अध्ययन लेख ३३
गीत ४ “यहोवा मेरो गोठालो हुनुहुन्छ”
यहोवा तपाईँलाई प्रेम गर्नुहुन्छ भन्ने कुरामा ढुक्क हुनुहोस्
“मैले तिमीलाई अटल प्रेम देखाएर आफूतिर खिचेको छु।”—यर्मि. ३१:३.
सिक्न सकिने कुरा
यहोवा हामीलाई प्रेम गर्नुहुन्छ भनेर किन ढुक्क हुनुपर्छ अनि त्यस कुरामा विश्वस्त भइरहन कस्तो प्रयास गर्नुपर्छ?
१. तपाईँले किन यहोवालाई आफ्नो जीवन समर्पण गर्नुभयो? (चित्र पनि हेर्नुहोस्।)
तपाईँले यहोवालाई आफ्नो जीवन समर्पण गर्नुभएको क्षण सम्झनुहोस् त! तपाईँले किन त्यस्तो निर्णय गर्नुभयो? किनभने तपाईँले यहोवालाई चिन्नुभयो र प्रेम गर्न थाल्नुभयो। त्यसैले अबदेखि उहाँको सेवालाई नै जीवनमा पहिलो स्थान दिने प्रतिज्ञा गर्नुभयो। साथै आफ्नो सारा हृदयले, सारा ज्यानले, सारा दिमागले र सारा बलले जिन्दगीभर उहाँलाई प्रेम गरिरहनेछु भनेर पनि वाचा गर्नुभयो। (मर्कु. १२:३०) त्यसदेखि यता यहोवाप्रतिको तपाईँको प्रेम झन्झन् बढ्दै गएको छ। त्यसोभए तपाईँलाई कसैले यो प्रश्न सोध्यो भने कस्तो जवाफ दिनुहुन्छ, “के तपाईँ साँच्चै यहोवालाई प्रेम गर्नुहुन्छ?” तपाईँ तुरुन्तै यसो भन्नुहुन्छ होला, “गर्छु। म सबैभन्दा धेरै यहोवालाई प्रेम गर्छु।”
यहोवालाई आफ्नो जीवन समर्पण गरेर बप्तिस्मा गर्दा तपाईँ उहाँलाई कत्ति प्रेम गर्नुहुन्थ्यो, के तपाईँले सम्झनुभएको छ? (अनुच्छेद १ हेर्नुहोस्)
२-३. हामी कुन कुरामा ढुक्क भएको यहोवा चाहनुहुन्छ अनि यस लेखमा हामी के छलफल गर्नेछौँ? (यर्मिया ३१:३)
२ तर कसैले तपाईँलाई यो प्रश्न सोध्यो भने नि, “यहोवाले तपाईँलाई प्रेम गर्नुहुन्छ भन्ने कुरामा के तपाईँ पक्का हुनुहुन्छ?” आफू यहोवाको प्रेम पाउन लायकको छैनँ जस्तो लागेकोले तपाईँलाई यो प्रश्नको जवाफ दिन गाह्रो लाग्छ कि? हुर्कँदै गर्दा माया नपाएकी एउटी बहिनीले यसो भनिन्: “म यहोवालाई प्रेम गर्छु। यसमा मलाई कुनै शङ्का छैन। तर यहोवा मलाई प्रेम गर्नुहुन्छ भन्ने कुरामा चाहिँ अक्सर शङ्का लाग्छ।” तपाईँलाई पनि त्यस्तै लाग्छ कि? त्यसोभए वास्तवमा यहोवा तपाईँबारे कस्तो महसुस गर्नुहुन्छ, विचार गरौँ।
