहरूबारे केही कुरा थाह पाउनसक्छौं। तिनका कोही कोही साथीहरूले आफूलाई यहोवाका उपासक त भन्थे तर तिनीहरूले तिनले जस्तो बाइबलका सिद्धान्तहरूलाई प्रेम गर्दैनथे। तैपनि उक्त भजनरचयिता तिनीहरूको प्रभावमा परेर सही कुरा गर्नदेखि पछि हटेनन्। (भजन ११९:२३) तपाईं बाइबल सिद्धान्तको कदर नगर्ने मानिससित बस्नुहुन्छ वा काम गर्नुहुन्छ भने तपाईंले आफ्नो र भजनरचयिताको अवस्थामा केही समानता देख्नुहुन्छ होला।
६ भजनरचयिता ईश्वरभक्त मानिस भए तापनि आत्मधर्मी भने पक्कै थिएनन्। तिनले आफ्ना असिद्धता स्वीकार्न हिचकिचाएनन्। (भजन ११९:५, ६, ६७) तथापि, तिनले आफूलाई पापको वशमा पर्न दिएनन्। तिनले यस्तो प्रश्न गरे: “जवान मानिसले आफ्नो चालचलन कसरी शुद्ध राख्नसक्ला?” तिनले यसरी उत्तर दिए: “तपाईंको वचनमा ध्यान दिएरनै हो।” (भजन ११९:९) अनि असल काम गर्न परमेश्वरको वचन अति शक्तिशाली बल हो भन्ने कुरामा जोड दिंदै भजनरचयिताले भने: “तपाईंको विरुद्धमा पाप नगरुँ भनेर, तपाईंको वचन मैले मेरो हृदयमा राखेको छु।” (भजन ११९:११) हामीलाई परमेश्वर विरुद्ध पाप गर्नदेखि बचाउनसक्ने शक्ति पक्कै पनि शक्तिशाली छ!
७. विशेष गरी जवानहरू दिनहुँ बाइबल पढ्न किन सचेत हुनुपर्छ?
७ जवान मसीहीहरूले भजनरचयिताका शब्दहरूमाथि गौर गर्नु मनासिब हुन्छ। आज जवान मसीहीहरूले निकै दबाबहरू सहनुपर्छ। यहोवाका उपासकहरूको युवा पीढीको मन भ्रष्ट पार्न पाए शैतान दंग पर्छ। शैतानको लक्ष्य जवान मसीहीहरू आफ्नो शारीरिक अभिलाषाहरूको प्रलोभनमा परेर परमेश्वरको व्यवस्था उल्लंघन गरून् भन्ने हो। चलचित्र तथा टेलिभिजन कार्यक्रमहरूमा अक्सर दियाबलको सोचाइ झल्किन्छ। त्यस्ता कार्यक्रमका अभिनेताहरू आकर्षक र मनमोहक देखिन्छन्। अनि तिनीहरूबीचको अनैतिक सम्बन्ध पनि सामान्य कुरा हो भनी देखाइन्छ। ती सबैले वास्तवमा भन्न खोजेको कुरा के हो? ‘अविवाहित मानिसहरूले एक अर्कालाई साँचो प्रेम गर्छन् भने यौन सम्बन्ध राख्नु ठीकै हो नि।’ दुःखको कुरा, हरेक वर्ष थुप्रै जवान मसीहीहरू यस्तो तर्कको पासोमा पर्छन्। कसै कसैको विश्वासको जहाज नै डुबेको छ। हो, निकै दबाब सामना गर्नु परिरहेको छ! तर के ती दबाबहरू जवानहरूले सामना गर्नै नसक्ने छन् र? अहँ पक्कै छैन! यहोवाले जवान मसीहीहरूको हानिकारक इच्छालाई विजय हासिल गर्ने बाटो देखाइदिनुभएको छ। ‘परमेश्वरको वचनमा ध्यान दिएर र उहाँको वचन हृदयमा राखेर’ तिनीहरूले दियाबलले तेर्साउने जस्तोसुकै हतियारको सामना गर्नसक्छन्। नियमित तवरमा व्यक्तिगत बाइबल पढाइ र मनन गर्न तपाईं कति समय बिताउनुहुन्छ?
८. यस अनुच्छेदमा दिइएका उदाहरणहरूले तपाईंलाई मोशालाई दिइएको व्यवस्थाप्रति अझै मूल्यांकन बढाउन कसरी मदत गर्छ?
