ख्रिष्टियन जीवन
“पावलले परमेश्वरलाई धन्यवाद दिए र हौसला पाए”
पावल आउँदै गरेको खबर पाएपछि रोममा भएको मण्डलीका केही भाइहरू लगभग ६४ किलोमिटर यात्रा गरेर तिनलाई भेट्न गए। उनीहरूको निःस्वार्थ प्रेमले पावलमा कस्तो प्रभाव पाऱ्यो? “उनीहरूलाई देखेपछि पावलले परमेश्वरलाई धन्यवाद दिए र हौसला पाए।” (प्रे २८:१५) हुनत पावल आफूले भ्रमण गरेको मण्डलीहरूलाई प्रोत्साहन दिने व्यक्तिको रूपमा चिनिन्थे तर अहिले कैदी हुँदा भने तिनी आफैले अरूबाट प्रोत्साहन पाए।—२को १३:१०.
आज क्षेत्रीय निरीक्षकहरू दाजुभाइ दिदीबहिनीलाई प्रोत्साहन दिन एउटा मण्डलीबाट अर्को मण्डलीमा भ्रमण गर्ने गर्छन्। परमेश्वरका अरू जनहरूजस्तै तिनीहरू पनि कहिलेकाहीँ थकित, चिन्तित र निरुत्साहित महसुस गर्छन्। अर्को पटक क्षेत्रीय निरीक्षक र तिनकी पत्नी तपाईँको मण्डलीमा भ्रमण गर्न आउँदा तपाईँ तिनीहरूलाई कसरी हौसला दिन सक्नुहुन्छ, ताकि तपाईँहरू दुवैले “एकअर्कालाई प्रोत्साहन दिन” सकून्?—रोमी १:११, १२.
क्षेत्र सेवाको सभामा उपस्थित हुनुहोस्। भ्रमणको हप्ताको दौडान हुने विभिन्न गतिविधिबाट पूरापूर लाभ उठाउन प्रकाशकहरूले गरेका त्यागहरू देख्दा क्षेत्रीय निरीक्षकले प्रोत्साहन पाउँछन्। (१थि १:२, ३; २:२०) भ्रमण हुने महिनामा सहायक अग्रगामी गर्न सकिन्छ कि भनेर विचार गर्नुहोस्। क्षेत्रीय निरीक्षक र तिनकी पत्नीसित सँगै प्रचारमा जान वा तिनीहरूमध्ये कसैलाई आफ्नो बाइबल अध्ययनमा लैजान सक्नुहुन्छ कि? तिनीहरू नयाँ प्रकाशकहरू वा आफूलाई राम्रोसित प्रचार गर्न आउँदैन भनेर महसुस गर्ने प्रकाशकहरू लगायत सबै भाइबहिनीसित प्रचारमा जान पाउँदा रमाउँछन्।
अतिथि-सत्कार गर्नुहोस्। के तपाईँ क्षेत्रीय निरीक्षकहरूलाई बास दिन वा खाना खानको लागि बोलाउन सक्नुहुन्छ? यसरी तपाईँ क्षेत्रीय निरीक्षक र तिनकी पत्नीलाई प्रेम गरेको देखाउन सक्नुहुन्छ। तिनीहरू तपाईँबाट धेरै कुराको आशा गर्दैनन्।—लुका १०:३८-४२.
तिनले दिने निर्देशन र सल्लाह सुन्नुहोस् अनि लागू गर्नुहोस्। हामीले यहोवाको सेवामा प्रगति गर्न सकौँ भनेर क्षेत्रीय निरीक्षक हामीलाई मायालुपूर्वक मदत गर्छन्। कहिलेकाहीँ तिनले कडा सल्लाह दिनुपर्ने पनि हुन सक्छ। (१को ५:१-५) हामी आज्ञाकारी भयौँ र अधीनमा बस्यौँ भने तिनी खुसी हुनेछन्।—हिब्रू १३:१७.
कृतज्ञता व्यक्त गर्नुहोस्। क्षेत्रीय निरीक्षक र तिनकी पत्नीको प्रयासले गर्दा तपाईँले कस्तो लाभ उठाउनुभएको छ, तिनीहरूलाई बताउनुहोस्। तपाईँ तिनीहरूलाई भेटेरै त्यो कुरा बताउन सक्नुहुन्छ वा नोट अथवा कार्ड लेखेर दिन पनि सक्नुहुन्छ।—कल ३:१५.