अध्ययन लेख २६
तनावपूर्ण अवस्थाको सामना गर्न अरूलाई मदत गर्नुहोस्
“तिमीहरू सबै एकै मनका होओ, एकअर्काको पीडा महसुस गर, भ्रातृस्नेह प्रकट गर, कोमलताले भरिएको करुणा देखाओ अनि नम्र होओ।”—१ पत्रु. ३:८.
गीत १०७ ईश्वरीय प्रेमको नमुना
परिचयa
१. हामी कसरी हाम्रा मायालु बुबा यहोवाको अनुकरण गर्न सक्छौँ?
यहोवा हामीलाई अत्यन्तै प्रेम गर्नुहुन्छ। (युह. ३:१६) हामी हाम्रा मायालु बुबाको अनुकरण गर्न चाहन्छौँ। त्यसैले हामी सबैको तर विशेषगरि “एउटै विश्वास हुने हाम्रा भाइबहिनी”-को ‘पीडा महसुस गर्न, भ्रातृस्नेह प्रकट गर्न र कोमलताले भरिएको करुणा देखाउन’ प्रयास गर्छौँ। (गला. ६:१०; १ पत्रु. ३:८) त्यसैले हाम्रो आध्यात्मिक परिवारका सदस्यहरूले तनावपूर्ण अवस्थाको सामना गर्नुपर्दा हामी तिनीहरूलाई मदत गर्न चाहन्छौँ।
२. यस लेखमा हामी के छलफल गर्नेछौँ?
२ यहोवाको परिवारको भाग बन्न चाहने जो-कोहीले पनि तनावपूर्ण अवस्थाहरूको सामना गर्नुपर्ने हुन्छ। (मर्कु. १०:२९, ३०) यस संसारको अन्त नजिकिँदै जाँदा हामीले झन् धेरै परीक्षाहरूको सामना गर्नुपर्ने हुन सक्छ। त्यस्तो बेला हामी कसरी एकअर्कालाई मदत गर्न सक्छौँ? आउनुहोस्, लुत, अय्युब र नाओमीको विवरणबाट के सिक्न सक्छौँ, विचार गरौँ। साथै अहिले हाम्रा भाइबहिनीले सामना गरिरहेका केही चुनौतीहरू के-के हुन् र समस्याहरूसित डट्न हामी तिनीहरूलाई कसरी मदत गर्न सक्छौँ भनेर पनि छलफल गरौँ।
धीरजी हुनुहोस्
३. दोस्रो पत्रुस २:७, ८ ले देखाएअनुसार लुतले कस्तो गलत निर्णय गरे? त्यसले गर्दा नतिजा कस्तो भयो?
३ सदोमका मानिसहरू नैतिक तवरमा अत्यन्तै भ्रष्ट जीवन बिताउँथे। त्यस्ता मानिसहरूमाझ बस्ने छनौट गरेर लुतले बुद्धिमानी निर्णय गरेनन्। (२ पत्रुस २:७, ८ पढ्नुहोस्) हुनत त्यो ठाउँ अत्यन्तै सुन्दर थियो तर त्यहाँ सरेकोमा तिनले ठूलो मूल्य चुकाउनुपऱ्यो। (उत्प. १३:८-१३; १४:१२) तिनकी पत्नीलाई त्यो सहर वा त्यहाँ बस्ने केही मानिसहरू असाध्यै मन परेको हुन सक्छ, जसले गर्दा तिनी यहोवाको आज्ञा उल्लङ्घन गर्न समेत तयार भइन्। यहोवाले त्यस इलाकामा आगो र गन्धक बर्साउनुहुँदा तिनले आफ्नो ज्यान गुमाइन्। लुतका दुई छोरीलाई पनि विचार गर्नुहोस्। तिनीहरूले मगनी गरेका केटाहरू पनि सदोमको विनाश हुँदा मरे। लुतले आफ्नो घर, आफ्नो सबै सम्पत्ति र सबैभन्दा पीडादायी कुरा, आफ्नी पत्नी गुमाए। (उत्प. १९:१२-१४, १७, २६) लुतले यस्तो तनावपूर्ण अवस्थाको सामना गर्नुपर्दा के यहोवा तिनीप्रति धीरजी भइरहनुभयो? पक्कै हुनुभयो।