८ भजन ११९ का लेखकले यस्तो उद्गार गरे: “आहा! तपाईंको व्यवस्थालाई म कस्तो प्रेम गर्दछु!” (भजन ११९:९७) तिनले कुन व्यवस्थालाई संकेत गर्दैथे? मोशालाई दिइएको व्यवस्थालगायत यहोवाको सम्पूर्ण वचन। पहिलो चोटि यसो हेर्दा कसै कसैलाई ती व्यवस्थासंग्रह पुराना लाग्नुका साथै त्यसलाई कसरी प्रेम गर्नसकेको होला जस्तो लाग्ला। तैपनि, भजरचयिताले जस्तै मोशालाई दिइएको व्यवस्थाको विभिन्न पक्षमाथि मनन गर्दा व्यवस्थाले संकेत गरेका बुद्धिका कुरा बुझ्नसक्छौं। व्यवस्थामा थुप्रै भविष्यसूचक कुराहरू हुनुका साथै सरसफाइ, भोजनसम्बन्धी नियमहरू पनि छन् र यसले गर्दा सफाइ र सुस्वास्थ्य कायम राख्न मदत पुऱ्यायो। (लेवी ७:२३, २४, २६; ११:२-८) व्यवस्थाले इस्राएलीहरूलाई व्यापारमा इमानदार हुन प्रोत्साहित गर्नुका साथै खाँचोमा परेका सँगी उपासकहरूलाई समानुभूति देखाउन आग्रह गर्थ्यो। (प्रस्थान २२:२६, २७; २३:६; लेवी १९:३५, ३६; व्यवस्था २४:१७-२१) न्यायिक निर्णयहरू निष्पक्ष हुनुपर्थ्यो। (व्यवस्था १६:१९; १९:१५) भजन ११९ का लेखकले जीवनमा अनुभव बटुल्दै जाँदा परमेश्वरको व्यवस्था व्यवहारमा लागू गर्दा आफ्नो क्रियाकलापमा राम्रो असर पर्दो रहेछ भनी थाह पाए। फलस्वरूप त्यसप्रति तिनको माया बढ्दै गयो। त्यसै गरी आज मसीहीहरूले बाइबल सिद्धान्तहरू व्यवहारमा उतार्दा हुने राम्रा परिणामहरू देखेपछि परमेश्वरको वचनप्रतिको प्रेम अनि मूल्यांकन अझ बढ्दै जान्छ।
भिन्न हुन आँट गर्ने राजकुमार
९. परमेश्वरको वचनप्रति राजा हिजकियाहले कस्तो मनोभाव विकास गरे?
९ भजन ११९ को विषयवस्तु हिजकियाहले जवान राजकुमार छँदा गरेका कामकुराहरूसित मिल्दोजुल्दो छ। केही बाइबलविद्हरू हिजकियाहले नै उक्त भजन लेखेका हुन् भन्छन्। तिनैले लेखेका हुन् या होइन हामीलाई पक्का नभए तापनि हामीलाई यति कुराचाहिं थाह छ, हिजकियाह परमेश्वरको वचनलाई अत्यन्तै आदर गर्थे। आफ्नो जीवनशैलीद्वारा भजन ११९:९७ मा लिपिबद्ध शब्दहरूसित तिनी पूर्णतया सहमत थिए भनी प्रमाणित गरे। हिजकियाहबारे बाइबल यसो भन्छ: “तिनी परमप्रभुका भक्त भइरहे र आफ्नो भक्ति देखाउनमा तिनी पछि हटेनन्, औ मोशालाई परमप्रभुले दिनुभएका आज्ञाहरू तिनले पालन गरे।”—२ राजा १८:६.
१०. ईश्वरभीरु परिवारमा नहुर्केका मसीहीहरूले हिजकियाहको उदाहरणबाट कस्तो ढाडस पाउनसक्छन्?
१० हिजकियाह ईश्वरभीरु परिवारमा हुर्केका पक्कै होइनन्। तिनका पिता राजा आहाज अविश्वासी मूर्तिपूजक थिए। तिनले हिजकियाहको भाइ अर्थात् आफ्नै छोरा झूटा देउतालाई जिउँदै बलि चढाए! (२ राजा १६:३) तिनको खराब उदाहरणको बावजूद हिजकियाहले परमेश्वरको वचन अध्ययन गरेर ‘आफ्नो चालचलन शुद्ध राखे’ र मूर्तिपूजाको प्रभावमा परेनन्।—२ इतिहास २९:२.
११. हिजकियाहले हेर्दाहेर्दै तिनका अविश्वासी पिताले कस्तो अवस्था भोग्नुपऱ्यो?
