आफ्नो इलाकाका बहिराहरूलाई प्रचार गर्न सजग हुनुहोस्
१ यहोवा सबैलाई यस्तो हार्दिक निमन्त्रणा दिनुहुन्छ; “ ‘आउनुहोस्!’ . . . जसले मन गर्छ, त्यसले जीवनको पानी सित्तैंमा लेओस्।” (प्रका. २२:१७) यस निमन्त्रणलाई स्वीकार्ने बहिराहरूको संख्या धमाधम बढिरहेको छ। फलतः गत १३ वर्षभित्रमा संयुक्त राज्य अमेरिका शाखाअन्तर्गत मात्रै २७ वटा सांकेतिक भाषाको मण्डली र ४३ वटा सांकेतिक भाषा समूहहरू स्थापना भए।
२ संसारका धेरै देशहरूमा भएका सांकेतिक भाषाका मण्डली तथा समूहहरूले आफ्नो इलाकामा बस्ने बहिरा तथा सुस्त श्रवण भएका व्यक्तिहरूतर्फ प्रचारकार्य केन्द्रित गरेका छन् र निकै सफलता हासिल गरेका छन्। भारतमा पनि धेरै बहिराहरू छन् र तिनीहरूलाई भेटेर साक्षी दिनु बाँकी नै छ। देशभरि नै लाखौं सुस्त श्रवण भएका व्यक्तिहरू छन्। पक्कै पनि यस विशेष क्षेत्रमा वृद्धि र विकास हुने ठूलो सम्भावना छ!
३ तपाईं कसरी मदत दिनसक्नुहुन्छ? के तपाईंले सार्वजनिक स्थलहरूमा मानिसहरू सांकेतिक भाषामा कुरा गरिरहेको देख्नुभएको छ? के तपाईंको काम गर्ने ठाउँ वा स्कूलमा कुनै परिवारका सदस्य बहिरा छन्? आफ्नो दैनिक कामकुरा गर्दा बहिराहरू भेट्टाउन सजग हुनुहोस्। तर तिनीहरूले परमेश्वरको राज्य सन्देश सुन्नेछन् भनेर तपाईं कसरी पक्का गर्नसक्नुहुन्छ?
४ साक्षी दिने: एउटी अग्रगामी बहिनीले आफ्नो इलाकामा धेरै बहिराहरू भेटिन्। एक दिन सुपरमार्केटमा किनमेल गरिरहेको बेला एउटी बहिरी युवतीले तिनलाई एउटा सामान खोज्न मदत गर्नुहोस् भनी सानो टुक्रा कागजमा लेखेर दिइन्। उनलाई सामान खोज्न मदत गरिसकेपछि अग्रगामी बहिनीले त्यस इलाकाका बहिराहरूलाई मदत गर्न आफू सांकेतिक भाषा सिक्न चाहेको कुरा व्यक्त गर्दै उनलाई एउटा सानो चिट लेखेर दिइन्। त्यसपछि बहिरी युवतीले यस्तो लेखिन्, “तपाईं किन बहिराहरूलाई मदत गर्न चाहनुहुन्छ?” बहिनीले जवाफमा यस्तो लेखिन्: “म एक जना यहोवाको साक्षी हुँ र बहिराहरूलाई बाइबल बुझ्न मदत गर्न चाहन्छु। तपाईंले मलाई सांकेतिक भाषा सिकाउनु भएमा म तपाईंलाई बाइबल सिकाउन खुसी हुनेछु।” बहिनी यसो भन्छिन्: “जब तिनले ‘हुन्छ’ भनिन्, खुसीले मेरो खुट्टा भुइँमा रहेन।” बहिनी छ हप्तासम्म लगातार हरेक साँझ उक्त युवतीको घर गइन्। तिनले सांकेतिक भाषा सिकिन् र बहिरी युवतीले सत्य सिकेर बप्तिस्मा लिइन्!
५ तपाईंको इलाकाका बहिराहरूलाई आध्यात्मिक तवरमा मदत दिनसक्ने तपाईंको मण्डलीमा कोही पनि छैन भने के गर्ने? तपाईं कसरी मदत दिन सक्नुहुन्छ? त्यस परिवारका बाँकी सदस्यहरूको सुन्ने क्षमता राम्रो छ भने पुनःभेट गरी उनीहरूसँग कुरा गरे कसो होला? स्थानीय रूपमा तिनीहरूले कुन सांकेतिक भाषा प्रयोग गर्दैछन्, पत्ता लगाउनुहोस्। बहिराहरूलाई अझ प्रभावकारी ढंगमा सिकाउन केही प्रकाशकहरूले स्थानीय सांकेतिक भाषा सिकेका छन्। (प्रेरि. १६:९, १०) यहोवाको आशिष् र हाम्रो उत्कट प्रयासले धेरै असल परिणामहरू ल्याउनेछन्।
६ आफ्ना इलाकाका बहिराहरूलाई प्रचार गर्न सजग भएर तपाईं तिनीहरूलाई जीवनको पानी सित्तैंमा लिने अवसर प्रदान गर्न सक्नुहुन्छ।—मत्ती १०:११.