३ यहोवा तपाईँलाई प्रेम गर्नुहुन्छ। यो कुरामा तपाईँ विश्वस्त भएको उहाँ चाहनुहुन्छ। (यर्मिया ३१:३ पढ्नुहोस्।) वास्तवमा उहाँले नै तपाईँलाई आफूतिर खिच्नुभएको हो। तपाईँले यहोवालाई आफ्नो जीवन समर्पण गरेर बप्तिस्मा गर्नुभएपछि उहाँबाट एउटा विशेष उपहार पाउनुभयो। त्यो हो, उहाँको अटल प्रेम। हो, यहोवा तपाईँलाई असाध्यै प्रेम गर्नुहुन्छ र तपाईँलाई कहिल्यै त्याग्नुहुन्न। उहाँ आफ्ना उपासकहरूलाई “अनमोल सम्पत्ति” ठान्नुहुन्छ। (मला. ३:१७, फुटनोट) त्यसमा तपाईँ पनि पर्नुहुन्छ। तपाईँले पनि प्रेषित पावलले जस्तै महसुस गरेको यहोवा चाहनुहुन्छ। यहोवाको प्रेममा ढुक्क भएकोले पावलले यस्तो लेखे: “म विश्वस्त छु, न मृत्युले न जीवनले न स्वर्गदूतहरूले न सरकारहरूले न अहिले यहाँ भएका कुराहरूले न त पछि आउने कुराहरूले न शक्तिले न उचाइले न गहिराइले न त अरू कुनै सृष्टिले हाम्रा प्रभु ख्रिष्ट येसुमार्फत व्यक्त भएको परमेश्वरको प्रेमबाट हामीलाई अलग पार्न सक्नेछ।” (रोमी ८:३८, ३९) यस लेखमा यहोवा हामीलाई प्रेम गर्नुहुन्छ भन्ने कुरामा हामी किन विश्वस्त हुनुपर्छ र हामी त्यस कुरामा कसरी विश्वस्त हुन सक्छौँ भनेर छलफल गर्नेछौँ।
यहोवा हामीलाई प्रेम गर्नुहुन्छ भन्ने कुरामा किन ढुक्क हुनुपर्छ?
४. सैतानको एउटा धूर्त चाल के हो र हामी त्यसविरुद्ध कसरी लड्न सक्छौँ?
४ यहोवा हामीलाई प्रेम गर्नुहुन्छ भन्ने कुरामा ढुक्क भयौँ भने हामी सैतानको एउटा “धूर्त चाल”-विरुद्ध लड्न सक्छौँ। (एफि. ६:११, फुटनोट) हामीलाई यहोवाको सेवा गर्नदेखि रोक्न सैतानले जे पनि गर्छ। सैतानले चाल्ने एउटा धूर्त चाल हो, यहोवा हामीलाई प्रेम गर्नुहुन्न भन्ने झूट। हामीलाई यहोवादेखि अलग बनाउन सैतानले मौका खोजिरहन्छ। कहिलेकाहीँ हामी विगतको तीतो अनुभव, अहिले भोगिरहेको चुनौती वा भविष्यको चिन्ताले गर्दा भावनात्मक तवरमा असाध्यै कमजोर हुन्छौँ। सैतानले अक्सर त्यस्तै बेला हामीलाई आक्रमण गर्छ। (हितो. २४:१०) बाइबलमा सैतानलाई सिंहसित तुलना गरिएको छ। सिंहले निस्सहाय जनावरलाई आफ्नो सिकार बनाउँछ। त्यसरी नै सैतानले पनि हामीले निस्सहाय महसुस गरिरहेको बेला हामीलाई आक्रमण गर्छ। तर यहोवा हामीलाई प्रेम गर्नुहुन्छ भन्ने कुरामा विश्वस्त भइरह्यौँ भने सैतान र त्यसका धूर्त चालहरूविरुद्ध ‘खडा भइरहन’ सक्नेछौँ।—१ पत्रु. ५:८, ९; याकु. ४:७.
५. यहोवा हामीलाई प्रेम र कदर गर्नुहुन्छ भनेर महसुस गर्नु किन महत्त्वपूर्ण छ?
