मिनिस्टेरियल ट्रेनिङ स्कूल —क्रियाकलापतर्फ डोऱ्याउने एउटा ठूलो ढोका
१ अगमवक्ता यर्मियामार्फत यहोवाले यस्तो अगमवाणी गर्नुभयो: “म तिनीहरूमाथि [मेरा मानिसहरूमाथि] गोठालाहरू खटाउनेछु जसले तिनीहरूको हेरचाह गर्नेछन्, तब तिनीहरू नता डराउनेछन्, न घबराउनेछन्, न तिनीहरूमध्ये कोही हराउनेछ।” (यर्मि. २३:४) आज यस किसिमको गोठालोरूपी काम सारा राष्ट्रका मानिसहरूमाझ पूरा गरिंदैछ। यो काम मण्डलीका हजारौं प्राचीनहरूले गरिरहेका छन्। साथै, शीतजस्तै अनगन्ती जवान मानिसहरूको एउटा दलले यहोवाको सेवामा आफूलाई अर्पण गरेका छन्। (भज. ११०:३) परमेश्वरका जनहरूको मण्डलीको लागि यी नम्र भाइहरू साँच्चै एउटा आशिष् हुन्! आध्यात्मिक अर्थमा जम्मा गर्ने काम जारी रहेकोले आफ्ना भाइहरूको सेवा गर्न आफूलाई उपलब्ध गराउने योग्य व्यक्तिहरूको अझै पनि खाँचो छ।
२ अविवाहित प्राचीन तथा सेवकाई सेवकहरूलाई प्रशिक्षण दिने एउटा उत्तम प्रबन्ध मिनिस्टेरियल ट्रेनिङ स्कूल हो। सन् १९८७ मा यो स्कूल प्रारम्भ भएदेखि यता लगभग १४० वटा देशमा जम्मा ९९९ वटा कक्षा सञ्चालन भइसकेका छन् र २२,००० भन्दा बढी विद्यार्थीहरूले यी कक्षाहरूबाट प्रशिक्षण पाइसकेका छन्। यी भाइहरूका लागि यो स्कूल “क्रियाकलापतर्फ डोऱ्याउने एउटा ठूलो ढोका” साबित भएको छ।—१ कोरि. १६:९, NW.
३ स्कूलको उद्देश्य: मिनिस्टेरियल ट्रेनिङ स्कूलको लक्ष्य यहोवाको संगठनमा जहाँ खाँचो छ त्यहाँ जिम्मेवारीहरू वहन गर्नको लागि योग्य पुरुषहरूलाई प्रशिक्षण दिनु र सुसज्जित पार्नु हो। प्रचारकार्य, बगालको हेरचाह र मण्डलीमा सिकाउने काममा नेतृत्व लिन स्कूलले उनीहरूलाई अझ दक्ष हुन मदत गर्छ। स्नातकपछि केही विद्यार्थीहरूलाई उनीहरूको आफ्नै देशमा नभए विदेशमा अग्रगामी अथवा परिभ्रमण निरीक्षकको रूपमा खटाइन्छ। अरूले चाहिं आफ्नै मण्डलीमा अथवा आफू बस्ने ठाउँको शाखाको इलाकाभित्र पर्ने आवश्यकता बढी भएको ठाउँमा सेवा गर्ने जिम्मेवारी पाउँछन्।
४ जम्मा आठ-हप्ते कोर्सको दौडान विद्यार्थीहरूले बाइबलको विस्तृत अध्ययन गर्छन्। उनीहरूले धेरैभन्दा धेरै बाइबल शिक्षाहरू लगायत बगालको हेरविचार गर्ने जिम्मेवारी तथा मसीही जीवन शैलीमा देखापर्ने समस्याहरू हल गर्न मदत गर्ने निर्देशनहरू होसियारीसाथ जाँच गर्छन्। उनीहरूले प्रशासनिक, न्यायिक अनि संगठनात्मक मामिलाहरूबारे धर्मशास्त्रमा के भनिएको छ भनेर पनि सिक्छन्। उनीहरूले जनसमक्ष बोल्ने सन्दर्भमा विशेष प्रशिक्षण पाउँछन् र आध्यात्मिक तवरमा प्रगति गर्न उनीहरूलाई व्यक्तिगत रूपमा मदत गरिन्छ।