यहोवाले लुत र तिनको परिवारलाई बचाउन दयालु हुँदै स्वर्गदूतहरू पठाउनुभयो (अनुच्छेद ४ हेर्नुहोस्)
४. यहोवा कसरी लुतप्रति धीरजी हुनुभयो? (आवरण पृष्ठको चित्र हेर्नुहोस्)
४ सदोममा बस्ने छनौट लुत आफैले गरेको भए तापनि यहोवाले दयालु हुँदै तिनलाई र तिनको परिवारलाई जोगाउन स्वर्गदूतहरू पठाउनुभयो। तर सदोम छोड्न स्वर्गदूतहरूले दिएको जरुरी आदेश पालन गरिहाल्नुको साटो लुतले “आलेटाले गरिरहे।” त्यसैले स्वर्गदूतहरूले तिनको हातै समातेर तिनलाई र तिनको परिवारलाई त्यहाँबाट भाग्न मदत गर्नुपऱ्यो। (उत्प. १९:१५, १६) त्यसपछि ती स्वर्गदूतहरूले तिनलाई पहाडी इलाकातिर भाग्नू भने। तर यहोवाको आज्ञा पालन गर्नुको साटो लुतले नजिकैको सहरमा जान्छु भने। (उत्प. १९:१७-२०) यहोवाले धीरजी हुँदै तिनको कुरा सुन्नुभयो र तिनलाई त्यस सहरमा जाने अनुमति दिनुभयो। पछि लुत त्यस सहरमा बस्न डराए र त्यही पहाडी इलाकामा गएर बसे, जहाँ यहोवाले तिनलाई सुरुमै जाने आज्ञा दिनुभएको थियो। (उत्प. १९:३०) यहोवा कत्ति धीरजी हुनुभयो! हामी कसरी उहाँको अनुकरण गर्न सक्छौँ?
५-६. हामी कसरी परमेश्वरको अनुकरण गर्दै १ थिस्सलोनिकी ५:१४ मा दिइएको सल्लाह लागू गर्न सक्छौँ?
५ हाम्रो आध्यात्मिक परिवारको कुनै सदस्य पनि बुद्धिमानी निर्णय गर्न चुकेकोले लुतजस्तै गम्भीर समस्यामा पर्न सक्छन्। यदि त्यसो भयो भने हामी कस्तो प्रतिक्रिया देखाउनेछौँ? ‘तिमीले जे छऱ्यौ, त्यसैको कटनी गऱ्यौ’ भनूँ जस्तो हामीलाई लाग्छ होला, जुन कुरा साँचो पनि हो। (गला. ६:७) तर त्यसको सट्टा हामी कस्तो प्रतिक्रिया देखाउन सक्छौँ? यहोवाले लुतलाई मदत गर्नुभएको तरिका हामी अनुकरण गर्न सक्छौँ। कसरी?
६ यहोवाले स्वर्गदूतहरू पठाउनुको उद्देश्य लुतलाई चेतावनी दिनु मात्र थिएन बरु सदोमको विनाशबाट बच्न तिनलाई मदत गर्नु पनि थियो। त्यसैगरि हाम्रो कुनै भाइ वा बहिनी बुद्धिमानी निर्णय नगरेकोले समस्यामा पर्न लागेका छन् भनेर थाह पायौँ भने हामीले तिनलाई चेतावनी दिनुपर्ने हुन सक्छ। तर सायद हामी तिनलाई मदत पनि गर्न सक्छौँ। तिनले आफूले पाएको बाइबलआधारित सल्लाह लागू गर्न ढिलासुस्ती गरे भने पनि हामी तिनीप्रति धीरजी हुनुपर्छ। ती दुई स्वर्गदूतको अनुकरण गर्नुहोस्। हार मानेर तिनलाई त्यतिकै छोड्नुको साटो तिनलाई मदत गर्न सकिने व्यावहारिक तरिका खोज्नुहोस्। (१ युह. ३:१८) एक अर्थमा भन्नुपर्दा हामी तिनको हातै समात्न अनि तिनलाई आफूले पाएको बुद्धिमानी सल्लाह लागू गर्न मदत दिन तयार हुनुपर्छ।—१ थिस्सलोनिकी ५:१४ पढ्नुहोस्।
७. यहोवाले लुतप्रति राख्नुभएको दृष्टिकोण हामी कसरी अनुकरण गर्न सक्छौँ?
