यहोवाका अतुलनीय गुणहरूप्रति कृतज्ञ हुन मदत दिनुहोस्
१ हामी प्रचार र चेला बनाउने काममा मानिसहरूलाई बाइबलको आधारभूत शिक्षा मात्र सिकाउँदैनौं। यहोवालाई चिन्न र उहाँका अतुलनीय गुणहरूप्रति कृतज्ञ हुन पनि मदत दिन्छौं। स्वच्छ हृदय भएकाहरूले परमेश्वरबारे साँचो कुरा थाह पाउँदा तिनीहरूको हृदयमा गहिरो छाप पर्छ र यहोवालाई ‘हर किसिमले खुश पार्नेगरी उहाँको योग्य चालमा’ चल्न तिनीहरू आफ्नो जीवनमा परिवर्तन गर्न उत्प्रेरित हुन्छन्।—कल. १:९, १०; ३:९, १०.
२ बाइबल अध्ययनको लागि नयाँ किताब: बाइबलले सिकाउँछ किताबले सुरुदेखि नै यहोवाका गुणहरूतिर ध्यान खिच्छ। पहिलो अध्यायले नै यी प्रश्नहरूको जवाफ दिन्छ: के परमेश्वरले तपाईंको साँच्चै चासो राख्नुहुन्छ? परमेश्वर कस्तो हुनुहुन्छ? अनि के परमेश्वरसित नजिक हुन सम्भव छ? त्यसै अध्यायमा यहोवाका गुणहरू पवित्रता (अनु. १०), न्याय, करुणा (अनु. ११), प्रेम (अनु. १३), शक्ति (अनु. १६), कृपा, अनुग्रह, क्षमाशीलता, धीरज र वफादारिताबारे (अनु. १९) बताइएको छ। अनुच्छेद २० को अन्तिम वाक्य यस्तो छ: “तपाईंले यहोवाबारे जति धेरै सिक्नुहुन्छ तपाईंलाई उहाँ त्यति नै वास्तविक लाग्नेछ र उहाँलाई प्रेम गर्ने तथा उहाँसित नजिक हुने थप कारण पाउनुहुनेछ।”
३ बाइबल विद्यार्थीलाई यहोवाको नजिक हुन मदत दिनको लागि हामी कसरी बाइबलले सिकाउँछ किताब चलाउन सक्छौं? यहोवाको कुनै गुणबारे बताइएको अनुच्छेद छलफल गरिसकेपछि विद्यार्थीलाई यस्तो प्रश्न सोध्न सक्नुहुन्छ: “यस अनुच्छेदमा परमेश्वर कस्तो हुनुहुन्छ भनेर बताइएको छ?” वा “परमेश्वरले तपाईंको चासो राख्नुहुन्छ भनेर यस अनुच्छेदमा कसरी देखाइएको छ?” यसरी बाइबल अध्ययनको दौडान समय-समयमा यस्ता प्रश्नहरू सोधेर हामी विद्यार्थीलाई उनीहरूले सिकिरहेका कुरामा मनन गर्न सिकाउँछौं र यहोवाका अतुलनीय गुणहरूप्रति कृतज्ञ हुन मदत दिन्छौं।
४ पुनरावृत्ति पेटी चलाउनुहोस्: प्रत्येक अध्याय अध्ययन गरिसकेपछि त्यसको अन्तमा दिइएको “बाइबलले के सिकाउँछ” पेटीका बुँदाहरूबाट विद्यार्थीलाई आफ्नै शब्दमा टिप्पणी गर्न लगाउनुहोस्। त्यस पेटीमा दिइएका बाइबल पदहरूको महत्त्व बुझाउनुहोस्। विद्यार्थीलाई मनको कुरा भन्न लगाउन यस्तो प्रश्न सोध्न सक्नुहुन्छ: “यस बुँदामा बाइबलले सिकाउने कुरा तपाईंलाई कस्तो लाग्यो?” यसो गरेर तपाईंले उक्त अध्यायको मुख्य बुँदालाई जोड दिइरहनुभएको त हुन्छ नै, त्यसको अलावा विद्यार्थीले वास्तवमा के विश्वास गर्छन्, त्यो पनि बुझ्न मदत पाइरहनुभएको हुनेछ। यसो गर्दा विद्यार्थीले यहोवासित सम्बन्ध गाँस्न मदत पाउनेछन्।