“तिमीहरूको ज्योति . . . चम्कोस्”
१ हामी वरपरको संसार आध्यात्मिक तथा नैतिक अन्धकारमा छ। सत्यको ज्योतिले अन्धकारका “निष्फल कार्यहरू” उदांग पार्ने हुनाले यस्ता घातक ठोक्करहरूलाई पन्छाउन सकिन्छ। त्यसकारण, प्रेरित पावलले मसीहीहरूलाई यस्तो आग्रह गरे: “ज्योतिका सन्तानझैं हिंडडुल गर।”—एफि. ५:८, ११.
२ “ज्योतिको फल” संसारको अन्धकारभन्दा एकदमै फरक छ। (एफि. ५:९) यो फल खेती गर्न उदाहरणीय मसीही जीवन व्यतीत गरेर येशू ख्रीष्टले स्वीकार्नु हुने व्यक्ति बन्नुपर्छ। हामीले सच्चाइको खातिर ऐकान्तिक भक्ति, निष्कपटता र उत्साहजस्ता गुणहरू पनि प्रदर्शित गर्नैपर्छ। यी फलहरू हाम्रो दैनिक जीवन तथा सेवकाईमा प्रकट गर्नु आवश्यक छ।
३ हर अवसरमा चम्कने: येशूले आफ्ना चेलाहरूलाई भन्नुभयो: “तिमीहरूको ज्योति मानिसहरूका सामु चम्कोस्।” (मत्ती ५:१६) येशूको अनुकरण गर्दै हामी परमेश्वरको राज्य तथा उहाँका उद्धेश्यहरूबारे प्रचार गर्दै यहोवाको ज्योति चम्काउँछौं। घर घरको प्रचारमा, स्कूलमा, हाम्रा छिमेकीहरूकहाँ वा जुनसुकै अवसरमा हामी ज्योति भई चम्कन्छौं।—फिलि. २:१५.
४ कसै कसैले ज्योतिलाई घृणा गर्नेछ भनेर येशूले भन्नुभयो। (यूह. ३:२०) त्यसैकारण अधिकांश व्यक्तिहरूले ख्रीष्टको “महिमाको सुसमाचार” आफूमाथि नचम्कोस् भनी यस ज्योतिलाई इन्कार गर्दा हामी निरुत्साहित हुँदैनौं। (२ कोरि. ४:४) यहोवाले मानिसहरूको हृदय पढ्नुहुन्छ र आफ्ना जनहरूले अधर्मी काम गरेको उहाँ चाहनुहुन्न।
५ यहोवाका मार्गहरूलाई पछ्यायौं र आध्यात्मिक ज्योतिको आनन्द उठायौं भने हामी अरूहरूलाई पनि यो ज्योति चम्काउन सक्छौं। यदि हाम्रो आचारणद्वारा तिनीहरूले हामीसित “जीवनको ज्योति” छ भनी देखेमा तिनीहरू पनि ज्योतिवाहक हुन आवश्यक परिवर्तन गर्न प्रोत्साहित हुनसक्छन्।—यूह. ८:१२.
६ ज्योति चम्काएर हामी आफ्नो सृष्टिकर्ताको प्रशंसा गर्नुका साथै निष्कपट व्यक्तिहरूलाई उहाँलाई चिन्न अनि अनन्त जीवनको आशा प्राप्त गर्न मदत गर्छौं। (१ पत्रु. २:१२) हामीसँग ज्योति भएकोले अरूलाई आध्यात्मिक अन्धकारबाट निकाल्न र ज्योतिको फल फलाउन त्यसको सदुपयोग गरौं।