७ यहोवाले लुतका गल्तीहरूमा ध्यान दिन सक्नुहुन्थ्यो तर उहाँले त्यसो गर्नुभएन। बरु उहाँले पछि प्रेषित पत्रुसलाई लुत धर्मी मानिस थिए भनेर लेख्न प्रेरित गर्नुभयो। यहोवा हाम्रा गल्तीहरूको क्षमा दिनुहुन्छ भन्ने कुरा थाह पाउँदा हामीलाई कत्ति खुसी लाग्छ नि, होइन र? (भज. १३०:३) यहोवाले लुतप्रति राख्नुभएको दृष्टिकोण के हामी अनुकरण गर्न सक्छौँ? यदि हामीले भाइबहिनीहरूको राम्रा गुणहरूमा ध्यान दियौँ भने हामी तिनीहरूप्रति अझै धीरजी हुन सक्नेछौँ। अनि तिनीहरूलाई पनि हाम्रो मदत स्विकार्न अझै सजिलो लाग्नेछ।
दयालु हुनुहोस्
८. दयाले हामीलाई के गर्न उत्प्रेरित गर्छ?
८ अय्युबले लुतको सन्दर्भमा जस्तै बुद्धिमानी निर्णय गर्न चुकेकोले दुःख भोगेका थिएनन्। तैपनि तिनले ठूलठूला विपत्तिहरू भोग्नुपऱ्यो; तिनले आफ्नो सरसम्पत्ति, समाजमा आफूले कमाएको प्रतिष्ठा अनि आफ्नो सुस्वास्थ्य पनि गुमाए। सबैभन्दा दुःखको कुरा त तिनी र तिनकी पत्नीले आफ्ना सबै छोराछोरीको मृत्युको वियोग सहनुपऱ्यो। त्यसमाथि अय्युबका तीन जना झूटा साथीले तिनलाई गलत आरोप लगाए। ती झूटा सान्त्वनादाताहरूले अय्युबलाई दया नदेखाउनुको एउटा कारण के थियो? तिनीहरूले अय्युबको अवस्थालाई सतही रूपले मात्रै हेरे। त्यसले गर्दा तिनीहरू अय्युबबारे गलत निष्कर्षमा पुगे र कठोर हुँदै तिनलाई दोषी ठहराए। त्यस्तो गल्ती गर्नदेखि हामी कसरी जोगिन सक्छौँ? कुनै व्यक्तिको अवस्थाबारे सबै सत्यतथ्य यहोवालाई मात्र थाह हुन्छ भन्ने कुरा मानिलिनुहोस्। दुःख भोगिरहेको व्यक्तिको कुरा ध्यान दिएर सुन्नुहोस्। तिनको शब्द मात्र सुन्ने नभईकन तिनको पीडा पनि बुझ्ने कोसिस गर्नुहोस्। त्यसो गर्नुभयो भने मात्र तपाईँले आफ्नो भाइ वा बहिनीको पीडा साँच्चै महसुस गर्न सक्नुहुनेछ।
९. हामी दयालु छौँ भने के गर्नेछैनौँ र किन?
९ हामी दयालु छौँ भने अरूले सामना गरिरहेका समस्याहरूबारे हानिकारक गफ फैलाउनेछैनौँ। कुरा ओसार्ने व्यक्तिले मण्डलीलाई सुदृढ पार्न मदत गर्दैन बरु मण्डलीको शान्तिलाई भताभुङ्ग पार्छ। (हितो. २०:१९; रोमी १४:१९) त्यस्तो व्यक्ति दयालु हुँदैन बरु उसले सोचविचारै नगरी बोलिरहेको हुन्छ अनि दुःख भोगिरहेको व्यक्तिलाई उसको बोलीले झनै चोट पुऱ्याउन सक्छ। (हितो. १२:१८; एफि. ४:३१, ३२) त्यसैले अरूको राम्रा गुणहरूमा ध्यान दिनु र अरूलाई गाह्रो अवस्थाको सामना गर्न कसरी मदत गर्न सक्छौँ भनेर विचार गर्नु कत्ति बेस!