५ यहोवा हामीलाई प्रेम गर्नुहुन्छ भन्ने कुरामा ढुक्क भयौँ भने हामी उहाँसित अझ नजिक हुन सक्छौँ। यो कुरा बुझ्न हामी कसरी सृष्टि भएका छौँ, विचार गरौँ। यहोवाले हामीलाई अरूलाई प्रेम गर्ने र अरूबाट पनि प्रेम पाउने चाहनासहित सृष्टि गर्नुभएको छ। त्यसैले हामीलाई प्रेम गर्ने व्यक्तिलाई हामी स्वतः प्रेम गर्छौँ। यहोवा हामीलाई प्रेम गर्नुहुन्छ भनेर जत्ति धेरै महसुस गर्छौँ, उहाँलाई प्रेम गर्न त्यत्ति नै उत्प्रेरित हुन्छौँ। (१ युह. ४:१९) उहाँप्रतिको हाम्रो प्रेम बढ्दै जाँदा हामीप्रतिको उहाँको प्रेम पनि बढ्दै जानेछ। बाइबल यसो भन्छ: “परमेश्वरसित नजिक होओ र उहाँ तिमीहरूसित नजिक हुनुहुनेछ।” (याकु. ४:८) त्यसोभए यहोवा हामीलाई प्रेम गर्नुहुन्छ भन्ने कुरामा हामी कसरी पक्का हुन सक्छौँ?
यहोवा हामीलाई प्रेम गर्नुहुन्छ भन्ने कुरामा ढुक्क हुन के गर्नुपर्छ?
६. यहोवा हामीलाई प्रेम गर्नुहुन्छ भन्ने कुरामा ढुक्क हुन के गर्न सक्छौँ?
६ तोकेरै अनि निरन्तर प्रार्थना गर्नुहोस्। (लुका १८:१; रोमी १२:१२) यहोवा तपाईँबारे कस्तो महसुस गर्नुहुन्छ भनेर बुझ्न उहाँसित मदत माग्नुहोस्। त्यसको लागि तपाईँले हरेक दिन धेरै चोटि प्रार्थना गर्नुपर्ने हुन सक्छ। कहिलेकाहीँ आफू बेकामको छु जस्तो लाग्दा यहोवाको प्रेममा शङ्का लाग्न सक्छ। तर यो कुरा कहिल्यै नबिर्सनुहोस्, यहोवा तपाईँको हृदयभन्दा महान् हुनुहुन्छ। (१ युह. ३:१९, २०) तपाईँ आफूलाई जत्ति राम्ररी चिन्नुहुन्छ, यहोवा तपाईँलाई त्योभन्दा अझ राम्ररी चिन्नुहुन्छ। तपाईँले आफूमा देख्न नसक्नुभएका कुराहरू पनि उहाँ देख्न सक्नुहुन्छ। (१ समु. १६:७; २ इति. ६:३०) त्यसैले आफ्नो भावना यहोवालाई ‘पोखाउनुहोस्’ र उहाँ तपाईँलाई प्रेम गर्नुहुन्छ भन्ने कुरामा ढुक्क हुन मदत माग्नुहोस्। (भज. ६२:८) त्यसपछि प्रार्थनाअनुसारै कदम चाल्न निम्न सुझावहरू लागू गर्नुहोस्।
७-८. भजनको किताबले यहोवा हामीलाई प्रेम गर्नुहुन्छ भन्ने कुरामा कसरी ढुक्क बनाउँछ?
