हितोपदेश १६:३—“आफूले गर्ने सबै काम परमप्रभुलाई सुम्पिदेऊ”

“आफूले गर्ने जुनसुकै काम यहोवालाई सुम्पिदेऊ; तब तिम्रा योजनाहरू सफल हुनेछन्‌।”—हितोपदेश १६:३, नयाँ संसार अनुवाद।

“तैँले गर्ने जुनसुकै कुरा परमप्रभुलाई सुम्पिदे, र तेरा योजनाहरू सफल हुनेछन्‌।”—हितोपदेश १६:३, नयाँ संशोधित संस्करण।

हितोपदेश १६:३ को अर्थ

यस पदले साँचो परमेश्‍वरका उपासकहरूलाई उहाँको डोऱ्‍याइ खोजेर अनि त्यसअनुसार चलेर उहाँमाथि भरोसा राखेको देखाउन प्रोत्साहन दिएको छ। यसो गर्दा तिनीहरूका योजनाहरू सफल हुनेछन्‌।

“आफूले गर्ने जुनसुकै काम यहोवालाई सुम्पिदेऊ।” यहोवाकाa उपासकहरू निर्णय गर्नुअघि नम्र भई उहाँको डोऱ्‍याइ खोज्छन्‌। (याकुब १:५) किन? एउटा कारण भनेको हाम्रो जीवनमा घट्‌ने कतिपय घटनाहरू अक्सर हाम्रो नियन्त्रणमा हुँदैन। (उपदेशक ९:११; याकुब ४:१३-१५) साथै आफ्नो योजनाअनुसारै चल्न हामीसित बुद्धिको कमी पनि हुन सक्छ। यस्ता कारणहरूले गर्दा थुप्रैले परमेश्‍वरमा भर पर्दै आफ्ना कामहरू उहाँलाई सुम्पिदिन्छन्‌। कसरी? तिनीहरू डोऱ्‍याइको लागि यहोवालाई प्रार्थना गर्छन्‌ अनि बाइबल पढेर उहाँको इच्छा बुझ्न प्रयास गर्छन्‌। त्यसपछि उहाँको इच्छासित मेल खाने निर्णय गर्छन्‌।—हितोपदेश ३:५, ६; २ तिमोथि ३:१६, १७.

“आफूले गर्ने जुनसुकै काम यहोवालाई सुम्पिदेऊ” भन्‍ने अभिव्यक्‍तिको शाब्दिक अर्थ “यहोवामा अर्पण गरिदेऊ” भन्‍ने हुन्छ। एउटा स्रोतसामग्रीअनुसार यो अभिव्यक्‍ति पढ्‌दा हाम्रो मनमा “यस्तो व्यक्‍तिको चित्र आउँछ, जसले आफूले बोकिरहेको भारी आफूभन्दा बलियो र त्यो भारी राम्ररी बोक्न सक्ने व्यक्‍तिलाई सुम्पिदिन्छन्‌।” त्यसैले नम्र भई परमेश्‍वरमा भरोसा राख्यौँ भने उहाँले मदत गर्नुहुनेछ अनि सम्हाल्नुहुनेछ भन्‍ने कुरामा हामी ढुक्क हुन सक्छौँ।—भजन ३७:५; ५५:२२.

“आफूले गर्ने जुनसुकै काम” भन्‍ने अभिव्यक्‍तिको अर्थ परमेश्‍वरले हाम्रा सबै योजनाहरूलाई समर्थन गर्नुहुन्छ वा आशिष्‌ दिनुहुन्छ भन्‍ने त होइन। यहोवाबाट आशिष्‌ पाउन चाहन्छौँ भने हाम्रा योजनाहरू उहाँको स्तर र इच्छासित मेल खाएको हुनुपर्छ। (भजन १२७:१; १ युहन्‍ना ५:१४) परमेश्‍वरले उहाँको आज्ञा नमान्‍नेहरूलाई आशिष्‌ दिनुहुन्‍न र “दुष्टका योजनाहरूलाई उहाँ विफल पारिदिनुहुन्छ।” (भजन १४६:९) अर्कोतर्फ बाइबलमा पाइने उहाँका स्तरहरूको कदर गर्ने र त्यसअनुसार चल्नेहरूलाई उहाँ आशिष्‌ दिनुहुन्छ।—भजन ३७:२३.

“तब तिम्रा योजनाहरू सफल हुनेछन्‌।” यस अभिव्यक्‍तिलाई केही बाइबलमा “तिम्रा योजनाहरू स्थापित हुनेछन्‌” भनेर अनुवाद गरिएको छ। पुरानो करार भनेर चिनिने हिब्रू धर्मशास्त्रमा “स्थापित” भनेर अनुवाद गरिएको शब्दले जग बसाल्नु भन्‍ने अर्थ दिन्छ र यसले अक्सर परमेश्‍वरको सृष्टिमा देखिने स्थिरतालाई बुझाउँछ। (हितोपदेश ३:१९; यर्मिया १०:१२) त्यसैगरि परमेश्‍वरले उहाँको नजरमा सही काम गर्नेहरूको योजनालाई स्थिर पारिदिनुहुन्छ अर्थात्‌ सफल बनाइदिनुहुन्छ। यसले गर्दा तिनीहरू सुरक्षित, स्थिर र आनन्दित हुन सक्छन्‌।—भजन २०:४; हितोपदेश १२:३.

हितोपदेश १६:३ को प्रसङ्‌ग

यो हितोपदेश राजा सुलेमानले रचेका थिए। हितोपदेशको किताबमा पाइने धेरैजसो उपदेश तिनले नै लेखेका थिए। परमेश्‍वरले अपार बुद्धि दिनुभएकोले तिनले हजारौँ हितोपदेश रच्न सके।—१ राजा ४:२९, ३२; १०:२३, २४.

हितोपदेश अध्याय १६ को सुरुतिर सुलेमानले परमेश्‍वरको बुद्धिको प्रशंसा गरे अनि घमन्डीहरूलाई उहाँ कत्ति घृणा गर्नुहुन्छ भनेर बताए। (हितोपदेश १६:१-५) अनि त्यस अध्यायका बाँकी पदहरूमा तिनले एउटा महत्त्वपूर्ण सत्यबारे जोड दिए, जसबारे हितोपदेशको किताबमा थुप्रै चोटि चर्चा गरिएको छ। त्यो सत्य के हो? नम्र भई परमेश्‍वरको डोऱ्‍याइअनुसार चल्छौँ भने मात्र हामी साँचो अर्थमा बुद्धिमान्‌ र सफल हुन सक्नेछौँ। (हितोपदेश १६:३, ६-८, १८-२३) यो महत्त्वपूर्ण सत्यबारे बाइबलमा थुप्रै चोटि उल्लेख गरिएको छ।—भजन १:१-३; यसैया २६:३; यर्मिया १७:७, ८; १ युहन्‍ना ३:२२.

हितोपदेशको किताबको विषयवस्तुबारे बुझ्न यो छोटो भिडियो हेर्नुहोस्‌।