सङ्गी विश्वासीले आफ्नो ‘बोली सम्हाल्न सकेनन्’ भने धीरजी हुँदै तिनको कुरा सुन्नुहोस् अनि सही समयमा सान्त्वनादायी कुरा गर्नुहोस् (अनुच्छेद १०-११ हेर्नुहोस्)c
१०. अय्युब ६:२, ३ मा अय्युबले भनेको कुराबाट हामी के सिक्न सक्छौँ?
१० अय्युब ६:२, ३ पढ्नुहोस्। कुनै-कुनै बेला अय्युबले ‘आफ्नो बोलीलाई सम्हाल्न सकेनन्।’ तर पछि तिनले आफूले बोलेका केही कुराहरू गलत थिए भनेर स्विकारे। (अय्यु. ४२:६) आज पनि तनावपूर्ण अवस्थाको सामना गरिरहेको व्यक्ति अय्युबजस्तै आफ्नो बोली सम्हाल्नदेखि चुक्न सक्छन् र आफूले बोलेको कुरा सम्झेर पछि पछुतो मान्न सक्छन्। कसैले त्यसरी सोचविचारै नगरी बोल्दा हामीले कस्तो प्रतिक्रिया देखाउनुपर्छ? तिनको आलोचना गर्नुको साटो हामी दयालु हुनुपर्छ। आज हामीले जे-जस्ता समस्याहरू र तनावपूर्ण अवस्थाहरूको सामना गर्नुपरिरहेको छ, ती सामना गर्नुपरोस् भनेर यहोवाले हामीलाई बनाउनुभएको थिएन भन्ने कुरा नबिर्सनुहोस्। त्यसैले यहोवाको कुनै वफादार सेवकले तनावपूर्ण अवस्थामा सोचविचार नगरी बोल्दा हामी छक्क पर्दैनौँ। यदि तिनले यहोवाबारे वा हामीबारे कुनै गलत कुरा बोलिहाले भने पनि तिनीसित रिसाइहाल्ने गर्नुहुँदैन वा तिनलाई दोषी ठहराउनतिर लाग्नुहुँदैन।—हितो. १९:११.
११. सल्लाह दिँदा एल्डरहरूले कसरी एलिहुको अनुकरण गर्न सक्छन्?
११ कहिलेकाहीँ भने तनावपूर्ण अवस्थाको सामना गरिरहेको व्यक्तिलाई कुनै सल्लाह वा मदतकारी सुझाव दिनुपर्ने हुन सक्छ। (गला. ६:१) एल्डरहरूले कसरी त्यसो गर्न सक्छन्? तिनीहरूले एलिहुको अनुकरण गर्नुपर्छ, जसले अय्युबको पीडा महसुस गर्दै तिनको कुरा ध्यान दिएर सुने। (अय्यु. ३३:६, ७) एलिहुले अय्युबको सोचाइ बुझिसकेपछि मात्रै तिनलाई सल्लाह दिए। एलिहुको अनुकरण गर्ने एल्डरहरू पनि समस्या भोगिरहेको व्यक्तिको कुरा ध्यान दिएर सुन्छन् र तिनको अवस्था बुझ्ने कोसिस गर्छन्। त्यसपछि सल्लाह दिँदा सल्लाह सुन्ने व्यक्तिको मन छुने सम्भावना धेरै हुन्छ।
सान्त्वनादायी कुरा गर्नुहोस्
१२. आफ्नो पति र दुई छोराको मृत्युले नाओमीलाई कस्तो असर गऱ्यो?