७ यहोवाले भन्नुभएको कुरामा विश्वास गर्नुहोस्। बाइबल उहाँको प्रेरणाद्वारा लेखिएको हो। त्यसैले बाइबलमा उहाँबारे भनिएका कुराहरूमा हामी विश्वास गर्न सक्छौँ। दाउदले यहोवाबारे मनै छुने तरिकामा यसरी वर्णन गरे: “यहोवा टुटेका हृदय भएकाहरूको नजिक हुनुहुन्छ र निराश भएकाहरूलाई उहाँले बचाउनुहुन्छ।” (भज. ३४:१८) निराश हुँदा तपाईँलाई एक्लो महसुस हुन सक्छ। तर त्यस्तो बेला तपाईँलाई उहाँको साथ अझ धेरै चाहिन्छ भनेर उहाँलाई थाह छ। त्यसैले यहोवाले त्यस्तो अवस्थामा तपाईँको नजिक हुने प्रतिज्ञा गर्नुभएको छ। अर्को एउटा भजनमा दाउदले यस्तो लेखे: “मेरो आँसु तपाईँको मशकमा जम्मा गरिदिनुहोस्।” (भज. ५६:८) यहोवा तपाईँमा गहिरो चासो राख्नुहुन्छ। त्यसैले तपाईँको दुःख-पीडा उहाँ देख्नुहुन्छ र बुझ्नुहुन्छ। मरुभूमिमा यात्रा गर्ने व्यक्तिको लागि आफूले मशकमा बोकेको एक-एक थोपा पानी बहुमूल्य भएझैँ तपाईँले बगाउनुभएको एक-एक थोपा आँसु यहोवाको लागि बहुमूल्य छ। भजन १३९:३ मा दाउदले यहोवाबारे यसो भने: “मेरा सबै चाल तपाईँलाई राम्ररी थाह छ।” यहोवा तपाईँको सबै चाल देख्नुहुन्छ तर तपाईँले गर्नुहुने असल काममा विशेष ध्यान दिनुहुन्छ। (हिब्रू ६:१०) किन? किनभने उहाँलाई खुसी बनाउन तपाईँले गर्नुहुने हरेक प्रयासको उहाँ मोल गर्नुहुन्छ।a
८ यस्ता सान्त्वनादायी पदहरूमार्फत यहोवा हामीलाई यसो भन्दै हुनुहुन्छ: “म तिमीलाई असाध्यै माया गर्छु र तिम्रो ख्याल राख्छु भन्ने कुरामा ढुक्क होऊ!” तर अगाडि छलफल गरेझैँ सैतानले यहोवा तपाईँलाई प्रेम गर्नुहुन्न भन्ने झूट फैलाएको छ र तपाईँले त्यो झूट पत्याएको चाहन्छ। त्यसैले यहोवाको प्रेममा शङ्का लाग्दा एकैछिन रोकिनुहोस् र आफैलाई सोध्नुहोस्, “म कसको कुरामा विश्वास गर्छु? ‘झूटको बुबाको’ कि ‘सत्यका परमेश्वरको’?”—युह. ८:४४; भज. ३१:५.
९. यहोवाले उहाँलाई प्रेम गर्नेहरूसित कस्तो प्रतिज्ञा गर्नुभएको छ? (प्रस्थान २०:५, ६)
९ यहोवा उहाँलाई प्रेम गर्नेहरूप्रति कस्तो महसुस गर्नुहुन्छ, त्यसमा मनन गर्नुहोस्। यहोवाले मोसा र इस्राएलीहरूलाई के भन्नुभयो, विचार गर्नुहोस्। (प्रस्थान २०:५, ६ पढ्नुहोस्।) उहाँलाई प्रेम गर्नेहरूलाई उहाँले अटल प्रेम देखाइरहने प्रतिज्ञा गर्नुभयो। त्यसैले हामीले उहाँलाई प्रेम गर्दा उहाँले हामीलाई प्रेम नगर्ने त कुरै आउँदैन। (नहे. १:५) त्यसैले यहोवाको प्रेममा शङ्का लाग्दा एकैछिन रोकिनुहोस् र आफैलाई सोध्नुहोस्, ‘के म यहोवालाई प्रेम गर्छु?’ यदि तपाईँ उहाँलाई प्रेम गर्नुहुन्छ र उहाँलाई खुसी बनाउन सक्दो गर्दै हुनुहुन्छ भने उहाँ पनि तपाईँलाई प्रेम गर्नुहुन्छ भनेर ढुक्क हुनुहोस्। (दानि. ९:४; १ कोरि. ८:३) हामीले यहोवाको प्रेम र वफादारीमा कहिल्यै शङ्का गर्नुपर्दैन।