११ हिजकियाह हुर्कंदै जाँदा तिनले आफ्नो मूर्तिपूजक पिताले गरेका राजकाजको स्थिति बुझे। यहूदाको चारैतिर शत्रुहरू थिए। अरामका राजा रसीन र इस्राएलका राजा पेकहले यरूशलेममाथि आक्रमण गर्न मतो गरे। (२ राजा १६:५, ६) अनि त्यतिबेला एदोमी र पलिश्तीहरू पनि थिए, तिनीहरूले यहूदामा आक्रमण गरेर कुनै कुनै यहूदी शहरहरूसमेत कब्जा गरे। (२ इतिहास २८:१६-१९) यस्तो संकटको बेला आहाजले के गरे? अराम विरुद्ध लड्न यहोवाको मदत माग्नुको साटो आहाजले अश्शूरका राजालाई मन्दिरको सुन, चाँदी सौगात पठाएर गुहार मागे। तर यसले यहूदामा स्थायी शान्ति ल्याएन।—२ राजा १६:६, ८.
१२. आफ्नो पिताले गरेका गल्तीहरू नदोहऱ्याउन हिजकियाहले के गर्नसक्थे?
१२ पछि आहाजको मृत्यु भयो र हिजकियाह २५ वर्षको उमेरमा राजा भए। (२ इतिहास २९:१) तिनी अलि सानै उमेरका थिए तर सफल राजा हुनुमा तिनको उमेर बाधक भएन। आफ्नो अविश्वासी पिताको चालचलन पछ्याउनुको साटो तिनले परमेश्वरको वचन पछ्याए। राजाहरूको लागि यस्तो विशेष आज्ञा दिइएको थियो: “जब उ आफ्नो राज-सिंहासनमा बस्छ, तब लेवी पूजाहारीहरूको जिम्मामा राखेको व्यवस्थाको नकल गरेर एउटा पुस्तकमा उतारोस्। त्यस व्यवस्थाका सबै कुरा र यी विधिहरू पालन गर्नलाई त्यो नकलको पुस्तक उसँगै रहोस्। औ उसले आफ्नो जीवनभरि त्यो पढ़ोस्, र उसले परमप्रभु आफ्ना परमेश्वरको डर मान्न सिकोस्।” (व्यवस्था १७:१८, १९) परमेश्वरको वचन दिनहुँ पढेर हिजकियाहले यहोवाप्रति भय राख्न सिक्न सक्थे र आफ्नो अभक्त पिताले गरेका गल्तीहरू दोहऱ्याउनु पर्दैनथ्यो।
१३. मसीहीले आध्यात्मिकताको खातिर गरेको काममा सफल हुन्छन् भनी कसरी पक्का हुनसक्छन्?
१३ इस्राएलका राजाहरूलाई मात्र होइन तर सबै ईश्वरभीरु इस्राएलीहरूलाई परमेश्वरको वचनमा ध्यान दिइरहन प्रोत्साहित गरिन्थ्यो। पहिलो भजनले एक आनन्दित मानिसको व्याख्या गर्छ। ऊ “परमप्रभुको व्यवस्थामानै . . . प्रसन्न रहन्छ, र दिनरात उहाँकै व्यवस्थामा त्यसले ध्यान दिन्छ।” (भजन १:१, २) त्यस्तो मानिसबारे भजनरचयिता यस्तो भन्छन्: “त्यसले जे गर्छ, त्यसमा त्यो सफल हुन्छ।” (भजन १:३) त्यसको विपरीत यहोवा परमेश्वरमा पूर्ण विश्वास नराख्ने मानिसबारे बाइबल यसो भन्छ: “दोहोरो मन भएको मानिस उसको सबै चाल-चलनमा चञ्चल हुन्छ।” (याकूब १:८) हामी सबै आनन्दित र सफल हुन चाहन्छौं। नियमित र अर्थपूर्ण बाइबल पढाइले हाम्रो आनन्दमा योगदान पुऱ्याउनसक्छ।
परमेश्वरको वचनले येशूलाई सँभाल्यो
१४. येशूले परमेश्वरको वचनप्रति कसरी माया देखाउनुभयो?