१२ नाओमी यहोवालाई प्रेम गर्ने वफादार स्त्री थिइन्। तर आफ्नो पति र दुई छोराको मृत्यु भएपछि भने तिनले आफ्नो नाम परिवर्तन गरेर “मारा” राख्न चाहिन्, जसको अर्थ हो, “तीतो।” (रुथ १:३, ५, २०, फुटनोट, २१) नाओमीकी बुहारी रुथले गाह्रोसाह्रो अवस्थामा तिनलाई साथ दिइरहिन्। रुथले नाओमीलाई व्यावहारिक मदत मात्र दिइनन्, तिनीसित सान्त्वनादायी कुरा पनि गरिन्। रुथले नाओमीप्रतिको आफ्नो प्रेम र तिनलाई साथ दिन चाहेको कुरा सरल शब्दमा अनि मनैदेखि व्यक्त गरिन्।—रुथ १:१६, १७.
१३. जीवनसाथीको मृत्यु भएकाहरूलाई किन हाम्रो मदतको खाँचो पर्छ?
१३ हाम्रो आध्यात्मिक परिवारको कुनै सदस्यले आफ्नो जीवनसाथी गुमाए भने मृत्युको चोट सहन तिनलाई हाम्रो मदतको खाँचो पर्छ। पति-पत्नीलाई सँगसँगै बढेका दुइटा रूखसित तुलना गर्न सकिन्छ। वर्षहरू बित्दै जाँदा ती दुइटा रूखका जराहरू एकअर्कासित जेलिन्छन्। अनि जब एउटा रूखलाई उखेलिन्छ र त्यो मर्छ, त्यसले अर्को रूखलाई पनि निकै ठूलो असर पुऱ्याउँछ। त्यसैगरि, कसैले आफ्नो जीवनसाथी गुमाउनुपर्दा तिनलाई भावनात्मक चोट सहन लामो समयसम्म गाह्रो हुन सक्छ। पोलाकोb पतिको अचानक मृत्यु भयो। तिनी यसो भन्छिन्: “मेरो पूरै जीवन उलटपुलट भयो अनि मैले एकदमै असहाय महसुस गरेँ। उहाँ मेरो सबैभन्दा मिल्ने साथी हुनुहुन्थ्यो। म उहाँलाई आफ्नो सबै कुरा बताउँथेँ। उहाँ मसँगसँगै रमाउनुहुन्थ्यो अनि गाह्रो अवस्थामा मलाई साथ दिनुहुन्थ्यो। म उहाँमा आफ्नो सबै दुःख बिसाउन सक्थेँ। उहाँको मृत्यु हुँदा मलाई आफ्नो आधा ज्यानै काटिएजस्तो लाग्यो।”
जीवनसाथी गुमाएकाहरूलाई हामी कसरी साथ दिन सक्छौँ? (अनुच्छेद १४-१५ हेर्नुहोस्)d
१४-१५. जीवनसाथीको मृत्यु भएको व्यक्तिलाई हामी कसरी सान्त्वना दिन सक्छौँ?
१४ जीवनसाथीको मृत्यु भएको व्यक्तिलाई हामी कसरी सान्त्वना दिन सक्छौँ? हामीले चाल्नुपर्ने पहिलो अनि महत्त्वपूर्ण कदम भनेको तिनीसित कुरा गर्नु हो। हुनत त्यस्तो बेला हामीलाई कुरा गर्न अप्ठेरो लाग्न सक्छ वा के भन्ने भनेर थाह नहुन सक्छ। अगाडि उल्लेख गरिएकी पोला भन्छिन्: “कसैको मृत्यु हुँदा त्यसले मानिसहरूलाई असहज महसुस गराउँछ भनेर मलाई थाह छ। आफूले बोलेको कुराको गलत अर्थ लाग्ने हो कि भनेर तिनीहरूलाई चिन्ता लाग्न सक्छ। तर एक शब्द पनि नबोली चुपचाप बस्नुभन्दा त दुई-चार शब्द बोल्नु नै बेस हो।” शोक गरिरहेको व्यक्तिले हामीले गहकिलै कुरा भन्छौँ होला भनेर पक्कै पनि आशा गरेका हुँदैनन्। पोला भन्छिन्: “साथीहरूले ‘उहाँको विषयमा सुनेर धेरै दुःख लाग्यो’ भन्दा मात्रै पनि मैले सान्त्वना पाएँ।”