१०-११. यहोवा तपाईँले फिरौतीको बलिदानप्रति कस्तो दृष्टिकोण राखेको चाहनुहुन्छ? (गलाती २:२०)
१० फिरौतीको बलिदानमा मनन गर्नुहोस्। फिरौतीको बलिदान यहोवाले मानिसजातिलाई दिनुभएको सबैभन्दा ठूलो उपहार हो। (युह. ३:१६) के यो उपहार तपाईँको लागि पनि हो? पक्कै हो। प्रेषित पावलबारे विचार गरौँ। ख्रिष्टियन बन्नुअघि तिनले गम्भीर पापहरू गरेका थिए। साथै तिनले त्रुटिपूर्ण झुकावविरुद्ध सङ्घर्ष गरिरहनुपऱ्यो। (रोमी ७:२४, २५; १ तिमो. १:१२-१४) तैपनि तिनले फिरौतीको बलिदानलाई यहोवाले तिनलाई नै दिनुभएको उपहार ठाने। (गलाती २:२० पढ्नुहोस्।) तिनले परमेश्वरको प्रेरणा पाएर यी शब्दहरू लेखेका थिए अनि बाइबलमा लेखिएका सबै कुरा हाम्रै शिक्षाका लागि हुन्। (रोमी १५:४) पावलका शब्दहरूबाट यहोवा हामीले फिरौतीको बलिदानप्रति कस्तो दृष्टिकोण राखेको चाहनुहुन्छ भनेर बुझ्न सक्छौँ। हो, फिरौतीको बलिदान यहोवाले तपाईँलाई दिनुभएको उपहार हो। तपाईँले यस्तो दृष्टिकोण राख्नुभयो भने यहोवा तपाईँलाई प्रेम गर्नुहुन्छ भन्ने कुरामा विश्वस्त हुन सक्नुहुन्छ।
११ यहोवाले येसुलाई हाम्रो निम्ति ज्यान दिन पठाउनुभएकोमा हामी कृतज्ञ छौँ। तर येसु पृथ्वीमा आउनुको अर्को कारण पनि थियो। त्यो हो, यहोवाबारे सत्य कुरा बताउन। (युह. १८:३७) त्यसमा यहोवा हामीबारे कस्तो महसुस गर्नुहुन्छ भन्ने सत्य पनि समावेश छ।
यहोवा हामीलाई प्रेम गर्नुहुन्छ भन्ने कुरामा ढुक्क हुन येसुले कसरी मदत गर्नुभयो?
१२. येसुले यहोवाबारे भन्नुभएको कुरामा हामी किन विश्वास गर्न सक्छौँ?
१२ येसुले मानिसहरूलाई यहोवा कस्तो परमेश्वर हुनुहुन्छ भनेर बताउनुभयो। (लुका १०:२२) येसुले यहोवाबारे भन्नुभएको कुरामा हामी विश्वास गर्न सक्छौँ। किनभने उहाँले स्वर्गमा यहोवासित युगौँयुग बिताउनुभएको थियो। (कल. १:१५) यहोवा आफ्ना वफादार उपासकहरूलाई कत्ति धेरै प्रेम गर्नुहुन्छ भनेर येसुले देख्नुभएको छ। यो कुरा उहाँ आफैले पनि अनुभव गर्नुभएको छ। त्यसोभए यहोवाको प्रेममा ढुक्क हुन येसुले हामीलाई कसरी मदत गर्नुभएको छ?
१३. हामीले यहोवालाई कुन रूपमा हेरेको येसु चाहनुहुन्छ?