१४ एक चोटि येशूलाई, उहाँका आमाबाबुले यरूशलेमको मन्दिरमा शिक्षकहरूको माझमा बसिरहनुभएको भेट्टाए। परमेश्वरको व्यवस्थामा खप्पिस यी मानिसहरू “उहाँको समझ र जवाफहरूमा छक्क पर्दथिए”! (लूका २:४६, ४७) त्यतिबेला येशू १२ वर्षको मात्र हुनुहुन्थ्यो। हो, कलिलै उमेरदेखि उहाँ परमेश्वरको वचनलाई माया गर्नुहुन्थ्यो। पछि येशूले धर्मशास्त्र चलाउनुभएर दियाबललाई यसरी हप्काउनुभयो: “मानिस भोजनले मात्र होइन, तर परमेश्वरका मुखबाट निस्केको हरेक वचनले बाँच्तछ।” (मत्ती ४:३-१०) त्यसको तुरुन्तै पछि येशूले आफ्नो जन्मभूमि नासरतका मानिसहरूलाई धर्मशास्त्र चलाएर प्रचार गर्नुभयो।—लूका ४:१६-२१.
१५. अरूलाई प्रचार गर्ने सम्बन्धमा येशूले कसरी उदाहरण बसाल्नुभयो?
१५ येशूले आफ्नो शिक्षालाई जोड दिन बारम्बार परमेश्वरको वचन उद्धृत गर्नुभयो। श्रोताहरू “उहाँका शिक्षाले छक्क परे।” (मत्ती ७:२८) अनि छक्क नपर्ने पनि कुरै थिएन किनभने येशूको शिक्षा यहोवा परमेश्वरबाट थियो! येशूले यसो भन्नुभयो: “मेरो शिक्षा मेरै होइन, तर मलाई पठाउनेको हो। जसले आफ्नैतर्फबाट बोल्दछ, उसले आफ्नै महिमा खोज्दछ, तर जसले आफूलाई पठाउनेको महिमा खोज्दछ, त्यही सत्य हो, र उसमा अधार्मिकता हुँदैन।”—यूहन्ना ७:१६, १८.
१६. येशूले कुन हदसम्म परमेश्वरको वचनप्रति प्रेम देखाउनुभयो?
१६ भजन ११९ का लेखक र येशूमा भिन्नता छ, उहाँमा “अधार्मिकता” थिएन। उहाँ परमेश्वरको सिद्ध पुत्र हुनुहुन्थ्यो अनि उहाँ “मृत्युसम्मै आज्ञाकारी हुनुभयो, . . . मृत्युसम्मै आफूलाई होच्याउनुभयो।” (फिलिप्पी २:८; हिब्रू ७:२६) तर येशू सिद्ध हुनु भए तापनि उहाँले परमेश्वरको वचन अध्ययन गर्नुका साथै आज्ञा पालन गर्नुभयो। उहाँले आफ्नो निष्ठा कायम गर्नसक्नुको मुख्य कारणै त्यही थियो। आफ्नो मालिक पक्राउमा पर्नदेखि बचाउन पत्रुसले तरवार झिक्दा येशूले गाली गर्नुभयो र यस्तो प्रश्न गर्नुभयो: “तिमी के ठान्दछौ, के म आफ्ना पितालाई बिन्ती गर्नसक्तिनँ, र के उहाँले मलाई बाह्र पल्टनभन्दा बढ़ी स्वर्गदूतहरू अहिले जुटाइदिनुहुन्न र? हुनुपर्छ भनी लेखिएको शास्त्रको कुरा कसरी पूरा नभै रहनसक्छ?” (मत्ती २६:५३, ५४) हो, क्रूर अनि बेइज्जतीपूर्ण मृत्युबाट बच्नुभन्दा धर्मशास्त्रका भविष्यवाणीहरू पूरा हुनु उहाँको निम्ति बढी महत्त्वपूर्ण थियो। परमेश्वरको वचनप्रति कस्तो उल्लेखनीय प्रेम!
ख्रीष्टको अनुसरण गर्ने अरू व्यक्तिहरू
१७. प्रेरित पावलको निम्ति परमेश्वरको वचन कत्तिको महत्त्वपूर्ण थियो?
१७ प्रेरित पावलले आफ्ना सँगी मसीहीहरूलाई यसरी लेखे: “म ख्रीष्टमा भएझैं तिमीहरू पनि मेरो देखा-सिकी गर्ने होओ।” (१ कोरिन्थी ११:१) आफ्नो मालिकले जस्तै पावलले पनि धर्मशास्त्रलाई प्रेम गर्न सिके। तिनले यसो भने: “म मेरो अन्तस्करणले परमेश्वरको व्यवस्थामा आनन्दित हुन्छु।” (रोमी ७:२२) पावलले बारम्बार परमेश्वरको वचन उद्धरण गरे। (प्रेरित १३:३२-४१; १७:२, ३; २८:२३) आफ्नो प्रिय सँगी सेवक तिमोथीलाई अन्तिम निर्देशन दिंदा पावलले “परमेश्वरको जन[को]” दिनचर्यामा परमेश्वरको वचनले महत्त्वपूर्ण भूमिका खेल्नुपर्छ भनी जोड दिए।—२ तिमोथी ३:१५-१७.
