“पुरुषहरूमध्ये वरदान[ले]” उत्सुकतासाथ परमेश्वरको बगालको गोठालो गर्छन्
१ आफ्नो पुत्रमार्फत् “पुरुषहरूमध्ये वरदान” दिनुभएर यहोवाले कस्तो मायालु प्रबन्ध गर्नुभएको छ! (एफि. ४:८, ११, १२, NW) तिनीहरूको काँधमा परमेश्वरको बगालको सक्रियता र इच्छुकतासाथ गोठालो गर्नुको अलावा अन्य थुप्रै जिम्मेवारीहरू छन्। (१ पत्रु. ५:२, ३) हामी सबैले यस अत्यावश्यक प्रबन्धबाट लाभ उठाउँछौं। चाहे समस्याहरू भोगिरहेका होस् वा भर्खरै संगत गर्न थालेका, कमजोरीहरू होस् वा बाटो बिराएका, सबैको आध्यात्मिक हितमा यी पुरुषहरूले गहिरो व्यक्तिगत चासो लिन्छन्।—फिलि. २:४; १ थिस्स. ५:१२-१४.
२ डरलाग्दा विश्व घटनाहरूको कारण अन्योलको वातावरण सृजना हुँदा यी उपगोठालाहरू “बतासबाट लुक्ने ठाउँ, र आँधी–बेह्रीबाट आड़ लिने ठाउँ” साबित हुन्छन्। हामीहरू थकित हुँदा वा बोझले दबिंदा र सान्त्वनाको खाँचो महसुस गर्दा तिनीहरूले हामीलाई “सुखा ठाउँमा पानी भएको खोला” वा “बिरानो भूमिमा ठूलो चटानको छायाजस्तै” गरी स्फूर्ति दिन्छन्।—यशै. ३२:२.
३ निष्क्रियहरूलाई प्रोत्साहन दिने: प्राचीनहरूले अनियमित वा निष्क्रिय भएकाहरूलाई मण्डलीका सबै क्रियाकलापमा नियमित तवरमा भाग लिन मदत गर्नका लागि विशेष प्रयत्न गर्छन्। मायालु गोठालोरूपी भेटले धेरै जनालाई नियमित तवरमा मण्डलीका सभाहरू धाउन र फेरि क्षेत्र सेवकाईमा भाग लिने हदसम्मको आध्यात्मिक उन्नति गर्न मदत गरेको छ। प्राचीनहरूले गरेका यी सबै प्रयत्नहरूमा यहोवाको मायालु हेरचाह र येशू ख्रीष्टको सक्रिय नेतृत्व प्रतिबिम्बित हुन्छ। बाटो बिराएका वा हराएका भेडाहरूप्रति मायालु चासो देखाउने सन्दर्भमा उहाँले राम्रो उदाहरण बसाल्नुभयो।—मत्ती १८:१२-१४; यूह. १०:१६, २७-२९.
४ यी उपगोठालाहरूले कोही आध्यात्मिक तवरमा लर्खराइरहेका छन् कि भनेर त्यसका लक्षणहरू हेर्छन्। निरुत्साहको लक्षण देखाउने, नियमित तवरमा सभाहरूमा उपस्थित नहुने अथवा क्षेत्र सेवकाईमा सेलाउँदै जानेहरूलाई आध्यात्मिक मदत चाहिएको हुन सक्छ। पहिरन तथा कोरीबाटीमा सांसारिक प्रभाव देखाउन अथवा मण्डलीप्रति आलोचनात्मक विचारधारा राख्न सुरु गर्नेहरूलाई मदत गर्न प्राचीनहरू इच्छुक छन्। यस्ताहरूलाई यहोवाप्रतिको तिनीहरूको प्रेम पुनः जगाउन मदत दिनको लागि निष्कपट चासो र कोमल स्नेहसाथ ख्याल राख्ने यी निरीक्षकहरू ‘तिनीहरूको आफ्नै प्राणसमेत दिन’ इच्छुक हुन्छन्।—१ थिस्स. २:८.
५ स्वास्थ्य समस्या, आर्थिक समस्या वा पारिवारिक दबाउको कारण असाध्यै चिन्तित भएकोले विगतमा केही समर्पित मसीहीहरूले मण्डलीसँगको सम्पर्क टुटाएका छन् र आध्यात्मिक तवरमा निष्क्रिय भएका छन्। कठिन समयहरूमा यहोवाले आफ्ना सबै भेडाहरूको हेरचाह गर्नुहुन्छ र तिनीहरूलाई सम्हाल्नुहुन्छ भनेर यी प्राचीनहरूले आलोचनात्मक नभइकन आश्वासन दिन्छन्। (भज. ५५:२२; १ पत्रु. ५:७) सतर्क गोठालाहरूले आफ्नो बगाललाई तिनीहरू ‘परमेश्वरको नजिक आएमा, उहाँ तिनीहरूको नजिक आउनुहुनेछ’ र सान्त्वना तथा स्फूर्ति दिनुहुनेछ भनी महसुस गर्न मदत गर्न सक्छन्।—याकू. ४:८; भज. २३:३, ४.
६ अशक्तहरूलाई मुल्यवान् ठान्ने: अरूले बेवास्ता गर्न सक्ने मानिसहरूप्रति पनि मायालु उपगोठालाहरूले चासो देखाउँछन्। अधिकांश मण्डलीमा कोही न कोही अशक्त, स्याहर केन्द्रमा बस्ने अथवा कुनै तरिकामा असक्षम व्यक्तिहरू संगत गरिरहेका हुन्छन्। आफ्नो परिस्थितिको कारण तिनीहरूले पक्कै राज्य सन्देश घोषणा गर्ने काममा थोरै मात्र भाग लिन सक्छन्। तिनीहरूले आफूलाई भेट्न आउने मानिस, अरू बिरामी अथवा सुसारेहरूलाई मात्र साक्षी दिने मौका पाउलान्। तथापि, तिनीहरूले जे-जति गर्न सक्छन् समग्र प्रचार कार्यमा तिनीहरूले गरेको योगदानलाई मुल्यवान् ठानिन्छ। (मत्ती २५:१५) तिनीहरूले १५ मिनेट मात्रै साक्षी दिए पनि यसको रिपोर्ट दिनुपर्छ र तिनीहरू नियमित राज्य प्रकाशकको रूपमा गनिनेछन्।
७ वर्षको यस समयमा अर्थात् स्मरणार्थ उत्सवको दौडान यी “पुरुषहरूमध्ये वरदान” आफ्ना भाइहरूको आध्यात्मिक आवश्यकताप्रति विशेष सजग छन्। बाटो बिराएकाहरूलाई मण्डलीको न्यानो संगतिद्वारा प्राप्त हुने मानसिक आनन्द र शान्ति अनुभव गर्नको लागि मदत दिन प्राचीनहरूले प्रयत्न गर्ने यो साह्रै उपयुक्त समय हो! “विश्वासका घराना[का]” यिनीहरू मण्डलीका सभाहरूमा उपस्थित भएको र बाहिर सेवकाईमा छुटकाराको बलिदानमा आफ्नो विश्वास जाहेर गरेको देख्न पाउँदा हामी रमाउँछौं।—गला. ६:१०; लूका १५:४-७; यूह. १०:११, १४.