१३ हामीले यहोवालाई कुन रूपमा हेरेको येसु चाहनुहुन्छ? मूल भाषामा हेर्ने हो भने सुसमाचारका पुस्तकहरूमा येसुले यहोवालाई १६० भन्दा धेरै चोटि “बुबा” भनेर सम्बोधन गर्नुभयो। चेलाहरूसित कुरा गर्नुहुँदा उहाँले “तिमीहरूका बुबा” वा “स्वर्गमा बस्नुहुने तिमीहरूका बुबा” जस्ता अभिव्यक्ति प्रयोग गर्नुभयो। (मत्ति ६:८, २६) येसु पृथ्वीमा आउनुअघि यहोवाका उपासकहरूले उहाँलाई सम्बोधन गर्दा “सर्वशक्तिमान् परमेश्वर,” “सर्वोच्च परमेश्वर” र “महान् सृष्टिकर्ता” जस्ता पदवीहरू प्रयोग गरे। तर येसुले भने सरल अनि दिनदिनै प्रयोग गरिने “बुबा” भन्ने अभिव्यक्ति चलाउनुभयो। यसबाट यहोवा हामीले कस्तो महसुस गरेको चाहनुहुन्छ भनेर बुझ्न सक्छौँ। जसरी एक जना बच्चाले आफ्नो बुबासित नजिक महसुस गर्छ, यहोवा पनि हामीले त्यस्तै महसुस गरेको चाहनुहुन्छ। आउनुहोस्, येसुले “बुबा” भन्ने अभिव्यक्ति प्रयोग गर्नुभएको दुई वटा विवरण विचार गरौँ।
१४. हामी प्रत्येक नै यहोवाको लागि बहुमूल्य छौँ भनेर येसुले कसरी देखाउनुभयो? (मत्ति १०:२९-३१) (चित्र पनि हेर्नुहोस्।)
१४ पहिलो विवरण हामी मत्ति १०:२९-३१ मा पाउँछौँ। (पढ्नुहोस्।) भँगेरा एकदमै सानो चरा हो र त्यसले कहिल्यै यहोवालाई प्रेम गर्न वा उहाँको उपासना गर्न सक्दैन। तर एउटा भँगेरा भुईँमा झरेको पनि उहाँलाई थाह हुन्छ। एउटा सानो चराको समेत यहोवा यत्ति धेरै मोल गर्नुहुन्छ र ख्याल राख्नुहुन्छ। त्यसोभए उहाँलाई प्रेम गर्ने र उहाँको उपासना गर्ने हामी प्रत्येकको झन् कत्ति धेरै ख्याल राख्नुहुन्छ होला! येसुले हाम्रो शिरको केशसमेत सबै गनिएका छन् पनि भन्नुभयो। मतलब, यहोवा हाम्रो यत्ति सानो कुरा पनि याद गर्नुहुन्छ। हामी प्रत्येक नै स्वर्गमा बस्नुहुने हाम्रो बुबा यहोवाको लागि बहुमूल्य छौँ। हामी यो कुरामा ढुक्क भएको येसु चाहनुहुन्छ।
यहोवा एउटा भँगेरा भुईँमा झरेको समेत याद गर्नुहुन्छ। झन् तपाईँ त उहाँको वफादार सेवक हुनुहुन्छ, त्यसोभए उहाँ तपाईँको कत्ति धेरै मोल गर्नुहुन्छ होला! (अनुच्छेद १४ हेर्नुहोस्)
१५. युहन्ना ६:४४ बाट हाम्रो बुबा यहोवाबारे के सिक्न सक्छौँ?
१५ अब येसुले “बुबा” भन्ने अभिव्यक्ति प्रयोग गर्नुभएको दोस्रो विवरण विचार गरौँ। (युहन्ना ६:४४ पढ्नुहोस्।) बुबा यहोवाले तपाईँलाई उहाँतर्फ मायालु तरिकामा खिच्नुभयो। किन? किनभने उहाँले तपाईँको उचित मनसाय देख्नुभयो। (प्रेषि. १३:४८) येसुले युहन्ना ६:४४ का शब्दहरू भन्नुहुँदा उहाँले यर्मिया ३१:३ मा लेखिएका शब्दहरूलाई सङ्केत गर्नुभएको हुन सक्छ। त्यस पदमा यहोवाले आफ्ना जनहरूलाई यसो भन्नुभयो: “मैले तिमीलाई अटल प्रेम देखाएर आफूतिर खिचेको छु।” (होसे ११:४ तुलना गर्नुहोस्।) यसबाट हामी के बुझ्न सक्छौँ? तपाईँले आफूमा भएका राम्रा गुणहरू सायद याद गर्नुभएको छैन होला तर यहोवाले भने सधैँ याद गर्नुहुन्छ।