५ आवश्यकताहरू: हो, यस स्कूलमा जान चाहने व्यक्तिहरूले पूरा गर्नुपर्ने आवश्यकताहरू पक्कै अलि कडा नै छन्। निवेदकहरूले प्राचीन अथवा सेवकाई सेवकहरूको रूपमा कम्तीमा पनि लगातार २ वर्ष सेवा गरिसकेको हुनै पर्छ। सबैजना अविवाहित तथा २३ देखि ५० वर्षबीचको हुनै पर्छ। निवेदकहरू अङ्ग्रेजी पढ्न, लेख्न र बोल्न सक्ने हुनै पर्छ र उनीहरूको स्वास्थ्य एकदम राम्रो हुनै पर्छ ताकि उनीहरूको विशेष हेरविचार गरिरहन वा उनीहरूका लागि विशेष भोजन बनाइरहन नपरोस्। नियमित अग्रगामी गरिरहेकाहरूलाई प्राथमिकता दिइन्छ।
६ मिनिस्टेरियल ट्रेनिङ स्कूलको लागि अग्रसर हुनेहरू नाम अथवा विशेष प्रतिष्ठाको लोभले नभई आफ्ना भाइहरूप्रतिको प्रेम र उनीहरूको सेवा गर्ने इच्छाद्वारा अभिप्रेरित भएको हुनुपर्छ। यस्तो राम्रो प्रशिक्षण पाइसकेपछि स्नातकहरूले आफूले सिकेको कुरा अरूको लाभको लागि चलाएको आशा गरिन्छ।—लूका १२:४८.
७ लाभहरू: आठ हप्तासम्म जोडतोडका साथ प्रशिक्षण चल्दा स्नातकहरू “असल सिद्धान्त र विश्वासको वचनमा पुष्ट” हुन्छन्। (१ तिमो. ४:६, NRV) यसले उनीहरूलाई आफूलाई खटाइएको मण्डली र क्षेत्रका भाइबहिनीलाई मदत गर्न र प्रोत्साहन दिन सक्षम बनाउँछ। मिनिस्टेरियल ट्रेनिङ स्कूलका स्नातकहरूलाई खटाइएको थुप्रै ठाउँमा क्षेत्रको गतिविधि बढेको छ; विशेष गरी जवानहरूलाई अग्रगामी सेवा गर्न प्रोत्साहन दिइएको छ र परमेश्वरका जनहरूसित संगत गरिरहेका थुप्रै नयाँ व्यक्तिहरूलाई व्यक्तिगत रूपमा धेरै ध्यान दिन सकिएको छ।
८ के तपाईं २३ देखि ५० वर्षबीचको अविवाहित प्राचीन अथवा सेवकाई सेवक हुनुहुन्छ? मिनिस्टेरियल ट्रेनिङ स्कूलको लागि निवेदन दिनुभए कसो होला? के तपाईं यहोवाकै सेवामा आफ्नो भविष्य निर्माण गर्ने विचार गरिरहनुभएको एक जना जवान भाइ हुनुहुन्छ? ‘क्रियाकलापतर्फ डोऱ्याउने यो ठूलो ढोकामा’ प्रवेश गर्नको लागि आफ्नो जीवनलाई सरल र बाधामुक्त राख्नुभए कसो होला? यसो गर्दा तपाईंले धेरै आनन्द र सन्तुष्टि प्राप्त गर्न सक्नुहुन्छ। निस्सन्देह, मिनिस्टेरियल ट्रेनिङ स्कूल स्नातकहरूका लागि मात्र होइन तर विश्वभरका परमेश्वरका जनहरूको मण्डलीको लागि पनि आशिष् साबित भएको छ।
[पृष्ठ ६-मा भएको पेटी]
प्रशिक्षणबाट उनीहरूले कसरी लाभ उठाए
“प्रशिक्षणले गर्दा सेवकाईमा मेरो साँच्चै सुधार हुनुका साथै धर्मशास्त्र चलाएर बुद्धिमानीसाथ गोठालो भेट गर्ने दक्षता पनि बढेको छ।”
“स्कूलले मलाई मण्डलीका विभिन्न जिम्मेवारीहरू निर्धक्क भई सँभाल्न मदत गरेको छ।”
“यसले परमेश्वरका प्रबन्धहरू र उहाँको संगठनबारे सोच्ने मेरो तरिकालगायत जीवनका प्रायजसो सबै पक्षलाई परिवर्तन गरिदिएको छ।”
“मैले पाएको प्रशिक्षणले आवश्यकता भएको ठाउँमा सेवा गर्न आफूलाई उपलब्ध गराउनुको खाँचोबारे बुझ्न मलाई मदत गऱ्यो।”