१५ विलियमकी पत्नीको केही वर्षअघि मृत्यु भयो। तिनी भन्छन्: “अरूले मेरी पत्नीसित बिताएको समयबारे कुरा गर्दा मलाई राम्रो लाग्छ। उनलाई सबैले माया गर्थे अनि आदर गर्थे भनेर म ढुक्क हुन्छु। यसरी अरूको साथ पाउँदा मलाई निकै मदत पुगेको छ। यसले मलाई ठूलो सान्त्वना दिन्छ किनकि मेरी पत्नी मेरो लागि साँच्चै अमूल्य थिइन् र मेरो जीवनको अभिन्न भाग थिइन्।” बियाङ्का नाम गरेकी विधवा यसो भन्छिन्: “अरूले मसँगै बसेर प्रार्थना गर्दा अनि एक-दुई वटा शास्त्रपद पढेर सुनाउँदा मात्र पनि म सान्त्वना पाउँछु। अरूले मेरो पतिबारे कुरा गर्दा अनि मैले उहाँबारे कुरा गरेको सुनिदिँदा मलाई राहत मिल्छ।”
१६. (क) मृत्युको कारण आफ्नो प्रियजन गुमाएकाहरूको लागि हामीले के गरिरहनुपर्छ? (ख) याकुब १:२७ अनुसार हामीले कस्तो जिम्मेवारी पाएका छौँ?
१६ जसरी रुथले विधवा नाओमीलाई साथ दिइरहिन्, त्यसैगरि हामीले पनि मृत्युको कारण आफ्नो प्रियजन गुमाएकाहरूलाई निरन्तर साथ दिइरहनुपर्छ। अगाडि उल्लेख गरिएकी पोला भन्छिन्: “मेरो पतिको मृत्यु भएलगत्तै मैले धेरै जनाको साथ पाएँ। तर समय बित्दै जाँदा सबै जना आ-आफ्नो दिनचर्यामा व्यस्त हुन थालेजस्तो देखिन्थ्यो। मेरो जीवन भने पूरै परिवर्तन भएको थियो। शोक परेको व्यक्तिलाई महिनौँ वा वर्षौँसम्म पनि साथ चाहिरहन्छ भनेर अरूले बुझिदिँदा निकै ठूलो मदत मिल्छ।” हुनत सबैको व्यक्तित्व एकै किसिमको हुँदैन। कोही-कोही आफ्नो बदलिँदो परिस्थितिसित चाँडै नै घुलमिल भएजस्तो देखिएलान्। तर अरू कसै-कसैलाई भने पहिला आफ्नो जीवनसाथीसित मिलेर गरेको जुनसुकै काम गर्नुपर्दा पनि जीवनसाथीको यादले पिरोल्न सक्छ। शोक गर्ने तरिका व्यक्तिअनुसार फरक-फरक हुन्छ। तर यो कुरा नबिर्सनुहोस्, यहोवाले हामीलाई मृत्युको कारण आफ्नो जीवनसाथी गुमाएकाहरूको ख्याल राख्ने सुअवसर र जिम्मेवारी दिनुभएको छ।—याकुब १:२७ पढ्नुहोस्।
१७. जीवनसाथीबाट धोका पाएकाहरूलाई किन हाम्रो साथ चाहिन्छ?
१७ कोही-कोही भने आफ्नो जीवनसाथीले धोका दिएको कारणले अत्यन्तै विचलित भएका हुन सक्छन् र तिनीहरूले निकै तनावको सामना गर्नुपर्ने हुन्छ। जोइसका पतिले उनलाई धोका दिएर अर्कै आइमाईसित लागे। जोइस भन्छिन्: “मेरो पतिको मृत्यु भएको भए मलाई जत्ति पीडा हुन्थ्यो, उहाँसित सम्बन्धविच्छेद हुँदाको पीडा पनि त्योभन्दा केही कम थिएन। यदि कुनै दुर्घटना वा रोगले गर्दा उहाँको मृत्यु भएको भए त्यो उहाँले गर्दा भएको हुने थिएन। तर मलाई छोडेर जाने कुरा भने मेरो पतिको आफ्नै छनौट थियो। यसले गर्दा मैले एकदमै अपमानित भएको र आफ्नो कुनै मोल नभएको जस्तो महसुस गरेँ।”
१८. जीवनसाथी गुमाएकाहरूलाई मदत गर्न हामी के गर्न सक्छौँ?