१६. (क) येसु हामीलाई वास्तवमा के भन्दै हुनुहुन्छ र हामीले उहाँको कुरामा किन विश्वास गर्नुपर्छ? (ख) यहोवा सबैभन्दा असल बुबा हुनुहुन्छ भनेर हामी कसरी विश्वस्त हुन सक्छौँ? (“यहोवा सबैभन्दा असल बुबा हुनुहुन्छ” भन्ने पेटी हेर्नुहोस्।)
१६ येसुले यहोवालाई हाम्रो बुबा भन्नुभयो। त्यसैले येसुले एक अर्थमा तपाईँलाई यसो भन्दै हुनुहुन्छ: “यहोवा मेरो मात्र होइन, तिम्रो पनि बुबा हुनुहुन्छ। उहाँ तिमीलाई प्रेम गर्नुहुन्छ र तिम्रो गहिरो चासो राख्नुहुन्छ भनेर ढुक्क होऊ।” त्यसैले यहोवा तपाईँलाई प्रेम गर्नुहुन्न जस्तो लाग्यो भने एकैछिन रोकिनुहोस् र यो कुरा विचार गर्नुहोस्, ‘येसु हाम्रो बुबा यहोवालाई राम्ररी चिन्नुहुन्छ र सधैँ सत्य बोल्नुहुन्छ। त्यसैले उहाँले भन्नुभएको कुरामा मैले विश्वास गर्नुपर्छ!’—१ पत्रु. २:२२.
निरन्तर प्रयास गर्नुहोस्
१७. यहोवा हामीलाई प्रेम गर्नुहुन्छ भन्ने कुरामा विश्वस्त भइरहन हामीले किन निरन्तर प्रयास गर्नुपर्छ?
१७ यहोवा हामीलाई प्रेम गर्नुहुन्छ भन्ने कुरामा विश्वस्त भइरहन हामीले निरन्तर प्रयास गर्नुपर्छ। हाम्रो शत्रु सैतान धूर्त छ र त्यसले हामीलाई यहोवाको सेवा गर्नदेखि रोक्न जे पनि गर्छ। यहोवा हामीलाई प्रेम गर्नुहुन्छ भन्ने कुरामा शङ्का उब्जाउन त्यसले प्रयास गरिरहनेछ। तर त्यसलाई कहिल्यै सफल हुन नदेऔँ।—अय्यु. २७:५.
१८. यहोवा तपाईँलाई प्रेम गर्नुहुन्छ भन्ने कुरामा तपाईँ कसरी विश्वस्त हुन सक्नुहुन्छ?
१८ यहोवा हामीलाई प्रेम गर्नुहुन्छ भन्ने कुरामा विश्वस्त हुन हामीले के गर्नुपर्छ भनेर यस लेखमा सिक्यौँ। आफूप्रति यहोवाको जस्तै दृष्टिकोण राख्न सकूँ भनेर प्रार्थना गर्नुहोस्। यहोवाको प्रेमबारे बाइबल लेखकहरूले के बताए, विचार गर्नुहोस्। यहोवा उहाँलाई प्रेम गर्नेहरूप्रति कस्तो महसुस गर्नुहुन्छ, मनन गर्नुहोस्। नबिर्सनुहोस्, यहोवा उहाँलाई प्रेम गर्नेहरूलाई सधैँ प्रेम गर्नुहुन्छ। फिरौतीको बलिदान यहोवाले मेरै लागि दिनुभएको उपहार हो भन्ने कुरामा मनन गर्नुहोस्। येसुले भन्नुभएझैँ यहोवा तपाईँको बुबा हुनुहुन्छ भनेर विश्वास गर्नुहोस्। त्यसपछि मानौँ, तपाईँलाई कसैले यो प्रश्न सोध्यो: “यहोवा तपाईँलाई प्रेम गर्नुहुन्छ भन्ने कुरामा के तपाईँ पक्का हुनुहुन्छ?” तपाईँले निर्धक्क भई यस्तो जवाफ दिन सक्नुहुनेछ: “हो, म पक्का छु अनि यहोवालाई प्रेम गरेको देखाउन म हरेक दिन प्रयास गर्दै छु।”
गीत १५४ अटल प्रेम