१८. आधुनिक समयमा परमेश्वरको वचनप्रति आदर देखाएका एक जना व्यक्तिको उदाहरण बताउनुहोस्।
१८ वर्तमान समयमा पनि यहोवाका थुप्रै विश्वासी सेवकहरूले परमेश्वरको वचनप्रति येशूले जस्तै प्रेम गर्न सिकेका छन्। यस शताब्दीको सुरुतिर एक जवान मानिसले आफ्नो साथीबाट बाइबल पाए। त्यस अनमोल उपहारको प्रभावबारे तिनले यसो भने: “मैले आफ्नो जीवनमा हरेक दिन बाइबलको केही अंश पढ्नै पर्ने नियम बनाएँ।” त्यस जवान व्यक्ति थिए, फेड्रिक फ्रान्ज। बाइबलप्रतिको प्रेमले गर्दा नै तिनले यहोवाको सेवामा लामो अनि आनन्दायी सफल जीवन बिताए। बाइबलका कतिपय अध्यायहरू किताबमा नहेरी मुखस्त भन्नसक्ने योग्यताको निम्ति पनि तिनको सम्झना गरिन्छ।
१९. कसै कसैले ईश्वरतान्त्रिक सेवकाई स्कूलको साप्ताहिक बाइबल पढाइको तालिका कसरी बनाउँछन्?
१९ यहोवाका साक्षीहरू नियमित बाइबल पढाइलाई निकै महत्त्व दिन्छन्। हरेक हप्ता तिनीहरूको मसीही सभाहरूमध्ये एउटा, ईश्वरतान्त्रिक सेवकाई स्कूलको तयारीमा तिनीहरू बाइबलको केही अध्यायहरू पढ्ने गर्छन्। उक्त बाइबल पढाइको मुख्य बुँदाहरू सभामा छलफल गरिन्छ। केही साक्षीहरूले हप्तामा पढ्नुपर्ने बाइबल अध्यायलाई सात भागमा बाँडेर हरेक दिन अलि अलि पढ्न सजिलो मान्छन्। पढ्दै जाँदा तिनीहरूले मनन पनि गर्छन्। सम्भव भएको बेला तिनीहरू बाइबल आधारित साहित्यहरू पल्टाएर थप अनुसन्धान पनि गर्छन्।
२०. नियमित बाइबल पढाइको निम्ति समय निकाल्न के गर्नुपर्छ?
२० नियमित तवरमा बाइबल पढ्न तपाईंले अन्य गतिविधिहरूबाट ‘समय निकाल्नुपर्ने’ हुनसक्छ। (एफिसी ५:१६, NW) तथापि, जस्तोसुकै त्याग गर्नुपरे तापनि यसबाट प्राप्त हुने लाभ अतुलनीय हुन्छ। दिनहुँ बाइबल पढ्ने बानी बसाल्नुभएपछि परमेश्वरको वचनप्रति तपाईंको प्रेम बढ्दै जानेछ। अनि धेरै समय नबित्दै तपाईं पनि भजनरचयिताले जस्तै यसो भन्न उत्प्रेरित हुनुहुनेछ: “आहा! तपाईंको व्यवस्थालाई म कस्तो प्रेम गर्दछु! दिनभरि मेरो ध्यान त्यसैमा रहन्छ।” (भजन ११९:९७) त्यस्तो मनोभावले अहिले र भविष्यमा पनि निकै फाइदा पुऱ्याउनेछ र यसबारे अझ अर्को लेखमा छलफल गरिनेछ।
के तपाईंले सम्झनुभएको छ?
◻ भजन ११९ का लेखकले कसरी परमेश्वरको वचनप्रति गहिरो प्रेम प्रदर्शित गरे?
◻ येशू र पावलको नमुनाबाट हामीले कस्तो पाठ सिक्नसक्छौं?
◻ हामीले व्यक्तिगत तवरमा परमेश्वरको वचनलाई अझ बढी प्रेम गर्न के गर्नसक्छौं?
[पृष्ठ १०-मा भएका चित्रहरू]
विश्वासी राजाहरूले परमेश्वरको वचन नियमित तवरमा पढ्नुपर्थ्यो। के तपाईं पनि पढ्नुहुन्छ?
[पृष्ठ १२-मा भएको चित्र]
सानो केटो छँदा पनि येशूले परमेश्वरको वचनलाई प्रेम गर्नुहुन्थ्यो