१८ जीवनसाथी गुमाएकाहरूको लागि हामीले दयालु हुँदै सानोतिनो काम मात्र गरिदिँदा पनि हामी तिनीहरूलाई माया गर्छौँ भन्ने कुरामा तिनीहरू ढुक्क हुन सक्छन्। तिनीहरूलाई असल साथीहरूको पहिलेभन्दा धेरै खाँचो परिरहेको हुन्छ। (हितो. १७:१७) तपाईँ कसरी तिनीहरूको साँचो साथी बन्न सक्नुहुन्छ? तपाईँ तिनीहरूलाई खाना खानको लागि बोलाउन सक्नुहुन्छ। अनि कुनै रमाइलो गतिविधि वा प्रचारकार्यमा भाग लिएर तिनीहरूसित समय बिताउने योजना बनाउन सक्नुहुन्छ। हामीले गर्न सक्ने अर्को कुरा भनेको कहिलेकाहीँ तिनीहरूलाई हाम्रो पारिवारिक उपासनामा निम्तो दिन सक्छौँ। यदि त्यसो गर्नुभयो भने तपाईँले यहोवालाई खुसी तुल्याइरहनुभएको हुनेछ किनकि उहाँ “टुटेका हृदय भएकाहरूको नजिक हुनुहुन्छ” र उहाँ “विधवाहरूका रक्षक हुनुहुन्छ।”—भज. ३४:१८; ६८:५.
१९. पहिलो पत्रुस ३:८ लाई मनमा राख्दै तपाईँ कस्तो सङ्कल्प गर्नुहुन्छ?
१९ चाँडै परमेश्वरको राज्यले पृथ्वीमाथि शासन गर्नेछ र सबै “दुःखहरू बिर्सिइनेछन्।” हामी बाइबलको यो प्रतिज्ञा पूरा भएको हेर्न उत्सुक छौँ: “पहिलेका कुराहरू फेरि सम्झनामा आउनेछैनन्; ती कुराहरू तिमीहरूले फेरि कहिल्यै आफ्नो मनमा खेलाउनेछैनौ।” (यसै. ६५:१६, १७) त्यो समय नआउन्जेल एकअर्कालाई साथ दिइरहौँ अनि आफ्नो आध्यात्मिक परिवारका सबैलाई प्रेम गर्छौँ भनेर आफ्नो बोली र काम दुवैबाट देखाइरहौँ।—१ पत्रुस ३:८ पढ्नुहोस्।
गीत १११ हामी आनन्दित हुनुको कारण
a लुत, अय्युब र नाओमीले वफादार भई यहोवाको सेवा गरे तर तिनीहरू सबैले आफ्नो जीवनमा तनावपूर्ण अवस्थाहरूको सामना गर्नुपऱ्यो। यस लेखमा हामी तिनीहरूको अनुभवबाट के सिक्न सक्छौँ भनेर विचार गर्नेछौँ। साथै समस्याहरूको सामना गरिरहेका हाम्रा भाइबहिनीहरूप्रति धीरजी हुनु, तिनीहरूसित दयालु व्यवहार गर्नु र सान्त्वनादायी कुरा गर्नु किन महत्त्वपूर्ण छ भनेर पनि हामी छलफल गर्नेछौँ।
b यस लेखमा नामहरू परिवर्तन गरिएका छन्।
c चित्रको व्याख्या: एक जना भाइ तनावपूर्ण अवस्थाले गर्दा आफ्नो ‘बोलीलाई सम्हाल्न सक्दैनन्’ तर एक जना एल्डर धीरजी हुँदै तिनको कुरा सुन्छन्। पछि ती भाइको रिस शान्त भएपछि एल्डरले तिनलाई दयालु ढङ्गमा सल्लाह दिन्छन्।
d चित्रको व्याख्या: एक जवान दम्पतीले पत्नीको मृत्यु भएको एक जना भाइसित समय बिताउँछन्। तिनीहरू उनकी पत्नीसित बिताएका रमाइला पलहरूबारे कुरा गर्छन्।